Read Isu Lûm 2 Bible Online

Lûm 2 - Isu bible

Lûm 2

¹Gha àliy yiy dyoʼò tsə ghà ə saʼa wiy aghê liy yiy, ghà way dzə ani dzày nə̀ ghà kamə kə̀ zəŋi bɛb dzə̂. Abu ghà saʼa wiy nəniy aghê liy yiy, ghà ghi saʼa wiy ìwe nəli aŋwòə ghà zəŋə kə àyiə àbɛbə à moʼo yiy.

²Ŋgà kwu ŋwoə̀ nə̀ Zə̀kìy ndzə̂m də̀ tsitsi ani saʼ aghê àdzə̀m ghu zəŋə nəniy ndzòʼò àyiə yə ghi.

³Afwu yamə, ghà ba ndzə̀mə̀ mòʼò nə̀ abu ghà saʼa nəniy aghê liy yiy anə ayiə yə ghu zəŋə, nə̀ ghà zəŋə kə ìyiə ì moʼo yiy, ghà kî də̀ ani tu fyi mə̀yə isaʼ i Kəzə̀ yìy ə?

⁴Ghà ghî kòʼò nìmə̀ ayiə àdzoŋə̀ yə̀ Zə̀kìy zəŋə nəniy moo fòŋ ə̀ we ì kwê yə̀ ù dè nəniy anə ndaŋ k-a-ghab. Gha kwu way nə̀ sələ kə iyiə kə Zə̀kìy tsəŋə̀ zəŋə kə ayiə àdzoŋə̀ yìy nə̀ ghà, à də̌ nə̀ ù liə nə̀ ghà kyemì ŋwô bə̂ anə ayiə ghi àbɛbə yiy ə̀?

⁵Ghà kwuni taw nə̀ ùtuw wiy, twe màʼà sòʼò ani kyemì ŋwò fyi bə̀ anə ayiə ghi àbɛbə yiy. Ghà ghî zəŋə nə̀ ayiə bɛb mâ yə̂ anə bə̀d kəli ani bu tsuk fə isaʼ fiy kpe tsə nəniy, Zə̀kìy nî dè bə̀ yəə fòŋ ŋə̀mə̀ nəniy we ate azoŋə̀ ghà, ù nî saʼ gha anə isaʼ itsitsi yiy.

⁶Zə̀kìy nî niamə wù ùmoʼ umòʼ anə fàʼ kə̀ ù kə fàʼ nəniy.

⁷Zəkìy nî nyiə̀ imùə̀ itsà awò aghù yə̀ ghu tsə̂ŋ kwu kə ani fàʼ àyiə àdzoŋə̀ yìy, khu tsə̀ sòʼò dzəd ani dòʼò aghè zwe yiy nə̀ ani kəli ŋkwiʼi M-à-zə̀ mìy, nə̀ ìmùə̀ yə̀ i doʼò təŋ nəniy. Zə̀kìy nî nyə̀ ghu nə̀ ìmùə̀ itsà yìy.

⁸Zə̀kìy nî dè fòŋ ə̀ we ì ŋəmə̀ yìy awò àghù yə̀ ghu moʼò təŋə kə iwe i ghu yiy, twe maʼà ìyiə yə i də nəniy ìsoŋə̀ yìy, fə̀d liə kə ani zəŋə ayiə àbɛbə yiy, ù saʼ wiy sòʼò ghu.

⁹Zə̀kìy nî nyə̀ mfəm awò àghû yə̀ àdzə̀m ghu zəŋə nəniy ayiə àbɛbə yiy, ù zəŋi sòʼò nə̀ ghu fii. Ani kaʼ ŋwò tsə nə̀ aghee Dzû, zù dyaŋi nə̀ à ghù yə̀ ghu də wày aghee Dzû.

¹⁰Zə̀kìy nî kwuni nyiə̀ kə̀daʼa, nə̀ ŋkwiʼi miy, nə̀ ìbvay yiy awò aghû yə̀ àdzə̀m ghu zəŋə nəniy ayiə àdzoŋə̀ yìy, ani kaʼ tsə nə̀ àghě Dzû, zù dyaŋi nə̀ àghù yə̀ ghu də wày aghee Dzû.

¹¹Zə̀kìy saʼa àghè dzə̀m ighəd.

¹²Aghû yə̀ ghu də kwu way ayiə yə lâŋ k-a-zə̀ kìy dzîy nəniy Zə̀kìy nî namə nyə̀ ŋwǒ ghu nə̀ mfəm anə ayiə àbɛbə yə ghu kə zəŋi nəniy, yəə ghu də bòʼ kwu kə way lâŋkìy. Aghû yə̀ ghu kwu nəniy ayiə yə lâŋ kìy dzîy nəniy, ghu namə zəŋə ayiə àbɛbə yiy, Zə̀kìy nî saʼa ghu an-a-làŋ.

¹³Zə̀kìy zəŋə àghù yə̀ ghu zuw nəniy lâŋkìy nə̀ ghu doʼò tsitsi, à wày dzə à yuu ghu mâŋ kwu nəniy yəə lâŋkìy dzîy, nə̀ ghu zuw way lâŋkìy.

¹⁴Aghû yə̀ ghu də wày aghee Dzû, ghu faʼà yə̀ fyiə kə lâŋkiy dzîy nəniy nə̀ ghu boʼò kwu way lâŋkìy, màŋə̀ fàʼà sòʼò.

