Read Isu 1 Kolìn 1 Bible Online

1 Kolìn 1 - Isu bible

1 Kolìn 1

¹À ŋwàʼà kə̀ twà mìə̀ Pôl, wù wə̀ Zə̀kìy sây kə nəniy nə̀ ù dòʼò wè ntwùm ə̀ Yesù Kə̀litò. Mə də nə̀ Sòstên, àzə̀ ŋgàŋ, ù bɛmə nəniy Zə̀kìy.

²Mə twâ yə̀ ŋwàʼà kə̀ awò àghù yə̀ ghu bɛmə nəniy Zə̀kìy a Kolìn, twà yə̀ sòʼò awò àghù yə̀ àdzə̀m Zə̀kìy toŋə tsə nəniy ghu nə̀ ghu doʼò àghè i ghe à zwe yə ghu təm doʼò fwumi nəniy nə̀ Yesù Kə̀litò, nə̀ àghù yə̀ àdzə̀m anə lòʼo tə dzə̀m ghu fwulə̀ nəniy Yesù Kə̀litò, ù də nəniy Mwe ə̀ Mbyi ə̀ ghu, də̀ sòʼò Mwe ə̀ Mbyi ə̀ ŋgàŋ.

³Mə gwuŋə̀ nə̀ Zə̀kə̀ kə də nəniy Tè ŋgàŋ, we nə̀ Mwe ə̀ mbyi ə̀ ŋgàŋ Yesù Kə̀litò, ghu dê ghà nə̀ fòŋə̀ ìdzòŋə̀ yìy, ghu nyiə̀ sòʼò ghà nə̀ ìbvay yiy.

⁴Mə taw nyiə̀ kə̀zòŋə̀ awò Zə̀ kam kiy bòʼ ghà anə fòŋə̀ ìdzòŋə̀ yə̀ ù dè nəniy awò ghà abidzəmə̀ Yesù Kə̀litò.

⁵Aŋwòə yiə ghà təm doʼò fwumi nəniy nə̀ Kə̀litò, ghà mə dòʼò aghê à kwumə yiy anə ufyiə udzə̀m, də̀ sòʼò aghê a kwumə yiy anə ayiə ghii à dziy yiy, nə̀ anə ntwab mə ghà kwu nəniy soʼo.

⁶Zə̀kìy mə zəŋi nə̀ ntwum yə ghè niʼà kwùmə̀ yə̀ nə̀ Kə̀litò, ì kəli tsə aghaŋə anə fòŋ təli.

⁷Ì yû dè tsə nə̀ lwì k-a-zə̀ kə̀ liy kiy way dzə ghà də kwu way anə yiə yə ghà lyimə nəniy ibû dzwoŋi i Mwe ə̀ mbyi ə̀ ŋgàŋ yìy Yesù Kə̀litò.

⁸Yesù kì zəŋə tsə sòʼò ghà nə̀ ibɛmə ghii yiy ki taw ani zù kwùm, tə̀ ghà ki də kwu way gə̂ŋ kə udzə kiy azoŋə̀ ghà a tsuk fə Mwe ə̀ mbyi ŋgàŋ Yesù Kə̀litò nì bè nəniy ate.

⁹Ghà gaʼ na yə̂ fòŋ təli azoŋə̀ Kə̀zə̀ nə̀ ù kì zəŋə ŋwò ayiə yə ù tɛb na nəniy. À sày sòʼò we ŋgaŋ nə̀ ŋgà ə doʼò fwumi anə fyiə kəmòʼ nə̀ Wà we, Mwe ə̀ Mbyi ə̀ ŋgàŋ, Yesù Kə̀litò.

¹⁰Mə bwoʼo bə̀ ghà nə̀ wokiy awizə̂ yamə anə daʼa kə Mwe ə̀ mbyi ə̀ ŋgàŋ Yesù Kə̀litò, nə̀ ghà si muə anə fyiə kəmòʼ nə̀ wù ùmoʼumòʼ. Gha yə ghà bɛmə nəniy â Zə̀kìy, ghà kə dzâw dòʼò dzə̀, ghà doʼò tsə anə fyiə kəmòʼ anə ayiə ghii à zəŋə yiy nə̀ àyiə yə ghà moʼò nəniy.

¹¹Awizə̂, aghê liy yiy ghu muə nəniy a ndàw Kloə̀, ghu bû dzày bə̀ â mìə̀ nə̀ ghà zwaʼà anə iwè.

