Read Isu 1 Kolìn 7 Bible Online

1 Kolìn 7 - Isu bible

1 Kolìn 7

¹Kwùmə̀ yə̀ nə̀ àyiə yə ghà kə twâ bə̂ â mìə̀, mə dzîy dzwəŋə bə̀ â ghà nə̀, “I dzwabə̀ nə̀ wìŋəmə̀ kə nîy dzə̌ wiy[1].”

²Anə ayiə yə lyaŋi kiy kwuni ŋge də, wìŋəmə̀ kwu ani kəli tsə wiy we, wìyəŋi kwu sòʼò ani kəli tsə ŋə̀mə̀ we bòʼ ìmwàm kòʼ yə̀ i bê nəniy i zəŋə nə̀ aghê zəŋi ayiə àlyaŋə yiy.

³Wìŋəmə̀ wə̀ ù nìy dzə̂ nəniy wiy, kəə ù nə̀ twe dzə̂ ani nə̀ŋì nə̀ wìy we, moo wìyəŋi wə̀ ù niy dzə̂ nəniy ŋəm, kəə ù nə̀ twe dzə̂ nəniy ani nə̀ŋì nə̀ ŋə̀mə̀ we.

⁴Wìyəŋi kwu dzə̀ way daʼa kiy anə uwè uwe, à kwu wìŋəmə̀. Wìŋəmə̀ kwu dzə̀ way daʼa kiy anə uwè uwe, à kwu wìyəŋi.

⁵Kəə wè lìy nə̀ twe dzə̂ ani nə̀ŋì nə̀ àzə̀, à mày kə ghà dzəŋi səay tsə ŋwô nə̀ ghà dziy nîy kə fəsoŋə ani gwùŋì yə̀ â Zə̀kìy. Abu ghà gwuŋì tsə dzə̂, ghà ə kàm kaʼ dzwoŋi tsə ani təm fwumi. Kəə ghǎ nì byemə nə̀ Satàn bù mwàm kòʼ ghà anə kəlyaŋi.

⁶Anə̀ ì yuu ghii, mə dzîy bə̀ yəə à də̀ itswû â ghà, mə tsâ bə̀ dzə̀ wày lâŋ kìy.

⁷Mə gwuŋə̀ nə̀ gha dzə̀mə mə doʼò tsə anə yiə yə mə də nəniy ate nə̀ mə kwu way wiy. À kwuni də̀ kə nə̀ wù ùmoʼ umòʼ kwu ayiə we Zə̀kìy nyiə̀ nəniy. Kày kwu i yuu kày kwu ì yiy.

⁸Mə dzîy yə̀ awò ise mpfənsə nə̀ àghù yə̀ ghu də kamə kə̀ nîy nəway wè lìy nə̀ ghu ba doʼò yə̂ kə nə̀ ghu kə̀ nîy dzə̂ nəway wù lìy.

⁹Abu i kwuni də nə̀ ghu way dzə ani kwi tsə iwe i ghu, ghu ba nìy yə̀ wù aŋwòə idzwabə̀ ani nìy wù tsiy fyi ani zwələ tsəə.

¹⁰Mə tsâ bə kəlàŋ awò àghù yə̀ ghu nîy dzə̂ nəniy iwee yiy, à wày dzə lâŋ kam, à də̀ lâŋ kə Mwe ə̀ mbyi. Kəə wìyəŋi ù lìy nə̀ səalə̀ dzə̂ nə̀ ŋə̀mə̀ we.

¹¹Abu ù kwuni salì dzə̂ nəniy nə̀ ŋə̀mə̀ we, u dòʼò yə̀ kə ghii, ù kə kâm nìy dzə̌ ŋə̀mə̀ ù ŋwò wìy. Bəə à də wày ghii, u zù dzwoŋi akə̀lə̀ ŋə̀mə̀ we, tə̀ we nə̀ ŋəm ghu byay tsə iwe i ghu, ghu doʼò tsə anə fyiə kəmòʼ. Wìŋəmə̀ kwu dzə̀ way ani sàlì sòʼò nə̀ wìy we.

¹²Mə dzîy yə̀ awò àghè liy yə ghu kə nîy nəniy iwee yiy nə̀ ghu kamə kə̀ bɛmə nəway Kə̀litò, à wày dzə lâŋ kə Mwe ə̀ mbyi, à də̀ itswû yam, bəə wù wə̀ ù bɛmə nəniy â Kə̀litò kwu nəniy wiy wə ù də kə̀ bɛmə nəway awò Kə̀litò, wìyəŋi ù ghè wə̀ kwuni bɛmə dzə̂ nəniy ani mùə̀ nə̀ we, kəə wìŋəmə̀ ù ghè wə̀ nə̀ səalə dzə̂ nə̀ we.

