Read Isu 2 Kolìn 1 Bible Online

2 Kolìn 1 - Isu bible

2 Kolìn 1

¹À ŋwàʼà kə̀ twà mìə̀, Pôl, wè ntwùm ə̀ Yesù Kə̀litò. À kə tsə̀m tsə Kəzə̀ ani sây kə miə nə̀ mə doʼò wè ntwùm ə̀ Yesù Kə̀litò. Mə də fwumi nə̀ àzə̀ ŋgàŋ, Timotì. Mə twâ yə̀ ŋwàʼà kə̀ awò dzəŋə kə aghě Kəzə̀ yə̀ kə də nəniy a Kolìn, twà bə̀ sòʼò awò ghà aghě Kəzə̀ yə̀ anə mbwòʼ ə̀ Àkayà ì dzə̀m.

²Ghè gwùŋə̀ nə̀ tè ŋgàŋ Kə̀zə̀, nə̀ Mwe ə̀ mbyi ə ŋgàŋ Yesù Kə̀litò. Ghu dê ghà nə̀ fòŋə̀ ìdzòŋə̀ yìy, ghu nyiə̀ soʼò ghà nə̀ ìbvay yiy.

³Ŋgà nyiə̀ ùkali awò Tè ŋgàŋ, Kə̀zə̀, ù də nəniy Tè Mwe ə̀ mbyi ə ŋgàŋ, Yesù Kə̀litò. Ù də̌ Təli wə ù dè nəniy aghê dzə̀m nə̀ mwuli kə̀ kwoʼo kiy. Ù də̀ sòʼo wù wə̀ ù zəŋə nəniy nə̀ aghê dzə̀m ki kwu fôŋ tə̀ khii tiy.

⁴Ù kwê fòŋ tə ŋgàŋ abu ŋgà də nəniy anə utswə̀d, ani zəŋi tsə nə̀ ŋgà ki kwe yəə soʼo fôŋ tə aghè liy tiy abu ghu də soʼo nəniy anə lelê tə məntswə̀d anə yiə yə ù fàʼ nəniy nə̀ ŋgàŋ.

⁵Yəə ŋgà ŋge fyaʼa nəniy anə lelê tə məntswə̀d anə ayiə yə Kə̀litò kə fii soʼò nəniy, à də̀ sòʼò ighəd Zə̀kìy kî ŋge kwe fôŋ tə ŋgàŋ tìy anə le tə tə dzə̀lə abidzəmə̀ Kə̀litò.

⁶Abu ghè fyaʼa nəniy ghii, à də̌ ani zəŋə tsə nə̀ Zə̀kìy nə̀ kwe fôŋ təli tiy, ù bii fyi sòʼò ghà. Zə̀kìy kwe bə̀ fòŋ tələ, nə̀ ghè ki kwe bə soʼo fôŋ təli tiy, ani zəŋi tsə nə̀ ghà ki kwê fôŋ tìy anə ntswə̀d mə̀ ghà də nəniy ate, anə ayiə yə ghè kə kwê soʼò nəniy fôŋ tìy anə ntswə̀d mə̀ ghè kə də nəniy ate.

⁷Imôʼ yə̀ ghè kwu nəniy azoŋə̀ gha, i kwunə kòʼò dzə̀ wày. Ghè kwu təŋ ŋwô nə̀ anə ayiə yə ghà fyaʼa nəniy, Zə̀kìy kî kwe ŋwò fôŋ təli tiy ighəd anə ayiə yə ù kə kwe soʼò nəniy fôŋ tələ tiy ate.

⁸Awizə̂, ghè liə nə̀ ghà kəli tsə ndzòʼò utswə̀d wə̀ u kə fyi nəniy nə̀ ghə̀d a mbwòʼ ə̀ Esìyà. Utswə̂d u ghè wə̀ kə ŋge də̀lə̀ ŋwò, u maa tsìy fyi daʼa kələ kiy. Ghè kə nyə̀ lyimə kə ìpfə anə mùə̀ tələ.

⁹Ghè kə ndzə̀m zuw yə̀ zuk kə ipfə, i kwuni zəŋi tsə nə̀ ghě kəli tsə nə̀ à kwu dzə̀ way ghəd muə̀ tələ tiy, nə̀ muə̀ tələ tiy də anə wokə k-a-zə̀, aŋwòə abu wù pfə kə ŋwô, Zə̀kìy ki zɛ̂m dzwoŋi kə we anə ipfə.

¹⁰U maa ndzə̀m bii fyi ghəd anə ipfə. Ghè kwu təŋ sòʼò ŋwô nə̀ ù nì tsə̀ŋ kwu kə ani bii fyi ghəd nsòŋə indzə̀m, ghe mə gaʼ na fôŋ tələ tiy a zoŋə̀ we nə̀ ù nì namə bii fyiə kə ŋwò ghəd,

¹¹anə ayiə yə ghà fîy nəniy ghəd anə gwùŋì təli tə ghà gwùŋə̀ nəniy, Zə̀kìy kîy bii fyiə ŋwò ghəd. Gwuŋì tə ghè tə̀ kì zəŋə tsə ndə̀mə̀ àghù ki nyiə̀ zòŋə̀ k-a-zə̀, anə ayiə àdzoŋə̀ yə̀ ù fàʼà nəniy azoŋə̀ ghə̀d.

