Read Isu 1 Kolìn 12 Bible Online

1 Kolìn 12 - Isu bible

1 Kolìn 12

¹Awizə̂ yamə, nyiə, mə dziy dzây bə̀ àyiə kwùmə̀ yə̀ nə̀ ùfyiə wə Zwàykə̀zwekiy nyiə̀ nəniy awò aghù yə̀ ghu bɛmə nəniy Zə̀kìy. Awizə̂ yamə, mə liə nə̀ ghà kəli dzwâb tsə ndzòʼò àyiə àsoŋə̀ yə̀ kwùmə̀ yə̀ nə̀ ùfyiə wə Zwàykə̀zwe kiy nyiə̀.

²Ghà kwu ŋwô nə̀ yəə ghà kə nam də nəniy nə̀ ghà kamə kə̀ bɛmə nəway Zə̀kìy, ghu kə ŋge mòŋə̀ myàʼà ghà anə ndə̀mə̀ tə̀ dzə̀lə, zəŋə gha nə̀ ghà ki fwulə mwòʼo miy nə̀ ìn wày ani dzə̀ŋì fyi bə̀ dzə̀.

³À yù də̀ ighe mə liə nə̀ ghà kəli tsə nə̀ wù wə̀ ù kwu nəniy Zwàykə̀zwekiy anə fôŋə̀ we, ù wày dzə ani dzày nə̀, “Ntyiə kiy dzwumì yə̂ Yesù.” Wù lìy wày dzə ani dzày fyi bə̀ sòʼò nə̀ Yesù də̀ Mwe ə̀ mbyi, à mày kə nə̀ à zəŋi Zwàykə̀zwekiy nə̀ ù dzày fyi bə̀.

⁴Zə̀kìy mə nyə̀ ŋgaŋ nə̀ lelê tə yiə tiy abidzəmə̀ Zwàykə̀zwekiy nə̀ ŋgà ki zəŋə. À kwuni nam də̀ kə Zwàykə̀zwe kə̀ moʼo kə ghè kə̀ Zə̀kìy zəŋi nə̀ kə nyiə̀ ŋgaŋ nə̀ àyiə ghè yə̀.

⁵Ŋgà kwu lelê tə ufàʼ ŋgà faʼà nəniy. Ŋgà kwuni fàʼà kə awò Mwe ə̀ mbyi ù moʼò wìy.

⁶Ŋgà faʼà ùfàʼ anə lelê tə tə dzə̀lə, à kwuni də̀ kə Zə̀ kə̀moʼo kiy kə nyiə̀ nəniy dzələ tə ghè tə̀ tə̀dzə̀m awò ŋgàŋ.

⁷Zwàykə̀zwekiy mə nyə̀ ŋgaŋ nə̀ ùfàʼ wìy ani fàʼ àyiə àdzoŋə̀ yìy awò àghè dzə̀m.

⁸Zwàykə̀zwe kə̀ moʼo kə ghè kə̀ zəŋə tsə wù lìy u dzìy àyiə yə a kwu nəniy utwab wiy, kə zəŋə wù lìy wìy soʼo nə̀ ù kəli tsə ayiə àliy yiy ù dè nəniy â ghu.

⁹Zwàykə̀zwe kə̀ moʼo kə ghè kə̀ zəŋə tsə wè lìy nə̀ ù kəli tsə ibɛmə nə̀ Zə̀kìy kî fàʼà ŋwò ayiə yə ù dzày na nəniy nə̀ ghe dziy fâʼ, kə nyiə̀ tsə sòʼò wù lìy nə̀ daʼa kiy ani zəŋi tsə aghee dzaŋə, nə̀ ghu taw kə.

¹⁰Zwàykə̀zwe kə̀ moʼo kə ghè kə zəŋə tsə wù lìy u kwu kədaʼa ani zəŋi mali tə ayiə, kə nyiə̀ tsə wè lìy nə̀ daʼa kiy ani nàʼà àyiə yə Zə̀kìy dzây nəniy. Kə zəŋə tsə sòʼò wè lìy nə̀ ù ki koʼo kyilə yə kwuni kə kə də nəniy anə ntwab mə ìn ŋwò bə̂ awò Zwàykə̀zwekiy nə̀ ntwab mə ìn də kə̀ ŋwô bə̂ dzə̂ awò Zwàykə̀zwekiy. Zwàykə̀zwe kə ghè kə̀ zəŋə tsə wè lìy nə̀ ù ki dzəŋə anə dzə̀ŋì tə nàʼà tə̀ ŋwò tìy, Kə kwuni zəŋi tsə wè lìy ù də̀ ani kyèmì dzày nyiə̀ bə̀ àyiə ghè yə̀.