¹³Bəə wìyəŋi wə ù bɛmə dzə̂ nəniy awò Kə̀litò, kwu nəniy ŋəm wə ù də kamə bɛmə â Kə̀litò, abu ŋə̀m ù ghè wə̀ bɛmə dzə̂ ani mùə̀ nə̀ we, kəə wìyəŋi ù ghè wə̀ nə̀ twe dzə̂ ani mùə̀ nə̀ we.

¹⁴Zə̀kìy mə zəŋi nə̀ wìŋəmə̀ wə̀ ù də kamə bɛmə â Kə̀litò, nə̀ ù dòʼò wù zwê wìy abidzəmə̀ wìy we wə ù bɛmə nəniy â Kə̀litò. Zə̀kìy mə zəŋi nə̀ wìyəŋi wə ù də kamə bɛmə awò Kə̀litò, nə̀ ù dòʼò wù zwê wìy abidzəmə̀ ŋə̀mə̀ we wə ù bɛmə nəniy â Kə̀litò, tə̀ awa ghu yiy ki də awa à zwe yiy. Bəə à mə̀ də wày aghii, Zə̀kǐy mə̀ dzǐy byɛmə dzə̀ wày àwa ghu yiy. Yəə i kwuni də nəniy ghii, Zə̀kìy kî byemə ŋwò awa ghu yiy.

¹⁵Abu à kwuni də nə̀ wù wə̀ ù də kə̀ bɛmə nəway â Kə̀litò mòʼ tsə nəniy nə̀ ghe dziy salì nə̀ wù wə̀ ù bɛmə nəniy â Kə̀litò, u sì sàlì yə̀. Wìyəŋi moo wìŋəmə̀ wə̀ ù bɛmə nəniy Kə̀litò, ghu kamə kwû na dzə̂ we azoŋə̀ wù wə̀ ù dziy salì nə̀ we. Aŋwòə Zəkiy mə ŋgaŋ toŋə nə̀ ŋgà si muə fwumi anə ibvay.

¹⁶Gha, iyəŋi yə ghà bɛmə nəniy awò Zə̀kìy, ghà kwu mə̀yə nə̀ ghà kî bii fyiə ŋwò àŋəm ghii? Moo gha, iŋə̀mə̀ yə̀ ghà nîy nəniy aghiy yiy, ghà kwu mə̀yiə nə̀ ghà kî bii fyiə ŋwò àghiy ghii yiy?

¹⁷Wù ùmoʼ umòʼ ki tsəŋ kwu kə ani mùə̀ anə umwàmə wə̀ Mwe ə̀ mbyi kə toŋə tsə nəniy we ate. À yù də̀ ayiə yə mə tyi dê nəniy anə udzəŋə u ghě Kəzə̀ ùdzə̀m.

¹⁸Bəə à də nəniy nə̀ Zə̀kìy kə toŋə wô nə̀ ghu mə gwùmì wô, kəə wò nə̀ zələ̀ myaʼà dzə̂ bənə kə ghè kə̀. Abu à də nəniy nə̀ Zə̀kìy kə wò toŋə tsə nə̀ ghu kamə kə̀ gwumì wô, kəə ghu nə̀ gwùmə̀ dzə̂ wô.

¹⁹Ani gwùmì wù moo â wù ani dòʼò nə̀ ghu kə̀ gwumì nəway we, i myìŋə̀ dzə̀ wày iyiə ìliy yiy. Iyiə ìsoŋə̀ yə̀ i də nəniy ighe yiy à də̀ ani nia tsə ulâŋ u Kəzə̀ wìy.

²⁰Wù ùmoʼ umòʼ ki moʼo tsə yəə ù kə də nəniy ate a soŋə fə Zə̀kìy kə toŋə tsə nəniy we.

²¹Abu wò kə boʼo də kə kwə̂d kìy, a sòŋə fə wò kə bɛmə nəniy Zə̀kìy, kəə i nə̀ fyimə dzə̂ wô anə fôŋ abu wò kwuni kəli tsə dzə̀ dzəd ani ŋwò fyi bə̀ anə kəkwə̀d, ŋwǒ fyi bə.

