Read Isu Kə̀fàʼ 3 Bible Online

Kə̀fàʼ 3 - Isu bible

Kə̀fàʼ 3

¹A ntsuk fə̀ liy fiy, Pità nə̀ Dzwan ə ŋwò tsə zù a ndàw Kə̀zə̀ anə fwa tə iwùŋ ìti, nə̀ ìnyikwubì tìy anə soŋə fə̀ gwuŋə fiy.

²Wè lìy, də̀ awote anə ufə̀b u mbà wə̀ ghu kə tyoŋə nə̀ à də̌ ufə̂b u mbà ù dzoŋə̀ wìy, ghu kə byoʼò bè nia tsə̂ nəniy we ntsuk indzə̀m. Ghu kə byi bə̀ we nə̀ ù də̀ kəŋkyoŋi. U ŋwa tsə̀ ukhiy awò aghù yìy abu ghu dziy tsîy nyiə yə̂ a ndàw Kə̀zə̀.

³Abù wù wə̀ kòʼ tsə nəniy Pità we nə̀ Dzwan, ghu tsîy nyiə yə̂ a ndàw Kə̀zə̀, u ŋwà yə̀ ùkhiy awò ghu.

⁴Pità nə̀ Dzwan ə lia yə̀ we tsitsi anə asə. Pità ə dyaŋi dzày yə̀ a we nə, “Lia bə̀ ghəd.”

⁵Wù wə̀ lia yə̀ sòʼò ghu mòʼò kə nə̀ ghu kî nyiə̀ ŋwò ighe nə̀ ùkhiy wiy.

⁶Pità kwuni dzày yə̀ a we nə, “Mə kwu dzə way ukhiy wiy. Mə kwuni nyiə̀ bə̀ kə wò nə̀ fyiə kə mə kwu nəniy. Mə dzîy bə̀ â wò nə̀ wò ŋwô kə idoŋ, wò kaʼ yə̂ ani bwìy anə izəd i Yesù, wè ìnaʼ i Nazalèt!”

⁷Pità ə dyaŋi kwiy tsə we anə ukwe u we ùnyiə wiy, tàlì ŋwò kə we idoŋ. Awee wù ù ghè wə̀ ə taw dòʼò tsə kaŋ nə̀ kyoŋi tə we tiy.

⁸U tà fyi kə idoŋ, tswi təmi tsə nə̀ awee we yiy, kaʼ tse sòʼò ani bwìy tsìy kyabi. U tsìy nyi yə̀ nə̀ ghu a ndàw Kə̀zə̀, bwìy yə̀, tìà fyiə kə idoŋ, nyiə̀ yə̀ ukali awò Kə̀zə̀.

⁹Aghû yə̀ awote kòʼ tsə we ù bwìy yə̂, kyalə yə̀ sòʼò Kə̀zə̀.

¹⁰Abù aghee yə̀ a ndàw Kə̀zə̀ kôʼ kəli tsə nə̀ à də̌ wù wə̀ ù kə dyoʼò tsə̀ anə ufə̀b u mbà wə̀ ghu kə tyoŋə nə̀ à də̀ ufə̂b ù dzoŋə̀ wìy, ŋwa ùkhiy, adzwə ŋge zwum ghu anə iyiə yə i kə fyi nəniy nə̀ we.

¹¹Yəə wù wə̀ tsə̀ŋ kwiy kəli kə Pità we nə̀ Dzwan anə bə̀d kə ndàw Kə̀zə̀ kə̀ Solomùn kə biə nəniy ghu kə twoŋə nə̀ à də̌ Pòtikò [2] adzwə ŋge zwum aghee ghà yə̀ ate, ghu nyəŋ zù u akə̀lə̀ ghu.

¹²Pità ə̀ kòʼ tsə nə̀ aghû yə̀ mə dzəŋə bə̀ akə̀lə̀ ghu, u dzày tsə nə̀, “Awizə̂, à də̌ kyə̀ adzwə sî zwumə nəniy gha anə ayiə yə ə? Ghà ghəd ghi tsə̀ŋə̀ lia kə anə iyîkìə̀? Ghà moʼò nə̀ à də̀ daʼa kələ moo ghà moʼò nə̀ ghè də̀ ŋwô ani zəŋi tsə nə̀ wù wə̀ ki bwiy bòʼ yəə ghè ŋge də nəniy aghee zwe yiy ə?

¹³Zə̀kə, Ablàhâm nə̀ Ayzìk nə̀ Dzàkôb nə̀ Zə̀kə̀ nə̀ tě ŋgàŋ asəsə yiy kə fwulə̀ tsə̂, ù mə nyìə ŋkwiʼi miy awò wè kə̀fàʼ ə we, Yesù. Ghà kwuni nìy kə we nyə̀ tsìy yə̀ awò ŋgəd tə ghee Dzû tìy, twe màʼà sòʼò we anə səkə Paylèt də̀ ghii nə̀ Paylèt mə tsə̀m ani nyəli màʼà we.

