Read Isu 2 Kolìn 12 Bible Online

2 Kolìn 12 - Isu bible

2 Kolìn 12

¹Abu mə də tsəm kwu kə way namə kə̀ liy kiy anə ayiə yə mə kwoʼo nəniy uwee wiy ate, mə kî kwuni tsìy yə̀ kə nə̀ sə kiy tyi dzày ghà nə̀ àyiə yə Mwe ə̀ mbyi dê nəniy awò mìə̀ anə udzɛ̀mə̀ nə̀ nù tə ayiə tə ù zəŋi nə̀ mə kəli tsə anə fôŋ yam.

²Mə kwu ŋwô wù lìy ù kə bɛmə nəniy awò Kə̀litò. Zə̀kìy nìy ŋwò kwoʼ này kə we idoŋ idòŋ an-a-byiwuŋ[1]. Ŋə̀mə̀ tìy mə tsìy ate ìvəm nə̀ ŋə̀mə̀ tìy ìkyàʼì. Mə kwu way nə̀ Zə̀kìy kə nìy kwoʼ yə̀ uwee u we ùdzə̀m moo à kə də̌ fòŋə̀ we yə. À kwu kə Kəzə̀.

³Mə kwu ŋwô nə̀ wù ù ghè wə̀ Zə̀kìy kə nîy kwoʼ yə̂ uwee u we wiy moo à kə də̌ fòŋə̀ we yə, à kwu kə Kəzə̀. Zə̀kìy kə nìy ŋwò kwoʼ yə̀ we, u dzày àyiə àliy yiy awò we nə̀, ndzòʼò ayiə yə wù də wày ani dzày anə daʼa kə we.

⁵Mə də ŋwô ani kwiʼi uwee kwùmə̀ yə̀ nə̀ wù ù ghà wə̀. Mə kwuni wày dzə ani kwiʼi uwee kwùmə̀ bə̀ nə̀ àyiə yam àzəŋə yiy aŋwòə ayiə àzəŋə yiy dê bə̀ nə̀ mə lay ŋwò.

⁶Bəə mə dziy kwiʼi uwee, i mə də dè dzə̀ wày nə̀ mə də wù ùlyaʼà wìy aŋwòə mə mə̀ dzǐy bvamə dzìy bə̀ kə àyiə àsoŋə̀ yìy. Mə ndzə̂m kwuni twe màʼà ŋwò ani kwiʼi uwe nə̀ aghê fə nə koʼo ŋgwoʼo miə anə ayiə yam à dziy yiy nə̀ àyiə yə mə zəŋə yiy, tsìy fyi wù wə̀ mə ba də nəniy we.

⁷Ani kwuni zəŋi tsə nə̀ kəə mə nə̀ ŋge kwoʼo kyabə tsə̂ nəniy uwee wiy anə dzwàbə̀ dzwàb tə yiə tə Zə̀kìy kə dê â mìə̀. Zə̀kiy zəŋi tsə nə̀ tsə̀ndii ə̀ Satàn bù kwe tsə miə anə utswə̀d ani zəŋi tsə nə̀ mə kə ŋge kwiʼi dzə̀ ùwee wiy.

⁸Nsòŋə inti nə̀ mə bwoʼo təŋə kə kə̀wo awò Mwe ə̀ mbyi anə igwùŋì nə̀ nìy ŋwò ùtswə̀d wə̀ azoŋə̀ mìə̀.

⁹U kwuni bə̀lì kə miə nə̀, “Fyiə kə wò kwu ani kəli à də̌ fòŋ yàm ìdzòŋə̀ yìy aŋwòə daʼa kam kiy faʼà azoŋə̀ wò abu wò də kwu way daʼa kiy.” Yəə i də nəniy ghii, mə kwu ani kəli kədwiʼi ani kwiʼi uwee anə uwè ùlay wiy ani zəŋi tsə nə̀ daʼa kə Kə̀litò kìy fâʼ azoŋə̀ mìə̀.

¹⁰À yù də̀ ighe mə baa bɛmə təŋ nəniy ani làʼ kə̀ daʼa, abu ghu nyaʼì miə, tswə̀lə̀ mìə̀. Mə kwu nəniy ntswə̀d mìy fyaʼa sòʼò bòʼ Kə̀litò aŋwòə abu mə lay nəniy, daʼa kə Kə̀litò kiy fàʼà azoŋə̀ mìə̀.

¹¹Ghà mə zəŋi miə mə də yəə à də̌ wù ù lyaʼà wìy anə yiə yə mə kwoʼo nəniy uwe wiy ate. À də̀ gha ghà tyiŋi nəniy miə nə̀ mə zəŋi ayiə ghè yə̀. À mə̀ kwu gha ani dzày ndzòʼò wù wə̀ mə də nəniy we aŋwòə mə tsîy fyi ŋwô aghee ntwùm ì gûw yə̀.