²²Aŋwòə wù wə̀ ù bɛmə nəniy Zə̀kìy, nə̀ ù kə də̀ tsə̀ kəkwə̂d, ù kàm wày dzə kəkwə̂d ù nyiə̀ də̌ wè Mwe ə̀ mbyi. A də̀ sòʼò ighəd wù wə̀ ù bɛmə nəniy Zə̀kìy nə̀ ù kə wày dzə kəkwə̂d, ù nyiə̀ də̀ kwə̂d kə Kə̀litò.

²³Zə̀kìy kə gha zwe anə ivən ì taw yiy. Kəə ghà nə̀ kàmə̀ dyoʼo dzə̂ ukwə̂d wìy awò àghè ə mbyi yiy.

²⁴Awizə̂ yamə, awò ghà ani bɛmə Kə̀litò à kə də̌ nə̀ ghà də mə̀yə, ghà doʼò tsə kə anə yiə yə Zə̀kìy liə nəniy.

²⁵Kwumə yə̀ nə̀ àghù yè ghu də kamə nîy dzə wè lìy, Mwe ə̀ mbyi kamə nyiə̀ dzə̀ miə nə̀ làŋ kə̀ liy kiy nə̀ mə nyiə̀ yə â ghu. Mə kwuni dzìy bə̀ yəə à də̌ wù wə̀ Mwe ə̀ mbyi fây dzə nəniy, aghê liə soʼò nəniy we.

²⁶Kwùmə̀ yə̀ nə̀ ntswə̀d mə̀ ìn ŋge də nəniy nyiə, mə moʼò nə̀ ghǎ mə doʼò təŋ yə̂ anə ayiə yə ghà də nəniy ate.

²⁷Abu à də nə̀ wò mə nǐy wù lìy, kəə wò nə̀ səalə̀ dzə̂ nə̀ we. Abu wò də kamə kə̀ nîy dzə̀ nəway wù lìy, kəə wò nì nìy dzə wù lìy.

²⁸Abu wìŋəmə̀ kwuni nîy yə̂ nəniy wiy, ù kamə kə̀ zəŋi bɛb dzə̀. Wìyəŋi wə ù də kamə kəli kôʼ nəway wìŋəmə̀, bəə ù nìy yə̂ nəniy ŋəm, ù kamə zəŋi bɛb dzə̂. I kwuni də̀ kə nə̀ iŋə̀mə̀ yə̀ ghu kî nìy yə̂ nəniy aghiy yiy, moo iyəŋə yə ghu kî nìy yə̂ nəniy aŋəmə, ghu kî kyilə ŋwòə ntswə̀d mìy anə imùə̀ yə̀. À yù də̀ ayiə yə mə liə nə̀ ghà kəli.

²⁹Awizə̂ yamə, fyiə kə mə mə liə nə̀ ghà kəli tsə à də̌ nə̀ soŋə fiy kamə̀ dàbə̀ wày ani kaʼ tsə nyiə zù isə awò Yesù ani bù dzwoŋi. Yəə i də nəniy aghii aghû yə̀ ghu nîy dzə̀ nəniy iwe yiy ghu kwu ani ndəmi tsə iwe ani fàʼ awò Mwe ə̀ Mbyi anə yiə yə ghu mə̀ kwu ani fàʼ nə̀ ghu kwu way aghiy yiy.

³⁰Aghû yə̀ ghu mwe nəniy, ghu doʼò tsə yəə ghu mwe dzə̀ wày. Aghû yə̀ ghu dyoʼo nəniy, ghu doʼò tsə yəə ghu dyoʼo dzə̀ wày. Aghû yə̀ ghu zwe nəniy ufyiə wiy, ghu doʼò tsə yəə ghu à kwu dzə way ghu ufyiə ughè wə̀.

³¹Aghû yə̀ ghu faʼà nəniy ufàʼ wə̀ fə anə an-a-mbvə̀dintsə, ghu kə môʼ təŋ dzə̀ ufàʼ u ghè wə̀ aŋwòə mbyi yə ì də nəniy nyiə̀, ì nì mìy ŋwò.

³²Mə kî liə dzə̀ way nə̀ ghà ki fyimə fôŋ təli tiy kwùmə̀ yə̀ nə̀ àyiə yə. Wìŋəmə̀ wə̀ ù də kamə kə̀ nîy nəway wiy, ù kwu kə ani fyimə fòŋə̀ we ani fàʼ fàʼ kə Mwe ə̀ mbyi aŋwòə ù də̀mə̀ ani zəŋi tsə nə̀ fòŋə̀ Mwe ə̀ mbyi ki dzwabə.