¹²Ghà kwu ŋwô Fyiə kə mə dzîy nəniy. Mə dzîy nə̀, “Gha aliy yiy dziy nə̀ ‘Mə dzwùmə̀ Pôl’ aliy yiy dziy nə̀ ‘Mə dzwùmə̀ Àpolòs,’ àliy yiy dziy nə̀ ‘Mə dzwùmə̀ Sefàs’ àliy yiy dziy nəniy nə̀ ‘Mə dzwùmə̀ Kə̀litò.’

¹³Kə̀litò dzàw dòʼò ŋwò anə ukə̀m ə̀? Ghu kə ba wiy Pôl anə utuw ghii yə̀? Ghà kə mwi m-à-zə̀ mìy nîy anə izəd i Pôl yə̀?

¹⁴Mə nyiə̀ zòŋə̀ k-a-zə̀ aŋwòə mə kə kə̀ nyiə̀ dzə̂ gha nə̀ mwi m-à-zə̀ mìy, à kə mày kə Gayòs we nə̀ Klipòs anə uzəə ghii mə kə nyiə̀ nəniy ghu nə̀ mwi m-a-zə̀ mìy.

¹⁵Wù lìy anə uzə ghii wày dzə ani dzày nə̀ ghe kə nìy mwi m-à-zə̀ anə izəd yam.

¹⁶Mə kə nyə̀ sòʼò Stèfanàs nə̀ mwi m-à-zə̀ mìy nə̀ ìsəd i ndaw i we yiy. Mə kamə̀ myìŋə̀ dzə̀ wày nə̀ mə kə nyìə̀ ŋwǒ wè lìy nə̀ mwi m-à-zə̀ mìy.

¹⁷Kə̀litò kə kə̀ twum dzə̂ miə nə̀ mə bû nyiə̀ àghù nə̀ mwi m-à-zə̀ mìy. Ù kə twum miə nə̀ mə bû naʼà ntwùm ìdzòŋì yìy. Mə kə ntwum yə̀ nìʼà dzə̀ wày anə utwab u ghě mbyi aŋwòə abu mə kə zəŋə nəniy ghii, ipfə i Kə̀litò anə kàʼ fə təzəd mə də kàm kwu dzə̀ way daʼa kiy ani fày fyi àghû.”

¹⁸I də nə̀ aghû yə̀ ghu muə nəniy anə ibɛb, ntwum yə ì dzìy nəniy ayiə kwùmə̀ yə̀ nə̀ ipfə i Kə̀litò yìy anə təzəd, ì zəŋə dzə̀ wày utwab wiy awò ghu. Abû ŋgaŋ yə ŋgà kəli dzə̂ ibii fyi yiy â Zə̀kìy, ntwùm ìghè yə̀ də̀ daʼa k-a-zə̀ awò ŋgàŋ.

¹⁹I twâ dòʼò anə ŋwàʼà k-a-zə̀ nə̀, “Mə nî byebə mìʼà tsə ntwab mə̀ ghù yə̀ ghu dzîy nəniy nə̀ ghu ŋge twabə ŋwò. Mə ni fwəd maʼà ntwab mə̀ ghu anə ayiə yə ghu byay na nəniy, ghu toʼò dzìy nəniy nə̀ ghu də aghê twabə yiy. Ayiə ghu ghè yə̀ ni nây an-a-sə̀àŋì.”

²⁰Wù ù twabə̀ ù ghè wə̀ də̀ yiə nyiə? Wù wə̀ ù ŋge tyi dê nəniy ulâŋ u Musîs wìy, ù də̀ yiə nyiə? Wù wə̀ ù dzìy nəniy nə̀ ghe ŋge kwu ŋwô ani bə̀lì àyiə, ù də̀ yiə nyiə? Zə̀kìy mə we dè nə̀ utwab u ghě mbyi wiy də ilyaʼì yə.

²¹Zə̀kìy mə zəŋi anə utwab u we nə̀ aghê mbyi nî kəli dzə̀ wày we abidzəmə̀ ntwab mə ghu kwu nəniy. U kwuni zəŋi na nə̀ ghu nî kyilə we abidzəmə̀ ntwùm ə̀ we yə ghè niʼà nəniy ghu tyoŋə nəniy nə̀ à də̌ “Ntwùmə̀ ìlyìʼà yìy.” Zə̀kìy zəŋi na nə̀ ghe nî bii fyiə àghù yə̀ ghu bɛmə nəniy â Zə̀kìy bòʼ Ntwùmə̀ ìghè yə̀.