¹²Iyiə yə ghè də ani fə̀n ìkiykiy ate nə̀ fòŋ tə̀ zwe tiy, à də̀ ani dzày tsə nə̀ ghè mə mùə nə̀ àghè àdzə̀m fə anə mbyi, tsəb mba mùə̀ tsə sòʼò nə̀ ghà anə ndzòʼò ìmuə̀ ìzwe yə, nə̀ anə ayiə àsoŋə̀ yə̀ Zə̀kìy liə. Ghè kə mùə̀ dzə̀ way anə ayiə ghè yə̀ anə utwab u aghě mbyi, à kə kwuni də̌ bòʼ fòŋ ìdzòŋə̀ yə̀ Zə̀kìy dê nəniy awò ghə̀d.

¹³Ghe twâ bə̀ dzə̀ wày ayiə àliy yiy awò ghà tsìy fyi ayiə yə ghà də ani toŋə kə, ghà zuw kəli tsə soʼò. Yəə ghà də namə zuw kyilə myà wày ghəd nyiə, mə moʼò nə̀, ghà kî bè zuw kyilə myà ŋwò ghəd, ani zəŋi tsə nə̀ ani bu ntsuk fə Mwe ə̀ mbyi ə̀ ŋgàŋ Yesù nì bù nəniy, ŋgà ni dzəŋə səaŋə.

¹⁵Mə kə kwu təŋ ŋwô nə̀ ghà kə zuw kyilə myà ŋwò àyiə yam à dziy yiy. À yù də̀ ighe mə kə bôʼ byay tsə nəniy ani bù a kə̀lə̀ ghà ani bù toŋə zuw gha, ani zəŋi tsə nə̀ ghǎ nì də ani kəli fəli kə lwì.

¹⁶Mə kə byay na nə̀ mə kî bè tyoŋə zuw dàŋə̀ tsə̀ ghà abu mə zê nəniy a mbòʼò Màsèdonìyà nə̀ abu mə bê dzwəŋə nəniy. Ghà ki fây kə miə ghà zəŋi tsə nə̀ mə zû dyaŋi a mbòʼò Dzùdiyà.

¹⁷Ghà moʼò nə̀ mə way ani zəŋi ayiə yə mə tsə̂m tsə nəniy ə̀? Moo Ghà nyiə̀ nə̀ myiŋə kə nə̀ mə də ndzòʼò àghù yə̀ ghu dzîy nə̀, “Ìny” ghu kàm dzày tsə nə̀, “Hǎy” ani lwìʼì tsə asə ə aghù ə̀?

¹⁸Anə ayiə yə Zə̀kìy də nəniy wù wə̀ ù bvamə zəŋə nəniy ayiə yə u tɛb na nəniy, ayiə yə ghè dzîy nəniy awò ghà, ghè dzîy dzə̀ wày anə tə dzə̀ ìbè, ghè dzîy tsə dzə̀ wày nə̀, “Ìny” ghě kàm dzày tsə nə̀, “Hǎy.”

¹⁹Wà Kə̀zə̀, twoŋə Yesù Kə̀litò wə̀ miə nə̀ Saylàs, nə̀ Timotì, ghè kə niʼà nəniy ntwùm ə̀ we awò ghà, ù wày dzə wè tə̀ dzə̀ ìbè. Ù dzìy tsə dzə̀ wày nə̀, “Ìny” u kàm dzày tsə nə̀, “Hǎy.” Ù taw byemə tsə̀ “Ìny.”

²⁰Kə̀litò taw dzìy tsə̀ nə̀, “Ìny” anə tɛb k-a-zə̀ kə̀ dzə̀m. À yù də̀ ighe abu ŋgà gwuŋə̀ nəniy a zù dzày tsə nə̀, “I də kə ghii” ani nyə̀ yə̀ mə̀ŋkwiʼi awò Zə̀kìy.

²¹À də̀ Kəzə̀, kə nyiə nəniy ŋgaŋ nə̀ daʼa kiy ani təmi taw tsə ani dzwùmì Kə̀litò. À də̀ Kəzə̀ kə sây kə nəniy ŋgaŋ,

²²kwe na tsə sòʼò tsəe kə we azoŋə̀ ŋgàŋ nə̀ ŋgà də aghe we. Ù kwe Zwàykə̀zwekiy anə fòŋ tə ŋgàŋ ani dè na bə̀ nə̀ ù kì fàʼà myà ŋwò àyiə adzə̀m awò ŋgàŋ ù tɛb na nəniy.

²³Mə kwu ŋwô nə̀ Zə̀kìy də ŋwô ani dzày nyə̀ àyiə yə a də nəniy anə fôŋ yam, mə guw dzə̀ wày àyiə yiy. Mə kə kə̀ kâm tsîy bə̂ dzə̂ a Kolìn akə̀lə̀ ghà, aŋwòə mə kə liə dzə̀ way ani kàm fyimi gha.

²⁴Ghè yiə yə̀ dzìy dzə̀ wày nə̀ ghè zəŋə nə̀ ghǎ kwu ani tə̀lì bɛmə kə ayiə yə ghè dzîy. Ghè kwu ŋwô nə̀ ghà təmi dòʼò taw ŋwô anə ibɛmə ghii. Ghè kwuni zəŋə nə̀ ghǎ kəli tsə kədwiʼi anə ayiə yə ghè faʼà dzəŋə nəniy nə̀ ghà.