Read Isu Kə̀fàʼ 27 Bible Online

Kə̀fàʼ 27 - Isu bible

Kə̀fàʼ 27

¹Abù soŋə fiy kpe tsə â ghə̀d ani nìy kə kəmfə̀n, ghè zû a Italì, ghu nìy kə ghəd kwe tsə anə wo kə dòŋ kə təsǔgôʼ, izəd i we yiy kə də nəniy nə̀ à də̌ Dzulìyùs. U kə də̀ tsə̀ anə dzəŋə kə sǔgôʼ tə Lûm ghu kə twoŋə nəniy izəd i dzəŋə kə ghè kə̀ nə̀ à də̌ “sǔgôʼ tə mwe ə mbwòʼ.”

²Ghě zù nìy kə kəmfə̀n anə inaʼ i Àdàmitìyùm, ghu kə dziy zù a loʼo kə ùmfə̀n wìy tyimə dyoʼò tsə̂ ate a mbwòʼ ə̀ Esìyà. Ghè kə nìy dzəŋi kə kəmfə̀n nə̀ Àlistakùs, wè ìnaʼ i Mèsèdonìyà ù kə ŋwò bə a Tèsàlonikà.

³Tswutswu wə̀, ghě zù kwùm tsə a Sidòn. Dòŋ kə tə sǔgôʼ kə̀, Dzulìyùs, kə ŋge kwu fòŋə̀ ìdzòŋə yìy azoŋə̀ Pôl. U nyə̀ Pôl nə̀ bwòʼ kìy nə̀ Pôl bwìy zù twoŋə zuw yə̀ àfələ we, ghu nə̀ də ani nyiə̀ we nə̀ fyiə kiy.

⁴Abù ghè ŋwô tsə nəniy Sidòn, ŋkwùŋì kìy ŋge təŋə ghəd nə̀ daʼa kiy. Ghě tsìy yə̀ akə̀lə̀ Sayplùs, inaʼ yə dzwì kə dzɛ̀mə̀ na nəniy aŋwòə ŋkwùŋì kìy kə ŋge tsìy dzə̀ wày anə bə̀d kə ghè kə̀ nə̀ daʼa kiy.

⁵Abù ghè dâŋ fyi kə nəniy a mbwòʼ ə̀ Sìlisìyà nə̀ a mbwòʼ ə̀ Pàmfilìyà, ghě bù dòʼò tsə anə inaʼ i Milà a mbòʼò Lisìyà.

⁶Dòŋ kə tə sǔgôʼ kə̌ kòʼ tsə kəmfə̀n awote kə ŋwò bə̂ a Àlèzandà kə zê nəniy a Italì, u nìy kwe nyi kə ghəd ate.

⁷Ghě nyəŋə kə an-a-bwi, ntsukə ndəŋ tsìy kwoʼ yə̀ sòʼò ghə̀d anə dzwî. Â ghə̀d ani zù kwùm yə̀ Sìnidùs, a də̌ nə̀ ghè mə ŋge fii tsə ghii. Ŋkwùŋì kìy twe nə̀ ghè kə kâm zù dzə̀ nə̀ səə kiy a bə̀d kə ghè kə̀. Ghě zù tsìy yə̀ a bə̀d kə Klǐt kə itəŋ kə ŋkwùŋì kì kə də tsìy dzə̀ wày awote nə daʼa kiy, dzwì kə dzɛ̀mə̀ na nəniy ani tsîy akə̀lə̀ Salmòn.

⁸Ghě bwìy bə̀ kə anə dzwî an-a-bwi bù fyi kə anə lòʼo kə̀ dzoŋə̀ kə̀ ùmfə̀n wìy kə bê tyiə dyoʼò nəniy ate. Ghu kə tyoŋə̂ loʼo kə ghè kə̀ nə̀ à də̀ “Loʼo kə̀ tyimə nia k-a-mfə̀n kə̀dzoŋə̀ kìy.” Loʼo kə ghè kə̀ kə kwùlì də̌ a kə̀lə̀ Lasìyà.

⁹Ghě ndəŋ fə̀d tsə ikwe awote, aŋwòə à kə də̌ a soŋə fə̀ bɛbə fiy, a də̀ sòʼo nə̀ ntsuk fə̀ nê fə̀ nîyzə̀ fə ibɛb fiy mə tsìy. Yəə i kə də nəniy ghii, Pôl nyiə̀ yə̀ ìtswù yə̀ â ŋgəd tə ghě kəmfə̀n yìy.

