Read Isu Lûm 6 Bible Online

Lûm 6 - Isu bible

Lûm 6

¹Ŋgà də ani ba dzày tsə nə indiə nyiə̀? A si tsəŋə zəŋə yə kə ayiə àbɛbə yiy, tə Zə̀kìy ki kwu kə ani dè ŋgàŋ nə̀ fòŋə̀ we ìdzòŋə̀ yìy ə?

²Hày, ŋgà kə kâm zə̀ŋi sòʼò ayiə àbɛbə yiy. Abu ŋgà pfə doʼò nəniy anə sə K-a-zə̀ bòʼ ìbɛb yə ŋgà zəŋə nəniy, ŋgà də mə̀yiə ani kam muə kə ayiə ə bɛbə yiy ə?

³Ghà kwu wày nə̀ yəə ŋgà kə nîy kə nəniy mwi m-à-zə̀ miy Zə̀kìy kə təm na dzəŋi yə̀ ŋgàŋ anə fyiə kə mòʼ nə̀ Yesù Kə̀litò, ŋgà ə dòʼò sòʼò fyiə kə mòʼ nə̀ Yesù anə ipfə i we.

⁴Soŋə fə ŋgà kə nîy nəniy mwi m-à-zə̀ mìy, i kə ghi dè tsə nə̀ ŋgà mə pfə, ghu mə kələ fwumi sòʼò ŋgàŋ nə̀ Kə̀litò, ani zəŋi tsə nə̀ ŋgà mùə̀ sòʼò ìmùə̀ ì fyiə yiy anə yiə yə tè mbyi, Zə̀kìy kə zɛmə̀ ŋwò bə̂ nəniy Yesù ate anə ipfə anə daʼa kə we kə̀soŋə̀ kìy nə̀ ù si muə.

⁵Yəə ŋgà dòʼò dzə̂ anə fyiə kə mòʼ nə̀ Yesù, ŋgà pfə soʼò anə yiə yə ù kə pfə nəniy, ŋgà kî namə dyòʼò anə fyiə kə mòʼ nə̀ we ani bu Zə̀kìy nî zɛ̀mə̀ ŋwò kə nəniy ŋgaŋ anə ipfə anə yiə yə ù kə zɛmə̀ ŋwò kə nəniy Yesù ate.

⁶Ŋgà kwu ŋwô nə̀, à də̀ yəə ghu kə baa na dzəŋi imuə̀ i ŋgàŋ ì wiy yə anə kàʼ fə təzəd nə̀ Yesù ani byɛbi màʼà tsə daʼa kə imùə̀ ì bɛmə yə, tə̀ ŋgà kə kâm dòʼò sòʼò ukwə̂d wìy ani fàʼ àyiə àbɛbə yiy.

⁷Ŋgà kwu ŋwô nə̀ abu ŋgà pfə tsə nəniy, ibɛb yiy kàm kwu dzə̀ way daʼa kiy azoŋə̀ ŋgàŋ.

⁸Yəə i dê nəniy nə̀ ŋgà mə pfə anə yiə yə Kə̀litò kə pfə nəniy, ŋgà kwu ibɛmə nə̀ a nî dyòʼò dzwəŋə bə utaw tə̀ a mùə̀ fwumi nə̀ we.

⁹Yəə ù kə pfə nəniy, Zə̀kìy ə zɛ̀mə̀ ŋwò dzwoŋi bə̀ we anə ipfə. Ù nì kàmə̀ pfə fwuli dzə̀ wày. Ŋgà kwu ŋwô nə̀ ipfə yiy kâm kwu dzə̀ way daʼa kiy azoŋə̀ Kə̀litò.

¹⁰Ipfə yə Kə̀litò kə pfə nəniy, ù kə pfə anə bɛb tə aghê kə zəŋə nəniy, ù nì kàm pfə kòʼ wày. I də ìsoŋə̀ yìy anə nsòŋə indzə̀m. Yəə ù muə nəniy nyiə, ù mùə̀ ani zəŋi tsə nə̀ Zə̀kìy si dyoʼo.

¹¹À də ighəd, ghà kwu ani kəli tsə nə̀ ibɛb yiy kâm kwu dzə̀ way daʼa kiy azoŋə̀ ghà. Ghà kwuni də̀ utaw nyiə awò Zə̀kìy abidzəmə̀ Yesù Kə̀litò.

¹²Ghà kə zəŋi dzə̀ nə̀ ibɛb yiy kəli kədaʼa anə iwè nəli yə i də mùə̀ tsà wày, tə̀ ghà ki də wày dzə ani zəŋə ayiə àbɛbə yə iwee nəli yiy liə.

