Read Isu Kə̀fàʼ 4 Bible Online

Kə̀fàʼ 4 - Isu bible

Kə̀fàʼ 4

¹Pità nə̀ Dzwan kə namə dzə̀ŋə̀ nə̀ àghě ndàw Kə̀zə̀ yìy, ŋgəd tə ghee lwaʼa tiy[3] nə̀ wù ù kyìŋə̀ ùnè a ndàw Kə̀zə̀, nə̀ aghee Sadùsî à liy yiy tsìy nyi kwoʼ bə̀.

²Fôŋ tìy ŋge ŋə̀m ŋgəd tə ghee lwaʼa tiy nə̀ wù ù kyìŋə̀ ùnè wə̀ a ndàw Kə̀zə̀, nə̀ aghee Sadùsî yìy aŋwòə aghee ntwumə Yesù yə̀ à bè kə tyi dè ayiə awò àghě ghà yə̀, aghu nə, Yesù mə zɛmə̀ anə ipfə. I dê təŋə nəniy nə̀ aghê nî zɛmə̀ dzoŋə ŋwò anə ipfə.

³À yù də̀ ighe ghu kə kwiy kə nəniy Pità nə̀ Dzwan fè na yə̀ ghu a ndàw ntsaʼ. Yəə à kə də nəniy nə̀ inyikwubì tìy, ghu bwuni zwu yə̀ a ndàw ntsaʼ.

⁴Ndə̀mə̀ àghù yə̀ ghu kə kwuni zuw nəniy ntwùm ì ghè yə̀, ghu bɛmə kə. Ntàŋə̀ ghu kə də̀ yəə à də̀ təkaam ità.

⁵Tswutswu wə, ŋgəd tə ghě Dzû, nə ŋgəd tə inaʼ tiy, nə̀ ghè tyiə dee ulàŋ wìy dzəŋə bə̀ a Yèlusalèm.

⁶Ghu təm fwumi bə̀ nə̀ wù ùlwaʼà ùnè wìy ghu kə tyoŋə nə à də̌ Anàs u də̂ nə̀ Kaʼifàs, nə̀ Dzwan, nə̀ Àlèzandà, nə̀ aghè liy ghu kə fyi nəniy anə isəd i ndaw i wù ùlwaʼà ù nè wə̀.

⁷Ghu nìy nyi bə̀ Pita nə, Dzwan, təmi na bə̀ ghu, bəb a ghu nə, “Ghà zəŋə taw wù wə̀ anə daʼa kə ndiə? Moo ghà zəŋə anə izəd i ndiə?”

⁸Zwàykə̀zwekiy kə nyə̀ tsə Pità nə̀ daʼa kiy, U bə̀lì kə a ghu nə, “Gha, ŋgəd tə aghee Dzû, nə̀ ŋgəd tə inaʼ tiy,

⁹abu ghà bəbə ayiə yiy zii â ghə̀d kwùmə̀ yə̀ nə̀ ìyiə ìdzoŋə̀ yə̀ ghè zəŋi nəniy nə̀ wù wə̀ ù kə də nəniy ŋkyoŋi kiy, nə̀ àyiə yə ghè kə zəŋi taw nəniy we ate,

¹⁰mə dziy dzây te fyi bə̂ â ghà, nə̀ awò aghee Islàel adzə̀m nə̀, fyiə kə kə zəŋi nəniy nə̀ wù wə̀ taw à də̀ daʼa kə̀soŋə̀ kə̀ kə də nəniy anə izəd i Yesù Kə̀litò, wà ìnaʼ i Nazalèt. Wù wə̀ ghà kə ba wiy nəniy anə kàʼ fə təzəd, Zə̀kìy kwuni zɛ̀mə̀ ŋwò dzwoŋi bə̀ we anə ipfə.

¹¹Yesù də̌ wù wə̀ ŋwàʼà k-a-zə̀ kìy myìŋə̀ nəniy anə lòʼo kə kə dzîy nəniy nə̀, ‘Itay yə gha aghê biə tə ndaw twe maʼa nəniy nə̀ i dzwâbə̀ wày, à kàm baa də̀ itay ghè yə̀ i bû kâm dòʼò tsə nəniy itay i bvu i ndaw yə i kwi kəli ndaw idzə̀m.’

¹²À bvwami mày kə Yesù ù kwu nəniy daʼakiy ani bii fyi aghû anə mbyi i dzə̀m. Wè lìy wày dzə Zə̀kìy nyiə̀ na nəniy we nə̀ daʼakiy ani bii fyi ŋgaŋ.”