³³A kwuni bû wìŋəmə̀ wə̀ ù nìy dzə̂ nəniy wiy, ù fyimə fòŋə we anə ayiə mbyi aŋwòə ù liə ani zəŋi tsə nə̀ fòŋə̀ wìy we ki dzwabə.

³⁴Bəə i fyi nəniy ghii, ù mə̀ ghii dzàw na fòŋə̀ we anə ayiə bè. Wìyəŋi wə ù də kamə kə̀ nîy nəway ŋəm, moo wà ùyəŋi wə ù də kwu way ùŋəmə̀, ù kwu kə ani fyimə fòŋə̀ we ani fàʼ fàʼ kə Mwe ə mbyi aŋwòə ù liə ani nìy kə uwe uwe nə̀ fòŋə̀ we, ù nyìə̀ yə̀ awò Zə̀kìy. A kwuni bû wìyəŋi wə ù nìy dzə̂ nəniy ŋəm, u fyimə fòŋə̀ we anə ayiə mbyi aŋwòə ù liə ani zəŋi tsə nə̀ fòŋə̀ ŋəmə we ki dzwabə.

³⁵Mə ayiə yə awò ghà dzîy bə̀ aŋwòə mə liə ani fày ghà. Mə khu dzə̀ wày dzəd ani bwi na gha nə̀ ghà kə zəŋə ayiə yə gha liə ani zəŋi. Mə kwuni liə ani zəŋi tsə gha nə̀ ghà ki zəŋə yəə ayiə yə a də nəniy tsitsi anə sə kə Mwe ə̀ mbyi, ghà nyiə̀ mâ yə̂ ìwee ghii ani fàʼ fàʼ kə Mwe ə̀ mbyi.

³⁶Bəə wìŋəmə̀ ùlìy wìy nyi na nəniy wà ùyəŋi wə ù taw dzə̂ nəniy anə wiy, ù liə nəniy we mòʼò anə nìy we. Zǔ kə nə̀ səkiy ani nìy we. À wày dzə iyiə ìbɛbə yiy.

³⁷A kwuni bû wìŋəmə̀ wə̀ ghu də kə̀ tyiŋə nəway we ani nìy wiy, ù tsəb zəŋi kə dzə̂ nəniy fòŋə̀ we nə̀ ghe nîy dzə̀ wày wà ùyəŋi wə ù kə̀ bòʼò mòʼò nəniy ani nìy, ù də dzə̀ soʼo ani bvami tsə uwee u we nə̀ ù mə byay sòʼò anə fôŋə we ayiə yə ù liə ani zəŋi, ù ghii zəŋə dzwàbə̀ ŋwò ani twe nə̀ ghè nîy dzə̀ wày wà yəŋə̀ fə̀ ghàŋ ù ghè wə̀.

³⁸À yù də ighe abu wìŋəmə̀ nìy yə̂ nəniy wà ùyəŋi wə ù kə byay na ani nìy, ù mə̀ ghii zəŋi dzwàb. A kwuni bû wìŋəmə̀ wə̀ ù də kə nîy nəway wìyəŋi wə ù kə byay na ani nìy, ù mə ghii zəŋi dzwàb tsìy fyi.

³⁹Wìyəŋi wə ù nìy dzə̂ nəniy ŋəm, ù kwu dzə̀ way ani kàm nìy fwuli yə̀ ŋə̀mə̀ ù ŋwò wìy. Abu ŋə̀mə̀ we kwuni pfə tsə dzə̀ nəniy, wìyəŋi ù ghè wə̀ kwu ŋwô daʼa kiy ani nìy wìŋəmə̀ ù ŋwò wìy abu ù liə nəniy. I kwuni də̀ kə nə̀ ù kwu kə ani kəli yə̀ kə ìbɛmə awò Mwe ə̀ mbyi.

⁴⁰Yəə i də nəniy ghii awò mìə̀, anə ayiə yə mə moʼò nəniy nə̀ Zwày k-a-zə̀ kìy kyiŋə̀ ŋwò miə, abu ù dòʼò nəniy ghii nə̀ ù kə kâm nîy nəway wù ù ŋwò wìy, ù kî kəli tsìy fyi kədwiʼi.