¹⁴Ù kə zwe ŋwò, də̀ sòʼo wù ù dzòŋə̀ wìy, Ghà ə kwuni twe màʼà tsə we, fə̀d liə nə̀ Paylèt nyəli màʼà fyi bə̀ wù wə̀ ù kə wiy myaʼà nəniy aghû yìy.

¹⁵Ghà maa wiy màʼa wù wə̀ ù nyiə̀ nəniy aghû yìy nə̀ ìmùə̀ itsà yìy. Zə̀kìy kwuni zɛ̀m ŋwò dzwoŋi kə we anə ipfə. Ŋgaŋ ə dzə̀m də ŋwô ani dzày àyiə yə a kə fyi nəniy.

¹⁶À də̀ daʼa kə kə də nəniy anə izəd i Yesù kə zəŋi nəniy nə̀ wè kə̀ŋkyoŋi wə̀ taw kə. Wù wə̀ ghà koʼò tsə fə, kwu sòʼo we, à zəŋi ibɛmə anə daʼa kə kə də nəniy anə izəd i Yesù. À də̀ ibɛmə azoŋə̀ Yesù i zəŋi tsə nə̀ ù taw kə anə yiə yə ghà kôʼ.

¹⁷Awizə yamə, mə kwu ŋwô nə̀ ayiə yə ghà kə zəŋi nə̀ ŋgəd təli tiy azoŋə̀ Yesù, ghà kə kwu dzə way fyiə kə ghà kə zəŋə.

¹⁸7 Zə̀kìy maa kwu nàʼà na abidzəmə̀ àghě ntwùm ə̀ we nə̀, wù wə̀ ù sùw na nəniy ù kə kwu ani bù fii. U zəŋi tsə sòʼò nə̀ i bù fyi kə ìsoŋə̀ yìy anə yiə yə ghà kə zəŋi nə̀ ù fii, ù pfə sòʼò.

¹⁹Ghà kyemì ŋwô bə̂ anə ayiə ghi àbɛbə yiy, ghà bû akə̀lə̀ Kə̀zə̀ tə̀ ù kî nîyzə̀ àyiə ghi àbɛbə yiy àdzə̀m.

²⁰Soŋə fiy bê ŋwò Mwe ə̀ mbyi ki zəŋi tsə nə̀ ghà kəli tsə kədaʼa anə tə fòŋ. Ù kì twum bə̀ sòʼò Yesù à də nəniy Kə̀litò wə̀ ù sày na dzə̂ nəniy awò ghà.

²¹Yesù kwuni kwu ani dòʼò an-a-vələ zù kwùm anə sòŋə fə Zə̀kìy kî zəŋə tsə nə̀ ufyiə udzə̀m doʼò tsə ùfyiə wiy anə ayiə yə ù kə kwuu tɛb na nə̀ ù tsìy kə abidzəmə̀ aghee ntwumə we à zwe yiy.

²²Musîs kə dzày tsə nə̀, ‘Mwe ə̀ mbyi Zə̀ kəli kiy nî twumə bə̀ ghà nə̀ wè ntwum ighəd anə yiə yə ù kə twum nəniy miə. Ù ki də wè ìnaʼ ghii. Ghà kwu ani zuw ayiə yə à dzə̀m ù dzìy nəniy nə̀ ghà zəŋi.’

²³Abu à də kə ndiə ù də zuw way ayiə yə wè ntwùm ə̀ Kə̀zə̀ wə̀ dzìy nəniy, Zə̀kìy kî nîy ŋwô fyi bə̀ we anə uzə u ghě we, ù byebi màʼà we.

²⁴Ani kaʼ ŋwo tsə azoŋə̀ Samwèl, zù kùm yə̀ azoŋə̀ aghee ntwùm ə̀ Kə̀zə̀ àliy yə ghu kə bû nəniy ibàm, ghu kə nam nàʼà kə àyiə yə a fyiə nəniy zii.

²⁵Utɛb wə Zə̀kìy kə nyiə̀ nəniy awò aghě ntwumə we yiy, u də awò ghà, ghà də sòʼo anə ŋkà mə̀ Zə̀kìy kə nyi nəniy nə̀ nə̀ tě nə̀ təli ghələ. Ù kə dzày tsə awò Ablàhâm nə̀ ‘Naʼà tə̀ dzə̀m anə mbyi kî kyilə kə̀lwì bòʼ wè lìy anə isəd i ndaw yiə̀.’

²⁶Zə̀kìy maa sày kə wè kə̀fàʼ ə we twum bə̀ we â ghà isə aŋwòə Zə̀kìy kə liə ani nyiə̀ ghà nə̀ lwì kìy, ù kə àyiə yə ghii zəŋi tsə nə̀ ghà kyèmì ŋwò bə̂ anə ayiə ghi àbɛbə yiy.”