¹²Yəə mə kə də nəniy nə̀ ghà, ghà maa kòʼ mà nə̀ mə də wè ntwùm ə̀ Yesù anə ndə̀mə̀ mali tə yiə tə mə kə zəŋi nəniy anə fwumi kəli nə̀ mə kwê fòŋ, nə̀ kwab tə yiə tə mə kə zəŋə nəniy.

¹³Mə kə fàʼ kə iyiə ìmoʼo yiy nə̀ ghà ighəd anə yiə yə mə kə fâʼ nə̀ ùdzəŋə ù Kəzə̀ ù liy wə. À kə mày kə yəə mə kə twe tsə nəniy ani fyimi gha nə̀ ghà ki tsəə bəə soʼo miə. Bəə à də nə̀ mə kə zəŋi bɛb ŋwô, kə̀lə̀ â ghà, nǐyzə̀ ə̀ nənìy miə anə ighè yə̀.

¹⁴À nyìə̀ zəŋə yə̀ nsòŋə inti anə ayiə yə mə byay tsə nəniy uwee wiy ani bù bwìy kòʼ ghà. Mə kî fyimi dzə̀ wày gha aŋwòə mə bê dzə̀ wày ani bù nìy ùfyiə ghii, mə baa bè ani bù kòʼ ghà. I ghii də̀ aŋwòə à wày dzə anîsə̂ ghu kwu nəniy ani khu nyiə nə̀ təli nə̀ ùfyiə wiy. À kwuni də̌ nə̀ tě wa ghu khu nyiə̀ nəniy ufyiə wiy awò ànìsə̂ yìy.

¹⁵Mə ndwamə̀ swamə way ani nyə̀ mà bə̀ ùfyiə wam udzə̀m nə ùwee nam wiy ani fày ghà. Abu mə sî bòʼ liə nəniy gha ghii nə̀ fòŋ yam idzə̀m, à də̌ kìə̀ ghà də wày ani mboŋ liə sòʼò mìə̀ nə̀ fòŋ təli tiy ə?

¹⁶Ghà ndzə̂m kwu ŋwô nə̀ mə kə kə̀ fyimi dzə̂ nəway gha anə ayiə uwè nam. Gha àliy kwuni dzìy nə̀ mə kə zəŋə àyiə utwab, nɛbə nyìə̀ ghà, kàmə̀ niɛbə nyiə gha ibàm ibàm.

¹⁷Mə dziy bəb tsə nə̀, mə kə sì ghà nɛb mə̀yə ŋwoə? Yəə mə kə twum bə̂ nəniy aghû yìy akə̀lə̀ ghà, wè lìy kə nɛb ŋwô gha ate ə̀?

¹⁸Mə kə bwoʼ tsə kəwo â Taytùs nə̀ ù bù akə̀lə̀ ghà. Mə twum gbaʼa bə̀ àzə̀ ə̀ ŋgàŋ ùlìy wìy nə̀ we. Ghà nyiə̀ fə̀ dzìy nə̀ Taytùs kə nɛb nyiə̀ ŋwòə wè lìy ə̀? Ghè bvami fàʼà kə wu kə mòʼ.

¹⁹Ghà nyiə̀ nə myiŋə kə nə̀ ghè baʼà mbàŋ anə tuw kələ anə sə kəli. Hǎy! Awizə̂, ghè yiə yə dzìy anə sə k-a-zə̀ anə izəd i Kə̀litò ani zəŋi tsə nə̀ ghè byiə na dzwâb tsə gha akə̀lə̀ Kə̀zə̀, gha yə ghè kwu nəniy gha anə təfòŋ.

²⁰Mə fə̂ tsəŋə nə̀ abu mə bû nəniy, mə fə̂ ni bû kôʼ ghà zəŋə nəniy ayiə à ŋwumə u nìə̀ yìy. Ghà ki koʼo miə, mə ki fwunə wù ù ŋwò wìy. Mə tsəŋə nə̀ mə fə ni bû nə̀ ghà zwaʼà ŋwò, kwu sòʼò kəghòʼ anə iwè, zə̀àŋə̀ ŋə̀mə̀ nə̀ fòŋ tìy moo kwu umwu, guw àyiə anə iwè, dzìy sòʼò təfɛm, kwu sòʼò iwee ìkwoʼo yiy, kwu sòʼo mwàmə mə̀ ŋwò mìy.

²¹Mə tsəŋə nə̀ a ki bu mə bû fəli nəniy, tuw kiy ki dələ miə anə sə k-a-zə̀. Mə ki bvami də kə yəə mə dîy ŋwò aŋwòə ghà kamə twe maʼà dzə̀ ayiə ghii àbɛbə yiy. Ghà namə zəŋə kə àyiə kəlyaŋi nə̀ àyiə àdzəə yiy nə̀ àyiə tuw kə̀ dələ kiy.