Read Isu Aghě Gàlatìyà 2 Bible Online

Aghě Gàlatìyà 2 - Isu bible

Aghě Gàlatìyà 2

¹Ŋəmə̀ tìy kə tsìy tsə ivəm nə ŋə̀mə̀ tìy ìkyàʼì, mə ŋwò zù dzwoŋi a Yèlusalèm nə̀ Bànabàs. Mə kə nìy zù sòʼò nə̀ Taytùs awote.

²Mə kə zù awote aŋwòə Zə̀kìy kə dè bə̀ awò mìə̀ nə̀ mə kwu ani zù awote. Abù yə mə də awote, mə nù kwi tsə kədzəŋə nə̀ ŋgəd tə dzəŋə kə aghě ndàw Kə̀zə̀ tìy. Mə tyi dzày yə̀ sòʼò ntwùm ìdzòŋə̀ yə̀ mə niʼà nəniy awò àghù yə̀ ghu də wày aghee Dzû. Mə kə liə dzə̀ way nə̀ fàʼ kə mə fâʼ tsìy dzə̂ nəniy moo kə̀ kuu mə liə ani fàʼ, kə doʼò kə̀ŋwôŋwò.

³Taytùs kə zù fwumi nə̀ mìə̀ a Yèlusalèm. Ù kə də̌ wè Glîk. Ghu kə kə̀ tyiŋi dzə we nə̀ u gwùmì tsə kətu â we ani dòʼò wè Kə̀zə̀.

⁴Ghè kə zù awote aŋwòə aghê liy yiy kə də̀ awote ghu kə dziy nə̀ ghu də aghee Kəzə̀, nə̀ ghu kwuni wày dzə aghee Kəzə̀. Ghu kə bù tsoŋ tsìy nyi kwoʼ bə̀ anə fwumi kələ ani bù kìykòʼ àyiə yə ghè kə zəŋə. Ghu kaw kəli fyi kə ifây yə̀ ghè kwu nəniy anə ayiə yə ŋgà təm doʼò dzəŋi nəniy nə̀ Yesù Kə̀litò anə ayiə yə ghu də ani kaw dzəd, ani zəŋi tsə ghè doʼò ùkwə̀d u ghu.

⁵Ghè kə kə̀ bôʼ zwuli dzə̂ ayiə ghu àdziy yiy anə kə̀mə̀ fə sòŋə kə ani zəŋi tsə nə̀ ghà ki tsəŋ kwu kə ibɛmə yiy anə ntwùm ìdzòŋə̀ yə̀ ì də nəniy ìsoŋə̀ yìy.

⁶Aghû yə̀ ghu kə də nəniy awote yəə à də̀ tə ŋgəd, awò àghù yə̀ ghu kə bɛmə nəniy Zə̀kìy, ghu kə kwu way ani dzày kwe fəli iyiə ìliy yiy anə ntwùm ə̀ Kə̀zə̀ yə̀ mə kə niʼà. Bəə ghu kə də kə aghê àsoŋə̀ yìy moo ghu kə də wày aghê soŋə̀ yìy, mə kə kə̀ na dzə̂ nəway isə yiy aŋwòə Zə̀kìy koʼò dzə̀ wày nə̀ wù də̌ wù ù bɛbə̀ wìy moo ùdzoŋə̀ wìy nə̀ ù lia yə̀ vən fə uwè fə wû.

⁷Ghu fə̀d kòʼ tsə nə̀ Zə̀kìy mə nyiə̀ miə nə̀ fàʼ kìy nə̀ mə naʼà ntùmə̀ ìdzoŋə̀ yìy awò àghù yə̀ ghu də wày aghee Dzû. Ighəd anə yiə yə ù kə nyiə̀ soʼò Pità ate nə̀ fàʼ kìy nə̀ ù ki niʼa ntwùm ìdzòŋə̀ yìy â àghě Dzû.

⁸Zə̀ kə̀ kə kə twum nəniy Pità nə̀ ù zù nàʼà ntwùm ə̀ Yesù â Dzû tìy, à də̀ kə ghe kə twum yə soʼò miə nə̀ mə zû naʼà ntwùm ìghè yə̀ â àghù yə̀ ghu də wày aghee Dzû.

⁹Dzɛ̂m, nə̀ Pità nə̀ Dzwan ghu kə də nəniy yəə à də̀ tə ŋgəd anə aghě ntwùm ə̀ Yesù, ghu kòʼ kəli tsə nə̀ Zə̀kìy mə nyə̀ miə nə̀ fàʼ kìy. Ghu nyiə̀ mìə̀ nə̀ wokiy, miə nə̀ Bànabàs ani dè tsə nə̀ ghè də aghee fàʼ kə̀mòʼ. Ghu bɛmə dzəŋi kə nə̀, miə nə̀ Bànabàs nə̀ ghè kwu ani fàʼ nə̀ àghù yə̀ ghu də wày aghee Dzû. Aghee ntwùm ə̀ Yesù àliy yə ghu zù fâʼ nə̀ aghě Dzû yìy.

¹⁰Ghu kə dzày kə ìyiə imòʼ nə̀ ghè ki moʼo tsə aghê la yə ghu də nəniy anə udzəŋə u ghù yə̀ ghu də nəniy a Yèlusalèm. À kə bvami də̀ iyiə yə mə kə kwu nəniy ighaa yiy ani zəŋi.

¹¹Abù Pità kwuni bù nəniy a Antìyòk, mə dzày yə̀ anə asə ə we nə̀ ù maa zəŋi bɛb aŋwòə iyiə yə ù kə zəŋi nəniy, i ki ŋge bɛbə ŋwò.

