Read Isu Aghě Gàlatìyà 4 Bible Online

Aghě Gàlatìyà 4 - Isu bible

Aghě Gàlatìyà 4

¹Ani zù isə nə̀ yiə yə mə mə̀ dzìy nəniy, wa nə ù kwu nəniy ani kəli ufyiə wə təli tɛb na nəniy ani nyìə̀ awò we, abu ù namə tɛbə, ù kwu dzə̀ way kwuni kiy nə̀ kwə̀d kìy yəə i tsəb də kə nə̀ à kwu we ufyiə wə ùdzə̀m ghu tɛb na awò we.

²Bəə ù namə tɛbə nəniy, aghee nyə̀ ì tswù awò we anə ayiə yə ù kwu nəniy ani zəŋi, nìy sòʼò ìyèmì anə ufyiə wə ù nì kwu ani bù kəli zù kwùm a sòŋə fə təli dzây na nəniy.

³À bvami də̀ sòʼò yəə ŋgà kə də nəniy ate awò Kə̀litò ani bù. Ŋgà kə də̀ yəə à də̀ anîsə̂. Ŋgǎ də̀ ukwə̂d awò ùlàŋ u Musîs wə̀ u kə saʼa nəniy aghê fə anə mbyi.

⁴Abù soŋə fiy kwuni kpe tsə nəniy, Zə̀kiy twum bə̀ Wà we. Wìyəŋi byi bə̀ we, u nia làŋ kə ghě Dzû,

⁵ani fày ŋwò fyi bə̀ ŋgàŋ anə daʼa kə lâŋ kìy kə kwu azoŋə̀ ŋgàŋ, ani zəŋi tsə nə̀ ŋgà doʼò àwa Kəzə̀.

⁶Ani dè tsə nə̀ ŋgà də awa we, Zə̀kiy twum bə̀ Zwàykə̀zwekiy anə mùə̀ tə ŋgàŋ, Zwàykə̀zwe kə kə də nəniy anə fyiə kə mòʼ nə̀ Wà we. Kə zəŋə tsə nə̀ ŋgà ki tyoŋə yəə Zə̀kìy nə̀ à də̌ “Tà, Təli wam.”

⁷I dê tsə nə̀ Zə̀kìy mə zəŋi nə̀ wò kə kâm dòʼò dzə̀ kwə̂d kìy, wò də̌ wà Kə̀zə̀. Yəə wò də nəniy wà Kə̀zə̀, Zə̀kìy kî nyìə̀ ŋwò wô nə̀ ùfyiə wə ùdzə̀m ù tɛb na nəniy awò awa we yiy.

⁸Səsə, yəə ghà kə də kam kwu way Zə̀kìy, ghà kə də̀ tsə̀ ukwə̂d awò nsìy mə̀ ìn də ndzə̀m wày dzə uzə̀.

⁹Ghà kwuni kwu ŋwoə Zə̀kìy nyiə. Mə ba də̀ ani dzày tsə nə̀, yəə Zə̀kìy kwu gha nyiə̀, Ghà də mə̀yə ani kàm dzwoŋi zù dòʼò ùkwə̀d awò làŋ kìy nə̀ kə kwu way daʼa kiy, kwu sòʼò way fàʼ kìy ə? À də̌ kìə̀ ghà liə nəniy ani dòʼò dzwoŋi ukwə̂d awò ùlàŋ u ghè wə̀?

¹⁰Ghà dzîy nə̀ ntsukə mə̀ lìy mìy moo ndzoŋə tə̀ liy tiy, moo sòŋə mə̀lìy mìy moo ŋəmə̀ tə̀ liy tiy ŋge tsìy fyi ŋwô.

¹¹Yəə ghà zəŋə nəniy ghii, i nyìə̀ mìə̀ nə̀ ìtsəŋ yiy nə̀ mə kə màŋ nyàb màʼà ŋwò soŋə fam fiy ani fàʼ nə̀ ghà.

¹²Awizə̂ yamə, mə bwoʼo gha nə̀ wokiy nə̀ ghà doʼò tsə yəə à də̀ miə, aŋwòə mə kə də̀ tsə̀ sòʼò yəə à də̀ gha. Ghà kə kə̀ zəŋi bɛb dzə̂ ìyiə ìliy yiy nə̀ mìə̀. A kwuni bû nyiə, ghà mə zəŋi bɛb.

¹³Ghà mbaŋ kwu ŋwô nə̀ à kə də̀ idzâŋ i kə zəŋi nə̀ mə naʼà ntwùm ìdzòŋə̀ yə̀ â ghà anə sòŋə fə səsə fiy.

¹⁴Idzâŋ yam yiy kə də̀ imwâm kòʼ â ghà, ghǎ kə̀ kwuni kôʼ kê nəway miə moo kə̀ twe màʼà miə soʼo. Ghǎ nìy ŋgwam na tsə miə yəə mə də tsə̀ndii ə̀ Kə̀zə̀ ìlìy yìy moo yəə mə də Yesù Kə̀litò nə̀ ùwee uwe wiy.

¹⁵Ghà kə ŋge dyoʼo ŋwò a sòŋə fə ghà fə̀! Dwiʼi kəli kə ghà kə̀ sì də̀ yə nyiə? Ghà kə də̀ ani fàʼ àyiə dzə̀m anə iliə yə ghà kə kwu nəniy â mìə̀. Mə kwu nə̀ abu dzəd kə də ani dòʼò, ghà kə dzǐy bvaʼà nyə̀ bə̀ ŋwò asə ghii yiy â mìə̀.

