Read Isu Kə̀fàʼ 8 Bible Online

Kə̀fàʼ 8 - Isu bible

Kə̀fàʼ 8

¹Sôl kə də̀ awote anə yiə yə ghu kə tyimi wiy nəniy Stifə̀n, ù bɛmə nyə̀ àyiə yiə ghu kə zəŋi nə̀ Stifə̀n. À ntsuk fə ghè fə̀ kə, utswə̂d ùsoŋə̀ wìy fyi azoŋə dzəŋə kə aghě Kəzə̀ yə̀ ghu kə də nəniy a Yèlusalèm, ghu kaʼ tsə ani ŋge fii anə wo kə ghě Dzû, ghu ŋwò tuu sàlì zù a Sàmaliyà, nə̀ a Dzùdiyà, a dòʼò səə tsə kə àghě ntwùm ə̀ Yesù awote.

²Aghê liy yiy ghu kə kwu nəniy ibɛmə ìsoŋə̀ yìy, ghu bù bòʼò kə ivən i Stifə̀n, zù kələ yə̀. Ghu màŋə̀ bvòʼə tsə̀ mbòŋ mə̀ dîy ani ipfə i we.

³Sôl ə kwuni kaʼ tsə ani zəŋi ayiə àbɛbə yiy azoŋə̀ dzəŋə kə aghě Kəzə̀ kìy, U bwìy yə̀ ndaw tə̀ ndàw, nìy fyiə bə̀ iŋə̀mə̀ nə̀ iyəŋi yə ghu kə bɛmə nəniy â Zə̀kìy, zè fyìè nia yə̀ ghu a ndàw ntsaʼ.

⁴Aghê Kəzə̀ yə̀ ghu kə ŋwô tuu salì tsə nəniy, ghu zù loʼo tə dzə̀m nìʼà yə̀ ntwùm ìdzòŋə̀ yìy anə lòʼo tə ghu kə zê ate.

⁵Filîp ə nyi yə̀ anə fôŋə̀ ìnaʼ i Sàmaliyà, nàʼà tsə ntwùm ìdzòŋə̀ yiy awote â àghù yìy kwùmə̀ yə̀ nə̀ Kə̀litò.

⁶Ŋwàâ kə ghù kə̀ kə kə də nəniy awote, ghu kòʼ tsə mali tə yiə tə ù zəŋi nəniy. Ghu màʼà tsə iwe ani zwuli ayiə yə ù kə dzîy nəniy â ghu.

⁷Nsìy mə̀bɛbə̀ mìy fyi ŋwò azoŋə̀ ndə̀mə̀ àghè liy nə̀ in bvoʼə yə̀ mə̀mbòŋ. Ndə̀mə̀ aghee liy ghu kə zɛ̀mə̀ bwîy nəniy, nə̀ àyu ghu kə pfə doʼò bə̂dkə̀bə̂d ghu taw kə.

⁸Aghê adzə̀m kə ŋge dwiʼi ŋwô awote anə inaʼ anə ayiə yə à kə fyi nəniy.

⁹Wè lìy kə mùə̀ a Sàmaliyà, izəd i we yiy kə də nə̀ à də̀ Simùn, ù kə zuw tsə̀ fə̀nyaʼ. U kwoʼo ùwe awò àghě Sàmaliyà yìy nə̀ ghe də wù ùsòŋə̀ wìy.

¹⁰Aghê àdzə̀m a Sàmaliyà, liy mə̀ àghù nə̀ kwab tə aghù tìy kə tsə̀ŋ kwu kə ani nyəŋə zee akə̀lə̀ we. Ghu dzìy nə̀ “Ù də̀ daʼa k-a-zə̀, Ghu twoŋə we nə̀ à də̀ ‘Daʼa kə̀soŋə̀ kìy.’ ”

¹¹Ghu tsə̀ŋ kwu kə ani dzwùmì we aŋwòə Simùn kə ŋge zəŋi ghu nə̀ ayiə zwumə idzwə yiy.

¹²Abù ghu kwuni zuw tsə yə Filîp kə niʼà nəniy ntwùm ə̀ ìdzòŋə̀ yìy ate kwùmə̀ yə̀ nə̀ àyiə yə Zə̀kiy saʼa aghee we yiy ate, kwùmə̀ yə̀ sòʼò nə̀ Yesù Kə̀litò, iyəŋi nə̀ iŋə̀mə̀, ghu bɛmə kə â Yesu, ghu nìy kə sòʼò mwi m-à-zə̀.

¹³Simùn ə bɛmə kə sòʼò â Yesù, nìy kə sòʼò mwi m-à-zə̀. Yəə ù nìy kə nəniy mwi m-à-zə̀ mìy, u də̌ nə̀ Filîp anə lòʼo tədzə̀m Filîp kə zê nəniy ate. Abù yəə ù kòʼ nəniy kwab tə yiə tə nə̀ mali tə yiə tə Filîp kə zəŋə nəniy, idzwə yiy ŋge zwum we ate.

