Read Isu Lûm 15 Bible Online

Lûm 15 - Isu bible

Lûm 15

¹Ŋgaŋ yə ibɛmə i ŋgàŋ yìy taw nəniy ŋgà kwu ani kwee tsə fôŋ tìy nə̀ àghù yə̀ ibɛmə i ghu yiy lay nəniy. Ŋgà kə kaʼì zəŋə dzə̀ ayiə yə a kî bè nəniy ŋgaŋ nə̀ dwiʼi kiy.

²Ŋgà kwu ani zəŋə yə ayiə àdzoŋə̀ awò àghè liy yə ghu bɛmə nəniy Zə̀kìy, zəŋə yə̀ sòʼò àyiə yə a də ani nyə̀ ghu nə̀ dwiʼi kiy ani zəŋi tsə nə̀ ibɛmə i ghu yiy taw tsə.

³Kə̀litò kə kə̀ kaʼi muə̀ dzə̂ ani zəŋi nə̀ ghe ki dyoʼo. Ù kə kwuni fàʼ anə yiə yə i twà dòʼò anə ŋwàʼà k-a-zə̀ nə̀, “Ayiə yə aghê kə dzîy anə sòŋə fə ghu kə nyaʼà nəniy gha, inyaʼì i ghè yə̀ mə bù azoŋə̀ mìə̀.”

⁴Ayiə yə ghu kə kwuu twâ naa nəniy anə ŋwàʼà k-a-zə̀ àdzə̀m, ghu kə twà na ani tswù bə̀ ŋgàŋ ate. Ŋwàʼà k-a-zə̀ kìy nyiə̀ sòʼò ŋgàŋ nə̀ imòʼ ìdzoŋə̀ yìy nə̀ ìghaa yiy ani kwù tə̀ fòŋ lyimə nə̀ tɛb k-a-zə̀ kìy bû doʼò kə̀soŋə̀ kìy.

⁵Mə gwùŋə̀ nə̀ Zə̀kə̀ kə nyiə̀ nəniy fòŋ ìkwê yìy nə̀ ìghaa yiy, nə̀ ù zəŋi tsə gha tə̀ ghà ki də anə fyiə kəmòʼ nə̀ àghè dzə̀m. À yù də̌ ndzòʼò ìmùə̀ yə̀ Yesù Kə̀litò liə nə̀ ghà kəli tsə.

⁶Anə yiə yə gha dzə̀m də ani təm dzəŋi bə̀ anə dzə̂ ìmòʼ ani nyiə̀ ùkali awò Tà, Kə̀zə̀ nə̀ Mwe ə̀ mbyi ə̀ ŋgàŋ Yesu Kə̀litò.

⁷Yəə i də nəniy ghii, ghà ki ŋgwamə nia tsə wù ùmoʼ umòʼ, anə yiə yə Kə̀litò ŋgwamə na nəniy gha ate, ani zəŋi tsə nə̀ aghê nyiə̀ ùkali awò Zə̀kìy.

⁸Mə ndzəmə̀ dzìy bə̀ ŋwò â ghà nə̀ Kə̀litò kə bù yəə à də̌ wè kə̀fàʼ awò àghě Dzû ani dè tsə nə̀ Zə̀kìy mə zəŋi nə̀ tɛb kə ù kə tɛb na nəniy awò nə̀ tě ghu asəsə yiy nə̀ kə bû doʼò kə̀soŋə̀ kìy.

⁹Ù kə bù ani zəŋi tsə sòʼò nə̀ aghû yə̀ ghu də way aghee Dzû tə̀ ghu nə̀ də ani nyə̀ Kə̀zə̀ nə̀ ùkali wiy anə mwuli kə̀kwoʼo kə ù dè nəniy awò ghu. Ighəd anə yiə yə ŋwàʼà k-a-zə̀ kìy dzîy nəniy nə̀, “Yəə i də nəniy ghii, mə kî kyalə wò anə nàʼà tə aghù yə̀ ghu də way aghee Dzû, mə zɛm nyiə̀ soʼò ùkali â wò.”

¹⁰Ŋwàʼà k-a-zə̀ kìy kamə̀ dzìy sòʼò nəniy nə̀, “Gha yə ghà də wày aghee Dzû, dwiʼi dzəŋə nənìy nə̀ àghee Kəzə̀ yìy!”

¹¹Ŋwàʼà k-a-zə̀ kìy namə dzîy soʼò nəniy nə̀, “Gha yə ghà də wày aghee Dzû, ghà kali Mwe ə̀ mbyi, Gha dzə̀m anə mbyi, ghà kali Kəzə̀.”

