Read Isu 1 Kolìn 15 Bible Online

1 Kolìn 15 - Isu bible

1 Kolìn 15

¹Awizə̂ yamə, mə zəŋə̀ bə̀ ghà anə ntwùm ìdzòŋə̀ yə̀ mə kə bû naʼà bə̂ â ghà, ghǎ bɛmə kə, təmi dòʼò taw tsə sòʼò ate.

²À yù də̌ ntwum yə ì nì bii fyiə nəniy gha abu ghà təmi doʼò taw tsə nəniy ate. Abu ghà də̀ kə̀ təmi doʼò taw tsə anə ntwùm ì ghè yə̀, à ki də nə̀ ghà kə màŋ bɛmə này kə̀ŋwôŋwò.

³I də nə̀ kwab kə iyiə kə səsə kə mə kə dzây bə̂ nəniy awò ghà, à də̀ iyiə yə ghu kə dzây bə̂ nəniy awò mìə̀ soʼo nə̀, Kə̀litò maa pfə bòʼ bɛb tə ŋgàŋ anə yiə yə ghu twâ na anə ŋwàʼà k-a-zə̀

⁴nə̀ ghu kələ we ntsukə tsìy tsə ìnti Zə̀kìy zɛ̀mə̀ dzwoŋi bə̀ we anə ipfə anə ayiə yə ghu twâ na nəniy anə ŋwàʼà k-a-zə̀ nə̀,

⁵u dè yə̀ ùwee uwe awò Pità, a sòŋə fə̀ liy fiy, u zù dè yə̀ sòʼò ùwee awò àghě ntwumə we yiy àvəm nə̀ àghè bè.

⁶U zù dè yə̀ sòʼò ùwe awò àwizə̂ ə ŋgàŋ à liy yiy ghu kə də nəniy mə̀mbwǎm intà anə lòʼo kəmòʼ. Ndə̀mə̀ ghu à liy yiy nam mùə̀ ŋwô, yəə à liy tsəb pfə kə ŋwô.

⁷U zù dè yə̀ ùwe awò Dzɛ̂m, dyaŋi zù dè yə̀ awò àghě ntwum ə we yiy à dzə̀m.

⁸Ù kə bù dè gwùŋì tsə uwee awò mìə̀ yəə mə də kə yəə à də̌ wù wə̀ ghu kə byi nəniy we anə sòŋə fə̀ bɛbə fiy.

⁹Aŋwòə mə də gwò fə fəghù anə aghě ntwùm ə̀ Yesù à dzə̀m. Mə kə̀ boʼò kpe dzə̂ yəə ghu ni toŋə miə nə̀ mə də wè ntwùm ə̀ Kə̀litò aŋwòə mə kə zəŋə nə̀ aghee Kə̀litò yìy ki fyaʼa.

¹⁰À kwuni də̌ bòʼ fòŋə̀ Kə̀zə̀ ìdzòŋə̀ yiy ì zəŋi nəniy miə nə̀ mə doʼò wù wə̀ mə də nəniy we zii. Fòŋə̀ ìdzòŋə̀ yə̀ Zə̀kìy dê nəniy awò mìə̀, ì kamə kə̀ nây dzə̂ kə̀ŋwôŋwò. Mə mə fàʼ tsìy fyi aghee ntwumə Yesù àliy yə à dzə̀m. À fàʼà dzə̀ wày miə, à fàʼà Kə̀zə̀ azoŋə̀ mìə̀ abidzɛ̀mə̀ fòŋə̀ we ìdzòŋə̀ yə̀ ì də nəniy azoŋə̀ mìə̀.

¹¹Abu à kə niʼà kə nəniy miə ntwùm ì ghè yə̀ moo à kə niʼà kə̀ aghee ntwùm ə̀ Yesù àliy yə, à nam də̀ kə ntwùm ì ghè yə̀ ghà kə bɛmə nəniy.

¹²Nyiə, abu ayiə yə ghè niʼà neniy nə̀ Kə̀litò maa zɛ̀mə̀ dzwoŋi anə ipfə, à sì də̌ kìə̀ gha àliy yiy sî səa nəniy nə̀ aghê nî zɛ̀mə̀ dzwoŋi dzə̀ wày anə ipfə yə?

¹³Abu à də nəniy nə̀ aghê nî zɛ̀mə̀ dzwoŋi dzə̀ wày anə ipfə, à ki də nə̀ Kə̀litò kə kə̀ zɛmə̀ dzwoŋi dzə̂ anə ipfə.

