Read Isu 1 Kolìn 13 Bible Online

1 Kolìn 13 - Isu bible

1 Kolìn 13

¹Abu mə də ani dzə̀ŋì mà tsə dzəŋì tə aghě mbyi tə dzə̀m nə̀ dzə̀ŋì tə̀ tsə̀təndii t-a-zə̀ tìy dzəŋə̀ nəniy, abu mə də kwuni kwu dzə̀ way iliə yiy, mə ki maŋ də yəə à də̌ ndzɛ̀m yə̀ ghu bwoʼo nəniy, moo byoŋi ì foŋə nəniy.

²Abu mə bôʼ kwu kə nəniy ani nàʼà àyiə yə Zə̀kìy dzîy nəniy â àghè, moo mə kwu kə utwab wiy ani zuw kəli mà tsə nùw tə ayiə tə tə də nəniy, moo bòʼ kwu kə ntwab mə̀ ìn dzə̀m, moo abu mə bôʼ kwu kə nəniy ibɛmə ìsoŋə̀ yə̀ i də nəniy ani bə̀lì màʼà tə̀ kàʼà, kwuni kwu way iliə yiy azoŋə̀ àghù yìy, I dê tsə nə̀ mə way dzə fyiə kə̀li kiy.

³Mə də ani bòʼ nyə̀ mà yə̀ kə ùfyiə wə mə kwu nəniy awò àghè la yiy, mə nyiə̀ dyaŋi yə̂ kə ùwe nam nə̀ ghu ŋwôʼ anə uvə̀lə̀, abu mə də kwu way iliə yiy azoŋə̀ àghè liy yiy, mə kî nyiə fyi kə dzə̀ wày fyiə kə̀li kiy ate.

⁴Abu wù liə nəniy aghû yìy, ù kwè fòŋ nə̀ ghu, dè sòʼò fòŋ ìdzòŋə̀ yìy. Abu wù liə nəniy aghû yìy, ù kwu dzə̀ way ani kəli kəghòʼ, moo uwe ù kwoʼo wiy.

⁵Abu wù kwu nəniy iliə yiy azoŋə̀ àghù yìy, ù kòʼò kè dzə̀ wày aghê àliy yiy. Ù kwu dzə̀ way ani kaʼi zəŋə təŋə kə ayiə yə a dzwabə̀ nəniy awò ùwe u we wiy. Iliə yiy zəŋə dzə wày nə̀ wù ki zəaŋə kyilə fòŋ ìŋəmə̀ yìy. Wù wə̀ ù kwu nəniy iliə yiy, ù kwi nia dzə̀ wày wè lìy anə fôŋ ə̀ we.

⁶Wù wə̀ ù kwu nəniy iliə yiy azoŋə̀ àghù yìy, ù kwu dzə̀ way ani dyoʼo anə ayiə àbɛbə yiy. Ù kwuni kwu ani dyoʼo nə̀ àyiə yə a də nəniy àsoŋə̀ yìy.

⁷Wù wə̀ ù kwu nəniy iliə yiy azoŋə̀ àghù yìy, ifələ yiy zəaŋə̀ pfə dzə̀ wày we anə ayiə àbɛbə yə aghê zəŋə nəniy nə̀ we. Ù kwu ibɛmə anə ayiə dzə̀m. Ù tsə̀ŋə̀ lia yə̀ kə isə ani kòʼ fyiə kə Zə̀kìy tɛb na nəniy. Ù tsə̀ŋə̀ kwè kə fòŋ anə ayiə dzə̀m.

⁸Iliə yiy nî mày kòʼ dzə̀ wày, akwuni bû àyiə Zwàykə̀zwekiy nyiə̀ nə̀ a naʼà, a nî mìì ŋwò. Daʼa kə Zə̀kìy nyiə̀ na nəniy awò àghù yìy ani dzə̀ŋì dzə̀ŋì tə̀ ŋwô tìy, kə nî mìy ŋwò. Aghû yə̀ ghu tsəb kwu nəniy ntwab miy, ntwab mə̀ ghu miy nî mìy sòʼò ŋwò.

⁹I ghii də̌ nə̀ udaʼa wə Zə̀kìy nyiə̀ na nəniy nə̀ ŋgà fâʼ ate nə̀ ntwab mə ŋgà niʼà nəniy ntwùm ìdzoŋə̀ yìy ate, u də ukə̂m ùkə̂m.

¹⁰Ani bu Zə̀kìy zəŋi tsə nə̀ ayiə bù fyi mà kə, ukə̂m wə̀ nî mày ŋwò yə̀.

¹¹Soŋə fə mə kə də nəniy ànìzə̀, mə dzə̀ŋə̀ àyiə yəə à də̌ ànìzə̀. Fòŋ yam kə də̀ yəə à də̌ fòŋə̀ ànìzə̀. Imôʼ yam yiy kə də̀ sòʼò yəə à də̀ imôʼ i ànìzə̀. A kwuni bû nyiə yəə mə kpe tsə anə wû, Mə mə màʼà àyiə nìsə̂ yìy.

¹²Fyiə kə ŋgà koʼò nəniy nyiə̀ à də yəə à də̀ kəzəŋi ŋgà koʼò nəniy anə fyiə kə̀ tii kəsə kiy nə̀ ŋgà bày kòʼò wày, ŋgà nî ba tòʼò kòʼò dzwàbə̀ tsə ŋwò. Fyiə kə mə kwu nəniy nyiə, mə kwu uboʼ uboʼ mə ni kwuni bè kyilə mìyà kə ŋwò anə ayiə yə Zə̀kìy kwu ma nəniy miə ate.

¹³Ayiə də ŋwô àti a də nəniy kwab tə yiə tiy. Ayiə ghà yə̀ də̀, Ibɛmə, nə̀ ani gaʼ na fòŋ anə iyiə Zə̀kìy tɛb na, nə̀ ìliə yiy. Fyiə kə kə kwuni tsîy fyi nəniy anə ayiə yə àti à də̀ iliə.