Read Isu 2 Kolìn 4 Bible Online

2 Kolìn 4 - Isu bible

2 Kolìn 4

¹À liə tsə Kəzə̀ anə idzwàb i we ani dzày nə̀ ghè fâʼ fàʼ kə̀, ifəd yìy pfə sòʼò wày ghəd ate.

²Ghè mə twe màʼà ani zəŋi ayiə an-a-nù nə̀ àyiə yə a bê nəniy nə̀ tuw kə̀ dələ kiy àdzə̀m. Ghè nɛbə dzə̀ wày àsə ə ghù yìy, ghè way soʼo ani kwe iguw anə ayiə Kəzə̀ yə̀ ghè dzîy nəniy. Yəə ghè kwunə dzîy nəniy ayiə àsoŋə̀ yìy awò àghù yìy, wù ùmoʼ umòʼ kwu ŋwô anə fôŋ ə̀ we nə̀ ghè dzîy àyiə àsoŋə yìy, anə sə ka-zə̀.

³Abu wè lìy də kamə zuw kyilə way ntwùm ìdzòŋə̀ yə̀ ghè niʼà nəniy, i dê tsə nə̀ wù ù ghè wə̀ mə kàʼ ani moŋə.

⁴À də̀ Satàn ù kwù na nəniy fôŋ tə aghù yə̀ ghu də kamə bɛmə nəway â Yesù. Ù zəŋi na nə̀ kəə ghu nə kòʼò yə̂ dzə̂ àsə àzwe yə à də nəniy, ntwùm ìdzòŋə̀ yìy bè nəniy nə̀ ghe yiy anə izəd i Kə̀litò. Kə̀litò də̀ fwuni k-a-zə̀.

⁵Ayiə yə ghè niʼà nəniy, à wày dzə ayiə unìə̀ ghələ. Ghè kwuni nìʼà àyiə kwùmə̀ yə̀ nə̀ Yesù Kə̀litò də̀ Mwe ə̀ mbyi. Ghè də aghě kəfàʼ awò we bòʼ ghà.

⁶Zə̀kə̀ kə kə dzây tsə nəniy nə̀, “Kaʼì tìy taw fyi bə̂ a loʼo kə ləm kiy də nəniy ate!” À nam də̀ kə Zə̀kə ghè kə̀ kə zəŋi tsə kaʼì tìy ki mwaa anə fôŋ tələ ani zəŋi tsə nə̀ ghè kôʼ kəli yə̂ àyiə yə ŋkwiʼi m-à-zə̀ mìy mwâ fyiə bə̂ nəniy anə utwùmusə u Yesù Kə̀litò.

⁷Ghè kwuni màŋ də yəə à də̌ ntwà tə itsaʼ, ghu kwe na nəniy ntwùm ìdzòŋə̀ yìy azoŋə̀ ghə̀d nə̀ aghê dzə̀mə̀ kôʼ kəli bə̂ nə̀ à kwu Kəzə̀ daʼa kiy, à fàʼà dzə̀ wày ghəd anə daʼa kələ.

⁸Aghê mə ghə̀d tswə̂d, loʼo tədzə̀m, i kwuni də̀ kə nə̀ ghu ghəd kamə kyemi na dzə̂ anə lòʼo kəmòʼ yəə ghè ni də̂m kê ani nàʼà ntwùm ə̀ Yesù. Ghè bê anə sòŋə fə̀ liy fiy, ghě zù təmi dòʼò yə̀ kwu way iyiə yə ghè dziy zəŋi bəə ayiə ŋge fyimə, ghě kwuni zè kə nə̀ sə kiy.

⁹Ghu mə dzày ayiə àbɛbə yiy azoŋə̀ ghə̀d Zə̀kìy kwuni kamə kə̀ tu na sə dzə̂ ghəd. Ghu mə ghəd nyaʼì, ghu kwuni kamə kə̀ byɛbi maʼà dzə̂ ghəd.

