Read Isu 2 Kolìn 10 Bible Online

2 Kolìn 10 - Isu bible

2 Kolìn 10

¹Miə, Pôl, mə bwoʼo bə̀ ghà nə̀ wokiy anə uwè ùbvamə wiy, yəə à də̌ Kə̀litò. Aghê də anə fwumi kəli, ghu tsə̂ŋ kwu kə ani dzày nə̀, “Bəə mə də nəniy nə̀ ghà mə bvamə ù wee, abù mə kwuni də wày a kə̀lə̀ ghà, mə twà bə̀ ùŋwàʼà bvəmə bə̀ ghà ani nyiə̀ ghà nə̀ mfəm.”

²Kə̀lə̀ â ghà, ghà kə zəŋi dzə̀ miə nə̀ abu mə kâm bû nəniy mə ki zwàʼà nə̀ ghà anə ayiə yə mə də nəniy ani zəŋi nə̀ àghù yə̀ ghu dzîy nəniy nə̀ ghè faʼà yəə à də̀ aghû yə̀ ghu də kwu way Zə̀kìy.

³I də nə̀ yəə ghè bôʼ muə kə fə anə mbyi ghii, ghè ŋwâ dzə̀ wày tsam anə dzə̀lə tə ghě mbyi.

⁴Mə ayiə yə ghii dzìy aŋwòə ufyiə u tsam wə ghè ŋwâ nəniy ate, à wày dzə ndzòʼò ufyiə u tsam wə aghee mbyi yiy ŋwâ nəniy ate nə̀ àghù yìy. Ufyiə u tsam wə ghè ŋwâ nəniy ate, à də daʼa k-a-zə̀ kə̀ kə byilə̀ myaʼà nəniy loʼo tə udaʼa u Satàn ù dzə̀m zoʼo doʼò nəniy ate.

⁵A nîy kə ùtwab u Kəzə̀ a bwalə nimə myàʼà àyiə à bələ yiy ate à dzə̀m zəŋə sòʼò nə̀ aghê kwuni kə dzələ tə ghu moʼò nəniy ayiə yiy ate ani zəŋi tsə nə̀ ghu ki moʼo ndzòʼò àyiə yə Kə̀litò liə nəniy nə̀ ghu ki moʼo.

⁶Ghà muə̀ tsə anə ayiə yə lâŋ kə Yesù kìy dzîy nəniy, ghè mə̂ iwee yiy byay na təŋ ani nyə̀ mfəm awò wù wə̀ ù twe nəniy ani zuw awò Kə̀litò.

⁷Tòʼo fwə̀lə dzwàbə tsə nənìy àyiə yə a də nəniy akə̀lə̀ ghà. Abu wù dzìy nəniy nə̀ ghe də wè Kə̀litò, ù tòʼ kəli tsə nə̀ ghè də sòʼò aghee Kə̀litò anə ayiə yə ù də nəniy.

⁸Mə way ani də̀d dzə̀ nə̀ tuw kiy anə daʼa kə Mwe ə̀ Mbyi nyiə̀ nəniy â ghə̀d nə̀ ghè doʼò àghě ntwùm ə̀ Yesù. Ù nyə̀ daʼa kə ghè kə̀ nə̀ ghè fây kə gha ate ani byiə kwoʼ bə̀ ìbɛmə ghii, àwày dzə nə̀ ghè byɛbi maʼà ghà.

⁹Kəə ghǎ nə̀ koʼò dzə̂ ayiə yə mə twâ nəniy anə ŋwàʼà kə̀, ghà ki moʼo nə̀ mə twà bə̀ ani bvumi gha ate.

¹⁰Mə ghii dzìy aŋwòə aghê liy yiy dzîy kyabə tsə̀ nə̀ ùŋwàʼà u Pôl wìy dələ̀ ŋwò, taw sòʼò â wù ani zuw kəli abu ù də nəniy a ndàw ntsaʼ. Abu ù kwuni də nəniy nə̀ ŋgàŋ, u də̀ yəə à də̌ wù wə̀ ù də wày ani dzày ìyiə.

¹¹Ndzòʼò àghě ghè yə̀ kəli tsə nə̀ ayiə yəə ghè twâ bə̂ anə kəŋwàʼà n-à-di kiy, a də ighəd anə ayiə yə ghè kî zəŋə soʼò nəniy abu ghè də nəniy a kə̀lə̀ ghà.

¹²À wày dzə nə̀ ghè byalə̀ ŋwò moo ghè dziy a doʼò soʼò yəə à də̀ aghû yə̀ ghu kyalə təŋə nəniy iwee i ghu yiy nə̀ noŋə̀ ghu. Ghu lyaʼà ŋwò ani foʼo dzəŋə iwee i ghu yiy, byàlə̀ sòʼò anə iwè.

¹³A kwuni bû ghə̀d, ghè way dzə ani kwiʼi iwee anə fyiə kə ghè də kə̀ zəŋi nəway. Ghè kwoʼo ìwee anə fàʼ kə̀ Zə̀kìy twum bə̂ nəniy nə̀ ghè fâʼ ani fàʼ yəə à də̌ fàʼ kə̀ ghè faʼà nəniy azoŋə̀ ghà.

¹⁴Ghè ŋge kwoʼo dzə̀ wày iwee yiy anə ayiə yə ghě mə̀ kwu ani kwiʼi iwee ate anə fàʼ kələ. À mày kə bəə à mə̀ də nə̀ ghè kə kə̀ bû nəway akə̀lə̀ ghà isə nə̀ ntwùm ìdzòŋə̀ yə̀ kwùmə̀ yə̀ nə̀ Kə̀litò.

¹⁵Ghè way dzə ani kwiʼi iwee anə fàʼ kə̀ aghê liy yiy fâʼ nəniy. Fyiə kə ghè liə nəniy à də̌ nə̀ ibɛmə ghii yiy nɛmə yə̂, ghè liə sòʼo nə̀ ghě nì də ani fàʼ fàʼ kə̀soŋə̀ kìy anə fwumi kəli anə ayiə yə Zə̀kìy nyiə̀ nəniy ghəd ate nə̀ daʼa kiy.

¹⁶À də̀ ighe i kî zəŋə nəniy ghəd nə̀ ghè naʼà dyaŋi yə̂ soʼò ntwùm ìdzòŋə̀ yə̀ anə nàʼà tə̀ tə doʼò này yə̂ soʼò nəniy isə. Ghè də mə̀yə ani ŋgamə kwoʼo uwee wiy anə fàʼ kə̀ wè lìy fàʼ tsîy dzə̂ nəniy anə fwumi kə ghù ə?

¹⁷I kwuni də̀ anə ŋwàʼà k-a-zə̀ nə̀. “Abu wù dziy kwiʼi uwee, ù kwu ani kwiʼi uwee anə ayiə yə Mwe ə̀ mbyi zəŋi nəniy.”

¹⁸Mə ghii dzìy aŋwòə à wày dzə wù ù kyalə nəniy uwe u we wiy, ghu koʼò nəniy fàʼ kə we kiy, à də̌ wù wə̀ daʼa kə Mwe ə̀ mbyi kiy də nəniy azoŋə̀ we ghu koʼò nəniy fàʼ kə we kiy.