Read Isu 1 Kolìn 6 Bible Online

1 Kolìn 6 - Isu bible

1 Kolìn 6

¹Bəə wè lìy anə uzəə ghii bɛmə nəniy Zə̀kìy, ù kwu nəniy utswə̂d wìy nə̀ àzə̀ we, ù də̌ mə̀yə ani nasə tsə aghee Kəzə̀, ù nìy zù nə̀ ùtswə̀d u ghè wə̀ a ndàw ìsaʼà yìy nə̀ aghû yə̀ ghu də kwu way Zə̀kìy saʼ we?

²Ghà kwu wày nə̀ aghû yə̀ ghu bɛmə nəniy Zə̀kìy, ghu nî saʼa ŋwò aghee mbyi yə ə̀? Nyiə, abu à də nə̀ ghà nî saʼa ŋwò aghee mbyi yə, à ghî də̌ nə̀ ghà də ŋwô ani saʼ nyòŋə mə̀ yiə mə anə uzə ghii.

³Ghà kwu wày nə̀ ghà nî saʼa dyaŋə ŋwòə tsə̀təndii t-a-zə̀ tìy ə̀? Abu i də nəniy ghii, ghà kwu ani byay ntswə̀d mə̀ in fyimə nəniy gha anə imùə̀ yə̀ fə anə mbyi.

⁴Abu ghà kwu nəniy ndzòʼò ntswə̀d mə̀ anə uzə ghii, ghà sày kə aghû anə dzəŋə kə ndaw Kəzə̀ tə̀ ghu byay tsə utswə̂d u ghè wə̀, abu ghu boʼò də wày kə aghê soŋə̀ yìy anə sə kə ghě ndàw Kə̀zə̀.

⁵Mə ghii dzìy ani zəŋi tsə nə̀ utuw wiy də̂d tsə gha. I ghii də̌ nə̀ wè lìy wày anə uzə ghii ù kwu nəniy nyoŋə fə utwab fiy anə ayiə yə ù də nəniy ani byay na idə̂m yə̀ aghê dəmə̀ nəniy ate?

⁶Wù wò ù bɛmə â Zə̀kiy, fə̀lə̀ nìy kə àzə̀ we a ndàw Kə̀zə̀ zèè nə̀ we a ndàw ìsaʼ nə̀ aghû yə̀ ghu də kə̀ na nəway fôŋ tìy â Zə̀kìy, ghu saʼ we, ù zəŋə dzwàbə dzə̀ wày.

⁷Anə yiə yə ghà nîy zè nəniy nə̀ àwizə̂ ghii yiy ate a ndàw ìsaʼà yìy, à ghii də̌ nə̀ ghà mə bvə̀ səə. À də̌ kìə̀ wò də wày ani nyəli màʼà yə̀ tə̀ wò doʼò yə̂ nə̀ wò kə̀ nîy zû nə̀ we a ndàw ìsaʼà yìy ə̀? I dzwabə̀ â azə̀ yiə̀ ani zəŋi iyiə ìbɛbə yiy tsìy fyi â wò ani nìy zù nə̀ we a ndàw ìsaʼà yìy.

⁸À ba kàm də̀ gha ghà zəŋə nəniy ŋgwali tə ayiə tiy anə iwè nəli, tsè kwunə̀ sòʼò àwizə̂ ghəli yə ghu bɛmə â Kə̀litò.

⁹Ìsoŋə̀ ìsoŋə yìy, ghà kwu way nə̀ aghû yə̀ ghu zəŋə nəniy ayiə àbɛbə yiy nî zù nyi kwoʼ dzə̀ wày anə lòʼo kə Zə̀kìy saʼa nəniy ate yə̀? Ghà kə nɛb dzə̀ iwee nəli yiy, ghà kəli tsə nə̀ aghê àlyaŋə yiy, moo aghû yə̀ ghu fwulə̀ nəniy mwòʼo miy nə̀ àghù yə̀ ghu niŋə̀ nəniy nə̀ àghiy ghù yìy, moo iŋə̀mə̀ yə̀ ghu niŋə̀ kwùnə̀ nə̀ iŋə̀mə̀,

¹⁰moo, aghê tsoŋə yiy, moo aghû yə̀ ghu dûw nəniy nə̀ mwìy mìy, nə̀ àghù yə̀ ghu muə kee nəniy nlwù mìy, moo aghû yə̀ ghu dzîy nəniy fem tiy, nə̀ aghù yə̀ ghu dəmə̀ nìy nəniy ufyiə wiy awò àghù yìy, ghu nî nyi kwoʼ dzə̀ wày anə lòʼo kə Zə̀kìy saʼa nəniy ate.

