Read Isu 1 Kolìn 14 Bible Online

1 Kolìn 14 - Isu bible

1 Kolìn 14

¹Ghǎ kaw tsə dzələ tədzə̀m nə̀ iliə yiy doʼò tsə fyiə kə səsə kiy tsìy fyi ùfyiə udzə̀m anə ufyiə wə̀ Zwàykə̀zwekiy nyiə̀ nəniy. Ghà kəli tsə sòʼò ì ghaa ani kəli tsə namə kə Zwàykə̀zwekiy nyiə̀ nəniy â ghà. À mba tsəm də̀ ani nàʼà àyiə yə Zə̀kìy dzîy nəniy.

²Aghû yə̀ ghu dzə̀ŋə̀ nəniy anə dzə̀ŋə̀ tə̀ ŋwò tìy, ghu dzəŋə̀ dzə̀ wày nə̀ àghù yìy. Ghu dzə̀ŋə̀ nə̀ Zə̀kìy aŋwòə wè lìy zuw kyilə dzə̀ wày ayiə yə ghu dzîy nəniy. Zwàykə̀zwekiy fîy ghu ani dzày àyiə àsoŋə̀ yə̀ a də nəniy an-a-nù. À kwuni də̀ kə nə̀ aghû yə̀ ghu zwələ nəniy ghu zuw kyilə dzə̀ wày ayiə yə ghu dzîy nəniy.

³A kwuni bû aghû yə̀ ghu niʼà àyiə yə Zə̀kìy dzîy, ghu ghii zəŋə ani fày àghù nə̀ ghu təmi taw tsə anə ibɛmə ighu. Ghu kwe sòʼò fòŋ ghù.

⁴Aghû yə̀ ghu dzəŋə̀ nəniy anə dzə̀ŋì tə nàʼà tə̀ ŋwô tìy, ghu fîy təŋə kə ìwe i ghu. Aghû yə̀ ghu kwuni niʼà nəniy ntwùm ə̀ Kə̀zə̀, ghu fîy àghě dzəŋə k-a-zə̀ àdzə̀m.

⁵Mə mə dzǐy liə ŋwò nə̀ gha ki dzəŋə anə dzə̀ŋì tə nàʼà tə̀ ŋwǒ tìy. Mə kwuni ba liə nə̀ gha dzə̀m kəli tsə daʼa kə̀ niʼa kə ntwùmə Kə̀zə̀ kìy aŋwòə ani nàʼà ntwùm ə̀ Kə̀zə̀, i tsîy fyi ŋwô ani dzə̀ŋì anə dzə̀ŋì tə nàʼà tə̀ ŋwô tìy. À mày kə nə̀ wù lìy də̀ ŋwô ani kyemì dzày bə̀ àyiə yə aghê dzîy nəniy anə dzə̀ŋì tə ŋwò tìy, i ki də ani fày àghě dzəŋə k-a-zə̀ à dzə̀m.

⁶Awizə̂, abu mə bû nəniy akə̀lə̀ ghà, dzìy bə̀ àyiə anə idzə̀ŋì ì ŋwǒ yìy, i də ŋwô ani fày ghà ə̀? I way ani fày dzə̀ ghà anə iyiə ìliy yiy. À mày kə nə̀ mə bû dzày bə̀ ghà nə̀ àyiə yə Zə̀kìy dê bə̂ â mìə̀, moo à mày kə nə̀ Zə̀kìy nyiə̀ mìə̀ nə̀ utwab wiy, à mày kə nə̀ mə bû nàʼà bə̀ iyiə yə Zə̀kìy dzîy, à mày kə sòʼò nə̀ mə bû tyi dè bə̀ ìyiə ìliy yiy awò ghà.

⁷À də̀ sòʼò ighəd nə̀ mbwələ tiy nə̀ ùbɛ̀m wìy. Abu aghê twuŋə nəniy mbwələ tiy, à liy yiy bwoʼo yə̂ nəniy ubɛ̂m wìy, mbwələ tiy foŋə yə̂ anə dzə̀ tə̀ ŋwô tìy ubɛ̂m wìy foŋə yə̂ anə dzə̀lə tə̀ ŋwô tìy, aghê də ani zuw kəli tsə nə̀ ghu twuŋə kìə̀ moo ghu bwoʼo kìə̀?

