Read Isu Lûm 4 Bible Online

Lûm 4 - Isu bible

Lûm 4

¹A də ani dzày tsə nə̀ìndiə kwùmə̀ yə̀ nə̀ tè nə̀ tèe ŋgàŋ Ablàhâm ə? À kə fyi kìə̀ a tsuk u Ablàhâm anə gùw ùwè ə̀ we?

²Bəə à kə də nə̀ Zə̀kìy kə kòʼò Ablàhâm nə̀ ù də̌ wù tsitsi wiy nə̀ à də̀ ayiə à zəŋə yiy, tee Ablàhâm ə kə kwu iyiə yiy ani fə̀n ìkiykiy ate, à kwuni wày dzə ghi anə sə k-a-zə̀.

³Ŋwàʼà k-a-zə̀ kìy dziy nə, “Ablàhâm kə bɛmə kə Kə̀zə̀, à kə də̌ bòʼ ìbɛmə i we Zə̀kìy kə kôʼ nəniy nə̀ ù də̀ tsitsi.”

⁴Wù ù fàʼà nəniy ukhiy wə ghu tsəə nəniy wè ate, à wày dzə kənamə ghu niamə yə̂ nəniy we ate, à də̀ fyiə kə ghu mə̀ kwu ani tsə we ate anə fàʼ kə we kə ù fàʼ nəniy.

⁵Wò kwuni wày dzə ani zəŋi nə̀ Zə̀kìy kôʼ nə̀ wò də̀ tsitsi bòʼ ìyiə ìliy yiy wò zəŋi nəniy. À də̀ ibɛmə yə wù kwu nəniy i zəŋə nə̀ Zə̀kìy zəŋi wù ù bɛbə̀ wìy dòʼò tsə tsitsi anə səkə Kəzə̀.

⁶Devìd kə twà sòʼò ìyiə ì moʼo yiy anə ŋwàʼà k-a-zə̀. U tyi dè bə̀ ndzòʼò lwì kə̀ kə bê nəniy awò àghù yə̀ ghu də nəniy tsitsi anə sə k-a-zə̀ nə̀ ghu kə̀ bôʼ zəŋi nəway iyiə ìliy yiy i kwoʼ kpe nəniy ndzòʼò ùlwì wə̀. U twà tsə nə̀,

⁷Dwiʼi kiy ŋge də̀ awò aghù yə̀ Zə̀kìy nîyzə̀ dzə̂ ŋwuni kə ghu kə kwu nəniy. Sùw ŋwò mà tsə sòʼò àyiə ghu àbɛbə yiy.

⁸Dwiʼi kiy də awò wù wə̀ Mwe ə̀ mbyi nî də wày dzə ani twà na ayiə we àbɛbə yiy.

⁹Ùlwì wə̀ Devìd kə dzây nəniy, u də kə awò àghě Dzû ghu kə gwumì nəniy ghu moo u də sòʼò ŋwô awò àghù yə̀ à də wày aghee Dzû yiy ghu kə də kə̀ gwumì nəway ghu ə? Ghu twâ na anə ŋwàʼà K-a-zə̀ nə̀, “Ablàhâm kə bɛmə Kəzə̀,” bòʼ ìbɛmə i we, Zə̀kìy nìy we nə̀ à də̌ wè tsitsi.

¹⁰Ayiə yə̀ kə kwuni fyi zəŋi? À kə də̌ nə̀ ghu mə gwùmì Ablàhâm moo nə̀ ghu kamə gwùmì we yə? A kə fyi nə̀ ghu kamə kə̀ gwùmì dzə̂ we.

¹¹Ghu kə we gwùmì nə̀ ayiə yə̀ mə tsìy ŋwò. Igwumì yə̀ ghu kə gwumì nəniy we ate à kə də̌ ani dè tsə tsə̀e nə̀ Zə̀kìy kə we bɛmə nə̀ u də̌ wè tsitsi â ghu ani gwùmì we bòʼ ìbɛmə i we yə ù kə kwu nəniy awò Zə̀kìy. À yù də̀ ighe Ablàhâm də tè àghè dzə̀m ghu də nəniy tsitsi anə sə k-a-zə̀ bòʼ ìbɛmə yə ghu kwu nəniy, yəə ghu də kə nə̀ ghu kə̀ gwumì na nəway ghu.

¹²Ì yû dè bə̀ sòʼò nə̀ Ablàhâm də̌ tè àghù yə̀ àdzə̀m ghu gwùmì na dzə̂ nəniy ghu, ghu bɛmə sòʼò awò Zə̀kìy anə yiə yə Ablàhâm kə bɛmə soʼò â ghu ani gwùmì we.

¹³Zə̀kìy kə tɛb na awò Ablàhâm nə̀ àwiwa we nə̀ à kwu ghu mbyi yə. Zə̀kìy kə kə̀ nyiə̀ dzə̂ tɛb kə bòʼ yiə yə Ablàhâm kə na nəniy ulâŋ wìy. À kə kwuni də̌ nə̀ ù bɛmə ŋwô â Zə̀kìy, Zə̀kìy nìy sòʼò we nə̀ à də̌ wè tsitsi.

