Read Isu Lûm 5 Bible Online

Lûm 5 - Isu bible

Lûm 5

¹Anə yiə yə Zə̀kìy bɛbə dzə̂ ŋgaŋ nyiə dzìy nə̀ ŋgà də tsə tsitsi anə səkə we bòʼ ìbɛmə i ŋgàŋ â Mwe ə̀ mbyi ə̀ ŋgàŋ, Yesù Kə̀litò, ŋgà muə nyìə̀ anə ibvay nə̀ Zə̀kìy.

²Ibɛmə yə ghè kwu nəniy â Kə̀litò, i mə zəŋi nə̀ ŋgà kəli tsə fòŋə̀ ìdzòŋə̀ yə̀ Zə̀kìy dê nəniy nyiə awò ghə̀d. À də nəniy fyiə kə Zə̀kìy zəŋə nyiə awò ŋgàŋ. À yù də ighe ŋga ghaa iwee yiy dyoʼo sòʼò anə imòʼ ìdzoŋə̀ yə̀ ŋgà kwu nəniy ani muə̀ nə̀ Zə̀kə̀ ù də nəniy wù ùsòŋə̀ wìy.

³Yəə ghè fyaʼa kə ghi, ghè namə səaŋə kə ŋwò. Kwu təŋ sòʼo nə̀ yə ghè fyaʼa nəniy ghii Zə̀kìy kî zəŋə tsə nə̀ ghè ə kwû tsə təfôŋ.

⁴Abu ghè kwû tsə fôŋ tìy, ghè ki də ani təmi taw tsə, ghè ki də ani zəŋi ayiə yə a də nəniy tsitsi anə sə K-a-zə̀. Zə̀kìy ki də soʼo ani dyoʼo nə̀ ghə̀d. Abu Zə̀kìy dyoʼo nə̀ ghə̀d, ghè ki kwu môʼ tə̀dzoŋə̀ tìy anə tɛb K-a-zə̀.

⁵Imôʼ yə̀ ghè kwu nəniy i kî bvə̀ màʼà dzə̀ wày ghəd. Ayiə yə ghi àdzə̀m a fyiə aŋwòə Zə̀kìy mə nyiə̀ ghəd nə̀ Zwàykə̀zwekiy, Ù zəŋi nəniy nə̀ ghè kəli tsə anə fòŋ tələ nə̀ Zə̀kìy ŋgee liə ŋwò ghəd.

⁶Kə̀litò kə pfə anə sòŋə fə̀ dzòŋə̀ fə̀ ŋgà kə də wày ani fày ìwe i ŋgàŋ. Ŋgà kə də̀ aghê bɛbə yiy.

⁷I toʼo taw â wù lìy ani pfə anə tuw kə wù wə̀ ù də nəniy tsitsi. Wù lìy nyə̀ ni də ŋwô ani kəli fòŋ ì taw yìy ani pfə anə tuw kə wù wə̀ ù zəŋə nəniy ayiə àdzoŋə̀ yìy.

⁸Zə̀kìy kə kwuni dè ìliə yə ù kwu nəniy â ŋgàŋ. U twum bə̀ Kə̀litò nə̀ ù bù pfə anə utuw ŋgàŋ nə̀ a də aghê bɛbə yiy.

⁹Ŋgà mə dòʼò tsitsi nyiə anə sə K-a-zə̀ bòʼ kàŋ tə̀ Kə̀litò kə ndzaay nəniy anə utuw ŋgàŋ. I də nə̀ Kə̀litò kì bii ŋwò fyiə bə̀ ŋwò ŋgaŋ tə̀ Zə̀kìy ki də kə̀ nyiə ŋgàŋ nə̀ mfəm.

¹⁰Zə̀kìy kə dzwə nə̀ ŋgàŋ, ŋgà ə dzwə sòʼò nə̀ Zə̀kìy, u fə̀d zəŋi tsə nə̀ ŋgà doʼò tsə anə ibvay nə̀ we abidzəmə̀ ìpfə i Wà Kə̀zə̀. Yəə ŋgà də nəniy nyiə anə fyiə kəmòʼ nə̀ Zə̀kìy, Kə̀litò kì bii fyiə ŋwò ŋgaŋ anə imuə̀ i we ù tsìy fyi, ŋwòə ù də̌ ùtâw wìy.

¹¹Ani dzày kwe fwuli tsə, ŋgà səaŋə aŋwòə Zə̀kìy ma twum bə Mwe ə̀ mbyi ə̀ ŋgàŋ Yesù Kə̀litò nə̀ ù bù zəŋi tsə nə̀ ŋgà kəli tsə fyiə kəmòʼ nə̀ Zə̀kìy.

¹²Adàm kə zəŋi iyiə ìbɛbə yiy, ibɛb i ghà yə̀ ə nìy bù nə̀ ìpfə yiy anə mbyi. Aghê àdzə̀m mə zəŋi bɛb, i dè tsə nə̀ aghê dzə̀m ə̀ kwu ani pfə.