¹²Ìzayà maa dzày sòʼò anə ŋwàʼà k-a-zə̀ nə̀, “Wà tu kə Dzesì nì bè dyòʼò tsə kə̀dòŋ. Ù ni saʼa aghû yə̀ ghu də wày aghee Dzû. Ù nî zəŋi tsə nə̀ ghu ki kwu təŋ kə môʼ tə̀ dzoŋə̀ tìy anə ayiə yə ù tɛb na nə̀ ghe kî zəŋə ŋwò.”

¹³Mə gwuŋə̀ nə̀ Zə̀kə̀ kə nyiə̀ nəniy imôʼ yìy â ŋgàŋ anə ayiə yə ù tɛb na ù nyə̀ ghà nə̀ dwiʼi kiy nə̀ ibvay anə ayiə yə ghà bɛmə nəniy awò we. Tə̀ Zə̀kìy zəŋi tsə anə daʼa kə Zwàykə̀zwekiy nə̀ ghà ki tsəŋə niyɛmə yəə kə ŋwô anə imòʼ anə ayiə yə Zə̀kìy tɛb na.

¹⁴Awizə̂ yamə, mə kwu ŋwô nə̀ ghà ŋge zəŋə àyiə àdzoŋə̀ yìy, kwu dzwàb sòʼò àyiə yə Zə̀kìy liə nə̀ ghà kəli, də̀ sòʼò ani tyi dè àyiə awò wù ùmoʼ umòʼ.

¹⁵Mə kwuni twà dzày te fyi bə̀ àyiə àliy mə liə nəniy ani zə̀ŋì fəli bə̀ ghà ate. Mə ghii twà dzày te fyi bə̀ aŋwòə Zə̀kìy kə ŋge dè fòŋə̀ we ìdzòŋə̀ yìy awò mìə̀.

¹⁶Zə̀kìy kə sày mìə̀ nə̀ mə doʼò wè kə̀fàʼ ə̀ Yesù Kə̀litò ani fày àghù yə̀ ghu də wày aghee Dzû. Mə faʼà yəə à də̌ wù ùlwaʼà wìy ani nàʼà ntwùm ə̀ Kə̀zə̀ ìdzòŋə̀ yə̀ awò ghu tə̀ Zwàykə̀zwekiy zəŋi tsə nə̀ aghû yə̀ ghu də wày aghee Dzû ghu zwu doʼò tsə yəə à də̀ fyiə kə ghu nyiə̀ yə̂ nəniy awò Zə̀kìy, fòŋə̀ Kə̀zə̀ dzwàbə̀ soʼò ate.

¹⁷Anə yiə yə mə də fyiə kəmòʼ Yesù Kə̀litò, mə də ŋwô ani fə̀n ìkiykiy anə fàʼ kə̀ mə faʼà nəniy awò Zə̀kìy.

¹⁸Mə way dzə ani kwiʼi uwee anə iyiə ìliy yiy, à mày kə anə ayiə yə Kə̀litò fàʼ nəniy abidzəmə̀ mìə̀. Ù mə zəŋi nə̀ mə fây àghù yə̀ ghu də wày aghee Dzû nə̀ ghu ki zuw yə â Zə̀kìy, anə ntwùm ə̀ Kə̀zə̀ yə̀ mə naʼà nəniy, nə̀ anə ayiə yam àzəŋə yiy.

¹⁹À kə zəŋi mali tə yiə tə nə̀ kwab tə yiə tə nə̀ ghu bɛmə awò Zə̀kìy anə daʼa kə Zwàykə̀zwekiy. Mə kə nàʼà ntwùm ìdzòŋə̀ yə̀ kwùmə̀ yə̀ nə̀ Kə̀litò ani kaʼ ŋwò tsə anə inaʼ i Yèlusalèm zù kwùm này yə̀ inaʼi Ìlilikwùm.

²⁰Mə kwuni ŋge liə tsə ani nàʼà ntwùm ə̀ ìdzòŋə̀ yə̀ a lòʼo tə̀ ghu də kamə zuw nəway iyiə ìliy yiy kwùmə̀ yə̀ nə̀ Kə̀litò, tsìy fyi a lòʼo tə aghee liy yiy zû kaʼ dzə̂ ani nàʼà ate, ani zəŋi tsə nə̀ mə fâʼ yəə à də̌ wù ù bwamə tə̀ ndaw wə ù də biə dzə way ndaw anə tsə kə ndaw kə wù lìy bwam na nəniy.

