Read Isu Lûm 14 Bible Online

Lûm 14 - Isu bible

Lûm 14

¹Ghà ki ŋgwamə nia tsə aghû yə̀ ibɛmə ighu yiy lay nəniy, kəə ghǎ nì bələ̀ dzə̂ ayiə nə̀ ghu kwùmə̀ yə̀ nə̀ ìyiə yə ghu moʼò nə̀ i də tsitsi moo ìbɛbə yiy.

²Aghê liy yiy kwu ibɛmə nə̀ ufyiə u dzə̀m dzwâbə̀ ŋwò ani nyi. À yuu bɛmə tə ghu tiy lay nəniy, ghu kwuni nyiə kə mə̀nzù.

³Aghû yə̀ ghu nyiə nəniy le tə ufyiə tədzə̀m, ghu kə môʼ dzə̀ nə̀ ghu tsîy fyi ŋwô aghû yə̀ ghu də nyiə way le tə ufyiə tədzə̀m. À yuu ghu nyiə kə nzù mìy, kə ghu nì dzìy soʼò awò àghù yə̀ ghu nyiə nəniy le tə ufyiə tədzə̀m nə̀, ghà zəŋə bɛbə ŋwò ani nyi le tə ufyiə udzə̀m aŋwòə Zə̀kìy mə ŋgwam na aghê dzə̀m.

⁴Wò də̌ ndiə ani dzày nə̀ aghee kə̀fàʼ ə wù lìy wìy mə zəŋi dzwàb moo ù mə zəŋi bɛbə ə̀? À mày kə̀ wù wə̀ ù də nəniy mwe awò ghu, ù də nəniy ani dzày tsə nə̀ ghu mə zəŋi dzwàb moo ghu mə zəŋi byɛbi. Ghu kî fàʼà dzwàbə̀ ŋwò aŋwòə Mwe ə̀ mbyi də ŋwô ani zəŋi nə̀ ghu fâʼ dzwâb.

⁵Aghê liy moʼò kə nə̀ utsuk ù liy tsîy fyi ŋwô ntsukə mə̀ lìy mə̀, à liy kwuni moʼo nə̀ ntsuk i ndzə̀m də kə ighəd. Wù ùmoʼ umòʼ kwu ani nìy kə itsə̂m anə iyiə yə ù kwu nəniy nə̀ i də tsitsi.

⁶Aghû yə̀ ghu moʼò nə̀ ntsuk fə̀ liy fiy tsîy fyi ŋwô ntsukə mə̀ lìy mìy, ghu moʼo aghii ani nyə̀ mə̀ŋkwiʼi awò Mwe ə̀ mbyi. Aghû yə̀ ghu nyiə nəniy fànyiə miy ìndzə̀m ghu faʼa ghii ani nyə̀ mə̀ŋkwiʼi awò Mwe ə̀ mbyi, yəə ghu nyiə̀ tsə zòŋə̀ kìy anə ufànyiə̀ u ghè wə bəə ghu dziy nyi. À yuu ghu tee ani nyi ufânyiə ù liy wiy, ghu nyiə̀ kə mə̀ŋkwiʼi awò Mwe ə̀ mbyi, aŋwòə ghu nyiə̀ tsə kə̀zòŋə̀ awò Zə̀kìy anə̀ ufànyiə u ghè wə̀ bəə ghu dziy nyi.

⁷Wù lìy mùə̀ dzə̀ way ani zəŋi tsə nə̀ ghe ki dyoʼo, wù lìy pfə sòʼò wày ani zəŋi tsə nə̀ ghe ki dyoʼo.

⁸Abu ŋgà muə nəniy, ŋgà muə ani zəŋi tsə nə̀ Mwe ə̀ mbyi ki dyoʼo, abu ŋgà pfə nəniy, ŋgà pfə ani zəŋi tsə nə̀ Mwe ə̀ mbyi ki dyoʼo. Ì yû dè tsə nə̀ abu ŋgà muə moo ŋgà pfə nəniy, ŋgà də aghee Mwe ə̀ mbyi.

⁹Aŋwòə Kə̀litò kə̀ pfə zɛ̀mə̀ dòʼò bə̀ utaw ani dòʼò bə̀ Mwe ə̀ mbyi awò aghù yə̀ ghu də nəniy utaw nə̀ aghù yə̀ ghu pfə dzə̂.

¹⁰Gha yə ghà nyiə təŋə kə nəniy ufànyiə u mənzù wìy, à də kìə̀ ghà dzîy nəniy awò àghù yə̀ ghu nyiə nəniy ufyiə udzə̀m nə̀ ghu mə zəŋi bɛbə ə? Gha yə soʼo ghà nyiə nəniy ufyiə udzə̀m, à də kìə̀ ghà sî kòʼò kê nəniy aghê liy yə ghu bɛmə soʼò nəniy Zə̀kìy ə? Ŋgaŋə dzə̀m nî tyimə yə̀ anə sə k-a-zə̀ tə̀ ù saʼ ŋgaŋ.