¹²Yəə Pità kə bû nəniy a Antìyòk anə sòŋə fə səsə fiy, u nyi fwumi nə̀ àghù yə̀ ghu kə də wày aghee Dzû yìy nə̀ ghu mə bɛmə â Zə̀kìy a də̌ nə̀ ghu kamə gwùmì dzə̂ nəway ghu. Abù Dzɛ̂m kwuni twum aghê liy yiy, Pità ə kàm twe ani nyi nə̀ àghù yə̀ ghu də wày aghee Dzû. Ù kə tsəŋə àghù yə̀ ghu kə tyi dê nəniy nə̀ ghu kwu ani gwùmì tsə dzə̀ àghù yə̀ ghu də wày aghee Dzû abu ghu bɛmə dzəə Zə̀kìy.

¹³Aghee Dzû àliy yə kaʼ sòʼò ani ŋwamə zəŋə anə yiə yə Pità kə zəŋə nəniy. Bànabàs ə kaʼ yə̀ ani zəŋi sòʼò ighəd nə̀ ù kwu ŋwô nə̀ i way dzə tsitsi.

¹⁴Abù mə kòʼ tsə nə̀ ghu dzwumə̀ wày ayiə àsoŋə̀ yə̀ a də nəniy anə ntwùm ìdzòŋə̀ yə̀, mə dzày yə̀ â Pità anə sə kə ghù àdzə̀m a we nə̀ “Wò də̀ wê Dzû kwuni mùə̀ yəə à wày wè Dzû. Wò kwuni də̌ mə̀yə ani zəŋi tsə nə̀ wù wə̀ ù də wày wè Dzû nə̀ ù mùə̀ tsə yəə à də̌ wè Dzû yə nə̀ wò kwuni mùə̀ wày yəə à də̌ wè Dzû?”

¹⁵Nə̀ təli ŋgàŋ asəsə yiy kə ndzə̀m də̀ aghee Dzû, ghu kə wày dzə aghû yə̀ ghu də wày aghee Dzû. Aghê dzîy nə̀ aghû yə̀ ghu də wày aghê Dzû də aghê bɛbə yiy.

¹⁶Ŋgà kwu ŋwô nə̀ Zə̀kìy byemə dzə̀ wày nə̀ wù də̀ tsitsi anə sə kə we anə yiə yə ù nia nəniy lâŋ kìy. À kwuni də̀ anə ibɛmə yə wù kwu nəniy awò Yesù. Ŋgaŋ aghee Dzû, ŋgà mə bɛmə sòʼò awò Yesù Kə̀litò nyiə ani zəŋi tsə nə̀ Zə̀kìy nì də ani bɛmə nə̀ ŋgà də tsitsi anə sə kə we bòʼ ìbɛmə i ŋgàŋ azoŋə̀ Kə̀litò à kwuni wày dzə nə̀ ŋgà zəŋə àyiə yə lâŋkìy dzîy nəniy. Aŋwòə wù lìy wày dzə Zə̀kìy kî byemə nəniy nə̀ ù də̀ tsitsi anə sə kə we anə ayiə yə ù nia nəniy lâŋ kìy.

¹⁷Bəə ŋgà kwuni mbvuŋə̀ nəniy nə̀ Zə̀kìy bɛmə kə nə̀ ŋgà də tsitsi anə sə kə we bòʼ ìbɛmə yə ŋgà kwu nəniy azoŋə̀ Kə̀litò, bəə i dê tsə nəniy ŋgà kwuni də aghê bɛbə yiy anə yiə yə ŋgà nyəli màʼà lâŋ kə aghě Dzû kìy, yəə à də̀ aghû yə̀ ghu də wày aghee Dzû, I ghii dê tsə nə̀ Kə̀litò zəŋə nə̀ ŋgà ə zəŋi bɛb yə̀? Hàay! À wày dzə ghii.

¹⁸Bəə mə byiə dzwoŋi kə fyiə kə mə kə sâʼ màʼà nəniy, i ki myiŋə nə̀ mə mə zaʼ lâŋ kìy.

¹⁹Mə kə kòʼ tsə nə̀ lâŋ kìy way dzə ani zəŋi nə̀ Zə̀kìy bɛmə nə̀ mə də tsitsi, mə ba twe màʼà yə̀ kə̀làŋ. Mə nyiə̀ ba mùə̀ ani fàʼ â Zə̀kìy.

²⁰Yəə Kə̀litò kə pfə nəniy anə kàʼ fə təzəd, i dê tsə nə̀ mə kə maa pfə sòʼò. À kàm wày dzə miə mə muə, à kwuni mùə̀ Kə̀litò azoŋə̀ mìə̀. Imùə̀ yə̀ mə muə nəniy nyiə̀ anə uwè ù wù mbyi, mə muə bòʼ ìbɛmə yam azoŋə̀ Wà ə̀ Kə̀zə̀ ù kə liə nəniy miə, nyə̀ ŋwò bə̀ ìmùə̀ i we awò mìə.

²¹Mə kə̀ bɛmə dzə̂ ani twe fòŋə̀ ìdzòŋə̀ yə̀ Zə̀kìy dê nəniy â mìə̀. Bəə à mə̀ də nə̀ Zə̀kìy byemə nə̀ wù də̀ tsitsi anə sə kə we abidzəmə̀ làŋ kə̀ nia kiy, a mə də nə̀ ipfə i Kə̀litò yìy kə kwu dzə̀ way fàʼ kìy.