Read Isu Aghě Gàlatìyà 3 Bible Online

Aghě Gàlatìyà 3 - Isu bible

Aghě Gàlatìyà 3

¹Gha, aghee Gàlatìyà, ghà liʼà ŋwò! À lwòʼ na ndiə ghà ə? Mə ma tyi dzày awò ghà yiə ghu kə ba wiy nəniy Yesù ate anə kàʼ fə təzəd anə dzəd yəə ghà kə də ani zuw kəli dzwàb tsə ate.

²Mə liə ani kəli kə iyiə imòʼ â ghà. Zwàykə̀zwekiy kə bù azoŋə̀ ghà nə̀ ghà zəŋə àyiə yə lâŋ kìy dzîy nəniy moo yəə ghà kə zuw tsə ntwùm ìdzòŋə̀ yìy, bɛmə yə̀ ntwùm ìghà yə̀ ə?

³Ghà ghii ŋge lyàʼà anə iyîkìə̀? Ghà kə kaʼ tsə imuə̀ ìfyiə yiy nə̀ Zwàykə̀zwekiy. Ghà myiŋə̀ nə̀ ghà də ŋwô ani bù dòʼò anə ayiə yə Zə̀kìy liə nə̀ ghà doʼò anə daʼa kəli yə̀?

⁴Ghà kə màŋ fii anə ndə̀mə̀ tə yiə kə̀ŋwôŋwò ə̀? Mə kwu nə̀ ifii ghəli yiy myìŋə̀ ŋwò ìyiə yiy!

⁵Mə bəbə fwulə bə̀ nə̀ â Zə̀kìy ani zəŋi nə̀ Zwàykə̀zwekiy bû azoŋə̀ ghà, fàʼ sòʼò mali tə yiə anə uzə ghi, à kə də̌ bòʼ ghà kə zəŋə àyiə yə lâŋkìy dzîy moo, à kə də̌ bòʼ ghà kə zuw ntwùm ə̀ Kə̀zə̀, bɛmə yə̀ ə?

⁶I də sòʼò ighəd anə yiə yə i twâ dòʼò anə ŋwàʼà k-a-zə̀ nə̀ “Ablàhâm kə dzə̀m bɛmə â Zə̀kìy, bòʼ ìbɛmə yə ù kə kwu nəniy, Zə̀kǐy kòʼ kəli tsə nə̀ ù də̌ wù wə̀ ù zəŋə nəniy ayiə yə a də nəniy tsitsi.”

⁷Ghà kwu ani kəli tsə nə̀ aghû yə̀ ghu kwu nəniy ibɛmə yiy â Zə̀kìy, ghu də awa Ablàhâm.

⁸I kə kwu twà dòʼò zìì bə̀ anə ŋwàʼà k-a-zə̀ nə̀ “Zə̀kìy nî byemə àghù yə̀ ghu də wày aghee Dzû nə̀ ghu də tsitsi anə sə kə ighe abidzəmə̀ ìbɛmə i ghu yiy. Zə̀kìy kə kwu nàʼà ntwùm ìdzòŋə̀ yə̀ awò Ablàhâm anə sòŋə fə ù kə dzây tsə nəniy nə̀, ‘Aghû yə̀ à dzə̀m ghu də wày aghee Dzû, ghu nî kyilə kə̀lwì abidzəmə̀ wò.’ ”

⁹Ablàhâm kə bɛmə â Zə̀kìy, Zə̀kǐy lwì we. Yəə i də nəniy ghii, aghû yə̀ ghu bɛmə nəniy â Zə̀kìy adzə̀m, Zə̀kìy mə ghu lwî anə yiə ù kə lwî sòʼò nəniy Ablàhâm ate.

¹⁰Aghû yə̀ ghu muə təŋ kə anə làŋ kə̀ nia kiy, Zə̀kìy kî nyìə̀ ghu nə̀ mfəm aŋwòə i twâ dòʼò anə ŋwàʼà k-a-zə̀ nə̀, “Wù wə̀ ù də taw nia tsə̀ wày ayiə yə àdzə̀m a twâ dòʼò nəniy anə ŋwàʼà kə ulàŋ, Zə̀kìy kî nyìə̀ we nə̀ mfəm!”