⁸Abu wù wə̀ ù twuŋə nəniy nsa fə tsam fiy də kə̀ twuŋ dzwâb fyi bə̂ nəway nə̀ aghû yìy zuw tsə, aghee də mə̀yiə ani byay tsə iwe i tsam ə?

⁹À də̀ sòʼò ighəd nə̀ ghà. Abu ghà dzə̀ŋə̀ nəniy nə̀ aghè anə idzə̀ŋi yə̀ ghu də zuw kyilə way, ghu kî kyilə tsə nə̀ wò dzìy nə̀indiə? Ayiə ghəli àdzii yiy kiy maŋə zəə tsiy anə kəŋkwùŋì.

¹⁰Ndə̀mə̀ lelê tə tə dzə̀ŋì tìy də ŋwô anə mbyi, idzəŋì ìmoʼ imòʼ yìy kwu nəniy imyiŋì i we yiy.

¹¹Abu mə kwuni də zuw kyilə dzə̀ wày idzəŋì yə̀ ghu dzə̀ŋə̀ nəniy, aghû yə̀ ghu dzə̀ŋə̀ nəniy, ghu kiy də aghe tətwùmə̀ â mìə̀, mə ki də soʼo wù kə̀twum awò àghě ghè yə̀.

¹²Mə dzîy nə̀ abu ghà ŋge liə nəniy ani kəli ayiə yə Zwàykə̀zwekiy nyiə̀ nəniy, ghà kwu ani də̀m tsə nə̀ daʼa kiy ani kəli udaʼa wə Zwàykə̀zwekiy nyiə̀ nəniy awò àghù yìy u biə kwoʼo bə̂ nəniy aghee ndàw Kə̀zə̀ yìy.

¹³I də nə̀ wù wə̀ ù dzə̀ŋə̀ nəniy anə dzə̀ŋì tə̀ ŋwǒ tìy, ù kwu ani gwùŋì nə̀ daʼa kiy nə̀ Zwàykə̀zwekiy nyiə̀ we nə̀ daʼa kiy ani kyèmì dzày dzwoŋi bə̀ àyiə yə ù mə̀ dzîy nəniy anə idzə̀ŋì ì ŋwò yìy.

¹⁴Aŋwòə abu mə gwuŋə̀ nəniy anə idzəŋì ìŋwò yìy, à gwùŋə̀ zwày kam. Mə zuw kyilə way ayiə yə mə dzîy nəniy.

¹⁵Mə də ani zəŋi yə̀ mə̀yə tə̀ zwày kam kiy də ani gwuŋə yə, mə ki gwuŋə yə soʼo anə imòʼ yamə. Zwày kam kiy də ŋwô ani zɛmə yə ayiə yiy, mə ki zɛmə yə soʼo anə imòʼ yam.

¹⁶Abu wò kyalə təŋə kə nəniy Zə̀kìy anə zwày kiə̀, aghû yə̀ ghu də zuw kyilə dzə̀ wày idzəŋì yə̀ wò kyalə nəniy Zə̀kìy ate, ghu də mə̀yə ani təm fwumi bə̀ nə̀ wò ani kyali Kəzə̀ ə? Ghu kî kaʼa tsə mə̀yiə ani dzày nə̀, “I doʼò kə ghii” nə̀ ghu zuw kyilə way ayiə yə wò nyìə̀ nəniy zòŋə̀ k-a-zə̀ kìy ate anə igwùŋì yə?

¹⁷Igwuŋì yə̀ wò nyiə̀ nəniy zòŋə̀ k-a-zə̀ kìy ate, i də ani tsəbə dzwabə, kwuni kwu dzə̀ way ifây ìliy yiy awò àghè liy yiy abu ghu də zuw kyilə way.

¹⁸Mə nyiə̀ kə̀zòŋə̀ awò Zə̀kìy nə̀ mə kwu ŋwô ani dzə̀ŋì dzə̀ŋì tə̀ ŋwò tìy tsìy fyi gha dzə̀m.

¹⁹Akwuni bû a ndàw Kə̀zə̀, mə kî liə ani dzày fyi bə̀ àyiə àtà a kwu nəniy utwab wiy ani tswù yə̀ àghè liy, tsìy fyi awò mìə̀ ani dzày lwuli tsə ndə̀mə̀ ndə̀mə̀ tə ayiə anə idzə̀ŋì ìŋwô yìy nə̀ aghê zuw kyilə way.