¹⁵Ayiə yə ghu zəŋə a dê tsə nə̀ ayiə yə ulâŋ wìy dzîy nəniy a twâ dòʼò anə fòŋ tə ghu. Fôŋ tə ghu tiy saʼa ŋwò ghu nə̀ Zə̀kìy də zə̀d màʼà ìbɛb ighu moo ù də̀ ani saʼ wiy ghu yə.

¹⁶Àyu də ayiə yə ani fyiə nəniy anə ntwum yə mə nìʼà nəniy. Zəkìy nî saʼa nù tə yiə tə tə də anə mùə̀ tə ghù dzə̀m abidzəmə̀ Yesù Kə̀litò.

¹⁷Gha ə liy yiy tyoŋə iwee nəli nə̀ ghà də aghee Dzû. Ghà gaʼ na təŋ kə tə̀fòŋ anə yiə yə ulâŋ u Musîs wìy dzîy nəniy. Ghà kwoʼo sòʼò ìwe nə̀ ghà də a ghee Kəzə̀.

¹⁸Ghà kwu ŋwô fyiə kə Zə̀kìy liə nə̀ ghà zəŋi. Ghà mə zwiʼi kəli sòʼò anə ulàŋ ani sày fyiə kə̀ kə də nəniy tsitsi.

¹⁹Ghà ndzə̂m kwu ŋwô nə̀ ghà də aghû yə̀ ghà tyàlə̀ nəniy aghê fɛbə yiy, ghà də sòʼò yəə à də̀ təkaʼì awò aghù yə̀ ghu də nəniy an-a-ləm.

²⁰Anə yiə yə utwab wiy də nəniy anə ulàŋ u Kəzə̀ nə̀ àyiə àsoŋə̀ yìy, ghà mboʼò də ŋwô nyiə ani tswə̀ aghù yə̀ ghu liʼà nəniy nə̀ àwa fəghàŋ yìy.

²¹Ghà də mə̀ yiə ani tyi dè àyiə awò àghè liy yiy nə̀ ghà way ani tyi dè anə iwè nəli yə? Ghà tyi dè awò aghù yìy nə̀ i dzwàbə̀ wày ani tsoŋ, ghà kwuni tsoŋə nəniy.

²²Ghà tyi dè awò àghù yìy nə̀ i dzwabə̀ wày ani nə̀ŋì nə̀ aghiy ghě liy yiy moo aŋəm ə ghè liy, ghà kwuni niŋə̀ nəniy nə̀ àghiy ghù yìy nə̀ ŋəmə ghù yìy. Ghà tyi dè nə̀ i dzwàbə̀ dzə̀ wày ani fwùlì mə̀mwòʼo, kwuni tsoŋə fyiə ùfyiə anə lòʼo tə ghu fwulə̀ nəniy mwòʼo miy ate.

²³Ghà kwoʼo ìwe kwùmə yə̀ nə̀ ùlàŋ wìy, kwuni twe ani zəŋi ayiə yə ulâŋ u Musîs wìy dzîy nəniy, nìy bə̀ tuw kə̀ dələ kiy awò Zə̀kìy.

²⁴I bvwami də̀ ighəd anə yiə yə ŋwàʼa k-a-zə̀ kìy dzây nəniy nə̀, “À də̌ bòʼ ghà aghee Dzû, aghû yə̀ ghu də wày aghee Dzû ghu nyiʼà nəniy Zə̀kìy.”

²⁵Abu ghà na tsə nəniy ayiə yə ulâŋ u Musîs wìy dzîy nəniy, à ki də yəə ghu mə ghà gwùmì. Abu ghà də kə̀ kwuni na nə way ayiə yə ulâŋ wìy dzîy nəniy, à ki də yəə ghu ghaa kamə kə̀ gwùmì dzə̂.

²⁶I dê tsə nə̀ abu aghû yə̀ ghu də wày aghee Dzû zəŋi tsə nəniy ayiə yə ulâŋ wìy dzîy, à ghî də nə̀ ghu bvwami də̀ aghu yə̀ ghu gwùmì na dzə̂ nəniy ghu

²⁷Aghû yə̀ ghu də wày aghee Dzû kî saʼa wiy ŋwò gha aghee Dzû aŋwòə ghà nia dzə̀ wày ayiə yə̀ à də nəniy anə ulâŋ Musîs wə̀ ù kə twâ na nəniy awò gha, gwùmì na sòʼò ghà anə yiə yə ulâŋ wìy dzîy. Ghu kwuni nia ŋwò ulâŋ wìy nə̀ ghu kə boʼò gwùmì na dzə̀ ghu anə yiə yə ulâŋ wìy dzîy nəniy.

²⁸Wù wə̀ ù ba də nəniy wè Dzû à də̌ wù wə̀ ghu gwùmì tsə dzə̀ fòŋə we à wày dzə̀ wù wə̀ ghu mâŋ zù gwùmì tsə nəniy tu kə we kiy.

²⁹Awò wù ani ndzə̀m dòʼò tsə wè Dzû, à də abu ù muə nəniy anə ayiə yə ulâŋ wìy dzîy nəniy aŋwòə ndzə̀m ndzə̀m kə igwùmì kìy də anə fôŋə̀ wù, à wày dzə anə uwè. À də̀ Kəzə̀ kə kyalə nəniy wù à wày dzə wè mbyi.