²²Aghee Dzû yìy liə ani kòʼ mali tə yiə awò ghu ani bɛmə, aghee Glîk yìy kwuni khu tsə̀ ùtwab u wè mbyi.

²³Abu ghè niʼà yə̂ nəniy ntwum yə nə̀ ghu kə ba wiy Kə̀litò anə kàʼ fə təzəd, fôŋ tǐy ŋə̀mə̀ yə̀ àghě Dzû ate. Aghû yə̀ ghu də wày aghee Dzû, ghu mòʼò nə̀ à də̀ ilyaʼì.

²⁴Ntwùmə̀ Kə̀zə̀ yə̀ kwuni də̌ Kə̀litò wə̀ ù də nəniy daʼa k-a-zə̀ kìy nə̀ ùtwab u Kəzə̀ wìy awò àghě Dzû yə̀ Zə̀kìy toŋə tsə nəniy ghu nə̀ à də̀ aghû yə̀ ghu də wày dzə aghee Dzû.

²⁵Ayiə ə Kəzə̀ yə̀ aghee mbyi yiy koʼò nəniy dzìy nə̀ à də̀ ilyaʼì, ayiə ghè yə̀ dzwàb tsìy fyi ŋwô ùtwab u ghě mbyi yiy. Ayiə ə Kə̀zə̀ yə̀ a fwunə nəniy ilay yiy awò wù mbyi a taw tsiy fyiə ŋwoə daʼa kə wù mbyi kiy. A yiə Kəzə̀ yə̀ ghu koʼò soʼò dzìy nə̀ à də̀ ayiə àlay yiy, a taw tsìy fyi ŋwô daʼa kə aghee mbyi yiy kwu.

²⁶Awizə̂ yamə, myìŋi tsə nənìy fyiə kə ghà kə də nəniy səsə â zə̀kìy ani toŋə tsə gha. À kə wày dzə gha dzə̀m ghà kə kwu nəniy utwab wiy anə yiə yə aghee mbyi ə koʼò. Ndə̀mə̀ gha àliy yiy kə kwu dzə̀ way utwab wiy anə ayiə yə aghee mbyi yiy moʼò, moo kə daʼa, moo izəd ìnê yiy, moo bwôʼ kə̀ nê kìy.

²⁷Zə̀kìy kwuni sày kə ayiə yə à də nəniy ayiə àlyiʼa anə sə kə ghě mbyi ani zəŋi tsə nə̀ utuw də̂d tsə aghû yə̀ ghu dziy ghu kwu utwab. U sày kə sòʼò fyiə kə aghee mbyi kwu nəniy nə̀ à də̀ fyiə kə lay kiy ani də̀d maʼa ùtuw u ghù yə̀ ghu moʼò nəniy nə̀ ghu kwu udaʼa.

²⁸Zə̀kìy kə sây fyi bə̀ ùfyiə wə aghee mbyi koʼò kê nəniy, myìŋə̀ sòʼò nə̀ u kwu way fàʼ kə̀ liy kiy ani zəŋi tsə nə̀ utwab u ghu wiy kə kəli dzə̌ fàʼ kə̀liy kiy.

²⁹Ani zəŋi tsə nə̀ kəə wè lìy nə̀ fənə̀ nəniy ikiy kiy yiy anə sə k-a-zə̀ anə iyiə ìliy yiy.

³⁰Ayiə yə Zə̀kìy zəŋi nəniy awò ghà à də̀ ayiə yə a zəŋi nəniy nə̀ ghà doʼò fyiə kəmòʼ nə̀ Yesù Kə̀litò. Ayiə yə Yesù Kə̀litò zəŋi nəniy ŋgà kwu ani kəli tsə nə̀ à də̀ utwab u Kəzə̀ awò ŋgàŋ. I dê tsə nə̀ à də̀ Yesù ù fày ŋgaŋ ani zəŋi nə̀ ŋgà ki faʼa ayiə yə a də nəniy tsitsi, à də̌ we ù kə zwe ŋwô dzwoŋi bə̂ ŋgaŋ awò ìbɛb yiy.

³¹À də̀ ighe i twâ doʼò nəniy anə ŋwàʼà k-a-zə̀ nə̀, “Abu wù dziy fə̂n ìkiykiy, u kwu ani fə̀n bòʼ àyiə yə Mwe ə̀ mbyi zəŋə nəniy.”