¹⁴Aghee ntwùm ə̀ Yesù yə̀ ghu kə də nəniy a Yèlusalèm ə zuw tsə nə̀ aghê mə bɛmə ntwùm ə̀ Kə̀zə̀ a Sàmaliyà, ghu twum yə̀ Pità we nə̀ Dzwan awote.

¹⁵Yəə Pità nə̀ Dzwan zû kwùm tsə nəniy, ghu gwùŋì tsə anə utuw aghè ghà yə̀ nə̀ Zwàykə̀zwekiy bû azoŋə̀ ghu.

¹⁶I kə ghii də̌ aŋwòə Zwàykə̀zwekiy kamə fyi tswi bə̂ dzə̀ azoŋə̀ wù lìy ate, ghu nam màŋ nìy kə kə mwi m-à-zə̀ anə izəd i Mwe ə̀ mbyi, Yesù.

¹⁷Pità we nə̀ Dzwan ə gaʼ tsə awo azoŋə̀ àghù yə̀ àdzə̀m ghu kə ndzə̀m bɛmə nəniy Zə̀kìy, Zwàykə̀zwekiy bù azoŋə ghu.

¹⁸Simùn ə kòʼ tsə nə̀ Zwàykə̀zwekiy mə bù azoŋə̀ àghě ghè yə̀ anə yiə yə aghee ntwùm ə̀ Yesù kə gaʼ tsə nəniy awo azoŋə̀ ghu. U nìy kə ukhiy nyə̀ yə̀ â Pità we nə̀ Dzwan.

¹⁹U dzày tsə sòʼò aghu nə, “Ghà nyiə̀ tsə soʼò mìə̀ nə̀ ndzòʼò daʼa kə, tə̀ bəə mə gaʼ yə̂ awo yam yiy azoŋə̀ wù, Zwàykə̀zwekiy bù azoŋə̀ we.”

²⁰Pità ə kwuni dzày yə̀ a we nə̀, “Wò kì fwuə anə uvə̀lə̀ nə̀ ukhiy yiə̀ wìy abu wò mòʼò nəniy nə̀ wò də̌ ani zwe fyiə kə Zə̀kìy nyiə̀ nəniy â àghù yə̀ ghu bɛmə nəniy â we.

²¹Wò wày dzə ani fàʼ nə̀ ghə̀d, aŋwòə imôʼ yiə̀ yìy way dzə tsitsi anə sə k-a-zə̀.

²²Kyèmi ŋwǒ bə̀ anə ayiə yiə̀ àbɛbə yiy, wò gwùŋì yə̂ â Mwe ə̀ mbyi nə̀ ù nìyzə̀ wò anə ndzòʼò ìmòʼ ìbɛbə yə wò kwu nəniy.

²³Mə koʼò bə̀ ŋwò nə̀ wò kwu ghòʼ kə̀ bɛbə kiy, də sòʼò kəkwə̂d awò ìbɛb yiy.”

²⁴Simùn mee â Pità we nə̀ Dzwan a ghu nə, “Mə bwoʼ gha nə̀ wo kiy, ghà gwùŋì yə̂ â Mwe ə̀ mbyi anə tuw kam nə̀ ayiə yə ghà dzây nəniy, kə a kə fyi dzə̀ nə̀ mìə̀.”

²⁵Abù Pità nə̀ Dzwan dzây mà tsə ayiə yə Yesù kə zəŋi nəniy awò ghu, naʼà mâ tsə sòʼò ntwùm ə̀ Mwe ə̀ mbyi, ghu ŋwò zù dzwoŋi a Yèlusalèm. Yəə ghu namə dzwəŋə yə̂, ghu nìʼà yə̀ ntwùm ə̀ ìdzòŋə̀ yìy anə nàʼà mə̀ ìn də nəniy a mbwòʼ ə̀ Sàmaliyà.

²⁶A ntsuk fə̀liy fiy tsə̀ndii ə Kə̀zə̀ kə dzày yə̀ â Filîp a we nə, “Byay tsə uwe niə̀ wìy, wò zû anə dzəd[5] yə ì ŋwò tsə nəniy a Yèlusalèm, zè a Gazà,”

²⁷Filîp ə bvwami byay tsə sòʼò uwee, ŋwò yə̀ zù kpe tsə nə̀ wè Ìtopìyà ùsoŋə̀ wìy ù kə də nəniy tuw kiy anə aghù yə̀ àdzə̀m ghu kə lia nəniy mbè kə ukhiy kə Kandèk kìy (Kandèk myìŋə̀, nàʼtwùm ə̀ Ìtopìyà), ù kə də̌ a Yèlusalèm, fwùlə̀ Kə̀zə̀. Yəə ù bè dzwəŋə a ndàw we, nə̀ ù mə kwoʼ dòʼò kə anə kənyəŋ[6] kə we, tyoŋə ŋwàʼà kə wè ntwùm ə̀ Kə̀zə̀, Ìzayà kə twâ na.

