Read Isu 1 Kolìn 8 Bible Online

1 Kolìn 8 - Isu bible

1 Kolìn 8

¹Mə dziy bəlìy bə̂ ghà nyiə anə iyiə yə ghà kə bəb bə̂ nəniy kwùmə̀ yə̀ nə̀ àyiə ufânyiə wə ghu sâ nyə̀ dzə̂ nəniy â mwòʼo miy. À də̌ ìsoŋə̀ yìy nə̀ “ŋgà ndzə̂m kwu ŋwoə ntwab miy” anə ayiə yə aghê dzîy nəniy. À də̌ ndzòʼò ntwab mə̀ ghè mə̀ ìn zəŋə ŋgaŋ a kwoʼò iwe. Ŋgà kwuni kwu ani dè iliə awò wù ùmoʼ umòʼ ani zəŋi tsə nə̀ ghà nɛmə yə̂ anə ibɛmə ghəli.

²Aghû yə̀ ghu toʼò kwoʼo nəniy iwe yiy dzìy nə̀ ghu kwu məntwab, ghu kamə kəli kwoʼ kwùm dzə̂ anə yiə yə ghu kwu ani kəli ate.

³Wù wə̀ ù kwuni liə nəniy Zə̀kìy, Zə̀kìy kwu ŋwô we.

⁴Yəə i də nəniy ghii anə ayiə ufânyiə wə ghu sâ nyə̀ dzə̂ nəniy â mwòʼo miy, ghè kwu nə̀ mwòʼo fiy kwu dzə̀ way fàʼ kəli kiy fə anə mbyi. Zə̀kìy də kə kə̀mòʼ, ù kə zəŋi nəniy mbyi idzə̀m.

⁵Abu mwòʼo mə̀ lìy mìy boʼò də kə ŋwô, aghê tyoŋə nəniy nə̀ à də̀ uzə̀, an-a-vələ moo an-a-mbvə̀dintsə, Yəə zə̌ mə̀ ghè mə̀ ghu tyoŋə nəniy nə̀ à də̌ nə̀ mwe boʼò dùw kə ŋwô,

⁶ghè kwuni kwu kə nə̀ Zə̀kìy də kə kə̀mòʼ ù də nəniy Təli wə ù kə zəŋi nəniy ufyiə udzə̀m, ŋgà muə soʼo nə̀ à də̌ we. Mwe mbyi də kə ùmòʼ soʼo à də nəniy Yesù Kə̀litò. Zə̀kìy kə zəŋi ufyiə udzə̀m abidzəmə̀ we, ŋgà muə soʼo nə̀ à də̌ we.

⁷À kwuni wày dzə aghê dzə̀m ghu toʼò kəli dzwâb dzə̂ àyiə sòŋə̀ yə̀. Aghê liy yiy kyili dòʼò anə ayiə à fwulə mə mwòʼo miy. Abu ghu nyiə nəniy ufânyiə wə ghu sâ nyə̀ dzə̂ nəniy â mwòʼo miy, ghu mòʼò kə nə̀ ghu ghii ndzə̀mə̀ fwùlə̀ mwòʼo mə̀ ghè mə̀. Ghu kwu môʼ tə̀ lay tiy. Bəə ghu nyi kə nəniy ufânyiə ughè wə̀ ghu mòʼò kə nə̀ ghu mə zəŋi bɛb.

⁸À wày dzə ufànyiə u zəŋə tsə nəniy nə̀ wù koŋə mà yə̀ a kə̀lə̀ Kə̀zə̀, ŋgà way dzə ani này màʼà fyiə kə̀li kiy abu ŋgà nyi nəniy ufânyiə wə ghu nyiə̀ dzə̂ nəniy awò mwòʼo miy. Abu ŋgà boʼò nyi kə ŋwoə̀ a way ani kəli namə kəliy kiy ate.

⁹Ghà kwu ani nìy tsə iyemì anə daʼa kə ghà kwu nəniy, kəə ghà nə̀ zəŋə nə̀ wù wə̀ ibɛmə iwe yiy lay nə̀ ù zəŋi bɛb.

¹⁰Aŋwòə abu wù lìy kòʼ bə̂ nəniy wô, wò kwu nəniy ayiə àsoŋə yiy wò nyiə nəniy a ndàw mə̀ mwòʼo nə̀ ù kwu soʼo liy fə imòʼ, ù kì wee də̀ sòʼò ŋwô ani zù nyi ufânyiə wə ghu sâ nyə̀ dzə̂ nəniy â mwòʼo miy ə?

¹¹À ki də nə̀, wò nyə̀ byebə myàʼà àzə̀ yiə wò ù kwu nəniy ibɛmə i lay yiy, Yesù kə pfə sòʼò nəniy anə ibɛb i we.

¹²Abu, wò zəŋi tsə nə̀ àzə̀ yiə̀ ùlìy wìy ù bɛmə nəniy Zə̀kìy nə̀ ù kwu ibɛmə ì lay yiy tə̀ u kaʼ yə̀ ani zəŋi ibɛb, à ki də nə̀ wò mə zəŋi ibɛb yiy awò Kə̀litò.

¹³Nyiə, abu à də nə̀ ufânyiə wə̀ mə nyiə nəniy nə̀ u kî zəŋə tsə ŋwǒ àzə̀ wam wə ù bɛmə Zə̀kìy nə̀ ù zəŋi ibɛb, mə ba dòʼò kə̀ nyiə dzə̂ nəway ufânyiə u ghè wə̀, ani zəŋi tsə nə̀ àzə̀ wam wə ù bɛmə nəniy Zə̀kìy ù kə kaʼ yə̀ dzə̀ ani zəŋi ibɛb.