¹¹Aŋwòə ŋwàʼà k-a-zə̀ kìy dzây tsə nə, “Mwe ə̀ mbyi dzîy nə̀, ‘Anə yiə yə mə tsəm də Zə̀kə̀ kə muə nəniy, aghê à dzə̀m nì bè nyaʼa tswi tsə a təŋə̀ mìə̀, aghê dzə̀m ni bû dzây fyi bə̂ soʼò nə̀ adzwə a ghu yiy nə̀ mə də Kəzə̀’

¹²Yəə i də nəniy ghii, ŋgaŋ adzə̀m ŋgà nî nyìə̀ ntaŋ awò Zə̀kìy anə ayiə yə ŋgà faʼà nəniy.”

¹³Yəə i də nəniy ghii, ŋgà bwi na ani saʼ aghê liy dzìy nə̀ ghu mə zəŋi bɛb. Ghà kə zəŋi dzə̀ ayiə yə a də ani zəŋi nə̀ àzwə̀ tyàŋì bvə̀ moo ghu zəŋi iyiə ìbɛbə yiy.

¹⁴Anə yiə yə mə təm doʼò dzəŋi nəniy nə̀ Mwe ə̀ mbyi Yesù, mə kwu nə̀ ufânyiə ùliy wiy way dzə u dzəə nəniy anə sə k-a-zə̀. Abu wù mòʼo nə̀ ufànyiə ùliy wiy dzəə ŋwò anə sə k-a-zə̀, ufânyiə u ghè wə̌ dòʼò yə̀ kə ùdzəə wiy awò wù ù ghè wə̀.

¹⁵Abu wò zəŋə nə̀ fòŋ ki ŋəmə àzwə̀ wə̀ ù bɛmə nəniy Zə̀kìy, bòʼ fyiə kə wò nyiə nəniy, ayiə yə wò zəŋə nəniy a dè tsə nə̀ wò kwu dzə̀ way iliə yiy azoŋə̀ we. Kə̀ zəŋi dzə̀ nə̀ ufânyiə wə wò nyiə nəniy u byɛbi maʼà wù lìy Kə̀litò kə pfə nəniy anə tuw kə we.

¹⁶Kə̀ zəŋə dzə̀ nə̀ fyiə kə wò koʼò nəniy nə kə dzwabə̀ ŋwò, kə fə̂d kəli yə̂ ìzəd ì bɛbə yiy.

¹⁷Yəə Zə̀kìy saʼa nəniy aghee we yiy ate à wày dzə ayiə ufànyiə nə̀ mə̀nlwù mìy, a kwuni də ani zəŋə ayiə yə a də nəniy tsitsi anə sə k-a-zə̀, nə̀ ani mùə̀ anə ìbvay nə̀ ghè liy yiy, nə̀ ani kəli dwiʼi kə̀soŋə̀ kə̀ Zwàykə̀zwekiy nyiə̀ nəniy awò àghè.

¹⁸Abu wò fàʼà awò Kə̀litò anə dzòʼò dzəd yə ghii, wò kî zəŋi nə̀ Zə̀kìy ki dyoʼo nə̀ wò. Aghê ki dziy sòʼò ayiə àdzoŋə̀ yìy kwùmə̀ yə̀ nə̀ wò.

¹⁹Yəə i də nəniy ghii, ŋgà kwu ani zəŋə yə ayiə yə a də ani bu nə̀ ìbvay yiy, nə̀ à yuu a də ani zəŋə soʼo nə̀ aghê liy yiy kəli tsə ibɛmə ìsoŋə̀ yìy.

²⁰Kə̀ byɛbi màʼà dzə̌ fàʼ kə̀ Zə̀kìy fâʼ na nəniy bòʼ ùfànyiə. Aghê də ŋwô ani nyi ufyiə u dzə̀m, à kwuni də̀ iyiə ìbɛbə yiy ani nyi fyiə kə kə də ani zəŋi nə̀ wè lìy zəŋi bɛb.

²¹I boʼò dzwàbə̀ â wù ani dòʼò nə̀ u kə̀ fwu dzə nyàm moo nə̀ ù kə mu dzə̌ nlwù mìy moo nə̀ ù kə̀ zəŋi dzə̂ iyiə ìliy yiy i də ani zəŋi nə̀ àzə̀ zəŋi iyiə ìbɛbə yiy.

²²Yəə i də nəniy ghii, abu wò bɛmə kə nə̀ìndiə kwùmə̀ yə̀ nə̀ àyiə yə, zəŋi tsə nə̀ à ki kwu kə wô nə̀ Zə̀kìy. Dwiʼi kiy də awò aghù yə̀ ghu zəŋə nəniy ayiə yə ghu kwu nəniy nə̀ a də tsitsi, ghu kòʼ kəli tsə nə̀ ghu kə̀ zəŋi bɛb dzə̂, nə̀ ghu kwuni zəŋi iyiə yə ghu kwu nə̀ i də tsitsi.

²³Abu ghu kwuni səmə̀ nəniy ani nyi, Zə̀kìy ki dziy nə̀ ghu mə zəŋi bɛb aŋwòə ayiə yə ghu zəŋə a dê tsə nə̀ ghu kwu dzə way ibɛmə yiy. Abu wù zəŋə nəniy iyiə ìliy səmə̀ nə̀ iyiə i ghè yə̀ sì də̀ ŋwô tsitsi moo, i dè nə̀ iyiə i ghè yə̀ də iyiə ìbɛbə yiy.