Read Isu 2 Kolìn 9 Bible Online

2 Kolìn 9 - Isu bible

2 Kolìn 9

¹Mə ŋge kwu dzə̀ way iyiə ìliy yiy ani twà dzày bə̀ awò ghà kwùmə̀ yə̀ nə̀ fàʼ kə̀ ghà kə fây yə̂ nəniy aghee Kəzə̀ à zwe yiy ate a Yèlusalèm.

²Mə kwu ŋwô ìghaa yə ghà kwu nəniy ani fày. À yù də̀ ighe mə kwoʼo nəniy uwee wiy ate awò àghě Kə̀zə̀ yə̀ a Màsèdonìyà, dzìy yə̀ awò ghu nə̀, gha yə a Àkayà, ghà maa byay na təŋ iwe yiy akəŋə̀m ani nyiə̀. Ighaa ghii yiy mə zəŋi ndə̀mə̀ àghù nə̀ ghu nyiə̀ soʼò.

³Nyiə̀, mə twumə yə̀ ghà nə̀ àwizə̂ ŋgàŋə̀ ani zəŋi tsə nə̀ iwe yə ghè kwoʼo nəniy kwùmə̀ yə̀ nə̀ ghà, i kə doʼò dzə̀ yəə ghè maŋə̀ dzìy àyiə. I kwuni doʼò tsə nə̀ ghà mə byay na iwe yiy ani fày anə ayiə yə ghè dzây nəniy.

⁴Bəə ghà də kə̀ byay nəway iwe yiy, abu aghee Màsèdonìyà àliy yiy kpaʼa bû dzəŋi nəniy nə̀ mìə̀, ghu bû kòʼ bə̂ nəniy nə̀ ghà kamə byay na iwe yiy, mə ki kəli tuw kə̀ dələ kiy anə ayiə yə mə gaʼ na fòŋ azoŋə̀ ghà. Ghà ki kwuni ŋge kəli tsîy fyi tuw kə̀ dələ kiy.

⁵À də̀ ighe mə kə môʼ tsə nəniy nə̀ i kə kpe ŋwô â mìə̀ ani twum na bə̀ àwizəə ŋgàŋ akə̀lə̀ ghà isə ani byay mà tsə ntsuw yə ghà kə tɛb na nəniy. Kəə i nə̀ dyoʼò dzə̂ nə̀ mə bê ani bù fwàʼ ŋwò fyi kə anə awo ghii, i doʼò tsə nə̀ ghà ndzə̂m nyə̀ bə̀ nə̀ fòŋ təli tədzə̀m.

⁶Ghà kəli tsə nə̀ wù wə̀ ù zee tsə nəniy nyoŋə fə tə ndzòʼ fìy anə uswum, ù kpìy tsə̀ sòʼò nyoŋə fə ufyiə. Wù wə̀ ù zee tsə nəniy ndə̀mə̀ tə̀ndzòʼ anə uswum, ù kpìy tsə̀ sòʼò ndə̀mə̀ ùfyiə

⁷Wù umoʼ umòʼ ki nyiə̀ tsə kə fyiə kə fòŋə̀ we tsə̂m tsə nəniy nə̀ ù nyə̀. Ù kə nyiə̀ dzə̀ nə̀ ù swamə yə̀ ìdzwə, moo nə̀ ù sè yə̀ ìfwe ani nyiə̀, aŋwòə Zə̀kìy ŋge liə wù wə̀ ù nyə̀ nəniy nə̀ fòŋə ìdzòŋə̀ yìy.

⁸Zə̀kìy kwu ŋwô daʼa kiy ani nyiə̀ ghà nə̀ lwì kə̀ kə tsîy fyi nəniy ani zəŋi tsə nə̀ ghà ki kwu ufyiə wiy anə ndə̀m anə nsòŋə indzə̀m anə fàʼ àyiə àdzoŋə̀ yìy ate.

⁹I twâ dòʼò anə ŋwàʼà k-a-zə̀ nə̀, “Ù tsə̀ŋ nyiə̀ kə nə̀ fòŋə̀ we ìdzòŋə̀ yìy awò àghù yə̀ ghu də kwu way, Zə̀kìy ki moʼo fàʼ kə ghu kə̀dzoŋə̀ kə̀ anə nsòŋi ndzə̀m.”

¹⁰Zə̀kə̀ kə nyiə̀ nəniy ndzòʼ tə̀ zee tiy nə̀ ùfyiə u nyiə wiy awò wù ùswum, ù kì kwe fwulə tsə ŋwò ufyiə wə wò kwu nəniy, ani zəŋi tsə nə̀ wò ki tsəŋə zəŋə yəə kə ayiə àdzoŋə̀ yìy ate awò aghù yə̀ ghu də kwu way.

¹¹Zə̀kìy kî zəŋə ŋwò nə̀ ghà doʼò àghè akumə yiy anə dzə̀lə tə dzə̀m bòʼ fòŋə̀ ìdzòŋə̀ yə̀ ghà kwu nəniy anə nsòŋə indzə̀m ani fày àghù. Ndə̀mə̀ àghù ki də ani nyə̀ kə̀zòŋə̀ awò Zə̀kìy abidzəmə̀ fòŋə̀ ìdzòŋə̀ ghii yə ghà kwu nəniy.

¹²Aŋwòə ufyiə wə ghè kî nyiə̀ yə̂, u kî kaʼi wày dzə ani fày yə̀ àghě Kəzə̀, u kî zəŋə tsə sòʼò nə̀ aghê ki ŋge nyiə̀ kə̀zòŋə̀ awò Zə̀kìy.

¹³Ndzòʼò dzəd yə ghà dê nəniy iwee yiy ate abidzəmə̀ fàʼ kə̀, i kî zəŋə ŋwò nə̀ aghê liy yiy nyiə̀ Kə̀zə̀ nə̀ ùkali wiy. Ghà mə bɛmə ntwum yə kwùmə̀ yə̀ nə̀ Kə̀litò, fàʼ sòʼò anə ayiə yə ì dzìy nəniy anə ayiə yə ghà dzâw fwumi nəniy ufyiə wiy ate nə̀ àghě Kəzə̀ yìy, dzàw sòʼò nə̀ àghè dzə̀m.

¹⁴Ghu gwùŋə̀ anə utuw ghii, dzìy nə̀ Zə̀kìy lwî ghà. Ghu kwu sòʼò gha anə təfòŋ anə yiə yə ghu moʼò tsə nəniy nə̀ Zə̀kìy mə nyə̀ gha nə̀ ìghaa yiy ani nyə̀ ghu nə̀ ùfyiə wiy ani fày àghě Kəzə̀.

¹⁵A nyiə̀ kə̀zòŋə̀ awò Zə̀kìy anə ndzòʼò fòŋə̀ ìdzòŋə̀ yə̀ ù dè nəniy awò ŋgàŋ nə̀ ŋgà way ani tyi dzày.