²⁹Zwàykə̀zwekiy dzày tsə â Filîp a we nə, “Zù a kə̀lə̀ nyəŋ kiy, wò ki bwi kioŋə yə anə ibwè.”

³⁰Filîp ə nyəŋ zù akə̀lə̀ nyəŋ kə ghè kə̀, u zuw wù wə̀ tyoŋə nəniy ŋwàʼà k-a-zə̀ kìy anə ŋwàʼà kə wè ntwùm ə̀ Kə̀zə̀, Ìzayà. Filîp ə bəb yə̀ a we nə, “Wò zuw kyilə kə ŋwò àyiə yə̀ wò tyoŋə nəniy ə?”

³¹Wù kə̀tuw wə̀ bə̀lì kə a we nə̀, “Mə də mə̀yə ani zuw kəli, àmày kə̀ nə̀ wè liy də̀ ŋwô ani tyi dzày bə̀ àyiə ghè yə̀ â mìə̀.” U dzày yə̀ nə̀ Filîp nyi kwoʼ dòʼò kə nə̀ we an-a-nyəŋ.

³²Loʼo kə ù kə tyoŋə nəniy anə ŋwàʼà k-a-zə̀ kə dzìy nə̀, “U kə də̀ yəə à də̌ ndzù yə̀ ghu nîy bə̂ nəniy ani suu. Ù kə də̀ yə à də̌ Wà ndzù yə̀ ghu khîy ŋwò tsə ŋwu tìy, i də kə̀ bwoʼ fyi bə̂ nəway bôŋ kìy. U kə̀ dzây dzə̂ nəway iyiə yiy.

³³Ghu zəŋi ayiə tuw kə̀dələ kiy nə̀ we, Wè lìy kə wày dzə ani dzày bə̀ ìyiə kwùmə̀ yə̀ nə̀ àwa we yiy, aŋwòə imuə̀ i we yiy mə mày fə anə mbyi.”

³⁴Wù Ìtopìyà wə̀ bəb yə̀ â Filîp a we nə. “Mə bwoʼ wô nə̀ wo kiy, dzày bə â mìə nə̀ wè ntwum Kə̀zə̀ wə̀ kə àyiə yə̀ dzìy kwùmə̀ yə̀ nə̀ ndiə? Ù kə ayiə yə̀ dzìy anə uwè u we moo anə uwè u wû ŋwò ə?”

³⁵Filîp ə kaʼ ŋwò tsə ani dzə̀ŋì anə lòʼo kə wù wə̀ kə tyoŋə nəniy anə ŋwàʼà k-a-zə̀. U nàʼà ntwùm ə̀ ìdzoŋə̀ yìy â we kwùmə̀ yə̀ nə̀ Yesù.

³⁶Yəə ghu tswi yə̂ anə dzəd, ghu tswi kwùm tsə anə lòʼo kə̀liy kiy, mwi kə də nəniy awote, wè Ìtopìyà wə̀ ə dzày yə̀ â Filîp a we nə, “Kòʼo mwi mə fə, à twe kìə̀ nə̀ wò kə nyiə̀ miə nə̀ Mwi m-à-zə̀ mìy ə?”

³⁸Wè Ìtopìyà wə̀ dzày yə̀ awò wù wə̀ ù kə sê nyəŋ kə a we nə̀ ù təmi na tsə nyəŋ kə ghè kə̀. Filîp ə nyi tswi yə̀ anə dzwî nə̀ wè Ìtopìyà zù nyiə̀ tsə we nə̀ mwi m-à-zə̀ mìy.

³⁹Anə yiə yə ghu ŋwò fyi kwoʼ bə̀ nəniy anə dzwî, Zwày kə Mwe ə̀ mbyi kiy nìy ŋwò yə̀ nə̀ Filîp. Wù wə̀ kə̀ kâm kôʼ nəway we. Wù ù ghè wə̀ kwuni ŋwò dyaŋi yə̀ kə anə lòʼo kə̀ ù zê nəniy ate nə̀ dwiʼi kiy anə fôŋ.

⁴⁰Filîp ə zù fyi kə a Àzotùs, u nìʼà yə̀ ntwùm ìdzòŋə̀ yìy anə dzəd anə nàʼà tə̀dzə̀m yəə ù zè dyaŋə nəniy a Kàsaliyà.