Read Isu Aghě Gàlatìyà 1 Bible Online

Aghě Gàlatìyà 1 - Isu bible

Aghě Gàlatìyà 1

¹À Ŋwàʼà kə̀ twà mìə̀ Pôl, wè ntwùm ə̀ Yesù. À kə kə̀ sây dzə̂ aghee mbyi yiy miə, Wè mbyi ù lìy wìy kə kə̀ twum soʼò miə. À kə mìə̀ kwuni sày Yesù Kə̀litò nə̀ uwee u we wiy, we nə̀ Tà Zə̀kə̀ kə kə zɛmə̀ ŋwò dzwoŋi bə̂ nəniy we anə ipfə.

²Miə nə̀ àghù yə̀ mə də fwumi nə̀ ghu, ghè tyoŋə zuw bə̀ àghě Kəzə̀ yə̀ ghu də nəniy a Gàlatìyà.

³Mə gwuŋə̀ nə̀ Tè ŋgàŋ, Kə̀zə̀ we nə̀ Mwe ə̀ mbyi ə̀ ŋgàŋ Yesù Kə̀litò, dè ghà nə̀ fòŋə̀ ìdzòŋə̀ yìy, ghu nyiə̀ soʼò ghà nə̀ ìbvay yiy.

⁴Yesù kə sà nyə̀ yə̀ ùwee u we anə ayiə ŋgàŋ àbɛbə yiy, ani fày ŋwò fyi bə̀ ŋgàŋ anə ayiə àbɛbə yə a də nəniy fə anə mbyi yə ŋgà muə nəniy ate anə ayiə yə Tè ŋgàŋ, Kə̀zə̀ kə byay na nəniy.

⁵Aghê kwu ani nyiə̀ Kə̀zə̀ nə̀ ùkali wiy anə nsòŋə ìndzə̀m. I doʼò kə ghii.

⁶Kâŋ tìy mə ŋge zwumi miə anə uwè anə ayiə yə ghà zəŋi nəniy. Ghà mə ghaʼi twe màʼa Zə̀kə̀ kə kə toŋə bə̂ nəniy gha. Ù kə toŋə tsə gha nə̀ ghà dòʼò tsə aghè we anə fòŋə̀ ìdzòŋə̀ yə̀ Kə̀litò kə dê nəniy â ghà[1]. Ghà mə bɛmə anə ntwùm ì ŋwò yìy kwuni dzìy nə̀ à də̌ ntwùm ə̀ ìdzoŋə̀ yìy.

⁷Ntwum yə ghà dzwumə̀ à wày dzə ntwùm ìdzòŋə yìy. Aghê liy yiy də ŋwô ghu fwələ miʼà nəniy gha, kwuni kə ntwùm ìdzòŋə̀ yə̀ kwùmə̀ yə̀ nə̀ Kə̀litò.

⁸Mə gwuŋə̀ nə̀ Zə̀kìy saʼ wiy wù wə̀ ù nìʼà nəniy ntwùmə yə ì kwu nəniy kwuni kiy nə̀ ì yù ghè kə naʼà awò ghà. Abu à də̀ kə ghəd moo tsə̀ndii ə̀ Kə̀zə̀ ì ŋwò tswi bə̂ an-a-vələ.

⁹Mə namə dzìy fwulə bə̀ ìyiə yə ghè boʼ dzày dzə̂ awò ghà nə̀, mə gwuŋə̀ nə̀ Zə̀kìy saʼ wiy wù wə̀ ù nìʼà nəniy ntwùm ə̀ yə̀ ì kwu nəniy kwuni kiy nə̀ nə̀ ì yù ghè kə bɛmə nəniy ate.

¹⁰Mə dzîy dzə̀ wày ani zəŋi tsə nə̀ aghê ki dziy nə̀ mə dzîy àyiə tsitsi yiy. Mə liə ani zəŋi tsə nə̀ Zə̀kìy ki dziy nə̀ mə zəŋə àyiə yə a də tsitsi. Bəə à mə̀ də nə̀ mə liə ani zəŋi nə̀ aghê ki dziy nə̀ mə zəŋə àyiə yə a də nəniy tsitsi, a mə də nə̀ mə way dzə wè kə̀fàʼ ə̀ Kə̀litò.

¹¹Awizə̂ yamə, mə liə nə̀ ghà kəli dzwàb tsə nə̀ ntwùm ìdzòŋə̀ yə̀ mə kə naʼà nəniy â ghà, ì kə̀ ŋwò bə̂ dzə̂ â wè mbyi ùlìy wìy.

