Read Isu 1 Kolìn 4 Bible Online

1 Kolìn 4 - Isu bible

1 Kolìn 4

¹Ghà kwu ani kəli tsə nə̀, Àpolòs nə̀ mìə̀, ghè dzəŋi də̀ aghee kəfàʼ â Kə̀litò. Ù nyiə̀ na ghəd nə̀ fàʼ kə̀ tyi dee kə nù tə ayiə kwùmə̀ yə̀ nə̀ Zə̀kìy

²I dê tsə nyiə nə̀, abuu ghu naa tsə nəniy wù nə̀ ù ki lia fàʼ kìy, wù ù ghè wə̀ kwu ani faʼa kiyoŋə yəə tsitsi awò wù wə̀ ù na nəniy we nə̀ ù fàʼ.

³Mə boʼò nia way isə yiy kwùmə̀ yə̀ nə̀ àyiə yə aghê saʼa nəniy miə ate anə fàʼ kə̀ mə faʼà nəniy â Zə̀kìy moo anə ayiə yə aghee mbyi yiy saʼa nəniy fàʼ kam kiy fə an-a-mbvə̀dintsə. Mə boʼò way ani saʼ soʼò ùwee nam nə̀ noŋə mìə̀.

⁴Fòŋ yam zwe ŋwò, à kwuni wày dzə nə̀ mə ŋge də̀ tsitsi anə imòʼ yam. À də̀ Mwe ə̀ Mbyi ù də ani saʼ dzwàb mìə̀ anə ayiə yam àzəŋə yiy.

⁵Ì yuu dè tsə nə̀ ghà ki koʼo yə dzə wù ghà saʼa we anə utwab u ghě mbyi nə̀ soŋə fiy kamə kpe dzə̂ â Zə̀kìy ani saʼ aghê àdzə̀m. Ghà ləmə tsə soŋə fə Mwe ə̀ mbyi nî bê nəniy ate. Ù nî nìy fyi bə̀ àyiə dzə̀m a nû doʼò nəniy tə̀ a fyi bə̂ anə asə àzwe yiy. Ù nî dè fyi bə̀ sòʼò mòʼ tə̀ tə̀dzə̀m tə də anə fòŋ tə̀ ghù. À yù də̀ soŋə fə Zə̀kìy nî niamə nəniy wù ùmòʼ umòʼ ate anə ayiə yə ù kə faʼà tsə̂ nəniy fàʼ k-a-zə̀ kìy ate.

⁶Awizə̂ yam àdzoŋə̀, mə dê bə̀ Àpolòs nə̀ ùwee nam wiy, ani dè tsə kətsəe anə ayiə yə mə tyi dê nəniy, anə dzəd yə ghà də ani zuw kəli tsə ayiə yə ŋwàʼà k-a-zə̀ kìy dzîy nəniy nə̀, “Abu ghà zuw yə̂ nəniy ayiə yə ŋwàʼà k-a-zə̀ kìy dzîy nəniy. Ghà kə kôʼ ŋgwiʼi dzə̌ wù kə̀fàʼ ùlìy wìy, kwuni kòʼ kè ù lìy wìy.”

⁷À zəŋi na ndiə gha nə̀ ghà tsîy fyi aghê liy yiy yə? Ghà kwu way nə̀ Zə̀kìy mə nyə̀ gha nə̀ ùfyiə wiy ù dzə̀m yə̀? À sì də̌ kìə̀ ghà kwoʼo nəniy iwe yiy anə ufàʼ wə̀ Zə̀kìy mâŋ nyiə̀ bə̂ nəniy awò ghà ə̀.

⁸Ghà də yəə ghà moʼò nə̀ ghà mə kəli ufyiə wə ùdzə̀m ghà kwu nəniy ani kəli, nə̀ ghà nyiə̀ də̀ aghê àkwumə yiy anə ayiə Kəzə̀, zəŋə sòʼò yəə ghà mə kaʼ ani saʼ dzəŋi nə̀ Kə̀litò yəə à də̀ udòŋ. Tə a mə si də nə̀ ghà nyiə̀ ndzə̀m ə̀ saʼa nə̀ Kə̀litò yəə à də̀ udòŋ, tə̀ ghě mə mboŋ də soʼo ani saʼ dzəŋi nə̀ ghà.

⁹I fə̂d də̀ â mìə̀ yəə wù ni dzây nə̀ Zə̀kìy kə na gwùŋə̀ tsə ghəd aghee ntwùm ə̀ Yesù ibàm, yiə à də̀ aghee ndàw ntsaʼ ghu lyimə nəniy tsuk fə ghu dziy saʼ wiy ghu ate. Ghè tiy nəniy anə səkə mbyi idzə̀m nə̀ tsə̀təndii tiy nə̀ aghee mbyi yiy àdzə̀m.

