Read Isu 2 Kolìn 3 Bible Online

2 Kolìn 3 - Isu bible

2 Kolìn 3

¹Yəə mə twâ nəniy ayiə yə kwùmə̀ yə̀ nə̀ ìwee nələ yiy, ghà moʼò nə̀ ghè mə kàʼ ani kwiʼi iwee kwùmə̀ bə̀ nə̀ fàʼ kələ kiy ə̀? Moo ghà moʼò nə̀ aghê àliy təlì, kwu ani twà bə̀ dzə̀ ùŋwàʼà awò ghà kwùmə̀ yə̀ nə̀ fàʼ kə̀dzoŋə̀ kə̀ ghè faʼà ə? Moo gha kwu ani twà yə̀ uŋwàʼà wìy awò aghè liy kwùmə̀ yə̀ nə̀ fàʼ kə̀ dzoŋə̀ kə̀ ghè fàʼà nəniy ə̀?

²Ghà də yəə à də̀ kəŋwàʼà kə dê nəniy awo kəfàʼ ghələ yiy. Ghà də anə fòŋ tələ yəə à də̀ kəŋwàʼà awò àghè dzə̀m ghu tyoŋə nəniy zuw kəli yə̀.

³I ghî dè nə̀ ghà də yəə à də̀ kəŋwàʼà Kə̀litò twà tsə nəniy twum bə̀ ghə̀d nə̀ ghe kiy. Ù kə kə̀ twâ dzə̂ nəway ŋwàʼà kə anə dzaŋ k-a-ŋwàʼà, ù kə twà bə̀ anə Zwày kə Zə̀kə̀ kə muə nəniy. Ù kə kə̀ twâ na soʼò nəway anə yemi mə̀ àtay, ù kə kwuni twà na anə fòŋ tə aghě mbyi.

⁴Ghè dzîy àyiə yə aŋwòə ghè gaʼ na fôŋ tələ awò Zə̀kìy abidzəmə̀ Kə̀litò.

⁵À wày dzə nə̀ ghè kwoʼo ìwee nə̀ ghè ŋge kwu ŋwô ani fàʼ fàʼ kə̀. À də̀ Kəzə̀ kə nyiə̀ nəniy ghəd nə̀ ìfày yìy ani fàʼ fàʼ kə̀.

⁶Ù mə zəŋi ghəd nə̀ ghè kəli tsə ani nàʼà ayiə kwùmə̀ yə̀ nə̀ ŋkàmə̀ fyiə̀ mə̀ we mə. Ŋkà mə̀ wày dzə ulâŋ wə u twâ doʼò nəniy. Ulâŋ wə̀ u twâ doʼò nəniy, u nîy bè nə̀ ìpfə yiy. Zwày k-a-zə̀kìy kwuni nyiə̀ ìmùə̀.

⁷Ulâŋ wə̀ u kə bê nəniy nə̀ ìpfə yiy, u kə twà dòʼò anə yɛmi mə̀ àtay. Yəə Musîs kə bê nəniy nə̀ ùghe wiy, aghee Islàel yǐy wày ani liay yə̀ dzə̀ ùtwùmusə u Musîs bòʼ yəə u kə ŋge mwâ nəniy, imwây i ghè yə̌ mìì yə̀ nyòŋə fənyòŋə,

⁸imwây yə̀ fàʼ kə Zwày k-a-zə̀ kìy kwu nəniy, i mə tsìy fyi imwây ulàŋ yə̀ i kə də nəniy anə utwùmusə u Musîs.

⁹Abu ulâŋ u ŋkà mə̀ wîy mə̀ u kə saʼa wiy təŋə yə̂ nəniy aghû yìy, u kə loʼo mwâ nəniy ghii, ulâŋ ŋkà mə̀ fyiə mə̀, u bê nəniy nə̀ imùə̀ yə̀ i də nəniy tsitsi anə səkə k-a-zə̀ u kî kəli way ŋkwiʼi miy u tsîy fyi ə̀?

¹⁰Ndzə̀m ndzə̀m ŋkà mə̀ wîy mə̀ a kə koʼò nəniy yəə ìn ŋge mwà ŋwò, mə̀ fyiə̀ mə̀ mə bù mwày tsǐy mə̀ wîy mə̀.

¹¹Abu ŋkà mə̀ wîy mə̀ ìn kə mâŋ zə̀ŋì də nəniy, bəə ìn kə loʼo də ani mwày aghii, ŋkà mə̀ fyiə̀ mə̀ ìn ba bû nəniy ani bù dòʼò təŋ, ìn mə ndzə̀m ŋge mwày tsìy fyi.

¹²Yəə ghè tsəm kwu təŋ dzə nəniy ayiə yə ghii anə fôŋ tələ, à yù də̀ ighe ghè kwu nəniy fôŋ tə̀ taw tiy.

¹³Ghè way dzə yəə à də̀ Musîs, ù kə fə̂d bwàm kəli kə nəniy utwumusə wiy nə̀ bə̀d kə ndzwu kiy nə̀ aghee Islàel yìy kə kôʼ lanə yə̀ dzə̀ ìmwày yə̀ i kə nimə yə̂ neniy.

¹⁴Ndzə̀m ndzə̀m, fôŋ tə ghu tiy maa kwuli dòʼò təŋ, bù kwùm tsə zii yə mə twâ nəniy, abu ghu tyoŋə nəniy ulâŋ u ŋkàmə̀ mə̀ wiy mə̀, bə̂d kə dzwu kə ghè kə̀ nam kəd na kə àsə ə ghu, aŋwòə à mày kə abu ghu bû təm doʼò fwumi kə dzə̂ nə̀ Kə̀litò ù kî nìy ŋwò kə bə̂d kə ndzwu kə ghè kə̀.

¹⁵Bù kwùm bə̀ kə zii yə mə twâ nəniy, abu ghu tyoŋə nəniy ulâŋ u Musîs wə̀, bə̂d kə dzwu kə ghè kə̀ namə kòŋə̀ bə̀ kə fòŋ tə ghu.

¹⁶Abu wù kwuni kyemì nyiə̀ yə̂ dzə̂ nəniy fòŋ ə̀ we awò Mwe ə̀ mbyi, ù kî nìy ŋwò kə bə̂d kə dzwu kə ghè kə̀ anə fòŋ ə̀ we.

¹⁷Nyiə, Mwe ə̀ mbyi nə̀ Zwàykə̀zwekiy də fyiə kəmòʼ. Loʼo kə Zwày kə Mwe ə̀ mbyi kiy də nəniy ate, aghê kâm wày dzə a tsəŋə ulaŋ u Musîs wìy.

¹⁸Ŋgaŋ adzə̀m nyiə̀ də̀ kə nə̀ bə̂d kə ndzwu kiy mə fwiy ŋwò anə ntwùmə̀sə mə̀ ŋgàŋ. Ntwùmə̀sə mə̀ ŋgàŋ mìy dê fyiə bə̀ yəə imwây i Mwê ə̀ mbyi yiy də nəniy ate, anə yiə yə Zwày kə Mwê ə̀ mbyi kiy zəŋə nəniy nə̀ ŋgà ki tsəŋə dyoʼo kwoʼo bəə yəə à də̀ Mwe ə̀ mbyi ə̀ ŋgàŋ wə̀ ù də nəniy Zwày kìy.