¹³Adzwə kə ŋge zwum ŋwô aghee ndàw ìsaʼà yə̀ anə yiə yə ghu kə kôʼ nə̀ Pità nə̀ Dzwan kə kwu ŋwô fôŋ tə̀ taw tiy. Ghu kəli tsə sòʼò nə̀ aghee ntwùm ə̀ Yesù yə̀ à bè way dzə aghee soŋə̀ yìy. Ghu kwu dzə̀ way ŋwàʼà kìy. Adzwə ŋge zwum sòʼò, ghu kòʼ kəli tsə nə̀ Pità nə̀ Dzwan kə də̀ tsə̌ nə̀ Yesù.

¹⁴Aghû yə̀ ə kə̀ kwuni kâm kəli dzə̂ iyiə yiy ani dzày aŋwòə ghu kə kòʼ yə̀ wù wə̀ Pità nə̀ Dzwan kə zəŋi taw kə nəniy ù tii fwumi nə̀ nə̀ Pità

¹⁵Ŋgəd tə dyaŋi dzày yə̀ aghu nə ghu ŋwǒ fyi fə a ndàw ìsaʼà yə̀. Ghu kaʼ yə̀ ani səay anə iwe, bəbə nə̀,

¹⁶“Ŋgà də ani zəŋi mə̀yə nə̀ aghù yə̀ ə? Aghee dzə̀m a Yèlusalèm kwu ŋwô mali kə iyiə kə̀soŋə̀ kə̀ ghu kə zəŋi nəniy. Ŋgà way dzə ani twe màʼà dzə̀ nə̀ ghu kə kə̀ zəŋi nəway iyiə i ghè yə̀.

¹⁷Â ŋgàŋ ani zəŋi tsə nə̀ aghê kə ŋge kəli dzə̀ àyiə yə, ŋgà kee na yə̂ aghù yə̀ nə̀ ikhu ghu nə̀ kàmə̀ dzîy ìyiə ìliy yiy fə â wù lìy anə izəd i Yesù.”

¹⁸Ghu dyaŋi twoŋə nyi dzwoŋi yə̀ aghè ə ntwum ə Yesù à bè a ndaw, dzày yə̀ aghu nə, kə ghu nə̀ dzîy iyiə ìliy yiy fə moo kə ghu nə tyi dê ìyiə ìliy yiy fə â wè lìy anə izəd i Yesù.

¹⁹Pità nə̀ Dzwan ə kwuni bə̀lì kə a ghu nə, “Ghà moʼò nə̀ à də̌ ìghaa yiy tsitsi anə sə k-a-zə̀ ə? Ani zuw ayiə ghi à dziy yiy moo ani zuw ayiə yə Zə̀kìy dzîy nəniy ə? Saʼ tsə anə iwè nəli.

²⁰Ghè way dzə ani dòʼò moŋ nə̀ ghè dzîy wày iyiə yə ghè kôʼ nəniy zuw sòʼò.”

²¹Ŋgəd tə ghù yə̀ ə ba kwà fwuli tsə ghu nə̀ daʼa kiy, dyaŋi nyəli màʼà tsə Pità nə̀ Dzwan nə̀ ghu ŋwô. Ghu kòʼ tsə nə̀ ghu way dzə ani nyiə̀ mfəm awò Pità nə̀ Dzwan aŋwòə aghû yə̀ nə̀ Pità kə niʼà nəniy ntwum yə awò ghu, ghu dzə̀m kə kyalə yə̀ Kə̀zə̀ anə iyiə yə i kə fyi nəniy.

²²Wù wə Pità nə̀ Dzwan kə zəŋi mali kə iyiə kə̀ azoŋə̀ we u taw dòʼò bə̀, ù kə tsìy kwoʼo yə̀ vəm mə̀ tə̀ ŋə̀mə̀ ìnkyàʼì.

²³Anə ayiə yə ghu kə nyəli maʼà tsə nəniy Pità nə̀ Dzwan, ghu ŋwò yə̀ zù dzày yə̀ àyiə yə ŋgəd tə aghè àlwaʼa tə̀ nə̀ ŋgəd tə inaʼ tiy kə zəŋi nəniy nə̀ ghu awò àghè ntwum ə Yesù àliy yə.

²⁴Abù aghû yə̀ ghu kə bɛmə nəniy Zə̀kìy zuw tsə nəniy ayiə yə, ghu dzəŋi gwùŋì, dzìy tsə nə̀, “A Mwe ə̀ mbyi, wò wə wò zəŋi nəniy byiwuŋ kiy nə̀ mbvə̀dintsə kiy nə̀ dzwì tìy nə ùfyiə wə u də nəniy ate ùdzə̀m.

