Read Isu 1 Kolìn 11 Bible Online

1 Kolìn 11 - Isu bible

1 Kolìn 11

¹Ghà ki dzwumə bə wuu kə ibwìy kam kiy anə ayiə yam àzəŋə yiy anə yiə yə mə dzwumə̀ nəniy wuu kə ibwìy kə Kə̀litò kìy anə ayiə yə ù kə zəŋə nəniy.

²Mə ŋge kyalə ŋwò ghà aŋwòə ghà tsə̂ŋ kwu kə miə anə mòʼ təli, dzwùmə̀ sòʼò ayiə yə mə kə tyi dê nəniy awò ghà anə ayiə yə mə kə zuw soʼò nəniy ate.

³Mə kwuni liə nə̀ ghà kəli tsə nə̀ wù wə̀ ù də̀ nəniy tuw kiy awò iŋə̀mə̀ àdzə̀m à də̌ Kə̀litò. Wù wə̀ ù də nəniy tuw kiy awò Wìyəŋi à də̌ ŋə̀mə̀ we, wù wə̀ də ù də nəniy tuw kiy awò Kə̀litò à də̀ Kəzə̀.

⁴Yəə̀ i də nəniy ghii, ùŋəmə̀ wə̀ ù gwùŋə̀ nəniy moo ù nìʼà nəniy ntwùm ə̀ Kə̀zə̀ nə̀ ù mə kəd na tuw kə we kiy, ù nyìə̀ dzə̀ wày ŋkwiʼi miy awò Kə̀litò wə̀ ù də nəniy tuw kiy awò we.

⁵Wìyəŋi wə soʼò ù gwùŋə̀ nəniy moo ù niʼà nəniy ntwùm ə̀ Kə̀zə̀ anə sə kə ghù nə̀ ù kə̀ kəd na nəway tuw kə we kiy, ù nyiə̀ wày ŋə̀mə̀ we nə̀ ŋkwiʼi miy, ŋəm wə ù də nəniy tuw kiy awò we.

⁶Bəə wìyəŋi də liə way ani kəd na tuw kə we, ù kwam màʼà tsə tuw kə we. Yəə à də nəniy tuw kə dələ kiy awò ùyiŋi ani kwam tuw kə we, ù kwu ani kəd na tsə tuw kə we.

⁷Wìŋəmə̀ kwu dzə̀ way ani kəd na tuw kə we aŋwòə Zə̀kìy zəŋi na wìŋəmə̀ nə̀ ù ki fwunə ighe, zəŋi na tsə sòʼò nə̀ ù dòʼò tsə ŋkwiʼi mə̀ Kə̀zə̀. Wìyəŋi kwuni də̌ ŋkwiʼi mə̀ wìŋəmə̀ toŋə ŋə̀mə̀ we.

⁸Zəkiy kə kə̀ nîy kə dzə̂ bə̂d kə uwè kə wìyəŋi kiy zəŋi fyi kə wìŋəmə̀ ate. Zə̀kìy kə nìy kə bə̂d kə uwè kə wìŋəmə̀, zəŋi fyi kə wìyəŋi ate.

⁹Zə̀kìy kə kə̀ zəŋi dzə̂ wìŋəmə̀ awò wìyəŋi, ù kə zəŋi wìyəŋi awò wìŋəmə̀.

¹⁰À də̀ iyiə i ghè yə̀ wìyəŋi kwu ani kələ nia tuw kiy ani dè tsə nə̀ ù nyìə̀ ŋwǒ ŋkwiʼi miy awò ŋə̀mə̀ we anə yiə yə ŋəm kwu nəniy daʼa kiy azoŋə̀ we ani zəŋi tsə nə̀ tsə̀təndii t-a-zə̀ tiy kôʼ àyiə ghè yə̀, ghu ki dyoʼo.

¹¹Yəə ŋgà də nəniy anə fyiə kəmòʼ nə̀ Mwe ə̀ mbyi, wìyəŋi way dzə ani mùə̀ anə ŋgəŋ ə we. Wìŋəmə̀ soʼo ù way dzə ani mùə̀ anə ŋgəŋ ə̀ we.

