Read Isu 1 Kolìn 16 Bible Online

1 Kolìn 16 - Isu bible

1 Kolìn 16

¹Nyiə, kwùmə̀ yə̀ nə̀ àyiə yə ghà kə twâ nəniy ani fày yə̀ àghù yə̀ ghu bɛmə nəniy Zə̀kìy a mbwòʼ ə̀ Dzùdiyà. Ghà kwu ni zəŋi yə̀ ndzòʼò àyiə yə mə kə dzây yə̂ awò àghě udzəŋə u Kəzə̀ wə̀ u də nəniy anə inaʼ i Gàlatìyà nə̀ ghu ki zəŋə.

²Ntsuk fə səsə fiy anə ivən, wù ùmoʼ umòʼ kwu ani niy zee nia yə kə̂m kə ufyiə kiy anə ufyiə wə ù fàʼ koŋə anə ivən, ani zəŋi tsə nə̀ abu mə bû nəniy à ki də nə̀ ghu mə tsuw na mà ùfyiə wiy.

³A ki bû mə dyaŋi bû nəniy, mə ki nyiə̀ tsə kəŋwàʼà awò àghù yə̀ ghu sây na nəniy nə̀ ghu boʼò zû nə̀ ntsuw ghii a Yèlusalèm.

⁴Abu i kî dzwâb nəniy yiə mə nə zû soʼò awote, ghu ki zû dzəŋi nə̀ mìə̀.

⁵Mə kî bè kə akə̀lə̀ ghà nə̀ mə mə zù dzə̀ à Màsèdonìyà aŋwòə mə kwu ani tsìy yə̀ dzə̀ dzəd awote.

⁶Nyîliy fiy, mə kî bè dzə̀ ə̀ dyòʼò tsə nə̀ ghà. Mə ki də ani dòʼò koŋə nə̀ ghà tə̀ soŋə fə mbùw ùfəb fə dzə̀m fiy tsîy mà tsə tə̀ ghǎ nì də ani fày mìə̀ ani zəŋə tsə nə̀ mə zû loʼo kə mə liə nəniy ani zù ate.

⁷Mə liə dzə̀ way ani bù dòʼò nə̀ ghà anə kə̀mə̀ fə sòŋə, mə liə ani ndəŋ dòʼò koŋə yə̀ nə̀ ghà abu Mwe ə̀ mbyi nyiə̀ nəniy miə nə̀ bwòʼ kìy ani dòʼò nə̀ ghà.

⁸Mə kî kwu ani dòʼò kə fə anə inaʼ i Efesùs, mə nyi fyi kə utsuk u Pentekòs.[2]

⁹Dzə̀d ìsoŋə̀ yìy mə fwiy dòʼò awò mìə̀ ani fàʼ fàʼ kə̀soŋə̀ kìy. Mə nia way isə yiy azoŋə̀ àghù yə̀ ghu tyalə̀ nəniy miə.

¹⁰A ki bu Timotì bù nəniy a kə̀lə̀ ghà, ghà ki ŋgwam na dzwâb tsə we aŋwòə ù fàʼà fàʼ kə Mwe ə̀ mbyi anə ayiə yə mə faʼà soʼò nəniy.

¹¹Yəə i də nəniy ghii, kəə wè lìy nə̀ koʼò kê dzə̂ nəniy Timotì. Ghà kwuni kwu ani fày we tə̀ ù bwìy kədzôŋ abu ù bè dzwəŋə a kə̀lə̀ mìə̀ aŋwòə mə liə nə̀ ù mbab bù dzwoŋi nə̀ àwizə̂ ŋgàŋ àliy yə ghu bɛmə nəniy awò Zə̀kìy.

¹²A bu àzə̀ ə̀ ŋgàŋ Àpolòs wə̀ mə kə zəŋə nəniy nə̀ ù kəli tsə ighaa tə̀ ù bù dzəŋi nə̀ àwizə̂ ə ŋgàŋ àliy yə ghu bɛmə nəniy Zə̀kìy, ù də kwuni liə way ani bù nyə̀, ù kì bè ŋwò a ki buu ù kəli tsə nəniy bwôʼ kìy.

¹³Ghà doʼò tsə anə mə yèmì. Ghà təmi taw tsə anə ibɛmə ghəli awò Zə̀kìy. Kəli tsə nənìy fôŋ tə̀ taw tiy, ghà təmi taw tsə soʼò.

¹⁴Ghà ki dee tsə iliə yiy awò àghè dzə̀m anə ufàʼ ùdzə̀m ghà faʼà nəniy.

¹⁵Awizə̂ yamə, ghà kwu nə̀ Stèfanàs nə̀ ìsəd i ndaw i we yiy kə də̀ agheè səsə yiy ghu kə bɛmə nəniy Zə̀kìy a bwòʼò Àkayà. Ghu mə na sòʼò fôŋ tìy ani fàʼ fày àghù yə̀ ghu bɛmə Zə̀kìy. Mə bwoʼ gha nə̀ wokiy nə̀,

¹⁶ghà ki dzwumə yə ndzòʼò àghù yə̀ ghu də nəniy yəə a də̌ Stèfanàs. Ghà ki zuw yə soʼo awò àghù yə̀ ghu faʼà soʼò nəniy yə à də̌ ghu.

¹⁷Mə kə də̌ nə̀ dwiʼi kiy aŋwòə Stèfanàs, nə̀ Fòtùnatùs, nə̀ Àkaykùs, ghu mə bù ani bù fàʼ fàʼ kə̀ ghà kə kwu ani fày mìə̀ ate.

¹⁸Ghu mâ ŋge kyimi fòŋ yam anə ayiə yə ghu kə kyimi soʼò nəniy fôŋ təli tiy ate. Ghà kwu ani nyiə̀ mə̀ŋkwiʼi awò ndzòʼò àghù yə̀ ghu faʼà nəniy fàʼ kə̀dzoŋə̀ kiy.

¹⁹Udzəŋə u ghě Kəzə̀ wə̀ fə anə mbwòʼ ə̀ Esìyà, u tyoŋə zuw bə̀ ghà. Àkwilà we nə̀ Plìsilìyà nə̀ àghè liy yə àdzə̀m ghu dzəŋə nəniy a ndàw ghu, fwùlə kəzə̀ ghu tyoŋə zuw bə̀ sòʼò ghà nə̀ fòŋ tə̀ dzoŋə̀ tìy anə izəd i Mwe ə̀ mbyi.

²⁰Aghû yə̀ adzə̀m fə, ghu bɛmə nəniy Zə̀kìy, ghu toŋə zuw bə̀ sòʼò ghà. Ghà toŋə zuw yə̂ soʼò wù ùmoʼ umòʼ nə̀ ghà myaŋə kyilə yə̀ ghu.

²¹À twà tsə miə Pôl itwoŋə zuw yə nə̀ wo kam kiy.

²²Wù wə̀ ù də liə way Mwe ə̀ mbyi, ntyiə kiy doʼò azoŋə̀ we. A Mwe ə̀ mbyi, bù.

²³Mə gwùŋə̀ nə̀ Mwe ə̀ mbyi dê ghà nə̀ fòŋə̀ we ìdzòŋə̀ yìy.

²⁴Mə gwùŋə̀ nə̀ iliə yam yiy doʼò nə̀ ghà abidzəmə̀ Yesù Kə̀litò. I doʼò kə ghii.