¹¹I də ìsòŋə̀ yìy nə̀ Zə̀kìy byemə dzə̀ wǎy wè lìy nə̀ ù də tsitsi anə sə kə we anə yiə yə ù nia nəniy lâŋ kìy, aŋwòə i twâ dòʼò anə ŋwàʼà k-a-zə̀ nə̀, “À mày kə wù wə̀ ù kwu nəniy ibɛmə yiy ù də ani dòʼò tsə tsitsi sə k-a-zə̀.”

¹²Ani na ulâŋ, i kwu dzə̀ wày iyiə ìliy yiy ani zəŋi nə̀ ìbɛmə yiy aŋwòə i kwuni twà dòʼò anə ŋwàʼà k-a-zə̀ nə̀, “Wù wə̀ ù zəŋə nəniy ayiə yə ulâŋ wìy dzîy nəniy, ù kì mùə̀ ŋwò anə yiə yə lâŋ kìy dzîy.”

¹³Kə̀litò maa fày fyi ŋgaŋ anə mfəm yə ŋgà kə kwu ani kəli anə ayiə yə lâŋ kìy kə dzây na. Yəə ghu kə ba we anə kàʼ fə təzəd, u nìy ŋwò yə̀ mfəm yə ŋgà kə kwu ani kəli anə kàʼ fə təzəd aŋwòə i twâ dòʼò anə ŋwàʼà k-a-zə̀ nə̀, “Ghu kî nyìə̀ mfəm awò wù wə̀ ghu wiy nəniy we anə kàʼ fə təzəd fəkàʼ.”

¹⁴Kə̀litò kə ŋgaŋ fây fyi ani zəŋi tsə nə̀ lwì kə̀ Zə̀kìy kə nyiə̀ nəniy awò Ablàhâm, ù nì də ani nyə̀ awò àghù yə̀ ghu də wày aghee Dzû abidzəmə̀ Yesù Kə̀litò. I kə ghii fyi tə̀ abu ŋgà kwu nəniy ibɛmə yiy, Zə̀kìy ki də ani nyə̀ ŋgàŋ nə̀ tɛb kə Zwàykə̀zwe kə ù tɛb na nəniy.

¹⁵Awizə̂, ayiə yə mə dzîy à də̀ ayiə yə a fyiə nə̀ àghè dzə̀m ntsukə indzə̀m. Abu aghê bè bɛmə na dzəŋi kə nəniy ani zəŋi iyiə ìliy yiy, wè lìy wày dzə ani twe màʼà moo ani kwuni kə yiə ìliy yiy anə iyiə i ghè yə̀.

¹⁶Kwùmə̀ yə̀ nə̀ tɛb kə Zə̀kìy kə tɛb awò Ablàhâm nə̀ àwi wa we yiy. Ŋwàʼà k-a-zə̀ kìy kə kə̀ dzây dzə̂ nə̀, “À kə də̌ awa.” I myìŋə̀ nəniy nə̀ à kə də̌ ndə̀mə̀ àghù. Kə kwuni dzìy nə̀, “Awò wà we.” I myìŋə̀ nəniy nə̀, “À kə də̌ wù ùmòʼ.” Wù ù ghè wə̀ kə də̌ Kə̀litò.

¹⁷Mə ba dzìy nə̀ indiə? Mə dzîy nə̀, lâŋ kìy kə bù nə̀ ŋəmə̀ tìy mə tsìy mə̀mbwàm inkyàʼì nə̀ ŋə̀mə̀ tìy mə̀vəm inti anə yiə yə Zə̀kìy kə nyi ŋkà mìy nə̀ Ablàhâm. Lâŋ kə̀ kə kwu dzə way daʼakiy ani bù twe màʼà ŋkà mə̀ Zə̀kìy kə tɛb na nəniy awò Ablàhâm.

¹⁸Abu à də nə̀ tɛb k-a-zə̀ kìy bê fyiə kə̀ soŋə̀ kìy nə̀ wù nia kə̀làŋ, i dê tsə nə̀ à kàm wày dzə kətɛb. Zə̀kìy kə kwuni nyə̀ ùlwì wə̀ awò Ablàhâm bòʼ tɛb kə ù kə tɛb na nəniy ani nyə̀ awò we.