¹¹À də̀ kə Zwàykə̀zwe kə moʼo kiy kə zəŋə nəniy ayiə yə àdzə̀m. À də̀ kə ghe nə̀ noŋə̀ ghe kiy kə tsəmə̀ tsə nəniy ani nyə̀ namə kə, kə dziy nyiə̀ awò kày.

¹²Yəə uwee u wû wìy kwu kə nəniy ndə̀mə̀ tə ubə̀d tìy, ubə̂d u ghè wə̀ ghii ùdzə̀m u biə kə uwee umòʼ. À mbvami də̀ sòʼo aghii aghee Kə̀litò yìy də nəniy yəə à də̀ ubəd uwè ùmòʼ.

¹³I də sòʼò ighəd nə̀ ŋgàŋ. Abu ŋgà də kə aghee Dzû yìy moo ŋgà də wày aghee Dzû, ŋgà tsəm də kə ukwə̂d wìy moo ŋgà də wày ukwə̂d wìy, ŋgà maa nǐy mwi m-à-zə̀ mìy anə daʼa kə Zwàykə̀zwe kə̀ moʼo kiy, Zə̀kìy mə nyə̀ sòʼò ŋgaŋ nə̀ Zwày kə̀ moʼo kiy anə fòŋ tə ŋgàŋ.

¹⁴Uwe wiy kwu dzə̀ way bə̂d kìy kə̀mòʼ, u kwu ndə̀mə̀ tə ubə̀d.

¹⁵Abu ufwe wiy mə̀ də ani dzày tsə nə̀ yəə mə də wày dzə ukwe, mə kâm wày dzə bə̂d kə uwè, ayiə yə ufwe u ghè wə̀ dzày nəniy, ayiə ghè yə̀ kì zəŋə dzə̀ wày nə̀ u kə kâm dòʼò dzə̀ bə̂d kə u wè kìy.

¹⁶Abu tswuŋi kiy mə̀ də ani dzày tsə nə̀ mə way dzə bə̂d kə uwè aŋwòə mə way dzə isə, i way ani zəŋi dzə̀ nə̀ kə ndzə̂m doʼò yə̂ nə̀ kə kâm wày dzə bə̂d kə uwè.

¹⁷Abu uwee udzə̀m mə̀ də kə nə̀ à də̀ isə, uwe u ghè wə̀ mə̀ də̌ mə̀yə ani zuw ayiə ə? Abu uwe wiy mə̀ də kə tswuŋi kiy, u mə̀ dzîy zuw mə̀yə yəə à də̌ mbvù tə iwiy yə?

¹⁸Yəə i də nəniy ghii, Zə̀kìy mə zəŋi na ubə̂d uwè wìy ù dzə̀m anə ayiə yə ù liə nəniy nə̀ u doʼò ate.

¹⁹Abu uwee u wû wǐy mə̀ də kə nə̀ à də̀ bə̂d kə̀mòʼ, ŋgǎ mə̀ dzǐy tyoŋə dzə̀ wày nə̀ à də̀ uwee.

²⁰Iyiə yə i də nəniy, uwe wiy kwu ndə̀mə̀ ndə̀mə̀ tə ubə̀d, kwuni də kə uwee ùmòʼ.

²¹À yù də̀ i ghe isə yiy də wày dzə ani dzày yə̀ awò ùkwe wiy nə̀ wò kwu dzə̀ way fàʼ kìy awò mìə̀. Moo tuw kiy way dzə ani dzày yə̀ awò ìfwe yiy nə̀ wò kwu dzə̀ way fàʼ kìy awò mìə̀.