¹⁰“Awizə̂, Mə koʼò nə̀ utswə̂d wìy də isə. Abu ŋgà zê kə ŋwò, mfə̀n kə ŋgàŋ kìy də ani fwuli, ufyiə wə u də an-a-mfə̀n, u ki kwuŋ nây, aghê də ani pfə sòʼò.”

¹¹Dòŋ kə tə sǔgôʼ kə̀ ə zwulə yə̀ kə àyiə yə mwe ə̀ kə̀mfə̀n we nə̀ wù wə̀ ù kə baŋə̀ nəniy mfə̀n kìy kə dzîy, ndòʼò nia bə̀ dzə̀ wày isə yiy anə yiə yə Pôl kə dzîy nəniy.

¹²Loʼo kə̀ dzoŋə̀ kə̀ ùmfə̀n wìy kə bê tyimə dyoʼò nəniy ate, kə kə dzwàbə̀ dzə̀ wày yəə wù nə doʼò awote anə mbùw ùfəb. Ndə̀mə̀ ghě liə nə̀ ghě mə ŋwò nyi yə̂ anə dzwî, ghè zû a Fòyenìks ani zù dòʼò awote anə soŋə fə mbùw ùfəb. Fòyenìks də loʼo kə ùmfə̀n wìy bê fyiə nəniy ate a mbwòʼ ə̀ Klǐt, lia yə̀ nə̀ ùkwe ùnyiə wiy anə bə̀d kə̀ inyi yiy nimə nəniy ate idoŋ nə̀ itəŋ.

¹³Abù liy f-a-ŋkwùŋì fiy toʼò kaʼ tsə ani kwoʼ bə̀ a bə̀d kə itəŋ kiy, aghû yə̀ ə tòʼò mòʼò kə nə̀ à də̀ soŋə̀ fə̀ dzoŋə̀ fìy ani zəŋi ayiə yə ghu kə byay na ani zəŋi. Ghu sòŋ ŋwò kə fyiə kə ghu tyìŋə̀ nia mfə̀n kìy ate, ghu bàŋ zù kə̀mfə̀n a bə̀d kə itəŋ kiy a mbwòʼ ə̀ Klǐt.

¹⁴Ghab kiy kə̀ fyi, zoŋ ə kaʼ tsə ani twùŋə ghə̀d, nə̀ ì ŋwò bə̀ anə nàʼà fə̀ dzwì dzɛmə̀ na tsìy nəniy.

¹⁵Zòŋə̀ ì ghè yə̀ kə tyiŋi bə̀ kə̀mfə̀n, aghě kàm wày ani bàŋ zù nə̀ mfə̀n kìy isə. Ghě nyəli màʼà yə̀ mfə̀n kə̀, zoŋə təŋ ŋwò yə̀.

¹⁶Abù ghè tsîy zù nəniy a bə̀d kə itəŋ kiy anə inaʼ yə ghu twoŋə nə̀ à də̀ Kodà, dzwì dzɛ̀mì na nəniy, a bə̀d kə̀ ŋkwùŋì kə̀ taw kiy kə də tsìy wày awote. Ghě də̀m tsə ghii ani zəŋi tsə tə̀ mfə̀n kìy təmi doʼò dzwàb tsə.

¹⁷Yəə i kə də nəniy ghii, aghee kəmfə̀n sè fyi yə̀ nə̀ mfə̀n kə̀ anə iŋgwùŋə, nìy tyiŋi kwe kə anə mfə̀n kə̀ nê kìy, kwù tsə nə̀ ùbaʼ wiy. Ghu kə tsəŋə nə̀ khu iyiə ìbɛbə yiy nə̀ fyiə nə̀ mfə̀n kə̀ aŋwòə loʼo tə̀ liy tiy kə də̀ ŋwô a ŋgwùŋə̀ Libìyà yə̀ tə kə də myilə way. Ghu zè ŋwò tswi tsə ndzwu tə tə̀ fîy nəniy nə̀ mfə̀n kìy ki zee, ŋkwùŋì kìy tyiŋə yə̀.

¹⁸Abù tswutswu, zoŋ yə tsə̀ŋə̀ tsìy kə ŋwò, ghu nìy màʼà fyi kə ufyiə ùliy an-a-mfə̀n.

¹⁹Ani zəŋi yə̀ ntsukə inti, ghu nìy màʼà ŋwò fyi kə ufyiə u kəmfə̀n ùliy wiy.

²⁰Ndə̀mə̀ ntsukə tsìy nə̀ ghè koʼò fyiə yə̀ dzə̀ wày inyi yiy moo mə̀nsǐbə̂d. Zoŋ yə namə tsìy kə ŋwò nə̀ daʼa kiy. Ghè mòʼò kə nə̀ ghè nyiə̀ də̀ ufyiə ù pfə wiy.