¹³Kə̀ na dzə̀ bə̂d kə uwè kəli kə̀liy kiy nə̀ kə dòʼò kə̀kwə̀d ani zəŋi nə̀ wò zəŋi ayiə àbɛbə yiy. Ghà kwuni ba nyiə̀ yə̂ iwe nəli awò Zə̀kìy yəə à də̀ àghû yə̀ Zə̀kìy zɛmə̀ ŋwò dzə̂ anə ipfə nə̀ ghu də àtaw yiy. Ghà nyiə̀ yə̂ ìwe nəli idzəm idzə̀m ani faʼa ayiə yə a də nəniy tsitsi anə sə k-a-zə̀.

¹⁴Ghà kə bɛmə dzə̀ nə̀ ibɛb yiy kəli kə daʼa azoŋə̀ ghà, aŋwòə ghà muə dzə̀ way anə yiə yə lâŋ kìy dzîy nəniy. Ghà kwuni muə bòʼ fòŋə̀ Kə̀zə̀ ìdzòŋə̀ yìy.

¹⁵Ŋgà kwu dzə̀ way ani zəŋə ibɛb yiy aŋwòə ŋgà muə dzə̀ way anə yiə yə lâŋ kìy dzîy nəniy, ŋgà muə bòʼ fòŋə̀ Kə̀zə̀ ì dzòŋə̀ yə̀ ù dè nəniy â ŋgàŋ.

¹⁶Ghà kwu ŋwô nə̀ abu wù nyə̀ yəə ùwee uwe wiy ani zuw â wù lìy wìy yəə à də̀ kəkwə̂d, u ndzə̀m dòʼò yə̀ kə̀kwə̀d â wù wə̀ ù zuw nəniy â we ə̀? Ghà də ani dòʼò kə̀kwə̀d awò ìbɛb yiy ghà pfə, ghà də sòʼò ani dòʼò ùkwə̀d â Zə̀kìy ani zuw ayiə we yiy, ghà doʼò tsitsi anə sə kə we.

¹⁷Mə nyiə̀ zòŋə̀ k-a-zə̀ nə̀ yəə ghà kə bòʼò də̀ ukwə̂d awò ìbɛb yiy, ghà mə nìy fôŋ tii tiy ani dzwùmì yə̀ ayiə àsoŋə̀ yə̀ ghà kə zuw nəniy yəə ghu kə tyi dê nəniy awò ghà.

¹⁸Zə̀kìy mə fày fyi ŋwò bə̀ gha anə daʼa kə ibɛb yiy kə kwu azoŋə̀ ghà, ghà nyiə də̀ ukwə̂d ani fàʼ ìyiə yə i də nəniy tsitsi anə sə k-a-zə̀.

¹⁹Mə ghî àyiə kəkwə̀d yə̀ tyi dzìy bə̀ â ghà ani zəŋi tsə nə̀ ghà zuw kəli dzwâb tsə ayiə yə mə dzîy nəniy. Ghà maa nìy gûw tə iwè təli tiy nyə̀ nə̀ tə doʼò ùkwə̀d awò ayiə àdzəə yiy nə̀ ìbɛb yiy ani zəŋi ayiə àbɛbə yiy. Ghà kwu ani nyə̀ yə̀ sòʼò iwe nəli ìdzə̀m ani dòʼò ùkwə̀d ani fàʼ àyiə yə a də nəniy tsitsi anə sə k-a-zə̀ tə̀ ghà ki zəŋi yə̂ ayiə à zwe yiy.

²⁰Yəə ghà kə nam də ukwə̂d wìy awò ibɛb yiy, ghà kə zəŋə dzə̀ wày ayiə yə a də nəniy tsitsi anə sə k-a-zə̀.

²¹Ghà kə nyi fyi kə kyìə̀ yə ghà kə zəŋə nəniy ndzòʼò àyiə yə utuw dələ̀ nəniy gha ani zəŋi nyiə ə? Ayiə àbɛbə yə ghà kə zəŋə nəniy, a bê nə̀ ìpfə yiy.

²²Yəə Zə̀kìy fây fyi dzə̂ gha nyiə anə daʼa kə ibɛb, ghà kwu kə ani dòʼò tsə ukwə̂d awò Zə̀kìy, tə̀ i ki zəŋi tsə gha, ghà si də aghê zwe yiy, ghà kəli tsə soʼò ìmùə̀ itsà.

²³Namə kə ayiə àbɛbə kiy də ipfə, Zə̀kìy kwunə nyìə̀ ìmùə̀ itsà kə̀ŋwôŋwò abidzəmə Yesù Kə̀litò, Mwe ə̀ mbyi ə̀ ŋgàŋ.