Read Isu 1 Kolìn 3 Bible Online

1 Kolìn 3 - Isu bible

1 Kolìn 3

¹Awizə̂ yamə, mə kə wày dzə̀ ani tyi dè dzə̀ àyiə â ghà anə yiə yə mə kə də ani tyi dè awò àghù yə̀ Zwàykə̀zwekiy lwee doʼò nəniy azoŋə̀ ghu, mə kə kwuni kwu ani tyi dè ayiə â ghà yəə à də̀ aghû yə̀ Zwàykə̀zwe kiy də kə̀ lwe doʼò nəway anə mùə̀ tə ghu. Mə dzəŋə̀ nə̀ ghà yəə ghà də anîsə̂ anə ibɛmə ghii awò Kə̀litò.

²Mə kə kə̀ tyi dê dzə̂ gha nə̀ àyiə yə a kə taw nəniy awò ghà ani zuw kəli ighəd yəə wìyəŋi nì nyìə̀ ighe yiy awò wa ù bwî wìy, i də taw way awò we ani ŋwu, mə kə tyi dè ghà nə̀ nyàŋə mə̀ yiə miy anə ayiə Kəzə̀, aŋwòə ghà kə wày dzə ani zuw kəli ayiə àtaw yiy a sòŋə fə ghà fə̀. Nyiə̀, ghà nam kam wày dzə ani zuw kəli ayiə Kəzə̀ àtaw yiy,

³aŋwòə ghà nam mùə̀ anə yiə yə aghee mbyi muə nəniy ate. Abu ghà kwu nəniy ghòʼ kìy anə iwè nəli, zwàʼà sòʼò nə̀ wù ùmoʼ umòʼ, i ghii dè tsə nə̀ ghà muə sòʼò yəə à də̀ aghee mbyi, fàʼà sòʼò àyiə yə̀ aghee mbyi faʼà.

⁴Abù wù ùmòʼ anə uzə ghii dzîy nəniy nə̀, “Mə dzwumə̀ Pôl,” ù lìy dzìy nə̀, “Mə dzwumə̀ Àpolòs.” Ghà ghî zəŋə yə à də̀ aghee mbyi.

⁵Àpolòs də̌ ndiə? Pôl də̌ ndiə? Ghè mâŋ də̀ aghee kəfàʼ awò Zə̀kìy, fìy sòʼò ghà nə̀ ghà bɛmə kə â Kə̀litò. Wù ùmoʼ umòʼ anə uzə ghələ faʼà kə àyiə yə Mwe ə̀ Mbyi nyiə̀ na nəniy nə̀ ù fàʼ.

⁶Mə də yəə à də̌ wù wə̀ ù zee nəniy ndzòʼ tìy, Àpolòs də̀ yəə à də̌ wù wə̀ ù bvùlə̀ nəniy. Zə̀kìy də wù wə̀ ù zəŋə nəniy nə̀ ndzòʼ tə̀ nɛmə.

⁷Wù wə̀ ù zee nəniy nə̀ wù wə̀ ù bvùlə̀ nəniy, ghu way dzə fyiə kə̀ liy kiy. À mày kə Kə̀zə̀ ù də̀ nəniy fyiə kə̀ soŋə̀ kìy aŋwòə ù zəŋə ndzòʼò tìy niyemə.

⁸Wù wə̀ ù zee nəniy nə̀ wù wə̀ ù bvùlə̀ nəniy, ghu də anə ŋghù kə̀ mòʼ. Zə̀kìy tsəə kə àghè dzə̀m anə fàʼ kə̀ ghu fâʼ.

⁹Ghè də aghee kəfàʼ ə Kəzə̀, ghè dzəŋə faʼà nəniy nə̀ Zə̀kìy. Ghà də yəə à də̀ uswum u Kəzə̀. Ghà də yəə à də̌ ndàw Kə̀zə̀ yə̀ ù byiə nəniy.

¹⁰Bòʼ ùtwab wə Zə̀kìy nyiə̀ nəniy awò mìə̀, mə byiə ə̀ tsə kə ndaw yəə à də̌ wù wə̀ ù ŋge kwu nəniy ani byiə, wù lìy kì bù byiə ndàw ì ghè yə̀ anə tsə kə mə bwam nəniy. I kwuni də̀ kə nə̀ aghê dzə̀m kwu ani bwam yə̀ kə nə̀ ghu nîy tsə ìyèmì.