¹²I də ghii aŋwòə Zə̀kìy kə nìy fyi bə̀ kə̀bə̀d azoŋə̀ wìŋəmə̀, zəŋi tsə wiyəŋi ate. À də̀ sòʼò wìyəŋi ù byikə bə̂ nəniy wìŋəmə̀. Ayiə yə à dzə̀m ŋwô bə̀ awò Zə̀kìy.

¹³Myìŋi tsə nənìy anə iwè nəli nə̀ i dzwabə̀ ŋwò awò wìyəŋi ani gwùŋì nə̀ ù kə̀ kəd na nəway tuw kə we kiy ə̀?

¹⁴Zə̀kìy mə we mgbaŋ zəŋi nə̀ ŋgà kəli tsə nə̀ à də̀ tuw kə̀dələ kiy awò wìŋəmə̀ ani tsuk na kətuw nə̀ kə nɛmə zâb doʼò tsə ə?

¹⁵À kwuni də̀ ufoŋ awò wìyəŋi wə ù tsuk na nəniy tuw kiy nə̀ ŋwû tìy nɛmə kə. À nyìə̀ Kə̀zə̀ ŋwû tə ghè tə̀ awò wìyəŋi nə̀ ù ki kələ nia tuw kə we kiy ate.

¹⁶Abu wù liy kwuni twe myaʼà nəniy ayiə yə mə dzìy nəniy, mə də ani dzày tsə nə̀ ŋgaŋ nə̀ ùdzəŋə u Kəzə̀ ù liy wə, ŋgà kwu dzə̀ way umwamə ù gwuŋə ù liy wiy tsìy fyi ù wə mə tyi dzìy nəniy.

¹⁷Anə itswù yə̀ mə kə nyiə̀ bə̂ nəniy awò ghà, mə kyalə dzə̀ wày gha aŋwòə ghà bê zəŋə ndə̀mə̀ tə yiə tə̀ bɛbə tiy anə dzəŋə kəli tsìy fyi ayiə à dzoŋə̀ yìy.

¹⁸Iyiə isəsə yiy də nə̀, mə zuw nə̀ abu ghà bû nəniy anə dzəŋə kə aghě Kəzə̀, ghǎ dzàw dòʼò yə̀ anə ukaʼ. Mə nyaʼi byemə ŋwò nə̀ à də̀ iyiə ìsoŋə̀ yìy.

¹⁹Idzâw doʼo yə̀ bɛbə dzə̀ wày, i də ani dè fyi yə̀ àghù yə̀ ghu dzwumə̀ nəniy Zə̀kìy nə̀ fòŋ ìmòʼ.

²⁰Abu ghà dzəŋə bə̂ nəniy a ndàw Kə̀zə̀, ghà kə kaʼa nyi dzə̀ ba k-a-zə̀ kìy,

²¹aŋwòə ghà bê nyiə anə ayiə yə ghà liə nəniy. Gha àliy yiy bê kaʼa yə̀ ani nyi nə̀ ghà lyimə way awizwə̂. Ayiə ghè yə̌ zəŋə dzoŋə zabə wù liy, wù lìy wiy kaʼ yə̀ ani ke.

²²Ghà kwu way ndaw tiy yəə ghà ni nyiə ate muə sòʼò mə̀nlwù ə̀? Moo ghà moʼò nə̀ ndàw Kə̀zə̀ wày fyiə kə̀ liy kiy. Ghà tsoʼo sòʼò àghû yə̀ ghu də kwu way fyiə kə̀ liy kiy ə̀? Ghà dziy nə̀ mə kyali bə̂ ghà anə ndzòʼò àyiə yə ə̀? Hǎy, mə way dzə ani kyali gha anə ndzòʼò àyiə yə.