²¹Abù tsukə miy ndəŋ tsîy tsə nə̀ wù liy nyiə way fyiə kə̀liy kiy, Pôl ə təmi kə a sə̀ aghù yə̀, dzày yə̀ a ghu nə, “Awizə̂, ghà kə kwu ani zuw ayiə yə mə kə dzây. Bəə ŋgà kə fə dyòʼò sə tsə a mbwòʼ ə̀ Klǐt, ufyiə u ŋgàŋ wìy mə̀ dzǐy bɛb way anə ndzòʼò àyiə yə ghii u nây soʼò.

²²Mə kwuni bwoʼo gha nə̀ wo kiy nyiə nə̀ ghà kəli tsə kə fôŋ tə̀ taw tiy, Wù ùmòʼ kìy pfə dzə̀ wày anə uzə ghii, a kì nìì yə̀ kə mfə̀n kə̀.

²³Mə də wè Kə̀zə̀, nə̀ ntsukə tiy, tsə̀ndii ə Kə̀zə̀ kə̀ bù akə̀lə̀ mìə̀.

²⁴Dzày bə̀ â mìə̀ nə̀, ‘A Pôl, kə̀ tsəŋ dzə̀. Kaʼisà kì saʼa wò Zə̀kìy kî fìy fyiə dàŋə̀ tsə̀ àghè dzə̀m bòʼ wò.

²⁵Ghà kəli tsə kə fòŋ tə̀ taw tiy. Mə kwu ŋwô nə̀ Zə̀kìy kî bvamə zəŋə ayiə yə ù dzày nəniy awò mìə̀.

²⁶À kwuni də kə nə̀ ŋkwùŋì kiy kî təŋə yə̀ mfə̀n kə ŋgàŋ kə zû fyi kə anə lòʼo kə dzwì dzɛ̀mì na nəniy.’ ”

²⁷Anə məntsukə ìvəm nə̀ ntsukə miy ìnkyàʼì, zoŋ ə tsə̀ŋə̀ tyiŋə zè kə nə̀ mfə̀n kə̀ anə dzwì Mèdìtèlinìyà ìnè yìy nə̀ ntsukə nə̀ ntsə̀ tìy. Nə̀ fòŋə̀ ntsukə tiy, ghè mòʼò kə nə̀ ghè mə zù kwùm akə̀lə̀ ì ŋgwùŋə.

²⁸Ghu kwù kə kəfyiə anə kəmbwì, màʼà nyi tsə anə dzwî ani kəli tsə nə̀ ì myilə mə̀yə. Ghu kaw kəli fyi kə nə̀ ì myilə yəə à də̀ tə ntàm iwuiwû. Ghu kàm soŋ koŋə yə̀, fòʼ nyi tsə, kəli fyi kə nə̀ à də̌ ntàm tə ikwe ìvəm nə̀ ghe tiy ità ani nyi tswi tsə.

²⁹Aghee kəmfə̀n yìy kaʼ yə ani tsəŋ nə̀ mfə̀n kiy də ani zàʼ anə kəna. Ghu kaw bə̀ ufyiə wə u kwi nia nəniy mfə̀n kìy nə̀ kə kə bwìy dzə̀ ùkyàʼì màʼà nyi tsə anə dzwî dyaŋi kaʼ yə kə ani gwùŋì nə̀ utsuk wiy zwu bə̂

³⁰Aghee kəmfə̀n yìy kaw tsə dzəd ani tuu fyi anə kəmfə̀n. Ghu nìy fyi kə nyàŋə f-a-mfə̀n anə mfə̀n kə̀ nê kə̀ na nyi tsə anə dzwî. Ghu ŋwam kaʼ yə̀ ani zəŋə yəə ghu dziy zù kwe ufyiə wə u kwi nia nəniy mfə̀n kìy anə sə k-a-mfə̀n nə̀ ghu nyiə̀ ghii te ŋwò fyiə ŋwò.

³¹Pôl ə kwuni dzày yə̀ awò wè kə̀tuw anə tə sǔgôʼ nə̀ aghè ulàŋ yìy â ghu nə, “A ki bu aghè baŋə kəmfə̀n yə̀ tuu fyi yə̂ nəniy, ghà də ani pfə aŋwòə wù kàm wày dzə ù də ani bàŋ kə̀mfə̀n.”

³²Sǔgôʼ tiy ba khìy maʼa tsə ubaʼ wə ghu kə təŋì na nəniy nyaŋə f-a-mfə̀n fə̀ ate, ŋkwùŋì kìy bòʼò ŋwô yə̀ nə̀ nyàŋə f-a-mfə̀n fə̀.

