Read Isu 2 Kolìn 6 Bible Online

2 Kolìn 6 - Isu bible

2 Kolìn 6

¹Anə fàʼ kə̀ ghè faʼà dzəŋə nəniy nə̀ Zə̀kìy, ghè ŋge bwoʼo bə̀ ghà nə̀ wo kiy nə̀ ghà kə zəŋi dzə̀ nə̀ fòŋə̀ ìdzòŋə̀ yə̀ Zə̀kìy dê nəniy awò ghà, i này kə̀ŋwôŋwò.

²Zə̀kìy mə dzày na anə tɛb kə we nə̀, “Soŋə fiy kî kpe tsə ŋwò awò mìə̀ ani dè gha nə̀ fòŋ ìdzòŋə̀ yìy, ghà ki dzây bə̂ nə̀ mə dê ghà nə̀ fòŋ ìdzoŋə̀ yìy, mə ki zuw ayiə yə ghà dzây. Mə ki dyaŋi twum bə̂ wù nə̀ ù bù bii fyi gha, ù kî bù bii fyi sòʼò ghà.” Ghà zwuli, soŋə fə ghè fə̀ mə kpe nyiə, à zìì də ntsuk fə Zə̀kìy kwu ani bii fyi gha ate.

³Ghè liə dzə̀ wày ani zəŋi iyiə ìliy yiy i də nəniy ani bù ghə̀d nə̀ ùtswə̀d wìy, tə̀ wè lìy ki də wày ani dzày ìyiə ìbɛbə yiy anə fàʼ kələ.

⁴Ghè kwuni fàʼà àyiə ghələ àdzə̀m anə dzələ tədzə̀m, ani dè bə̀ nə̀ ghè də ŋwô àghě kəfàʼ yìy awò Zə̀kìy. Ghè fə̂ tsə̀ŋə̀ kwè kə tə̀fòŋ anə ndə̀mə̀ àyiə. Ghè mə kòʼ lelê tə məntswə̀d tìy, ghè mə fii anə ndə̀mə̀ tə̀ dzələ, ndzə̀m kòʼ tsə sòʼò ŋgòʼ ìfyià yìy.

⁵Ghè mə mu mfə̀n mìy, ghè mə zù dòʼò a ndàw ntsaʼ anə ndə̀mə̀ nsòŋə. Ghè faʼa ghii, aghê mə kaw ntswə̀d mìy azoŋə̀ ghə̀d, ghè mə fàʼ aghii, bwi tsìy tsə. Ghè ndwamə̀ bvunə kwee way, də̀ təŋ sòʼo dzoŋ.

⁶Ghè mə dè bə̀ sòʼò ìwe nələ yiy nə̀ ghè kwu fôŋ tə̀ zwe tiy yəə à də̀ aghee kəfàʼ ə Kəzə̀. Zə̀kìy mə nyiə̀ sòʼò ghəd nə̀ ùtwab wiy. Zwàykə̀zwekiy fîy soʼò nəniy ghəd nə̀ ghè ki kwee fôŋ tìy, kwu sòʼò fôŋ tə̀ dzoŋə̀ tìy. Ghè kwu sòʼò iliə yə i fyiə bə̂ nəniy anə fôŋ tələ.

⁷Ntwùm ì dzòŋə̀ yə̀ ghè niʼà nəniy awò ghà à də̌ ìsoŋə̀ yìy, à də̀ daʼa k-a-zə̀ kə fîy nəniy ghəd. Ghè muə imùə̀ yə̀ ì də nəniy tsitsi yəə à də̀ baʼà fə tsam wù kwu nəniy nə̀ ùkwe ùkwoə̀ wìy nə̀ ìwuŋ yiy wù kwu nəniy anə ukwe ùnyiə wiy.

⁸Ghè kwu ani faʼa awò Zə̀kìy abu aghê nyiə̀ kə ghəd nə̀ ŋkwiʼi miy moo ghu koʼò kè ghəd, bəə ghu guw nia kə ayiə azoŋə̀ ghə̀d moo ghu kyalə ghəd, bəə ghu nîy ghə̀d nə̀ ghè də aghê guw də̀ ghii nə̀ ghè dzîy àyiə àsoŋə̀ yìy.