¹⁴Abu à də nəniy nə̀ Kə̀litò kə kə̀ zɛmə̀ dzwoŋi nəway anə ipfə, à ghii də̌ nə̀ ntwum yə ghè niʼà nəniy ì kwu way fàʼ kìy. Ibɛmə ghii soʼo awò Zə̀kìy kwu dzə̀ way fàʼ kìy.

¹⁵À ki də nə̀ ghəd, aghee ntwumə Yesù, ghè mə àyiə guw yiy dzây kwùmə̀ yə̀ nə̀ Zə̀kìy aŋwòə ghè dzây nə̀ Zə̀kìy kə bwad zɛ̀m kə Yesù anə ipfə. Abu aghê də kwuni zɛ̀mə̀ dzwəŋə way anə pfə, à ki də ayiə àsoŋə̀ yìy nə̀ Zə̀kìy kə kə̀ bwad zɛm dzwoŋi dzə̂ Kə̀litò anə ipfə.

¹⁶Abu aghee də zə̀ɛ̀mə̀ dzwəŋə way anə ipfə, i ghî dè tsə nə̀ Kə̀litò kə kə̀ zɛmə̀ dzwoŋi soʼò anə ipfə.

¹⁷Abu à də nəniy nə̀ Kə̀litò kamə kə̀ zɛmə̀ dzwoŋi anə ipfə, à ghii də̌ nə̀ ibɛmə ghii yiy də kə̀ŋwôŋwò, à ki də nə̀ ghà nam mùə̀ kə anə ibɛb.

¹⁸À ki də soʼo nə̀ aghû yə̀ ghu kə pfə nə̀ ghu mə bɛmə â Kə̀litò, ghu mə này an-a-nsə̀àŋì.

¹⁹Abu à də nə̀ ŋgà gaʼ na təŋ kə tə̀fòŋ azoŋə̀ Kə̀litò nə̀ i mây təŋ kə anə imùə̀ i ŋgàŋ fə an-a-mbvə̀dintsə, tsìy fyi imuə̀ yə̀ an-a-vələ, i ki dee tsə nə̀ ŋgà də aghû yə̀ Zə̀kìy də ani ŋge dè ghu nə̀ mwuli kə̀kwoʼo kiy tsìy fyi aghê dzə̀m.

²⁰Iyiə ìsoŋə̀ yìy kwuni də̀ kə nə̀ Kə̀litò maa zɛmə̀ dzwoŋi anə ipfə. Ù kə də̌ wù səsə ani zɛmə̀ anə ipfə ani dè tsə nə̀ aghû yə̀ ghu pfə dzə̂ nəniy, ghu nî zɛ̀mə̀ dzwəŋə ŋwò anə ipfə.

²¹Anə ayiə yə ipfə yiy kə bû nəniy abidzəmə̀ wù ùmòʼ, toŋə Adàm, à də̀ sòʼò ighəd ŋgà nî zɛ̀mə̀ dzwəŋə nəniy anə ipfə abidzəmə wù ùmòʼ toŋə Kə̀litò.

²²Anə yiə yə aghê àdzə̀mə̀ pfə nəniy bòʼ yəə ghu kə fyi nəniy azoŋə̀ Adàm, à də̀ sòʼò ighəd, aghê adzə̀m ghu təm doʼò fwumi nəniy nə̀ Kə̀litò, ghu ni zɛmə̀ dzwəŋə nəniy anə ipfə.

²³Ayiə à zɛmə dzwəŋə yə̀ nì də̀ anə ule, Kə̀litò kə də̌ wù səsə ani zɛ̀mə̀ anə pfə. Ani buu sòŋə̀ fə u ni kàmə̀ bè dzwəŋə nəniy ate, aghû yə̀ ghu bɛmə nəniy â we, ghu nî zɛmə̀ dzwoŋi bə̂.

²⁴Ani buu Kə̀litò byɛbi maʼà tsə dzə̂ ùdòŋ u nsìy mə̀bɛbə̀ mìy ù dzə̀m anə lòʼo tə ghu nə̀ àghù yə̀ ghu saʼa nəniy anə mbyi, nə̀ ù daʼa wə u də nəniy anə mbyi, mbyi ni dyaŋi mày. Kə̀litò nî dyaŋi nyə̀ yə̀ inaʼ ì fyiə yə awò Zə̀kìy, ù də nəniy Tè we.