¹⁰Ghè də aghê àlyiʼa yiy bòʼ Kə̀litò, ghà kwuni də aghê àtwabə yiy. Ghè lay ŋwò, ghà kwuni də nəniy aghê taw yiy. Aghê koʼò ŋgwoʼo gha kwuni kòʼò kè ghə̀d.

¹¹Bù fyi bə̀ nyə̀ aghii, ghè tsəŋə̀ də̀ kə dzoŋ, fôŋ tìy swəə nəniy ghəd, ghè koʼò wày fyiə kə ghè də ani mu, nə̀ fyiə kə ghè də ani nyi, dzə̀ŋə̀ bwìy tsə̀ nə̀ ùsàʼ u tə dzwu wiy. Ghu màŋə̀ tswàbə̀ bwalə tsə̀ ghə̀d, ghè boʼò kwu dyaŋi way ndaw tiy yəə ghè ni muə̀ ate.

¹²Ghè tsəbə bwi dyòʼò tsə sòʼò wày, ghè tsəŋə̀ ndyimə tsə ìwee ani fàʼ fàʼ kələ nə̀ àwo ghələ. Abu aghê nyiə̀ kə ghəd nə ntiə kiy, ghè kwuni nyìə̀ yə̀ kə ghu nə̀ ùlwì wìy. Abu ghu tswələ̀ kə nəniy ghəd ŋwô, ghě kwuni kwè kə təfòŋ ŋwô.

¹³Abu ghu boʼò dzìy kə ayiə àbɛbə yiy azoŋə̀ ghə̀d, ghě tsə̀ŋə̀ dzə̀ŋə̀ yə̀ kə nə̀ ghu anə dzə̂ tə̀ ìdzoŋə̀ tìy. Bù fyi bə̀ nyə̀ aghii, ghè fwunə kə àghè àdzəə yiy anə uzə ughě mbyi, ghè də kə yəə à də̀ aghee kə̀ ŋkpə̂mkpə̀m anə asə aghě mbyi.

¹⁴Mə twà bə̀ dzə̀ wày ŋwàʼà kə̀ ani zəŋi tsə nə̀ tuw kiy də̂d tsə gha ate, mə kwuni tswùə̀ bə̀ ghà yəə à də̀ awa yam à tsukə yiy.

¹⁵Abu ghà boʼò kwu kə aghê liy yiy təkaam ivəm, ghu yemə̀ nəniy azoŋə̀ ghà bòʼ ìbɛmə ghii awò Kə̀litò, ghà kwu kə təli umòʼ. Mə də təli ghəli aŋwòə à kə də miə, mə kə bû naʼà bə̂ nəniy ntwùm ìdzòŋə̀ yìy awò ghà ani bɛmə â Yesù Kə̀litò.

¹⁶Mə bwoʼo bə̀ ghà nə̀ wokiy nə̀ ghà ki dzwumə bəə ayiə yam àzəŋə yiy.

¹⁷À yù də̀ ighe mə twumə bə̂ nəniy Timotì a kə̀lə ghà, ù də̌ wa nam ùtsukə̀ wìy. Ù də̌ wù wə̀ ù fàʼà nəniy awò Mwê mbyi nə̀ fòŋə̀ we ìdzə̀m, ù kì bè dzìy bə̀ ŋwò ayiə yə mə zəŋə nəniy anə imùə̀ ìfyiə yə nə̀ Kə̀litò. À də̀ ayiə ghè yə̀ mə tyi dê nəniy awò ghà anə udzəŋə u ghě Kəzə̀ anə lòʼò tə dzə̀m.

¹⁸Gha àliy yiy kwuni kaʼ yə̂ ìwe ì kwoʼo yiy, mòʼò kə nə̀ mə way ani bù kwùm dzə̀ akə̀lə̀ ghà.

¹⁹Mə kî kwuni kwùlə̀ bè ŋwò akə̀lə̀ ghà abu Zə̀kìy fày dzə̂ nəniy miə. Mə kî kaʼi kaw kəli fyi kə dzə̀ wày ayiə yə aghè kwoʼo iwè yə̀ dzìy nəniy, mə kî bày dyaŋə bə̀ sòʼò ŋwòə ndzòʼò ùdaʼa wə ghu faʼà nəniy ate nə̀ u tə̂m ŋwò bə̀ kə ŋwò awò Zə̀kìy moo à màŋ adzwə àbwoʼo yiy.

²⁰Mə ghii dzìy aŋwòə dzəd yə Zə̀kìy liə nə̀ a mùə̀ ate à wày dzə̀ ayiə yə a dzîy fyiə bə̂ nəniy, à də̀ daʼa k-a-zə̀ kə faʼà nəniy azoŋə̀ ŋgàŋ.

²¹Ghà ba sày ìghaa yiy? Ghà sây nə̀ mə bû nə̀ mbàŋ fìy moo ghà sây nə̀ mə bû nə̀ ìliə yiy anə ayiə àdzoŋə̀ yiy?