⁹Ghu zəŋi yəə ghu kwu way ghəd, də̀ ghii nə̀ ghu kwu dzwàb ŋwô ghəd. Ghu koʼò ghəd yəə ghè də aghê pfə yiy, ghè kwuni namə də̀ kə utaw. Ghu tswə̂dlə̀ ghə̀d, ghè kwuni kamə kə̀ pfə dzə̂ nəway.

¹⁰Yəə ghè tsəm də kə yəə ghè mwe ŋwò, ghè kwuni dyoʼo ŋwò nsòŋə indzə̀m. Ghè də kə yəə à də̀ aghê laa yiy, ghè kwuni zəŋə nə̀ ndə̀mə̀ àghù ki kwumə. Ghè də kə yəə ghè kwu way fyiə kiy, ghè kwuni kwu ŋwô ùfyiə wiy ùdzə̀m.

¹¹Aghee Kolìn yìy, ghè mə dzày mà àyiə dzə̀m awò ghà. Ghè mə ndzə̀m fwiy na fôŋ tələ tiy azoŋə̀ ghà.

¹²Ghè mə dè mà nə̀ ghè ndzəmə̀ liə ŋwò gha anə mwuli kə̀ kwoʼo kə ghè kwu nəniy. À kwuni kàm də̀ gha, ghà dê bə̂ nəniy nə̀ ghà liə dzə̀ wày ghəd.

¹³Mə ayiə yə ghii dzìy bə̀ yəə mə də təli awò ghà nə̀ ghà ndzə̂m liə bə̂ soʼò ghə̀d nə̀ fòŋ təli tiy tə̀dzə̀m anə ayiə yə ghè liə nəniy gha ate.

¹⁴Ghà kə təm fwumi dzə̀ nə̀ àghù yə̀ ghu də wày dzə aghee Mwe ə̀ mbyi. Aghû yə̀ ghu zəŋə nəniy ayiə yə a də nəniy tsitsi, ghu də mə̀yə ani dòʼò fwumi nə̀ àghù yə̀ ghu də zəŋə way ayiə tsitsi yiy ə? Moo asə ə̀ zwe yiy də mə̀yə ani dòʼò fwumi nə̀ ləm kiy ə?

¹⁵Kə̀litò də̀ ŋwô ani bɛmə dzəŋi iyiə ìliy yiy nə̀ Satàn ə̀? Aghû yə̀ ghu dzwumə̀ nəniy Mwe ə̀ mbyi, ghu də ŋwô ani kəli iyiə ìliy yiy ani zəŋə nə̀ àghù yə̀ ghu dzwùmə̀ nəniy àmbvə̀ntsə ə̀?

¹⁶Ndàw Kə̀zə̀ kwu ŋwô ìyiə iliy yiy ani zəŋə nə̀ mwòʼo miy ə̀? Mə ghii dzìy aŋwòə iwe i ŋgàŋ yìy də ndàw Kə̀zə̀. Zə̀kìy dzày na anə ŋwàʼà kə we nə̀, “Mə kî muə̀ azoŋə̀ àghû yamə, mə ki bwiy dzəŋə nə̀ ghu. Mə ki də Zə̀ kə ghu kiy, ghu ki də soʼo aghû yamə.”

¹⁷Yəə I də nəniy ghii, Mwe ə̀ mbyi dzîy nə̀, “Fyi ŋwǒ bə̀ nənìy anə fwumi kə ghù yə̀ ghu twe maʼà nəniy miə, ghà dzâw doʼò fyi yə̂ nə̀ ghu. Ghà kə mwâm dzə̀ fyiə kə̀ liy kiy kə dzəə nəniy, mə ki ŋgwam na gha.”

¹⁸Mwe ə̀ mbyi wə ù kwu nəniy daʼa kə kə tsìy fyi ufyiə udzə̀m mə dzày sòʼò nə̀, “Mə ki doʼò tsə Təli ghii, ghà ki də soʼo awa yamə.”