Read Isu Lûm 16 Bible Online

Lûm 16 - Isu bible

Lûm 16

¹Mə dziy dzây bə̂ awò ghà nə̀ àzə̀ ə̀ ŋgàŋ ùyəŋi Fùɛbè, ù də̌ wù ùdzòŋə̀ yəə ghà ni fâʼ fwumi nə̀ we. Ù də̌ wè kə̀fàʼ a ndàw Kə̀zə̀ a Sìŋkliyèl.

²Ghà ŋgwam na tsə we anə izəd i Mwe ə̀ mbyi anə yiə aghee Kəzə̀ yìy kwu ani zəŋi ate. Ghà fây kə soʼò we anə iyiə yə ù kì liə nə̀ ghà fây we ate, aŋwòə ù mə ŋge fày ndə̀mə̀ àghù, fày dyaŋi sòʼò mìə̀.

³Ghà toŋə zuw tsə Plìsilìyà we nə̀ Àkwilà, ghu də sòʼò aghee kəfàʼ a Yesù Kə̀litò yəə à də̀ miə.

⁴Ghu kə pfə kè anə iyiə yam. Mə ŋge nyìə̀ zòŋə̀ kə ghu. À kaʼi wày dzə miə mə nyiə̀ nəniy ghu nə̀ zòŋə̀ kìy. Aghee Kəzə̀ anə àghù yə̀ ghu də wày aghee Dzû, ghu nyiə̀ sòʼò zòŋə̀ kə ghu.

⁵Ghà toŋə zuw yə̂ aghee Kəzə̀ yə̀ ghu təmə dzəŋə a ndaw Àkwilà nə̀ Plìsilìyà. Ghà toŋə zuw yə̂ Èpenetùs fwu wam ùtaw wìy. Ù kə də̌ wù ùsəsə wiy ani bɛmə awò Kə̀litò a mbwòʼ ə̀ Esìyà

⁶Ghà toŋə zuw sòʼò Mə̀li, ù mə ŋge fàʼ nə̀ daʼa kiy awo ghà.

⁷Ghà toŋə zuw soʼò Àndonikùs we nə̀ Dzunìyà, ghu də sòʼò aghee Dzû, ghu kə də fwumi nə̀ mìə̀ a ndàw ntsaʼ. Aghee ntwùm ə̀ Kə̀litò ŋge kwu ghu. À kə bɛmə ghu Zə̀kìy isə azoŋə̀ mìə̀.

⁸Ghà toŋə zuw soʼò Àmplìyatùs, ù tòʼò də̌ àzə̀ wam ù sòŋə̀ wìy, ù bɛmə nəniy awò Mwe ə̀ mbyi.

⁹Ghà twoŋə zuw soʼò Ùlbanùs, ù fàʼà dzəŋə nə̀ ghə̀d awò Kə̀litò, nə̀ Stakìs, ù də fwu wam u sòŋə̀ wìy.

¹⁰Ghà toŋə zuw soʼò Àpelès, ù dè bə̂ nəniy anə imùə̀ iwe nə̀ ghe mə bɛmə awò Kə̀litò. Ghà toŋə zuw soʼò ìsəd i ndaw i Àlìstobùlùs.

¹¹Ghà toŋə zuw Helodìyòn, ù də̀ sòʼo wè Dzû, Ghà toŋə zuw soʼò àghù yə̀ ghu bɛmə nəniy awò Mwe ə̀ mbyi anə isəd i ndaw Nàsisùs.

¹²Ghà toŋə zuw soʼò Tìfenà we nə̀ Tìfosà, ghu də aghee kəfàʼ ə Mwe ə̀ mbyi. Ghà toŋə zuw soʼò fwu wam ù dzòŋə̀ wìy Pelsìs. Ù mə ŋge fàʼ nə̀ daʼa kiy awò Mwe ə̀ mbyi.

¹³Ghà toŋə zuw Lufùs, ù tòʼò də̌ wè kə̀fàʼ ùsòŋə̀ wìy awò Mwe ə̀ mbyi, ghà toŋə zuw soʼò zə̂ we, ù ba kwu miə tee à də̌ wà we.

¹⁴Ghà toŋə zuw Àsiŋklitùs, nə̀ Flegòn, nə̀ Helmès, nə̀ Pàtobàs, nə̀ Helmàs, nə̀ aghee liy yə à dzə̀m ghu bɛmə nəniy awò Zə̀kìy.

¹⁵Ghà toŋə zuw tsə Fìlologùs nə̀ Dzuliyà. Ghà toŋə zuw soʼò Nelìyùs, nə̀ àzə̀ we ùyəŋi. Ghà toŋə zuw Olimpàs nə̀ àghě Mwe ə̀ mbyi yə àdzə̀m ù də dzəŋi nə̀ ghu.

