Read Isu 2 Kolìn 8 Bible Online

2 Kolìn 8 - Isu bible

2 Kolìn 8

¹Awizə̂, anə yiə yə i də nəniy nyiə̀ ghii, ghè liə nə̀ ghà toʼò zuw kəli tsə ndzòʼò fòŋə̀ ìdzòŋə̀ yə̀ Zə̀kìy dê nəniy awò àghù yə̀ ghu də nəniy anə udzəŋə wə aghee Kəzə̀ yìy də nəniy ate à mbwòʼ ə̀ Màsèdonìyà.

²Yəə ghu kə boʼò də kə ghii anə mbùw ùtswə̀d, dwiʼi kə̀ soŋə̀ kə̀ ghu kə kwu nəniy kə zəŋi ghu, ghu tsə̀ŋə̀ nyìə̀ kə ndə̀mə̀ tə ufyiə anə wo kə̀ bva kiy, anə ayiə yə ghu kə boʼò ŋge laa kə ghii.

³Mə dzîy bə̀ ŋwò awò ghà, nə̀ ghu kə ndzə̀m nyiə̀ anə ayiə yə daʼa kə ghu kiy kə kwûm nəniy ate. Ghu bòʼò nyə̀ tsìy fyi dyaŋi fyiə kə ghu kə kwu nəniy nə̀ wù lìy tyiŋə dzə̀ wày ghu.

⁴Ghu bòʼò bwoʼ dyaŋə sòʼò ghə̀d nə̀ wo kiy anə iwè ìghaa yiy nə̀ ghu mə tsuw tsə soʼò ùfyiə ani twàmì yə̀ sòʼò àghě Kəzə̀ à zwe yə ghu də nəniy a Yèlusalèm.

⁵Ghè kə bòʼ kwu dzə̀ way nə̀ ghu kî nyə̀ kwoʼo kwùmə̀ ŋwò ghii. À də̌ bòʼ ghu kə nyiə̀ yə̂ dzə̂ ìwe i ghu isə awò Mwe ə̀ mbyi. Ghu nyə̀ bə̀ sòʼò ùtswuŋi u ghu awò ghə̀d ani zuw kəli tsə ayiə yə Zə̀kìy dzîy nəniy.

⁶À yù də̀ ighe ghè kə bwoʼ tsə nəniy Taytùs nə̀ wo kiy, nə̀ ù zù kə nə̀ sə kiy ani fày kə gha tə̀ ghà mây kə fàʼ kə̀ dzòŋə̀ kə̀ ghà kə kaʼ na nəniy anə fòŋ tə̀dzoŋə̀ tìy.

⁷Ghà zəŋə ŋwò ayiə adzə̀m tsìy fyi aghê liy yiy, ghà kwu ibɛmə ì taw yiy, gha kwu nəniy ani dzày dzwàb ayiə, kwu sòʼo ntwab mə̀ sòŋə̀ mìy. Ghà zəŋə àyiə ghii nə̀ fòŋ tə̀ dzə̀m. Ghà ŋge liə sòʼò ŋwô ghəd. Mə liə nə̀ ghà zû kə nə̀ səkiy ani tsəŋə nyiə kə anə ndə̀m.

⁸Mə tsâ bə̀ dzə̀ wày lâŋ kìy awò ghà. Mə kwuni liə ani mwàmkòʼ ìghaa yə ghà ku nəniy ani dè iliə yə ghà kwu nəniy, ani kòʼ nə̀ i də ŋwô yəə à də̀ ighaa yə aghê liy yiy kwu nəniy ani nyə̀ ìfày awò àghè liy yiy moo i way ghii yə.

⁹Ghà mgbaŋ kwu ŋwô ndzòʼò fòŋə̀ ìdzòŋə̀ yə̀ Mwe ə̀ mbyi ŋgàŋ, Yesù Kə̀litò kwu nəniy azoŋə̀ ŋgàŋ, yəə ù kə kwumə nəniy ate, u bù dòʼò bə̀ wù lâ wìy ani zəŋi tsə nə̀ ghǎ doʼò tə aghê kwumə yiy anə sə k-a-zə̀.

¹⁰Anə itswù yam, I mə dzwàbə̀ nə̀ ghà mây kə nə̀ àyiə yə ghà kə kaʼ na nəniy a kəŋə̀m. À kə kaʼ tsə gha isə ani nyə̀. À kə kaʼ tsə sòʼò ghà isə ani dè bə̀ ighaa ani nyə̀ ìfày awò aghě Kəzə̀ yìy.

¹¹Ghà zəŋi tsə tə̀ ghà mây ŋwô kə fàʼ kə ghà kə̀. Ghà kəli tsə ighaa ani mày kə anə yiə yə ghà kə kwu nəniy ighaa yiy ani kaʼ tsə. Ghà nyiə̀ yə̂ anə ufyiə wə ghà kwu nəniy.