¹⁴Bəə tɛb k-a-zə̀ kiy mə̀ fə̀ də̀ awò aghù yə̀ ghu nia nəniy lâŋ kìy, ibɛmə yiy mə də kwu way fàʼ kìy, tɛb kiy mə də fyiə kə mkpə̀mkpə̀m kìy.

¹⁵Zə̀kìy ŋəmə̀ tsə̀ nə̀ fòŋ abu aghê zaʼ tsə nəniy lâŋ kə we kiy. Loʼo kə lâŋ kìy də kwuni wày ate, wù wày dzə ani zaʼ dzə̀ kə̀làŋ.

¹⁶Yəə i də nəniy ghii, tɛb k-a-zə̀ kìy də awò àghù yə̀ ghu bɛmə nəniy â Zə̀kìy, tə̀ ghu ki kəli fyiə kə Zə̀kìy. Tɛb kə̀ kaʼi wày təŋ dzə awò àwiwa ə Ablàhâm yə̀ ghu kwu nəniy lâŋ kìy.Tɛb kə ghà kə̀ də̀ sòʼò awò àghè dzə̀m bòʼ ìbɛmə yə ghu kwu nəniy â Zə̀kìy anə yiə yə Ablàhâm kə kwu soʼo. Ablàhâm də̌ təli â ghù yə̀ àdzə̀m ghu bɛmə nəniy â Zə̀kìy.

¹⁷I twâ dòʼò anə ŋwàʼà k-a-zə̀, nə̀ “Ablàhâm kə kwu ani bù dòʼò təli awò ndə̀mə̀ àghù.” Zə̀kìy kə zəŋi nə̀ tɛb kə̀ bù dòʼò kə̀soŋə̀ kìy, aŋwòə Ablàhâm kə kwu ibɛmə azoŋə̀ Kə̀zə̀, Zə̀ kə̀ kə kwu nəniy daʼa kiy ani zɛ̀mə̀ ŋwò dzwoŋi bə̀ àghè pfə yiy, kwu sòʼò kədaʼa ani zəŋi ufyiə ù fyiə wiy.

¹⁸Ablàhâm kə kwu ibɛmə nə̀ ìmòʼ yiy awò Zə̀kìy, yəə ù kə̀ də bòʼò kamə kòʼò dzə̀ wày fyiə kə Zə̀kìy kə tɛb na a we nə, “Awiwa yiə̀ yìy nî dùw tsə tee mənsǐbə̂d.” Zə̀kìy zəŋi tsə ù bù dòʼò bə̀ “Təli awò ndə̀mə̀ tə̀nàʼà.”

¹⁹Ibɛmə i Ablàhâm yìy kə kə̀ bû lay kôʼ dzə̂ nəway, bù kwùm bə̀ asòŋə fə ù kə də nəniy ŋəmə̀ tìy fə bwam, yəə ù kə lya tsə uwee u we wiy nə̀ ù mə dzwə̀n mà, u lya tsə sòʼò Sèla nə̀ ù kàm way ani byi wa.

²⁰Ablàhâm kə kə̀ kwuni sə̂m dzə̂ nəway Zə̀kìy anə tɛb kə ù kə tɛb na nəniy. Ibɛmə i we yiy maa zəŋi we nə̀ ù si taw dzwabə. U nyə̀ sòʼò mə̀ŋkwiʼi â Zə̀kìy.

²¹Ablàhâm kə ndzə̀m kwu təŋ ŋwô nə̀ Zə̀kìy kî zəŋə ŋwò àyiə yə ù tɛb na nəniy ani zəŋi.

²²Ayu də ighe ibɛmə i Ablàhâm yìy kə zəŋi nə̀ Zə̀kìy nìy we nə̀ à də̌ wè tsitsi.

²³Ani dzày tsə nə̀ “Zə̀kìy kə nìy we nə̀ à də̌ wè tsitsi.” Ghu kə kə̀ twâ na təŋ dzə̂ awò we.

²⁴Ghu kə twâ na sòʼò awò ŋgàŋ yə̀ Zə̀kìy kî nìy soʼò ŋgaŋ nə̀ a də aghee tsitsi yiy, a bɛmə nəniy awò Zə̀ kə̀ kə kə zɛ̀mə̀ ŋwô bə̂ Yesù Mwe ə̀ mbyi ə̀ ŋgàŋ anə ipfə.

²⁵Zə̀kìy kə twum bə̀ Yesù nə̀ ù bù pfə anə ayiə ŋgàŋ àbɛbə yiy, ù zɛmə̀ ŋwò dzwoŋi bə̀ we ani pfə ani zəŋi tsə ŋgaŋ nə̀ ŋgà doʼo tsə tsitsi anə sə K-a-zə̀.