¹⁶Ghà myaŋi kəli yə̂ wù ùmoʼ umòʼ anə uzə ghii ani dè tsə nə̀ ghà kwu iliə. Aghê dzə̀m anə ndaw tə udzəŋə tə Kə̀litò, ghu tyoŋə zuw bə̀ ghà.

¹⁷Mə bwoʼo kə̀wo awizə̂ yamə, nə̀ ghà nîy tsə iyɛmì azoŋə̀ àghù yə̀ ghu zəŋə nə̀ ghà salì doʼò, ghu fwələ myaʼà nəniy aghê anə ibɛmə i ghu, kwuni tyi dè ghà nə̀ àyiə àŋwoə̀ yìy, twe myàʼà yə̀ àyiə yə ghu tyi dê awò ghà kwùmə̀ yə̀ nə̀ Kə̀litò. Kə̀ nə ghu təmdzəŋə dzə̀.

¹⁸Aŋwòə aghû yə̀ ghu zəŋə nəniy ndzòʼò àyiə yə, ghu faʼà dzə̀ wày awò Mwe ə̀ mbyi ə̀ ŋgàŋ Kə̀litò. Ghu kwuni fàʼà àyiə unìə̀ u ghu. Ghu nɛbə kyabə tsə̀ àghù yə̀ ibɛmə yiy lay nəniy.

¹⁹Aghee Kəzə̀ àdzə̀m mə zuw yəə ghà gaʼ na nəniy fôŋ tìy ate anə ntwùm ìdzòŋə̀ yìy. À yù də̀ ighe mə dyoʼo nəniy nə̀ ghà. Mə liə nə̀ ghà kəli tsə utwab ani fàʼ àyiə àdzoŋə̀ yìy, ghà kə kwe wo kəli kiy anə iyiə ìbɛbə ìliy yiy.

²⁰Fəkəmə̀, Zə̀kə̀ kə nyiə̀ nəniy ibvay yiy, ù dyemi maʼà Satàn a təŋə ifwe ghii. Mə gwuŋə̀ nə̀ Mwe ə̀ mbyi ə̀ ŋgàŋ dè ghà nə̀ fòŋə̀ we ìdzòŋə̀ yìy.

²¹Timotì, Wù wə̀ mə faʼà dzəŋə nəniy fàʼ k-a-zə̀ kìy nə̀ we, ù tyoŋə zuw bə̀ sòʼò ghà we nə̀ Lusìyùs, nə̀ Dzasə̀n, nə̀ Sòsìpatà, ghu də nəniy aghee Dzû yìy.

²²Miə, Tetìyùs wə̀ twâ nyiə̀ nəniy ŋwàʼà kə̀, mə twoŋə zuw bə̀ sòʼò ghà.

²³Gayòs wə̀ mə suki nəniy a ndàw we a lòʼo kə aghee Kəzə̀ yìy bê dzəŋə nəniy ate, ù tyoŋə zuw bə̀ sòʼò ghà. Elastùs wə̀ ù nia nəniy mbè kə ukhiy kə inaʼ kiy, nə̀ azə̀ ŋgàŋ Kwatùs, ghu tyoŋə zuw bə̀ sòʼò ghà.

²⁴Mə gwùŋə̀ nə̀ Mwe ə mbyi ŋgàŋ Yesù Kə̀litò ù dè fòŋə we ìdzòŋə yìy awò ghà. I doʼò kə ghii.[5]

²⁵Ŋgà nyiə̀ ùkali awò Zə̀kìy aŋwòə à də̀ we ù nyə̀ nəniy ghà nə̀ daʼa kiy nə̀ ghà təmi taw tsə anə ibɛmə ghii. Anə yiə yə mə kə dzây awò ghà a sòŋə fə mə kə naʼà nəniy ntwùm ìdzòŋə̀ kwùmə̀ nə̀ Yesù Kə̀litò awò ghà. Ntwùm ìdzòŋə̀ yə̀ də̌ nù tə ayiə tə̀ soŋə̀ tə̀ Zə̀kìy kə nû na nəniy.

²⁶Abû nyiə, ayiə yə aghee ntwùm ə̀ Kə̀zə̀ yìy kə twâ na nəniy anə ŋwàʼà k-a-zə̀ a mə kwuni zəŋi nə̀ aghê dzɛ̀mə̀ kəli iyiə ìsoŋə̀ yìy anə ayiə yə Zə̀kìy dzây na nəniy, Ù də̌ Zə̀kə̀ kə muə nəniy anə nsòŋə indzə̀m, ani zəŋi tsə nə̀ aghê dzə̀m ə̀ kəli tsə ibɛmə, ghu ki zuw yə soʼo awò Zə̀kìy.

²⁷Ŋgà nyiə̀ mə̀ŋkwiʼi awò Zə̀kìy abidzəmə̀ Yesu Kə̀litò kə anə nsòŋə indzə̀m! À kwu Kəzə̀ utwab u dzə̀m. I doʼò kə ghii.