¹⁰Bəə ghè zû kə yə, ghě mòʼò tsə nə̀ yəə aghê kə wiy nəniy Yesù, ghu də sòʼò ani wiy ghəd anə yiə yə ghè tyi dê nəniy ntwùm ə̀ we. À də̌ nə̀ ghè liə ani zəŋi tsə nə̀ aghê dzə̀m ki də ani kòʼ kəli bə̀ ndzòʼò ìmùə̀ yə̀ Yesù kə muə̀ nəniy anə iwè nələ.

¹¹Ghè tsə̂ŋ kwu kə ani kòʼ mfyǎy mə̀ ìpfə nsòŋə̀ indzə̀m bòʼ Yesù, anə ayiə yə ghè muə nəniy ate ani zəŋi tsə nə̀ aghê ki koʼo bə imuə̀ i Yesù yìy anə iwè nələ.

¹²Ì yû dè tsə nə̀ mfyǎy mə̀ ìpfə mə ghè zuw nsòŋə indzə̀m, à də̌ ani kwuni zəŋi tsə nə̀ ghǎ kəli tsə imuə itsà.

¹³Ŋwàʼà k-a-zə̀ kìy dzîy nə̀, “Mə dzîy àyiə yə aŋwòə mə mə bɛmə awò Zə̀kìy.” Ghè dzîy àyiə aŋwòə ghè kwu sòʼo ndzòʼò ìbɛmə i ghà yə̀.

¹⁴Ghè kwu ŋwô nə̀ Zə̀kìy kə zɛ̀m dzwoŋi bə̀ Mwe ə̀ mbyi ə̀ ŋgàŋ Yesù anə ipfə nə̀ u dòʼò bə̀ ùtâw wiy. Ù nì zɛ̀mə̀ kə sòʼò ŋwò ŋgaŋ anə ayiə yə ù zɛ̀m dzwoŋi bə̂ nəniy Yesù ate. Ù nìy dzəŋə na bə̀ ŋgàŋ akə̀lə̀ we.

¹⁵Ayiə yə ghii àdzə̀m fyiə bòʼ ghà, ani zəŋi tsə nə̀ ndə̀mə̀ àghè ki kôʼ tsə ayiə yə fòŋə̀ Kə̀zə̀ ìdzòŋə̀ yìy də nəniy ate, ghu ki nyiə̀ yə ŋkwiʼi miy nə̀ ùkali wiy awò Zə̀kìy.

¹⁶À yù də̌ ighe ifəd yìy də pfə sòʼò wày ghəd. Yəə ghè boʼò kuw myà yə̂ kə ŋwô anə gùw tə iwè, Zə̀kìy tsə̂ŋ kwu kə ani kwe fôŋ tələ, nyiə̀ sòʼò ghə̀d nə̀ daʼa kiy ntsukə in dzə̀m.

¹⁷Fyìə̀ mə̀ yiə mə in fyiə nəniy nyiə nə̀ ghə̀d, ghè fyaʼa nəniy ate, ìn kì nìy bə̀ ghə̀d nə̀ ŋkwiʼi mə̀ sòsòŋə̀ mìy anə imùə̀ ìtsà, ŋkwiʼi mə̀ ghè mə̀ ni tsîy fyi tsə ntswə̀d mə̀ ghè mə̀.

¹⁸Ghè ndoʼò nia dzə̀ wày ìsə yiy anə ifii yə ghè fyaʼa nəniy nyiə̀. Ghè ba nia yə̀ kə̀ ìsə anə imùə̀ yə̀ Zə̀kìy byay na nəniy awò ŋgàŋ isə, abu ghè də tsəmə kòʼò kə way. Mə ghii dzìy aŋwòə imùə̀ yə̀ ŋgà muə nəniy nyiə̀, ŋgà mâŋ zə̀ŋì mùə̀ ŋwô. A kwuni bû ìmùə̀ itsà yə̀ ŋgà də kòʼò wày, i nî dyòʼò təŋə ŋwò.