²⁰Awizə̂ yamə, ghà kə doʼò dzə̀ yəə à də̀ anîsə̂ ani kəli ibɛmə yə i də kamə kə̀ taw nəway. Ghà doʼò tsə yəə à də̀ anîsə̂ yə̀ ghu də kwu way ibɛb yiy. Ghà ki kwuni moʼo tsə ayiə yiy yəə à də̀ aghû yə̀ ghu nɛmə kə dzə̂ nəniy.

²¹I twâ dòʼò anə ŋwàʼà k-a-zə̀ nə̀, “Mwe ə̀ mbyi dziy mə kî nìy àghù yə̀ ghu dzəŋə̀ nəniy anə dzə̀ŋì tə̀ ŋwò tìy tə̀ ghu dzəŋì yə̂ nə̀ àghù yamə. Mə kî dzə̀ŋə̀ nə̀ ghu anə adzwə ghě tə twùmə̀, aghû yamə kî kwuni zuw dzə̀ wày àyiə yamə à dziy yiy.”

²²Yəə i də nəniy ghii, dzəŋì tə̀ ŋwò tìy də kətsəe awò àghù yə̀ ghu də kamə bɛmə ntwùm ə̀ Kə̀zə̀, à wày dzə awò àghù yə̀ ghu bɛmə dzə̂ nəniy. A kwuni bû daʼa kə̀ niʼa kə yiə yə Zə̀kìy dzîy, à də̀ kətsəe awò àghù yə̀ ghu bɛmə dzə̂ nəniy awò Kə̀litò, kə way dzə awò àghù yə̀ ghu də kamə bɛmə dzə̂ Kə̀litò.

²³Nyiə, bəə aghee dzəŋə k-a-zə̀ kìy təm dzəŋi bə̂ nəniy, aghê dzə̀mə̀ kaʼ yə̂ ani dzə̀ŋì anə dzə̀ŋì tə ŋwô tìy, nə̀ aghê liy yiy də awote nə̀ ghu zuw way moo nə̀ ghu kamə kə̀ bɛmə nəway awò Kə̀litò, ghu kî dzày wày nə̀ aghû yə̀ zəə ŋwò yə̀?

²⁴Abu ghà ndzə̀m kwuni niʼà ayiə yə Zə̀kìy dzîy, nə̀ aghě liy yiy mə̀ bwìy bù anə dzəŋə kəli, nə̀ ghu kamə bɛmə nəway Zə̀kìy, abu ghu zuw tsə nəniy ntwùmə̀ Kə̀zə̀, ntwum yə̀ də̀ ani saʼ tsə fôŋ tə ghu anə ayiə àbɛbə yə ghu zəŋə nəniy.

²⁵Ghu də ani zuw tsə ntwum yə ì kì dè nyə̀ fyi ayiə àbɛbə yə anə fòŋ tə ghu, ghu tu nyaʼa yə̂ nə̀ àŋwu yiy ani fwùlì Kə̀zə̀. Ghu ki dziy nə̀, “Zə̀kìy ndzə̂m də̀ ŋwô anə fwumi kəli.”

²⁶Iyiə yə mə dziy nəniy awizə̂ yamə i də nə̀, bəə ghà bû nəniy anə kədzəŋə ani bù fwùlì Kə̀zə̀, wè lìy kwu nəniy ndzàŋ ani izɛm, wè lìy kwu nəniy ayiə yiy ani tyi dè, moo wè lìy kwu nəniy ayiə yiy Zə̀kìy tyi dê nəniy awò we, moo wè lìy kwu nəniy ntwùm ani nàʼà anə idzə̀ŋì ì ŋwò yìy, wè lìy də nəniy ani kyèmì dzày bə̀ àyiə ghè yə̀ anə idzə̀ŋì ì ŋwò yìy, ayiə ghè yə̀ àdzə̀m kwu ani dòʼò tsə ani biə kwoʼ bə̀ àghě Kəzə̀.

²⁷Abu wù lìy dziy dzəŋì anə idzə̀ŋì ì ŋwò yìy, abu aghê àbè, moo aghê àti fyi kə nəniy nə̀ ghu kwu ani dzə̀ŋì anə dzə̀ŋì tə̀ ŋwò tìy, ghu kwu dzə̀ way ani dzə̀ŋì anə sòŋə fə mòʼ. Abu ghu dzəŋə̀ nəniy, wù ùmòʼ kwu ani də awote ani kyèmì dzày bə̀ àyiə yə ghu dzîy nəniy anə idzə̀ŋì ì ŋwò yìy.