²⁵Kə̀litò kwu ani saʼ zù kwùm anə sòŋə fə Zə̀kìy nî tyimə nia bə̂ nəniy aghû yə̀ à dzə̀m ghu bâ nəniy we a təŋə ifwe i we.

²⁶Ipfə yiy də fyiə kə ù kì təmə nyiə gwuŋə̀ kə nəniy.

²⁷I twâ dòʼò anə ŋwàʼà k-a-zə̀ nə̀, “Zə̀kìy mə nìy na bə̀ ùfyiə udzə̀m a təŋə̀ Kə̀litò.” Abu ghu dzây tsə nəniy nə̀ ufyiə udzə̀m də à təŋə Kə̀litò, i myìŋə̀ dzə̀ wày nə̀ Zə̀kìy də sòʼo a təŋə̀ we.

²⁸Abu Zə̀kìy nîy na bə̂ dzə̂ ùfyiə u dzə̀m a təŋə̀ Kə̀litò, Kə̀litò kî nìy na yə̀ ùwee u we a təŋə̀ Zə̀kə̀ kə nî na yə̂ nəniy ufyiə udzə̀m a təŋə̀ we nə̀ ù dòʼò kə̀tuw ate tə̀ Zə̀kìy ki doʼò təŋ kətuw anə ufyiə udzə̀m.

²⁹Bəə à də nə̀ aghê nî kàmə̀ zɛmə̀ dzwəŋə way anə ipfə, i myìŋə̀ kìə̀ nə̀ aghee taw yiy zê nìy mwi m-à-zə̀ mìy anə azəd ə ghè pfə yiy ə? Abu à də nə̀ aghê pfə zɛmə̀ wày, aghê zê nìy mwi m-à-zə̀ mìy anə azəd ə ghè pfə yiy anə iyîkìə̀?

³⁰À də̌ kìə̀ ŋgà sî zuw nəniy ŋgoʼ nsòŋə̀ in dzɛ̀mə̀? Lyìmə̀ kòʼò yə̀ ìpfə nsòŋə in dzə̀m ə?

³¹Awizə̂ yamə, mə lyimə̀ kòʼò ìpfə ntsukə indzə̀m. Ikiykiy yə mə fənə̀ nəniy bòʼ ghà, mə fənə̀ boʼ ìmùə̀ ghii yə ghà zôŋ doʼò nə̀ Mwe ə̀ mbyi ə̀ ŋgàŋ Yesù Kə̀litò. I zəŋə miə nə̀ mə dzây àyiə yə mə dzîy nəniy nyiə̀ awò ghà.

³²Yəə mə kə ŋwâ nəniy nə̀ àghè àbɛbə a Efesùs, bəə mə kə ŋwâ nəniy anə imòʼ i wê mbyi, mə kə dzǐy kyilə namə kə̀ ghaa kiy? Abu à də nə̀ aghê pfə ndzəmə̀ zɛ̀mə̀ wày, aghê ki dziy kə nə̀ ŋgà ki tsəŋə nyiə yəə, muə mə̀nlwù aŋwòə ŋgà kî pfə ŋwò tswutswu.

³³Kəə ghǎ nì fə̀lə̀ aghê àlyiʼa yiy abidzəmə̀ àghù yə̀ ghu dzîy nəniy ndzòʼò àyiə yə ghii aŋwòə abu ghà bwîy fwumə nəniy nə̀ àghè bɛbə, ghu fwələ myàʼà mwàmə məli mə̀dzòŋə̀ mìy.

³⁴Ghà toʼò kwumi tsə utuw, ghà kəli tsə utwab ani moʼo tsə ayiə yə a də nəniy tsitsi, ghà bwi na tsə ani zəŋi ayiə àbɛbə yiy. Mə ghii dzìy nə̀ utuw də̂d tsə gha aŋwòə gha àliy yiy kwu dzə̀ way Zə̀kìy.

³⁵We lìy nyìə̀ ni bəbə nə̀, “Aghê pfə nî zɛ̀mə̀ dzwəŋə bə̀ mə̀yiə anə ipfə? Ghu nî baa kyilə ndzòʼò ìwe ìghaa yiy abu ghu ni zɛmə kə?”

³⁶Ghà lyaʼà ŋwò. Fyiə kə wò zee yə̂ nəniy a mbvə̀dintsə, kə way ani bvuni fyi kə dzə̀ nə̀ kə kə̀ pfə tsə nəway.