³³Yəə utsuk wiy zwee nyiə myià bə̂ nəniy, Pôl ə bwoʼ yə ghu nə̀ wokiy nə̀ ghu nyi kə, u dzày tsə nə̀, “Ghà mə dòʼo ntsukə miy ìvəm nə̀ ghe miy inkyàʼì nə̀ ghà nyiə way fyiə kiy.

³⁴Kə̀lə̀ â ghà, ghà nyi kə nənìy ufànyiə̀ wiy tə̀ ghà kəli tsə kədaʼa. Ghà kî pfə dzə̀ wày. Iyiə ìbɛbə ìliy yiy kì fyi dzə̀ wày nə̀ ghà.”

³⁵U dyaŋi nìy kə kəba, nyə̀ tsə kəzòŋə awo Zə̀kìy anə sə kə ghu, boʼ fyi yə̀ kə̀bə̀d kaʼ yə̀ ani nyi.

³⁶Fôŋ tìy dyaŋi nyi tsə aghê àdzə̀m, ghu dyaŋi nyi yə̀ sòʼò kə̀fyiə.

³⁷Aghû yə̀ ghu kə də nəniy anə kəmfə̀n, ghu kə də̀ məmbwàm imbè nə̀ mvəmi insèmbe nə̀ àghè ntyìfoŋ[19].

³⁸Abù aghê àdzə̀m nyi kpe dzwâb tsə nəniy, ghu bòʼò màʼà fyi kə ùmbè usaŋ wə u kə də nəniy anə kəmfə̀n ani zəŋi tsə nə̀ kə zəaŋì kə.

³⁹Abu utsuk wiy tee nyi bə̂ ghu kòʼò kyilə way ŋgùŋə tə dzwî tìy, ghu kwuni kòʼ yə̀ kə̀ nali k-a-sisi. Ghu kaw tsə dzəd ani bàŋ zù təmi nə̀ mfə̀n kìy awote.

⁴⁰Anə sòŋə fə ghè fə̀, ghu khìy màʼà tsə ubaʼ wə̀ u kə kwû doʼò anə ufyiə wə u kwi nia nəniy mfə̀n kìy nə̀ kə kə bwîy dzə̀. Ufyiə u ghè wə̀ mələ nyi tswi tsə anə dzwî. Ghu zè màʼà tsə sòʼò ùbaʼ wə̀ u kwi kəli nəniy fyiə kə ghu bàŋə̀ nəniy mfə̀n kìy ate. Ghu dyaŋi ŋwò nìy kwiʼi kwoʼ kə bə̂d kəndzwu kə nê kìy anə sə k-a-mfə̀n. Ŋkwùŋì kìy təŋ zù kə̀mfə̀n anə iŋgwùŋə.

⁴¹Mfə̀n kə̀ ə kwuni zù zàʼ nyi yə̀ ùwe anə mfə̀mə̀ kə̀sisi anə dzwî, tə kə dòʼò yə̀ awote ambvə̀d. Tuw k-a-mfə̀n kə̀ ə zù soʼ nyi yə̀ anə kəsisi, tàŋ dòʼò yə̀ awote. Dzwìy kə ŋge tsìy nə̀ daʼa kiy, i bù kɛmə màʼà nyi yə̀ tuw k-a-mfə̀n.

⁴²Sǔgôʼ tə̀ ə ŋwò mòʼò tsə nə̀ ghu wiy maʼà aghè ə ndàw ntsaʼ yə̀ tə̀ ghu fə̂ nə̀ tiə zû anə iŋgwùŋə i dzwî, ghu ŋwò tuu.

⁴³Wè ə kətuw anə tə sǔgôʼ u kwuni liə kə ani fày fyi Pôl, u bwi na yə̀ ghu nə̀ ghu kə zəŋi dzə̀ aghii. U fə̀d dzày yə̀ awò aghè dzə̀m a ghu nə wù wə ù də dzə ani tiə u bvwə̀ nyi yə̀, tə̀ ù tiə zù anə iŋgwùŋə.

⁴⁴Aghê liy yə ghu kə də kwu way ani tiə, u dzày nə̀ ghu zəŋ kwoʼ kə anə ukə̀m u ŋkàʼ wə̀ u də anə kəmfə̀n. À yù də̀ yəə ghè kə zû kwùm dzwâb nəniy ate anə iŋgwùŋə nə̀ iyiə ìliy yiy kə̀ fyi nəway nə̀ ghə̀d.