¹¹Gha àliy yiy kə bòʼ də̀ tsə̀ sòʼo ghii, Zə̀kìy mə kwuni nìy ŋwò ìbɛb ghii yiy, zəŋi tsə nə̀ ghà doʼò tsə aghê zwe yiy. Ù mə zəŋi nə̀ ghà kpe doʼò tsə anə sə kə we abidzəmə̀ Mwe ə̀ mbyi Yesù nə̀ abidzəmə̀ Zwàykə̀zwekiy.

¹²Gha àliy dzîy nə̀, “Zə̀kìy mə nyiə̀ miə nə̀ daʼa kiy ani zəŋi ayiə yə àdzə̀m mə liə nəniy ani zəŋi.” Mə kwuni dzìy bə̀ â ghà nə̀, “À də̀ ŋwoə ìsoŋə̀ yìy. Kəli tsə nə̀ à kwuni wày dzə ayiə dzə̀m wù zəŋə nəniy a nyiə̀ nəniy ifây yìy.” Wù lìy də̀ ani dziy nə̀ “Mə kwu kə daʼa ani zəŋi ayiə yə mə liə nəniy ani zəŋi.” Mə kwuni dzìy bə̀ nə̀ “I dzwàbə̀ dzə̀ wày â wò ani dòʼò kə̀kwə̀d ani iyiə ìliy yiy.”

¹³Gha àliy yiy dzîy nə̀, “Ufânyiə wiy də nə̀ a nyi na yə̂ anə unìə̀, unìə̀ wìy də sòʼo ani nyiə kwe nia yəə ufànyiə wiy ate.” À də̌ ìsoŋə̀ yìy i kwuni də̀ kə nə̀ Zə̀kìy kî zəŋə tsə ŋwò nə̀ ufânyiə wiy tsîy ŋwô nə̀ ùnìə̀ wìy. Iwee i ŋgàŋ yìy way dzə nə̀ ŋgà ki lyaŋə kyabə tsə nə̀ ìghe yiy, i də nə̀ wù ki faʼa yəə fàʼ kə Mwe ə̀ mbyi kiy ate. À də̀ Mwe ə̀ mbyi ù yèmə̀ nəniy ate anə iwè i ŋgàŋ.

¹⁴Zə̀kìy kə zɛ̀m dzwoŋi kə Mwe ə̀ mbyi Yesù anə ipfə. Ù kì zɛ̀mə̀ dzwəŋə kə sòʼò ŋwò ŋgaŋ anə ipfə, anə daʼa kə ù kwu nəniy.

¹⁵Ghà kwu way nə̀ iwe nəli yiy də ubə̂d uwè u Kə̀litò yə̀? Wò də̌ mə̀yə ani nìy kə bə̂d kə uwè kə Kə̀litò kìy, wò ə zəŋə kyabə tsə̀ àyiə kəlyaŋi ate yə? I kwu dzə̀ way ani fyi ghii.

¹⁶Ghà kwu way nə̀ abu wù təm doʼò fwumi yə̂ nəniy nə̀ wìyəŋi ù lyaŋə̀ wìy, u dòʼò tsə anə uwè ùmòʼ nə̀ wìyəŋi ù ghè wə̀ ə̀? Ghu twâ na anə ŋwàʼà k-a-zə̀ nə̀, “Ghu ghè yə̀ àbè ki doʼò tsə wù ùmòʼ.”

¹⁷Wù wə̀ ù kwuni təm doʼò fumi nəniy nə̀ Mwe ə̀ mbyi, ù kì də fyiə kəmòʼ nə̀ we anə Zwàykə̀zwekiy.

¹⁸Ghà tu ŋwô fyi anə kəlyaŋi aŋwòə ayiə àbɛbə àliy yə wù zəŋə nəniy a way dzə ani zəŋə iyiə ibɛbə yiy anə uwè uwe. A kwuni bû wù wə̀ ù lyaŋə nəniy, ù zəŋə ìbɛbə anə uwè uwe.

¹⁹Ghà kwu way nə̀ iwee nəli yiy də ndàw Zwàykə̀zwe kə Zə̀kìy nyiə̀ nəniy awò ghà yə̀, kə muə nəniy ate ə̀? À kwu dzə̀ way gha iwee nəli yiy, à kwu Kəzə̀ iwee nəli yiy.

²⁰Zə̀kìy kə zwe gha anə ivən ìtaw yiy. Ghà kwu ani nìy kə iwe nəli, ghà ki nyiə̀ yə ŋkwiʼi miy ate awò Zə̀kìy.