³⁷Abu wò zee yə̂ nəniy fyiə kiy a mbvə̀d, wò ze yə̀ sam. Wò ze yə̀ dzə̀ wày fyiə kə ghè kə̀ nə̀ kə mə nɛmə dòʼò təŋ. Yəə à də̀ isə isaŋ moo fyiə kə̀liy kiy.

³⁸Zə̀kìy kwuni nyìə̀ sàm ì ghè yə̀ nə̀ ìsə ìfyiə yiy anə ayiə yə ù liə. Ù nyə̀ tsə sam ìmoʼ imòʼ nə̀ ndzòʼò ùwee wə ì kì kyilə.

³⁹Ighəd, ufyiə u dzə̀m u zwî nəniy u kwu dzə̀ way uwee ù moʼo wiy. Aghû yìy kwu iwee i ghu nə̀ noŋ, nyâm tìy kwu sòʼò gûw tə iwè tə ghu nə̀ noŋ, ŋwùni kwu sòʼò gûw tə tə iwè tə ghu tiy nə̀ noŋ, tsi tiy kwu soʼo nəniy gûw tə iwè tə ghu tiy nə̀ noŋ.

⁴⁰Ufyiə wiy də an-a-byiwuŋ, də̀ sòʼò fə an-a-mbvə̀dintsə. Iwe yə i də nəniy an-a-byiwuŋ i mwâ nə̀ noŋ, i we yə i də nəniy fə an-a-mbvə̀dintsə, i mwâ sòʼò nə̀ noŋ.

⁴¹Inyi yiy kwu imwâ i we nə̀ noŋ, ndzoŋ kwu soʼo nəniy imwâ i we yiy nə̀ noŋ. Nsǐbələ̀ mìy kwu imwây i ghu nə̀ noŋ. Yəə nsǐbələ̀ mìy tsəmə dûw kə ghii, fə̀moʼ fəmòʼ kwu kə imwây i we nə̀ noŋ.

⁴²I kî dyòʼò sòʼò ighəd nə̀ àghù yə̀ ghu nî pfə zɛmə̀. Uwee wə̀ ghu kyələ yə̂ nəniy à də̀ u ghè u fwîy ŋwò yə̂ nəniy. Abu u zɛ̀mə̀ dzwoŋi bə̂ nəniy, u dòʼò tsə uwe wə̀ ù nî də̀ fwày dzə̀ wày.

⁴³Soŋə fə ghu kyələ yə̂ nəniy uwee wiy ate, u lay ŋwò, dzwàbə̀ sòʼo wày. Abu uwee u ghè wə̀ zɛ̀mə̀ bə̂ fə, u kwu kədaʼa, mwà dzwàbə̀ sòʼò.

⁴⁴Uwee wə ghu kyələ yə̂ nəniy à də̀ uwee wə ŋgà kwu nəniy an-a-mbvə̀dintsə. Abu u zɛmə̀ kə, u kəli tsə imuə̀ ìfyiə yə Zwàykə̀zwekiy nyiə̀ nəniy. Yəə a kwu nəniy iwee yə fə an-a-mbvə̀dintsə, à də̀ sòʼò ighəd a kyilə iwee ì ŋwô yìy Zwàykə̀zwekiy nyiə̀ nəniy, abu ŋgà zɛmə̀ kə anə ipfə.

⁴⁵I twâ dòʼò anə ŋwàʼà k-a-zə̀ nə̀, “Adàm ùsəsə wə Zə̀kìy kə zəŋi nəniy à kə də̌ wù ù kə muə nəniy anə mbyi.” Abû Adàm ìbàm wə̀ nyiə à də̌ Zwày kə̀ kə nyiə̀ nəniy imùə̀ yə̀ i nî də mày kòʼ dzə̀ wày.

⁴⁶Uwee usəsə wə ghu byikə bə̂, à də̀ uwee wə ŋgà kwu nəniy fə an-a-mbvə̀dintsə. Abû ùwee wə Zwàykə̀zwekiy nyiə̀ nəniy à də̌ ù wə u bè nəniy ibàm.

⁴⁷Zə̀kìy kə wù ùsəsə wə̀, toŋə Adàm zwubì anə təzwùb tə̀ fə an-a-mbvə̀dintsə. Ù kə twum tswi bə̀ Adàm ù ìbàm wə̀ toŋə Kə̀litò an-a-vələ.

