Read Isu 1 Kolìn 5 Bible Online

1 Kolìn 5 - Isu bible

1 Kolìn 5

¹Mə ndzə̂m zuw nə̀ wù liy də̀ anə uzə ghii ghu lyaŋə nəniy. Lyaŋi kə ghè kə̀ mə tsìy fyi kə ghù yə̀ ghu də kamə kə̀ bɛmə dzə̂ awò Zə̀kìy ghu zəŋə nəniy. Mə zuw nə̀ wìŋəmə̀ ùlìy wìy də̀ anə dzəŋə kə aghě Kəzə̀ kəli ù nìŋə̀ nəniy nə̀ wìy tè we.

²À we də̀ iyiə yə ghà də nəniy ani mwe ate, ghà fələ̀ dyoʼo nəniy anə ayiə ghè yə̀. Ghà nîy ŋwô fyi wù ù ghè wə̀ anə uzəə ghii.

³Yəə mə də wày kə nə̀ ghà nsə mə̀nsə, fòŋ yam nam də̀ ŋwô nə̀ ghà. Ani izəd i Mwê mbyi Yesù Mə mə saʼ wiy wù wə̀ ù zəŋi nəniy fyày fyày tə yiə tə, yəə mə də nə̀ ghà nsə mə̀ nsə. Bəə ghà ki bù nəniy anə kədzəŋə, mə kî də̀ ŋwô nə̀ ghà anə fôŋ yam. Mə gwuŋə̀ nə̀ daʼa kə Mwe ə̀ mbyi ə̀ ŋgàŋ, Yesù, kî fày ghà anə ayiə ghà kî zəŋə.

⁵Ghà ki dyaŋi kwe yə̂ wù ghè wə̀ anə wo kə Satan, tə̀ ù zuw tsə ifwabi anə uwè u we tə̀ Zə̀kìy ki bii ŋwô fyi bə̂ fòŋə̀ we anə utswə̀d a tsuk fə Mwe ə̀ mbyi, Yesù nì dzwəŋə bə̂ nəniy ani bù saʼ aghee mbyi.

⁶I dzwabə̀ dzə̀ wày awò ghà ani kwoʼo iwee yiy anə ndzòʼò àyiə yə ghii. Ghà kwu way nə̀ ibɛb yə̀ də̀ yəə à də̌ nyàŋə fə mbòŋ ì zəŋə nəniy nə̀ ba kiy dûw kwoʼ bə̂ anə kəkaŋ ə̀? À də̀ ighəd anə yiə yə ibɛb i wù mòʼ yìy də ani zəŋi nə̀ ndə̀mə̀ àghè zəŋi bɛb.

⁷Ghà kwu ani nìy ŋwò mbùŋ ì wîy yə̀ à də nəniy ibɛb, tə̀ i ŋwò tsə anə uzə ghii ani zəŋi tsə nə̀ ghà ki də agheè àzwe yiy. Ghà ki də yəə a də̀ ba kə̀ fyiə kiy ghu zəŋi nəniy nə̀ mbùŋ wày ate anə ayiə yə mə kwu nəniy nə̀ ghà ndzə̂m də̀ ate. Yesù də̀ yəə à də̀ zaʼ kə ŋgàŋ kə̀ ghu kə sâ nəniy anə tsuk fə inyi fə ufànyiə fə ghu kə nyi nə̀ mbùŋ wày ate.

⁸I myiŋə̀ nə̀ ghà kî nyi dzə̀ wày tsuk fə̀ nê fìy anə ba kə̀ kə kwu nəniy mbùŋ ì wîy yə̀ à də nəniy umwamə ù bɛbə wiy nə̀ fòŋ ìbɛbə̀ yìy. Ŋgà kwuni kwu ani nyi ntsuk fə̀ nê fə̀ anə ba kə̀ fyiə kə, kə də kwu way mbùŋ, à də nəniy umwamə ùfyiə wiy. Ghà kôʼ tsə nə̀ aghû yə̀ àdzə̀m anə kədzəŋə ghu doʼò tsə aghû yə̀ ghu dzwumì yə̂ Kə̀litò nə̀ fòŋ ìmòʼ, ghu dzîy yə̂ ayiə àsoŋə̀ yìy.

⁹Anə ŋwàʼà kə̀ mə kə bôʼ twà bə̂ nəniy awò ghà, mə kə dzìy awò ghà nə̀ kəə ghǎ nì təmə fwumə nə̀ àghè lyaŋə yiy.

¹⁰Mə kə dzìy dzə̀ wày aghê àlyaŋə yə ghu də kamə kə̀ bɛbə dzə̂ awò Zə̀kìy, moo aghû yə̀ ghu taŋə̀ nə̀ wo yiy, moo ghu dəmə̀ nìy nəniy ufyiə wiy awò aghè liy yiy, moo aghû yə̀ ghu fwulə̀ nəniy mwòʼo mə fə anə mbyi. Aŋwòə abu i mə̀ də aghii, i mə myiŋə nə̀ ghà ŋwò fyi yə̂ fə̀ anə mbyi yə, tə̀ kəə ghǎ nì təmə fwumə nə̀ ghu.

¹¹Mə kə kwuni twà bə̀ awò ghà nə̀ ghà kə təm dzəŋi nə̀ wù wə̀ ù dzìy nəniy nə̀ ghè də àzə̀ ghii nə̀ ù də̌ wù ùlyaŋə̀ wìy, moo wù wə̀ ù tàŋə̀ nəniy nə̀ àwo yiy, moo wù wə̀ ù fwùlə̀ nəniy mwòʼo miy, moo wù tə̀fem, moo wù wə̀ ù muə kee nəniy nlwù mìy, moo wù ù tsoŋə̀ wìy. Kəə ghǎ nì boʼò nyiə dzəŋə dzə̂ nə̀ ndzòʼò wù ù ghè wə̀.

¹²Mə kwu way miə nə̀ soŋə fiy ani saʼ wiy wù wə̀ ù də kamə bɛmə nəway Zə̀kìy. Ghà kwu ani saʼa aghû yə̀ ghu bɛmə nəniy Zə̀kìy, zəŋə àyiə àbɛbə.

¹³À kì saʼa Kə̀zə̀ aghû yə̀ ghu də wày a ndàw Kə̀zə̀. Ghu twâ na anə ŋwàʼà k-a-zə̀ nə̀, “Ghà nîy ŋwô fyi wù ù bɛbə̀ wə̀ anə uzə ghii.”