Read Isu 2 Kolìn 13 Bible Online

2 Kolìn 13 - Isu bible

2 Kolìn 13

¹Ibû yə̀ mə bê nəniy nyiə akə̀lə̀ ghà ani zəŋi yə̀ nsòŋə mam ìnti, mə kî bɛmə dzə̀ wày nə̀ a saʼ wiy wè lìy nə à wày dzə̂ tə aghè àbè moo àti tə kwi nəniy we.

²Yəə mə kə bû nəniy a kə̀lə̀ ghà ani zəŋi yə̀ nsòŋə mam ìmbè, mə tswù na tsə gha nə̀ mə kî nyìə̀ ŋwòə wù wə̀ ù twe nəniy ani nyəli màʼà ani zəŋi ayiə àbɛbə yiy nə̀ mfəm nə̀ àghè liy yə àdzə̀m ghu zəŋə soʼò ayiə àbɛbə yiy. Nyiə, mə way dzə̀ nə̀ ghà, mə loʼo dòʼò yə̀ ŋwò, mə kwuni namə nyìə̀ bə̀ kə gha nə̀ ìtswù ìmoʼo yiy nə̀ a ki buu mə kî kàm bù nəniy, wù lìy kì dòʼò wày nə̀ mə kə̀ nyiə̀ nəway we nə̀ mfəm.

³Mə kî zəŋə tsə ghii ani dè tsə â ghà nə̀ ayiə yə mə zəŋə nəniy a ŋwò bə̀ â Yesù Kə̀litò. Ù kə̀ lay sə dzə̂, ù kwu ŋwoə̀ daʼa kiy ani bwa tyili gha.

⁴I də ŋwô nə̀ ghu maa we ba wiy anə kàʼ fə təzəd yəə à də̌ wù ù lay wìy. Ù kwuni mùə̀ ŋwô nyiə anə daʼa k-a-zə̀. Ghè lay ŋwò ighəd anə ayiə yə ù kə də nəniy. Ghà kî kwuni kòʼò tsə nə̀ ghè muə ŋwô anə daʼa kə Zə̀kìy kwu nəniy ighəd yəə Kə̀litò kə muə nəniy ate.

⁵Tòʼo bǎy tsə nənìy ìwe nəli yiy ani kəli tsə nə̀ ghà ndzə̂m kwu kə ŋwô ìbɛmə yiy azoŋə̀ Yesù moo ghà kwu way yə. Ghà saʼ dzwâb tsə soʼò anə fòŋ təli. Abu ghà də kə̀ kəli fyi kə nəway nə̀ ghà muə ŋwô, à ki də nə̀ ghà mə bvə̀ fyi anə ibɛmə ghii.

⁶Mə kwu təŋ ŋwô nə̀ ghà kî bè kyilə fyiə kə ŋwò nə̀ ghè kə kə̀ bvə̀ dzə̂ anə fàʼ kələ.

⁷Ghè gwùŋə̀ nə̀ Zə̀kìy zəŋi tsə gha, tə̀ ghà kə zəŋi dzə̀ ìbɛb yiy. Ghè gwuŋə̀ dzə̀ wày a ghii ani dè tsə nə̀ ghè kə zəŋi ayiə dzə̀m tsitsi, ghè kwuni gwùŋə̀ ghii ani zəŋi tsə gha nə̀ ghà ki zəŋə yəə ayiə yə a də nəniy tsitsi, bəə i dê kəə nə̀ ghè maa bvə̀.

⁸Ghè ghii dzìy aŋwòə ghè way ani bwi na dzə̀ ìyiə ìsòŋə̀ yìy, ghè kî kwuni kwu kə ani taʼ nə̀ àyiə àsoŋə̀ yə̀ a də nəniy anə ntwùm ìdzòŋə̀ ì Yesù Kə̀litò yə̀.

⁹Ghè dyoʼo ŋwò abu ghè zəŋə nəniy ayiə yə a dê bə̂ nə̀ ghè lay ŋwò kwuni zəŋə nə̀ ghà ki taw. Ghè gwùŋə̀ sòʼò nə̀ ghà doʼò tsə aghee tsitsi anə sə k-a-zə̀.

¹⁰Daʼa kə Mwe ə̀ mbyi nyiə̀ nəniy â mìə̀ ani byiə fyi kwoʼ bə̀ ghà ate, mə liə dzə̀ way nə̀ abu mə bû nəniy mə ki kamə ŋgay azoŋə̀ ghà ani sàʼà màʼà ghà. À yù də̀ ighe mə twâ bə̂ nəniy ayiə yə ghii â ghà ani kway zə̀ŋì bə̀ ghà nyiə yəə mə də kamə bû.

¹¹Ani kəd tsə, awizə̂, ghà doʼò kədzôŋ. Ndəmi tsə kə nənìy ìwe yiy ani zəŋi ayiə yə a də nəniy tsitsi, ghà kə swây màʼà dzə̌ dzə̀ yam, ghà doʼò tsə anə dzə̂ ìmòʼ. Ghà muə̀ tsə nə̀ wù ùmoʼ umòʼ anə ibvay, Zə̀kə̀ kə kwu nəniy iliə yiy, nyiə̀ sòʼò ìbvay awò àghù yìy, kə ki doʼò nə̀ ghà.

¹²Ghà twoŋə zuw yə̂ wù ùmoʼ umòʼ nə̀ fòŋ tə̀ zwe tiy.

¹³Aghee Kəzə̀ à dzə̀m twoŋə zuw bə̀ ghà.

¹⁴Mə gwùŋə̀ nə̀ Mwe ə̀ mbyi Yesù Kə̀litò dè ghà nə̀ fòŋə̀ ìdzòŋə̀ yìy. Mə gwùŋə̀ nə̀ Zə̀kìy dê ghà nə̀ ìliə i we yiy, gwùŋə̀ sòʼò nə̀ Zwàykə̀zwekiy zəŋi tsə gha, ghà ki kwu fòŋ ìmòʼ yəə à də̌ wù ùmòʼ.