¹¹Yəə Zə̀kìy na təŋ dzə̂ Yesù Kə̀litò nə̀ ù də̀ yəə à də̀ tsə kə ndaw, wèlìy kàm wày soʼo ani dòʼò dzə̀ tsə kə ndaw kə̀ ŋwô kìy.

¹²Aghê liy bwamə anə tsə kə ufyiə ùtsəə ùsoŋə̀ wə̀ ghu tyoŋə nəniy nə̀ à də̀ gôl, aghê liy yiy bwamə nəniy anə tsə kə ufyiə ùtsə wə ghu tyoŋə nəniy nə̀ à də̌ sivà nə̀ àtay yə iven yiy ŋge taw nəniy ate, nə̀ ŋkàʼ nə̀ ùzuu wiy.

¹³Ani kwuni bû a tsuk fə isaʼ, uvələ wiy ni dê nyiə̀ kə ndzòʼò fàʼ kə̀ wù ù bwamə̀ tə̀ ndaw wiy ùmoʼ umòʼ kə faʼà nəniy. Uvələ wiy ni dê nyiə̀ kə nə̀ fàʼ kə wû kìy dzwabə̀ ŋwò moo kə dzwabə̀ wày.

¹⁴Ani buu fyiə kə ghu kə bwam nəniy anə tsə kə kə nam də nəniy nə̀ kə kə̀ fwu nəway, Zə̀kìy ni tsə wù wə̀ ù kə bwam nəniy.

¹⁵A kwuni bû fàʼ kə wû wə̀ kə ni fwuə ŋwô nəniy, ù ni də kə̀ kəli fyiə kə̀liy kiy. Wù ù ghè wə̀ nì kwuni kyilə kə ŋwò ìbii fyi yiy ani də yəə ù tu ŋwò fyi bə̀ anə uvə̀lə̀.

¹⁶Ghà kwu wày nə̀ iwee nəli də ndàw Kə̀zə̀ yə̀, Zwàykə̀zwekiy də soʼo nəniy azoŋə ghà ə̀?

¹⁷Bəə wù lìy sàʼà màʼà tsə nəniy ndàw Kə̀zə̀, Zə̀kìy kî sàʼà myàʼà sòʼò ŋwòə we aŋwòə ndàw Kə̀zə̀ də̌ ndàw ìzwê yìy. Ndàw Kə̀zə̀ ì ghè yə̀ də̀ iwee nəli.

¹⁸Kəə wè lìy nì nɛbə uwee u we wiy. Bəə wè lìy kwoʼo nəniy uwe wiy nə̀ ghe kwu utwab wə aghee mbyi yiy kwu nəniy, u bvami na tsə uwee u we nə̀ ghe də kəlyàʼì tə̀ ù kì ba ndzə̀m kəli tsə utwab.

¹⁹I də nə̀ utwab u ghě mbyi wiy də ilyaʼì anə asəə Kəzə̀, ghu twâ na anə ŋwàʼà k-a-zə̀ nə̀, “Zəkìy nîy kə ùtwab yiə̀, u bè kwi kə wô ate.”

²⁰Ghu twâ na fwuli sòʼò anə lòʼo kə̀li kiy anə ŋwàʼà k-a-zə̀ nə̀, “Mwe ə̀ Mbyi kwu ŋwô nə̀ imôʼ i ghè twabə yiy kwu way fàʼ kìy.”

²¹Yəə̀ i də nəniy ghii, kəə wè lìy nə̀ kwoʼo uwee wiy kwùmə̀ yə̀ nə̀ àyiə yə wè mbyi ù lìy də nəniy ani zəŋi. Ghəd ə dzə̀m ghè də yəə à də̀ aghee kəsə ani fày ghà.

²²Bəə à də kə Pôl, moo Àpolòs, moo Pità, moo mbyi yə, moo imuə̀, moo ipfə, moo soŋə fə nyiə, moo soŋə fə fə namə bê nəniy, àdzə̀m a də kə ani fày ghà.

²³Ghà də aghee Kə̀litò, Kə̀litò də soʼo wè ə̀ Kə̀zə̀.