²⁸Bəə wè lìy də wày ani kyèmì dzày bə̀ àyiə yə wù dzìy nəniy anə idzə̀ŋì ì ŋwô yìy, anə dzəŋə k-a-zə̀, ghu ba dòʼò yə̀ moŋ. Aghee ghè yə̀ kwu kə ani bvami dzə̀ŋì kə anə fòŋ tə ghu, dzə̀ŋì yə̀ kə nə̀ Zə̀kìy.

²⁹Aghee ntwùm ə̀ Kə̀zə̀ yìy kwu ani dòʼò tsə àbè moo àti ghu niʼà ayiə yə Zə̀kìy dzîy, aliy yə̀ ki də kə ani zwuli nə̀ ayiə yə ghu niʼà nəniy à də̀ kə ŋwô àsoŋə̀ yìy yə̀.

³⁰Abu wè lìy niʼà ayiə yə Zə̀kìy dzîy, Mwe ə̀ mbyi kwuni dê nyiə̀ tsə nəniy wè lìy nə̀ àyiə liy yiy anə kədzəŋə, wù wə̀ ù niʼà ayiə Zə̀kìy dzîy ù kwu ani təmi tsə, wè lìy wə̀ kəli tsə sòʼò kə̀bwòʼ ani dzə̀ŋì.

³¹Aŋwòə ghà nam də̀ ŋwô ani nàʼà ntwùm ə̀ Kə̀zə̀ fə̀moʼ fəmòʼ ani zəŋi tsə nə̀ ì ki tswuə yəə aghê liy, iwe i ghu yiy ki ŋəmə yə ate.

³²Ghà kəli tsə nə̀ wù wə̀ ù niʼà ayiə yə Zə̀kìy dzîy, ù də̀ ŋwô ani kwi tsə uwee u we abu ù niʼà ayiə yə Zə̀kìy dzîy ani zəŋi tsə nə̀ wè lìy mboŋ nàʼà sòʼò.

³³I ghii də̌ aŋwòə Zə̀kìy liə nə̀ ŋgà ki zəŋə ayiə yiy anə ule, zəŋə sòʼò anə ibvay. Abu aghee Kəzə̀ yìy zû nəniy a ndàw Kə̀zə̀,

³⁴anə ayiə yə ulâŋ u ghě Dzû wìy dzîy nəniy nə̀ iyəŋi kwu dzə̀ way ani dzəŋə. Ghu kwu kə ani dòʼò tsə moŋ, ghu ki zwulə yə kə ayiə yiy anə utswùŋì.

³⁵Abu ghu liə nəniy ani kəli fyi kə iyiə ì liy yiy, ghu bəb zuw tsə awò àŋəmə ghu yiy anə ndaw tə ghu. À də̀ tuw kə̀ dələ kiy awò iyəŋi ani dzəŋə anə dzəŋə kə aghě Kəzə̀.

³⁶Ghu kə kə̀ kaʼ bə̂ dzə̂ ani nàʼà ntwùm ə̀ Kə̀zə̀ azoŋə̀ wò a Kolìn. À kaʼi wày soʼo wô ghu bû naʼà bə̂ nəniy ntwùm ə̀ Kə̀zə̀.

³⁷Abu wò mòʼò nəniy nə̀ wò də̌ wè ntwùm ə̀ Kə̀zə̀ moo nə̀ Zwàykə̀zwekiy mə nyiə̀ wô nə̀ namə kiy, wǒ kəli tsə nə̀ ayiə yə mə twâ bə̂ nəniy à də̀ lâŋ kə Mwe ə̀ mbyi.

³⁸Abu wò kwuni kôʼ kê nəniy ayiə yə, aghee dzəŋə kə aghě Kəzə̀ yìy kî kòʼò kyilə dzə̀ wày wô.

³⁹Yəə i də nəniy ghii awizə̂, ghà gaʼ na yə̂ fòŋ təli ani nàʼà ayiə yə Zə̀kìy dzîy, ghà kə kwuni twe màʼà dzə̀ nə̀ aghê liy kə dzəŋì dzə̀ anə dzə̀ŋì tə̀ ŋwò tìy.

⁴⁰Ghà kwuni kwu kə ani zəŋə yə ayiə dzə̀m anə ayiə dzoŋə̀ yìy, zəŋə yə̀ sòʼò anə ule.