¹²Wè mbyi ùlìy kə kə̀ naʼà dzə̂ ntwum yə awò mìə̀. Wè lìy kə kə̀ tyi dê dzə̂ soʼò ntwum yə awò mìə̀. Mə kə kwuni kəli ntwum yə nə̀ à dè Yesù Kə̀litò awò mìə̀.

¹³Ghà kwu ŋwô yə mə kə muə tsə nəniy ate anə sòŋə fə mə kə nam kwu nəniy ndzòʼò ìbɛmə yə aghee Dzû yìy kə kwu. Ghà kwu sòʼò ŋwô yə mə kə khu tsə̂ utswə̂d wìy anə udzəŋə u ghě Kəzə̀ yìy nə̀ mə kwoʼo way nə̀ mwuli kiy azoŋə̀ ghu. Mə khu sòʼò dzəd anə ayiə yə mə kə kəli kwùm ani zəŋi nə̀ ghu salì ŋwô.

¹⁴Aghee Dzû yə̀ ghu kə də nəniy le fam fiy, mə maa tsiy fyi ghu dzə̀m anə ibɛmə yə aghee Dzû kə kwu nəniy. Mə ŋge kwu sòʼò ìghaa anə ayiə yə nə̀ təli ŋgàŋ asəsə yiy kə byìə̀ na nəniy.

¹⁵Â ghu ani kwuni byi miə, à kə də̌ nə̀ Zə̀kìy mə sày miə, toŋə tsə sòʼò mìə̀ anə fòŋə̀ we ìdzòŋə̀ yìy nə̀ mə bû fâʼ awò we. I dzwàb sòʼò we anə fôŋ,

¹⁶ani dè bə̀ Wà we â mìə̀ nə̀ mə naʼà ntwùm ìdzòŋə̀ yə̀ kwùmə̀ yə̀ nə̀ we awò àghù yə̀ ghu də wày aghee Dzû. Abù i fyi kə nəniy ghii, mə kə kə̀ zû dzə̂ nə̀ wè lìy dzày bə̀ àyiə yə mə kwu nəniy ani zəŋi.

¹⁷Mə kə kə̀ kwoʼ dzə̂ a Yèlusalèm ani zù kòʼ àghě ntwùm ə̀ Yesù asəsə yə. Mə kə kwuni ŋwò zù a mbwòʼ ə̀ Àlabìyà. Mə fə̀d ŋwò tsə awote zù dzwoŋi anə inaʼ i Dàmaskòs.

¹⁸Ŋəmə̀ tǐy tsìy tsə iti, mə ŋwò zù a Yèlusalèm ani zu toŋə zuw Pità.[2] Mə dòʼò awote nə̀ we mə̀ntsukə ivəm nə̀ ntsukə miy ìntà.

¹⁹Mə kə kə̀ kôʼ dzə̂ wè ntwùm ə̀ Yesù ùliy wiy. Mə kə kòʼ tsə kə Dzɛ̂m àzə̀ Mwe ə̀ mbyi.

²⁰Zə̀kìy kwu ŋwô nə̀ ayiə yə mə twâ dzîy bə̂ â ghà à wày dzə àguw yiy.

²¹Yəə mə may tsə a Yèlusalèm, mə zù a mbwòʼ ə̀ Silìyà nə̀ a mbwòʼ ə̀ Sìlisìyà.

²²Anə sòŋə fə ghè fə̀, aghee udzəŋə u ghě Kəzə̀ a mbwòʼ ə̀ Dzùdiyà kə kamə kə̀ kôʼ dzə̂ nəway miə.

²³Ayiə yə ghu kə kwu kwùmə bə̀ nə̀ mìə̀, à kə bvami may kə ayiə yə aghê kə dzîy kyabə tsə̂ nə̀ “Wù wə̀ ù kə khu utswə̂d wìy anə tuw kə ŋgàŋ, ù nyə̀ kàmə̀ nìʼà nə̀ aghê gaʼ na yə̂ tə̀ fòŋ azoŋə̀ Kə̀litò nə̀ à də̀ fyiə kə ù kə byɛbə myaʼà.”

²⁴Ghu nyə̀ ukali â Zə̀kìy bòʼ àyiə yə Zə̀kìy zəŋi nəniy abidzəmə̀ mìə̀.