²²I kwuni də̀ kə nə̀ ubə̂d uwè wə̀ u lay nəniy, iwee i ŋgàŋ yìy way dzə ani zəŋi ìyiə ìliy yiy nə̀ ghu way.

²³U bə̂d uwè wə̀ ŋgà koʼò tsə nəniy nə̀ u kwu dzə way ŋkwiʼi miy, à də̀ u ghe ŋgà toʼò yèmə̀ nəniy ate. Abû ù wə ŋgà də liə way ani dè, à də̀ u ghe ŋgà də yèmə̀ wày ate.

²⁴Ubə̂d uwè wə̀ a də nəniy ani dè, ŋgà way dzə ani ŋge nìy ìyèmì ate yə à də̌ ù wə a də wày ani dè. À də̀ Kəzə̀ kə zwubì na nəniy iwee i ŋgàŋ yìy awò ŋgàŋ ani toʼo yemə tsə anə ubə̀d u wè ù liy wə u də yəə u banə kwu dzə̀ way fàʼ kìy.

²⁵Ì yû də̌ ani zəŋi tsə nə̀ uwee wiy təm doʼò fwumi bə̂ nə̀ ubə̂d uwè wìy, u kə dzàw doʼo dzə̀. Ubə̂d uwè wìy ki fii tyilə yəə ubə̂d ùliy wə.

²⁶Bəə bə̂d kə uwè kə̀liy kiy fyaʼa nəniy, ubə̂d uwè ùliy wə fyaʼa dzəŋə yə̀ nə̀ ghe kiy soʼo. Bəə bə̂d kə uwè kə̀ mòʼ kìy kwu nəniy ŋkwiʼi miy, u bə̂d ù liy wə dyoʼo sòʼò.

²⁷Gha dzə̀m, də uwe u Kə̀litò, wù ùmoʼ umòʼ də̀ bə̂d kə uwè kə ghè kə̀.

²⁸Zə̀kìy mə nyə̀ na aghee we yiy nə̀ lelê tə unamə tiy. Ù mə tsuk na aghee ntwùm ə̀ Yesù yìy, nə̀ àghè àtyi dee ayiə yiy, nə̀ à yuu ghu zəŋə nəniy mali tə ayiə tiy. Ù mə tsuk na sòʼò àghê liy yiy, nyiə̀ tsə ghu nə̀ daʼa kiy nə̀ ghu ki zəŋə tsə wù ù dzàŋə̀ wìy, u taw kə, nə̀ à yuu ghu də nəniy ani fày àghù. Ù tsuk na sòʼò àghè àliy yiy nə̀ ghu doʼò tə̀ŋgəd, Tsuk na sòʼò àghù yə̀ ghu də nəniy ani dzə̀ŋì anə ndə̀mə̀ tə tə dzə̀ŋì.

²⁹À də̀ aghê dzə̀m ghu də nəniy aghee ntwùm ə̀ Kə̀litò yìy ə? Moo à də̀ aghê dzə̀m ghu də nəniy aghee ntwùm ə̀ Kə̀zə̀ yìy ə? Moo à də̀ aghê dzə̀m ghu də nəniy aghee tyi dê ayiə yiy ə? Moo à də̀ aghee dzə̀m ghu kwu nəniy daʼakiy ani fàʼ mali tə ayiə ə̀?

³⁰À də̀ aghê dzə̀m ghu kwu nəniy daʼa kiy ani zəŋi tsə wù wə̀ ù dzàŋə̀ nəniy nə̀ ù taw kə ə̀? Moo à də̀ aghê dzə̀m ghu də ani dzə̀ŋì anə dzə̀ŋì tə̀ ŋwò tìy ə? Moo à də̀ aghê dzə̀m ghu də ani kyèmì dzày bə̀ ìdzə̀ŋì ì ŋwǒ yìy ə?

³¹Ghà gaʼ na tsə kə̂ fòŋ təli anə unamə ùsoŋə̀ wə̀ Zə̀kìy nyiə̀ nəniy awò ghà, u fîy soʼò. Mə ki dê bə̀ ghà nə̀ dzəd yə̀ ì dzwàb tsìy fyi nəniy dzələ tə dzə̀m â ghà ani faʼ yə̀ anə unamə wə Zə̀kìy nyiə̀ nəniy â ghà.