¹²Abu wù kwu dzə nəniy ighaa yiy ani nyə̀, Zə̀kìy kî byemə kə kə̂ fyiə kə wù ù ghè wə̀ kwu nəniy, à wày dzə anə fyiə kə ù də kwu way.

¹³Mə ghî dzìy dzə̀ wày nə̀ mə liə nə̀ ghà nyiə̀ ìfày awò àghè liy yiy, tə̀ ghà doʼò nə̀ àwo àzwumə yiy, mə ghii dzìy ani zəŋi tsə nə̀ aghê dzə̀m ki kwu ufyiə wiy ighəd. À də̀ iyiə ìdzoŋə̀ yìy nə̀ ghà fây yə̂ àghù yə̀ ghu laʼà kê nəniy anə yiə yə ghà ndəŋ kwu nəniy nyiə ani zəŋi tsə nə̀ bəə ghà laʼà kê soʼò, ghu fày bə̀ sòʼò ghà abu ghu kwu nəniy anə ndə̀m. Abu ghà zəŋə nəniy ghii, ghà ghii zəŋə nə̀ aghê dzə̀mə̀ kəli tsə ufyiə ighəd.

¹⁵I bvami də̀ kə anə ayiə yə i twâ doʼò nəniy anə ŋwàʼà k-a-zə̀ nə̀, “Aghû yə̀ ghu kwu nəniy ufyiə wiy anə idùw, ghu kə kəli tsìy dzə̀. Aghû yə̀ ghu də banə kwu way ufyiə wiy, ghu kə ŋge làʼ kè dzə̀.”

¹⁶Mə nyiə̀ kə̀zòŋə̀ awò Zə̀kìy anə ayiə yə ù zəŋi tsə nəniy nə̀ Taytùs kəli tsə ndzòʼò fòŋ yə̀ ani fàʼ fàʼ kə̀ anə ayiə yə mə kwu nəniy fòŋ ate azoŋə̀ ghà.

¹⁷Taytùs kə kə̀ kaʼi bû dzə̂ aŋwòə ghè kə bwoʼ tsə we nə̀ wo kiy, ù kə kwuni bù sòʼò aŋwòə ù kə mbvuŋə̀ ani bù kòʼ ghà.

¹⁸Ghè twumə bə̀ we nə̀ àzə̀ ŋgàŋ ùlìy wìy aghê àdzə̀m anə udzəŋə u ghě Kəzə̀ ghu kyalə nəniy we anə fàʼ kə̀ ù kwu nəniy ani nàʼà ntwùm ìdzòŋə̀ yìy.

¹⁹Ghě we kə̀ mâŋ laŋə̀ twum bə̂ dzə̂, à we sây kə ùdzəŋə u aghě Kəzə̀ nə̀ ù dzwùmì bə̀ ghə̀d ani fàʼ nyə̀ mə̀ŋkwiʼi awò Mwe ə̀ mbyi, ani dè bə̀ sòʼò ìghaa yə̀ ghè kwu nəniy ani fày àghù.

²⁰Ghè yemə̀ kə nə̀ kəə wù lìy nì bě nə̀ ùtswə̀d ùliy wiy anə dzəd yə ghè dziy dzâw ùfyiə wə ghà nyiə̀ nəniy nə̀ fòŋ tə̀ dzoŋə̀ tìy.

²¹Ghè kaʼi zəŋə dzə̀ wày àyiə yə a də nəniy tsitsi akə̀lə̀ Mwe ə̀ mbyi, ghè ba ndyimə sòʼò ìwee ani zəŋi tsə nə̀ aghê dzə̀mə̀ kôʼ lanə bə̂ nə̀ ghè zəŋə àyiə tsitsi yiy.

²²Ghè namə twumə fwulə bə̀ àzə̀ ŋgàŋ ù liy wiy nə̀ we ù kwu soʼo nəniy ighaa yiy anə fàʼ kə̀ anə ndə̀mə̀ tə̀ dzə̀lə. Ghè kâm kòʼ tsə nə̀ ighaa i we yiy mə tsìy fyi yəə i kə bôʼ də tsə nəniy ate aŋwòə ù ŋge gaʼ na fòŋ azoŋə̀ ghà.

²³Taytùs də̌ wù wə̀ mə faʼà fwumə nəniy nə̀ we ani fày ghà. A kwuni bû àwizə̂ ŋgàŋ à liy yə ghu də fwumi nəniy nə̀ Taytùs, à ghu twum bə̀ ùdzəŋə u ghě Kəzə̀. Ghu nîy bə̀ sòʼò mə̀ŋkwiʼi awò Kə̀litò anə lòʼo tə dzə̀m anə fàʼ kə ghu.

²⁴Yəə i də nəniy ghii, abu ghu bû nəniy, ghà ki dê yə̂ a ghu nə̀ ghà liə ŋwoə ghu ani zəŋi tsə nə̀ aghee udzəŋə u Kəzə̀ wìy kôʼ tsə, ghu kəli tsə soʼò nə̀ ghè də ŋwô tsitsi ani kwiʼi iwe kwùmə̀ bə̀ nə̀ ghà.