Read Isu 2 Kolìn 2 Bible Online

2 Kolìn 2 - Isu bible

2 Kolìn 2

¹Mə mə kàm nìy itsə̂m yìy nə̀ mə kamə̀ dzwəŋə bə̀ dzə̀ wày akə̀lə̀ ghà nə̀ mə fə nə bû təŋə fôŋ təli.

²Abu mə sî kàm təŋə nəniy fôŋ təli tiy, à də̌ ndiə ani kwuni kàm kwe fòŋ yam ə? À də̀ kə gha yə mə zəŋi nə̀ fôŋ təli tiy ŋə̂m.

³À yù də ighe mə kə twâ bə̂ nəniy gha nə̀ ŋwàʼà kìy, mə kə liə dzə̀ way ani bù kaʼ uwee ani swam azoŋə̀ ghà yəə ghà kwu nəniy ani zəŋi miə tə̀ mə dwiʼi. Mə kwu təŋ ŋwô nə̀ abu mə dyoʼò nəniy, gha dzə̀m ghǎ dyoʼo sòʼò.

⁴Mə kə twà bə̀ ŋwàʼà kə̀ â ghà nə̀ utswə̂d ù fyaa wiy mə miə kwi taw, fòŋə ŋge byòŋə̀ sòʼò miə, mə də̀ sòʼo nə̀ nsə miy anə kətuw. Mə kə kə̀ twâ bə̂ dzə̂ nəway ani zəŋi nə̀ ghà kaʼ yə̂ ani mwe. À kə də̌ nə̀ ghǎ kəli tsə nə̀ mə ŋge liə ŋwô gha.

⁵Abu wù zəŋi tsə nə̀ wè lìy ŋə̀m nə̀ fòŋ, wù ù ghè wə̀ kə̀ zəŋi dzə̂ azoŋə̀ mìə̀, ù ghii kwuni zəŋi azoŋə̀ ghà dzə̀m. Mə liə way ani ŋge dzày ayiə ghà yə̀. Mə dzîy dzə wày àyiə yə ghii, aŋwòə mə liə dzə̀ way nə̀ ayiə yiy taw kwoʼ bə̂ azoŋə̀ wù lìy.

⁶Mfəm yə ghà nyiə̀ nəniy awò we anə ndə̀m, ì mə kpe dòʼò.

⁷À nyə̀ də̀ kə awò ghà ani nìyzə̀ àyiə we àbɛbə yiy, ghà kâm kwe dzwoŋi tsə fòŋə̀ we. Tə̀ ù fə̀ nə ŋge mwe tsîy anə dzəd yə ù də nəniy ani bvwə̀ anə ibɛmə i we.

⁸Kə̀lə â ghà, ghà kâm dê dzwoŋi yə̂ we nə̀ ìliə yiy, tə̀ ù kəli tsə nə̀ ghà ndzə̂m liə ŋwoə we.

⁹Mə kə twà bə̀ sòʼò ŋwàʼà kə̀ awò ghà ani mwàmkòʼ ghà nə̀ ghà kə zuw kə ŋwò ayiə yə àdzə̀m yə̀.

¹⁰Abu ghà nîyzə̀ yə nəniy ayiə àbɛbə yə aghê zəŋə nəniy nə̀ ghà, mə kî nìyzə̀ sòʼò. Abu à də nə̀ iyiə ìliy də ŋwô tə mə nə nìyzə̀, mə nìyzə̀ anə səkə Kə̀litò bòʼ gha dzə̀m.

¹¹Mə ghî dzìy anə zəŋi tsə nə̀ kəə Satàn nə̀ twabə tsîy nəniy ŋgaŋ, aŋwòə ŋgà mya dzə̀ wày ayiə we àzəŋə yiy.

¹²Yəə mə kə zû nəniy a Towàs ani zù nàʼà ntwùm ìdzòŋə̀ yìy awote kwùmə̀ yə nə̀ Kə̀litò, mə bù kəli fyi kə nə̀ Mwe ə̀ mbyi mə kaw na dzəd awote awò fàʼ kə we kiy ani zù nə̀ sə kiy.

¹³Fòŋ kə namə ŋge bìyòŋə̀ kə miə aŋwòə mə kə kə̀ kôʼ nəway àzə̀ wam, Taytùs awote. Mə dzày tsə a ghu awote nə̀ ghu doʼò kədzôŋ, ŋwò tsìy zù dyaŋi a mbwòʼ ə̀ Màsèdonìyà.

¹⁴Mə kwuni nyìə̀ kə̀zòŋə̀ awò Zə̀kìy aŋwòə yəə ghè təm doʼò fwumi nə̀ Kə̀litò, Zə̀kìy mə zəŋi ghəd nə̀ ghè ki bwiy yəə à də̀ aghû yə̀ ghu təm nyi nəniy tsam. Zə̀kìy də nəniy səkiy ani dè tsə nə̀ ayiə yə ghè niʼà nəniy, à fìy we ghəd ani nàʼà kyabi ntwùm ə̀ Kə̀litò. Ntwùmə̀ ìdzòŋə̀ yə̀ də̀ yəə à də̀ fyiə kə kə lyimə̀ dzwabə̀ nəniy anə loʼo tə dzə̀m.

¹⁵Ghè də yəə à də̀ fyiə kə kə lyimə̀ dzwabə̀ nəniy, Kə̀litò sà yə̂ nəniy awò Zə̀kìy. Zukə ghè kə̀ lyìmə̀ yə̀ loʼo tədzə̀m, lyìmə̀ wò tə̀ wò awò àghù yə̀ ghu bii fyi dzə̂ nəniy ghu nə̀ àghù yə̀ ghu də kamə kə̀ bii fyi nəway ghu.

¹⁶Aghû yə̀ ghu də kamə kə̀ kəli nəway imuə̀ itsà yìy, zukə kə ghè kə̀ kì zəŋi nə̀ ghu pfə. A kwuni bû aghû yə̀ ghu bii fyi dzə̂ nəniy ghu, zukə kə ghè kə kì nyə̀ ghu nə̀ imùə̀ itsà yìy. À mə̀ də̌ ndiə ani fàʼ kə̀fàʼ yəə à də̌ fàʼ kə̀ ə?

¹⁷Ghè way dzə yəə à də̌ ndə̀mə̀ àghè liy yə, ghu nîy na tsə nəniy ntwùm ə̀ Kə̀zə̀ yəə à də̌ kəŋ. Ghe kwuni də̀ aghû yə̀ Zə̀kìy twum bə̂ nəniy, ghě niʼà bə̀ ntwùm ə̀ we â ghà anə ayiə àsoŋə̀ yìy nə̀ daʼa kə Kə̀litò nyə̀ nəniy awò ghə̀d, ghè kwu nə̀ Zə̀kìy koʼò myà ŋwò ghəd.