¹³Ibɛb yiy kə bù dzə̀ anə mbyi isə awò làŋ kìy ani bù. Ghu kə kə̀ kôʼ dzə̂ nəway iyiə ìbɛbə yiy aŋwòə lâŋ kìy kə wày dzə.

¹⁴Ani kwuni kaʼ ŋwò tsə anə sòŋə fə Adàm zù kwùm anə soŋə fə Musîs, aghee dzə̀m kə də̀ aghee pfə yiy anə sə K-a-zə̀, zù kwùm yə̀ azoŋə̀ àghù yə̀ ghu kə də kə̀ boʼò zəŋi nəway ndzòʼò ìbɛb yə Adàm kə zəŋi nəniy. Adàm kə də̀ tsəe kə Kə̀litò wə̀ ù kə bû nəniy ibàm.

¹⁵Adàm kə kwuni wày dzə ighəd nə̀ Kə̀litò aŋwòə fòŋə Kə̀zə̀ ì dzoŋə̀ yiy way dzə ighəd nə̀ ìbɛb yə Adàm kə zəŋi nəniy. I də ìsoŋə yìy nə̀ ndə̀mə̀ àghè maa pfə dòʼò anə sə K-a-zə̀ bòʼ ìbɛb i wù wə̀ ùmòʼ. Fòŋə Kə̀zə̀ ì dzoŋə yìy nə̀ namə kə Zə̀kìy kə nyiə̀ awò ndə̀mə̀ ghù, abidzəmə̀ Yesù Kə̀litò ù kə dê nəniy fòŋə̀ ìdzòŋə̀ yìy ate awò aghee dzə̀m mə dzwàb tsìy fyi ibɛb yə Adàm kə zəŋi nəniy.

¹⁶Namə kə Zə̀kìy nyiə̀ kə ŋge kwu kə kwuni nə̀ ìbɛb yə Adàm kə zəŋi nəniy. Ibɛb yə Adàm kə zəŋi nəniy i nîy bə̀ mfəm. Akwuni bû namə kə̀ Zə̀kìy nyiə̀ nəniy, kə mə zəŋi nə̀ ŋgà doʼò tsə tsitsi anə sə k-a-zə̀, yəə ŋgà boʼò zəŋi kə nəniy ndə̀mə̀ àyiə bɛbə yiy anə ndə̀mə̀ nsòŋə.

¹⁷Ipfə yiy kə saʼa tsə̀ yəə à də̀ kədòŋ bòʼ ìbɛb yə Adàm kə zəŋi nəniy. I ghè yə̀ kwuni wày dzə ani byàlì nə fyiə kə Yesù Kə̀litò zəŋi. Zə̀kìy mə dè ŋgaŋ nə̀ fòŋə we ìdzoŋə̀ yìy, zəŋi sòʼò nə̀ ŋgà ə doʼò tsə tsitsi anə sə kə we bòʼ Yesù. À yù də̀ ighe ŋgà kwu nəniy ani mùə̀, a si saʼa soʼo yəə à də̀ udòŋ.

¹⁸I dê tsə nə̀ Zə̀kìy kə kwu ani nyə̀ àghè dzə̀m nə̀ mfəm bòʼ ìbɛb yə Adàm kə zəŋi nəniy. À də̌ bòʼ ayiə àdzoŋə̀ yə̀ Yesù kə kwuni zəŋi nəniy a zəŋi tsə nə̀ Zə̀kìy bɛmə nə̀ ŋgà də tsitsi anə sə kə we, nyə̀ sòʼò ŋgàŋ nə̀ imùə̀ ìfyiə yiy bòʼ ìyiə ìdzoŋə̀ yə̀ Yesù zəŋi nəniy.

¹⁹Adàm kə kə̀ zuw nəway awò Zə̀kìy, ayiə ghè yə̀ zəŋi tsə nə̀ aghee dzə̀m dòʼò àghè bɛbə yiy anə sə K-a-zə̀. Yesù ə kwuni zuw yə̀ awò Zə̀kìy, ayiə ghè yə̀ zəŋi tsə nə̀ aghee dzɛ̀mə̀ dòʼò tsə tsitsi anə sə K-a-zə̀.

²⁰Ghu kə ùlàŋ wìy twâ na ani zəŋi tsə nə̀ ibɛb yiy ba dê fyi kə uwee anə mùə̀ tə ghù. Loʼo kə aghê kə ŋge zəŋi nəniy ibɛb yiy ate, Zə̀kìy ŋge dè tsə fòŋə we ìdzòŋə̀ yìy anə lòʼò kə ghè kə̀.

²¹I dê tsə nə̀ Ibɛb yiy kə kwu kədaʼa aŋwòə aghê dzə̀m maa pfə dòʼò anə sə K-a-zə̀. Dzəd yə Zə̀kìy dê nəniy fòŋə̀ we ìdzòŋə̀ yìy ate ì kwu kə daʼa aŋwòə ù zəŋə nə̀ aghê si də tsitsi anə sə kə we, zəŋə sòʼò nə̀ ghu kəli imuə̀ itsà abidzəmə̀ Yesù Kə̀litò, Mwe ə̀ mbyi ə̀ ŋgàŋ.