⁴⁸Aghû yə̀ ghu muə nəniy fə an-a-mbvə̀dintsə, ghu də yəə à də̀ wù wə̀ ghu kə zwubì nəniy anə zwùb tə̀ fə a mbvə̀dintsə. Aghû yə̀ ghu də nəniy an-a-vələ, ghu də yəə à də̌ wù wə̀ ù kə ŋwô bə̂ nəniy an-a-vələ.

⁴⁹Yəə ŋgà də nəniy an-a-mbvə̀dintsə, ŋgà fwunə wù wə̀ ghu zwubì nəniy an-a-mbvə̀dintsə, à də̀ sòʼò ighəd ŋgà nî bè fwuni nəniy wù wə̀ ù də nəniy an-a-vələ.

⁵⁰Awizə̂ yamə, fyiə kə mə dzîy nəniy à də̌ nə̀ ŋgà nî wày dzə ani nyi kwoʼ anə vələ k-a-zə̀ nə̀ iwe yə ghu kə byi bə̂ nəniy ŋgaŋ ate fə an-a-mbvə̀dintsə. Fyiə kə kə nî kwu ani fwày, kə way dzə ani bòʼò kəli dzə̀ fyiə kə kə də wày dzə ani fwày.

⁵¹Mə dzây nyiə̀ bə̀ ghà nə̀ kwab kə iyiə kə kə nû doʼò Zə̀kìy dê dzə̂ awò ghə̀d à də̌ nəniy nə̀ ŋgà nî pfə mà dzə̀ wày àdzə̀m. I kwuni də̀ kə nə̀ iwee iŋgàŋ yìy nî kwunə kə ŋwò anə fə sòŋə. Ŋgà ni mâŋ ŋwò kwuni kə soŋə fəmòʼ yəə wù nə̀ mwulə tsə nəniy isə yiy. Ani bu ghu twuŋ gwuŋì tsə nəniy isoŋ yiy, aghû yə̀ ghu pfə dzə̂, ghu ni zɛmə̀ dzwoŋi bə̂, ghu ni də wày dzə ani kàm pfə. Ŋgaŋ yə ŋgà nî də kamə pfə nəway, a ni mâŋ ŋwò kwuni kə soŋə̀ fəmòʼ, a kəli tsə iwee ìfyiə yiy.

⁵²

⁵³I də ghii aŋwòə iwee i ŋgàŋ yə̀ ŋgà kwu nəniy fə an-a-mbvə̀dintsə, i nî pfə fwìy nəniy, i nî kwu ani kwuni dòʼò anə iwè yə̀ i nî də wày dzə ani pfə.

⁵⁴Ani bu iwe i ŋgàŋ yə̀ i nî pfə fwîy nì kəli tsə iwe yə i nî də wày ani pfə fwày, à ni də iyiə yə ghu twâ na anə ŋwàʼà k-a-zə̀ ni də ìsoŋə̀ yìy. I twâ dòʼò nə̀, “Ghu byɛbi màʼà ìpfə. Ghu mə təm nyi.”

⁵⁵Hôw! Ipfə yiy, wò təm nyi anə bə̀d kə̀ ghaa kiy? Daʼa kiə̀ kə̀ wo tyəə kyabə tsə̂ àghû yìy ate kə də ayiə?

⁵⁶Daʼa kə ipfə yiy kwu nəniy tyəə kyabə àghù ate à nyə̀ ìbɛb. A kwuni bû ìbɛb, i daʼa kə we kiy kyilə an-a-làŋ.

⁵⁷Ŋgà kwuni nyìə̀ kə kə̀zòŋə̀ awò Zə̀kìy, ù nyə̀ nəniy ŋgaŋ nə̀ daʼa kiy ani təm nyi ibɛb nə̀ ù tsìy abidzəmə̀ Mwe ə̀ mbyi ə̀ ŋgàŋ, Yesù Kə̀litò.

⁵⁸À yù də̀ ighè awizə̂ yam àsoŋə̀ yìy mə liə nəniy nə̀ ghǎ təmi doʼò taw tsə anə ibɛmə ghii. Kəə fyiə kə̀li kiy nə̀ səkə̀ gha. I taw nyiə yə nə iwee nəli yiy anə fàʼ kə Mwe ə̀ mbyi nsòŋə indzə̀m aŋwòə ghà kwu nə̀ fàʼ kə Mwe ə̀ mbyi kə ghà faʼà nəniy, ghà faʼa dzə̀ wày kə̀ŋwôŋwò.