¹⁹Ulâŋ wìy nyiə̀ ba kwu fàʼ kə̀ ghaa kiy? Zə̀kìy kə nyə̀ ùlàŋ ani dè tsə ibɛb yə aghee zəŋə nəniy. Ulâŋ wìy kə kwuni kwu ani dòʼò ani zù kwùm kə anə sòŋə fə Wa wə Zə̀kìy kə tɛb na nəniy. Zə̀kìy kə nyə̀ bə̀ ùlàŋ wə̀ abidzɛ̀mə̀ tsə̀təndii t-a-zə̀ tìy nə̀ ghu nyiə̀ bə̂ awò Musîs wə̀ ù kə tiy nəniy anə uzə u aghù nə̀ Zə̀kìy.

²⁰Wù wə̀ ù tiy nəniy nə̀ temə̀ntèmə̀ tìy, ù kwu ifây abu aghee də nəniy nə̀ ghu mə tsìy fyi àbè. Zə̀kìy kwuni də̀ kə kə̀mòʼ. Ù kə kə̀ nyiə̀ dzə̂ tɛb kə we kiy awò wè lìy nə̀ ù nyə̀ yə̀ awò Ablàhâm.

²¹I ghii dè tsə nə̀ ayiə yə ulâŋ wìy dzîy nəniy a byemə fwumə way nə̀ tɛb kə Zə̀kìy tɛb nəniy yə̀? Hàay! U byemə fwumə dzə̀ wày! Abu à də nə̀ ulâŋ wìy nyiə̀ ŋwò imuə̀ yìy, ŋgǎ mə̀ dzǐy dyoʼò ŋwò tsitsi anə sə k-a-zə̀ anə yiə yə ŋgà nia nəniy ulâŋ wìy.

²²Ŋwàʼà k-a-zə̀ kìy kwuni dzìy nə̀ ibɛb yiy kwu kədaʼa azoŋə̀ àghè dzə̀m. I dê tsə nə̀ ŋgà də ani kəli ifây yə̀ Zə̀kìy tɛb na nəniy bəə ŋgà bɛmə kə nəniy awò Yesù Kə̀litò.

²³Awò Kə̀litò ani bù tə̀ ŋgà kəli ìbɛmə azoŋə̀ we, ulâŋ wìy kə fè na ŋgaŋ yəə ŋgà də aghê ndàw ntsaʼ zù kwùm anə sòŋə fə ŋgà kə kəli tsə nəniy Kə̀litò ate, kəli tsə sòʼò ìbɛmə azoŋə̀ we.

²⁴Mə də ani ba dzày tsə nə̀ lâŋ kìy kə kyìŋə̀ tsə̀ ŋgàŋ ani zù kwùm a sòŋə fə Kə̀litò kə bû nəniy ate ani zəŋi tsə nə̀ Zə̀kìy nì də ani bɛmə nə̀ ŋgà də tsitsi anə sə kə we bòʼ ìbɛmə yə̀ ŋgà kwu azoŋə̀ Kə̀litò.

²⁵Yəə Kə̀litò kə bû dzə̂ nyiə awò ŋgàŋ ani kəli ibɛmə azoŋə̀ we, lâŋ kìy kamə̀ kyìŋə̀ dzə̀ wày ŋgaŋ.

²⁶Ghà ndzə̂m də̀ awa Kəzə̀ nyiə bòʼ ibɛmə yə ghà kwu nəniy azoŋə̀ Yesù Kə̀litò.

²⁷Yəə ghà kə nîy nəniy mwi m-à-zə̀ mìy ani təm dòʼò dzəŋi nə̀ Kə̀litò, mə də ani dzày tsə nə̀ ghà də fyiə kəmòʼ nə̀ Kə̀litò.

²⁸Aghee Dzû yìy kwu dzə̀ way kwuni kə̀liy kiy nə̀ àghù yə̀ ghu də wày aghee Dzû. Ukwə̂d wìy kwu dzə̀ way kwuni kə̀liy kiy nə̀ àghù yə̀ ghu də wày ukwə̂d yìy. Iŋə̀mə̀ kwu sòʼò way kwuni kiy nə̀ iyəŋi. Gha dzə̀m ghà də anə fyiə kəmòʼ nə̀ Yesù Kə̀litò.

²⁹Abu wò də nəniy wè Kə̀litò, wò ghii də̌ wà Ablàhâm. Zə̀kìy kî nyìə̀ sòʼò ŋwò wô nə̀ fyiə kə ù kə tɛb na nəniy awò Ablàhâm.