²³Ayiə yə Mwê mbyi kə tyi dê awò mìə̀ à də̀ aghe mə kə dzîy awò ghà. À kə də̀ a ntsuk fə ghu kə kwee Mwê mbyi Yesù ate anə awo aghè àbɛbə yiy, Mwe ə̀ mbyi ə nìy kə kəba,

²⁴nyə̀ yə̀ kə̀zòŋə̀ awò Zə̀kìy, boʼ fyi yə̀, dyaŋi dzày tsə nə̀ “A yù də̀ ùwee nam, mə nyiə̀ bə̂ awò ghà. Ghà ki tsəŋə zəŋə kə aghii ani myìŋə miə ate.”

²⁵Abù ghu nyi mâ kə nəniy ba kə, u nìy kə sòʼò bwàmə̀ mə̀nlwù anə ayiə à moʼo yə ù kə̀ nîy kə nəniy bakiy ate, dzày tsə nə̀ “Bwam yə də̌ ŋkà mə̀ Kə̀zə̀ mə̀ fyiə̀ mə̀ Zə̀kìy nyi nəniy anə kàŋ tam. Ghà mu ani myiŋə tsə miə ate.”

²⁶Abu ghà nyiə nəniy bakə, muə yə̀ sòʼò nlwù mə̀ i dê tsə nə̀ ghà ghii nìʼà ipfə i Mwe ə̀ mbyi zù kwùm tsuk fə ù nì bè dzwəŋə nəniy ate.

²⁷Yəə i də nəniy ghii, wù wə̀ ù nyi nəniy ba k-a-zə̀ kə̀, moo ù mu nəniy nlwù mə̀ anə dzəd yə ì də nyìə̀ wǎy ŋkwiʼi miy, i dê tsə nə̀ ù mə zəŋi bɛb anə uwè u Mwe ə̀ mbyi nə̀ anə kàŋ tə we soʼo.

²⁸Yəə i də nəniy ghii, bəə aghê dziy nyi bakə, nə̀ â ghu ani mu nlwù mə̀, ghu kwu ani tòʼ mòʼ dzwàb tsə ayiə yə ghu zəŋə.

²⁹Wù wə̀ ù nyi nəniy bakə, mu sòʼò nlwù mə nə̀ ù kwu way fyiə kə uwee u Mwe ə̀ mbyi wiy myiŋə̀ nəniy, à də̌ nə̀ ù zəŋə àyiə yə Zə̀kìy kî saʼa wiy we ate.

³⁰A yù də fyiə kə kə zəŋi ndə̀mə̀ gha àliy yiy nə̀ ghà ki dzaŋə, lay sòʼò. Ndə̀mə̀ gha àliy yiy pfələ soʼò nəniy.

³¹Abu ŋgà lia tsə dzə̂ muə̀ tə ŋgàŋ tìy isə, kòʼ tsə nə̀ tə zwe ŋwò, Zə̀kìy ki də kə̀ saʼ wiy maʼà dzə̂ ŋgaŋ.

³²Abu Zə̀kìy bwa tyilə bə̂ nəniy ŋgaŋ, imyiŋə̀ nə̀ ù liə nə̀ ŋgà zəŋi yə̂ ìyiə yə à də nəniy iyə ìdzoŋə̀ yiy, aŋwòə ù liə way ani saʼ wiy màʼà dzəŋi ŋgaŋ loʼo kə mòʼ nə̀ àghè àbɛbə yə fə nə mbyi.

³³Yəə i də nəniy ghii awizə̂ yamə, abu ghà bû nəniy ani bù nyi ba k-a-zə̀, ghà kwu ani ləmə tsə iwe nəli.

³⁴Abu dzoŋ zabə soʼò wù lìy, wù ù ghè wə̀ kwu ani nyi təŋ kə a ndàw we tə abù ghà dzəŋə bə̂ nəniy a lòʼo kə mòʼ, wù lìy ki də wày ani zəŋi ayiə yə Zə̀kìy də ani ŋə̀m fòŋ nə̀ we. Anə ayiə à liy yə mə vəəd na nəniy, mə kî bya bəə mə bû nəniy.