²⁵Wò kə dzə̀ŋì nə̀ təli ghələ ù səsə wiy Devìd, wù kə̀fàʼ yiə̀ abidzəmə̀ Zwàykə̀zwekiy yəə ù kə dzây tsə nəniy nə̀, ‘Fôŋ tìy ŋəmə̀ àghù yə̀ ghu də wày aghee Dzû anə iyîkìə̀? À də̌ kyiə̀ aghê byay ani zəŋi ayiə yə à də kwu way fàʼ kìy?

²⁶Ùdòŋ u mbyi wiy byay iwee itsaam ŋgəd tə inaʼ tiy kwi tsə kədzəŋə anə tuw kə Mwe ə̀ mbyi nə̀ anə tuw kə wù wə̀ Zə̀kìy kə sûw kyili na nəniy.’

²⁷Helòd nə Pontìyùs Paylèt kə ndzə̀m kwi tsə kədzəŋə fə a Yèlusalèm nə̀ àghù yə̀ à də wày aghee Dzû yìy, nə̀ àghě Islàel yìy, ghu kaʼ ani dzày àyiə guw yiy anə tuw kə Yesù wè kə̀fàʼ yiə̀ ù zwe wə̀ wò kə sûw kyili na nəniy.

²⁸Ghu kə fàʼ ayiə yə wò kə tsə̂m bə̀ nə̀ a nî fyiə ŋwò anə daʼa kyiə̀ kə̀ wò kwu nəniy.

²⁹A Mwe ə̀ mbyi zuw kə yə ghu bvumə nəniy ghəd ate. Ghè də aghee kəfàʼ yiə̀, zəŋi tsə ghè kəli tsə fôŋ tə̀ taw tiy ani nàʼà ntwum yiə.

³⁰Zəŋi tsə nə̀ aghê kôʼ daʼa kə̀soŋə̀ kə̀ wò kwu nəniy ani zəŋə taw aghû yə̀ ghu dzâŋə̀ nəniy, nə̀ ani fàʼ mali tə yiə nə̀ kwab tə yiə tiy anə izəd i Yesù wù kə̀fàʼ yiə ù zwe wìy.”

³¹Abù ghu gwùŋì mà tsə nəniy, loʼo kə ghu kə də nəniy ate, kə ŋwò sə̀k tsə, Zwàykə̀zwekiy nyi tsə azoŋə̀ ghu, ghu kaʼ tsə ani nàʼà ntwùm ə̀ Kə̀zə̀ nə̀ fòŋ tə̀ taw tiy.

³²Aghee ghà yə̀ ghu kə bɛmə nəniy â Zə̀kìy kə də̀ kə anə fyiə kəmòʼ, kwu kə fòŋ ìmòʼ. Wè lìy kə dzìy tsə dzə̀ wày anə uzə u ghu nə̀ ufyiə wə̀ də̀ u wam wiy. Ghu dzù fwumə yə̀ kə ufyiə wə ghu kə kwu anə iwè i ghu.

³³Aghee ntwum ə Yesù yìy kə nàʼà ntwùm ə̀ ìdzoŋə̀ yìy awò aghè dzə̀m nə̀ daʼa kiy, a ghu nə̀ Mwe ə̀ mbyi, Yesù, maa zɛ̀mə̀ anə ipfə. Zə̀kìy lwì dzwàb tsə ghu dzə̀m.

³⁴Wè lìy kə wày dzə anə uzə u ghu ù kə laʼà nəniy fyiə kiy. Aghû yə̀ ghu kə kwu nəniy loʼo tiy moo tə̀ ndaw, ghu zè fyiə̀ tsə, bè nə̀ ùkhiy ghè wə̀ ghu fê nəniy ufyiə wiy ate,

³⁵nyiə̀ tsìy yə̀ awò àghě ntwùm ə̀ Yesù yìy, ghu dzù nyiə awò àghù yə̀ ghu kə laʼà kê nəniy.

³⁶Yùsə̂f, wè i naʼ i Levì anə nàʼa fə Sayplùs, aghee ntwumə Yesù yìy kə tyoŋə nə̀ à də̌ Bànabàs, (I kə myìŋə̀ nəniy nə̀, “À də̌ wù wə̀ ù kə kwe nəniy fôŋ tə ghù tìy”,)

³⁷u fè tsə loʼo kə we, nìy bə̀ ukhiy ghè wə̀, nyiə tsìy yə̀ awò àghě ntwùm ə̀ Yesù yìy.