²¹Ighəd anə yəə ŋwàʼà k-a-zə̀ kìy dzîy nəniy nə̀, “Aghû yə̀ wù kə də kamə dzây kôʼ ìyiə yiy â ghu kwùmə̀ yə̀ nə̀ we, ghu nî kòʼò ŋwò we. Aghû yə̀ ghu kə də kamə kə̀ zuw kôʼ ntwùm ìdzoŋə̀ yə̀ kwùmə̀ yə̀ nə̀ we, ghu nî zuw kyilə ŋwò.”

²²Fàʼ kam kiy tyalə̀ mìə̀ anə ndə̀mə̀ nsòŋə nə̀ mə kə bwîy bù kòʼ dzə̀ gha.

²³Yəə mə kwuni mây dzə̂ nəniy fàʼ kam kiy anə mbwòʼ yə̀ nyiə, fòŋ mə bàŋ miə anə ndə̀mə̀ tə̀ŋə̀mə̀ ani bù kòʼ ghà.

²⁴Mə moʼò nyìə̀ ani bwìy bù kòʼ ghà, mə kî liə ani kòʼ dàŋ tsə̀ ghà abu mə̀ zê nəniy anə inaʼ i Spên, ghà ki fày kə soʼò mìə̀ ani zù awote, nə̀ mə mə dzə̀ dòʼò tsə nə̀ ghà anə fəkəmə̀.

²⁵Mə nyiə̀ kwuni zè a Yèlusalèm ani zù nyə̀ ìfày â àghě Kəzə̀ yə̀ ghu də nəniy awote.

²⁶Aŋwòə aghee Kəzə̀ yə̀ ghu də nəniy a mbwòʼ ə̀ Mèsèdonìyà nə̀ mbwòʼ ə̀ Àkayà, ghu mə tsuw tsə u fyiə wiy ani fày yə̀ àghè la yə ghu də nəniy anə inaʼ i Yèlusalèm.

²⁷Ghu tsə̀m tsə ani fày yə̀ ghu aŋwòə ghu kə mòʼò nə̀ ghu ndzə̂m kwu ani fày ghu. Yəə aghee Dzû kə zəŋi tsə nə̀ aghû yə̀ ghu də wày aghee Dzû nə̀ ghu kəli tsə soʼò lwì kə̀ Zə̀kìy nyiə̀ nəniy, aghû yə̀ ghu də wày aghee Dzû yìy, ghu nìy sòʼò ufyiə wə ghu kə kwu nəniy fày yə̀ àghě Dzû ate.

²⁸A ki bu mə mây kə nəniy awote nyə̀ yə̀ sòʼò ùfyiə wə aghee Kəzə̀ yìy twum bə̂ nəniy awò ghu, mə ki bû kôʼ dâŋ tsə̂ ghà, mə zû dyaŋi a Spên.

²⁹Mə kwu ŋwô nə̀ abu mə bû nəniy, Kə̀litò kì ŋge lwì ŋgàŋ anə sòŋə fə ŋgà kî kwu nəniy ani dòʼò.

³⁰Awizə̂ yamə, mə bwoʼ gha nə̀ wokiy anə izəd i Mwe ə̀ mbyi ə̀ ŋgàŋ Yesù Kə̀litò, bòʼ ìliə yə Zwàykə̀zwekiy nyiə̀ nəniy, nə̀ ghà təm dzəŋi bə̂ mìə̀ ani gwùŋì anə tuw kam.

³¹Ghà gwuŋì nə̀ Zə̀kìy kyiŋì mìə anə wokə ghù yə̀ ghu də kamə bɛmə nə way Zə̀kìy anə inaʼ i Dzùdiyà. Ghà gwuŋì soʼò nə̀ aghee Kəzə̀ yə̀ a Yèlusalèm ki dwiʼi ani nìy ìfày yə̀ mə zê nəniy ani zù nyə̀ awò ghu,

³²tə̀ mə nì də ani bù kwùm nə̀ dwiʼi kiy anə fôŋ abu Zə̀kìy liə nəniy, anə yiə yə ŋgà də ani dzəŋi kəli soŋə fə̀ dzoŋə̀ fìy.

³³Mə gwuŋə̀ nə̀ Zə̀kə̀ ù nyə̀ nəniy ibvay yiy, nə̀ ù ki də nə̀ ghà. I doʼò kə ghii.