¹⁶Ghà nyiə̀ nìy yə̀ mìə̀ yəə mə də wù wə̀ ù dzwə nəniy nə̀ ghà aŋwòə mə dzîy bə̀ àyiə àsoŋə̀ yìy â ghà.

¹⁷Aghû yə̀ ghu liə nəniy nə̀ ghà dzwumì yə̂ ù làŋ u ghě Dzû, ghu kwu ighaa ani niɛbi gha nə̀ ghà təm dzəŋi yə̂ nə̀ ghu. Ghu kwuni kwu way môʼ tə̀dzoŋə̀ tìy. Ghu liə ani sè ŋwò ghà â mìə̀ tə̀ ghà ki ŋge kwu sòʼo ighaa yiy ani zuw ayiə â ghu.

¹⁸I dzwabə̀ ŋwò awò ghà ani kəli ighaa ani iyiə ìliy yiy abu iyiə ighè yə̀ də nəniy ìdzoŋə̀ yìy. Ghà kwu ani zəŋə ghii anə sòŋə indzə̀m. Ghà kə kaʼi zəŋi dzə̀ abu mə də nəniy nə̀ ghà.

¹⁹A wa yam à dzòŋə̀ yìy, mə nyiə̀ kàmə̀ zuw fwulə ìfwabi â ghà yəə wìyəŋi nì sə̀kə̀ nəniy ani byi. Mə kî tsə̀ŋə̀ zuw kə ifwabi yə zù kwùm soŋə fə ghà kî kyilə tsə dzə̂ nəniy ndzòʼò ùmwamə wə Kə̀litò kwu nəniy.

²⁰Mə mbvuŋə̀ nə̀ mə mə si də nə̀ ghà nyiə. Abu mə mə̀ də nə̀ ghà mə mə̀ dzǐy tswû dzə̀ wày gha anə dzə̂ ìtaw yə̀ mə dzəŋə̀ nəniy ate aŋwòə idzwə yiy mə miə ŋge zwum anə mwàmə məli.

²¹Ghà dzây bə̂ â mìə̀ gha yə ghà liə nəniy ani fàʼ àyiə yə lâŋ kìy liə nəniy, ghà kwu way ayiə yə lâŋ kìy dzîy nəniy ə̀?

²²I twâ dòʼò anə ŋwàʼà k-a-zə̀ nə̀ Ablàhâm kə kwu awa iŋə̀mə̀ à bè. Wìyəŋi wə ù kə də nəniy kwə̂d kìy, u byi wà ù mòʼ. Ù wə̀ ù kə də wày kəkwə̂d u byi sòʼò wa u mòʼ.

²³Wa nə yəŋì kə̀kwə̀d wə̀ kə byi nəniy, u kə byi we anə yiə yə aghê boŋə byikə awa yiy ate. A kwuni bû wà wìyəŋi wə ù kə də wày kəkwə̂d, ghu kə byi we anə tɛb k-a-zə̀.

²⁴A də ani dzày nə̀ iyəŋi yə̀ dè bə̀ ùfyiə ubè. A də ani kòʼ iyəŋi yə yəə à də̀ le tə məŋkà ìm bè. Yəŋə̀ kə̀kwə̀d wə̀, tyoŋə Hagà də̀ yəə à də̌ ŋkà mə̀ Zə̀kìy kə nyi nəniy nə̀ àghě we yiy anə ukàʼ u Sinày. Aghû yə̀ àdzə̀m ghu də nəniy anə ŋkà mə̀ də̀ ukwə̂d ighəd anə yiə yə awa Hagà yìy də nəniy ukwə̂d wìy.

²⁵Aghee Yèlusalèm nə̀ awa ghu yə ghu də nyiə, ghu də ukwə̂d aŋwòə ghu dzwumə̀ yə̀ àyiə yə lâŋ kə ghě Dzû kìy dzîy nəniy. Ghu də ukwə̂d yəə à də̀ Hagà wə̀ ù də nəniy yəə à də̌ ŋkà mə̀ Zə̀kìy kə nyi nəniy nə̀ àghě we yiy anə ukàʼ u Sinày anə inaʼ i Àlabìyà.

²⁶Zə̂ ŋgàŋ kwuni də̌ inàʼ i Yèlusalèm idoŋ an-a-vələ. I way dzə kəkwə̂d â wù lìy.

²⁷Ŋwàʼà k-a-zə̀ kìy dzîy kwùmə̀ yə̀ nə̀ we nə̀, “A ŋkà kìy, wô wə̀ wò də kamə byi kôʼ nəway wa, kəli tsə dwiʼi kiy. I bwoʼə yəə mbòŋ mìy idoŋ nə̀ dwiʼi kiy, wô wə̀ wò də kamə sə̂k kôʼ nəway I bwoʼə yəə bôŋ kìy aŋwòə awa wìyəŋi wə ù də nəniy ŋkà kìy ghu kî tsìy fyiə ŋwò awa wìyəŋi wə ù nìy nəniy ŋəm anə ndaŋ k-a-ghab.”

²⁸Awizə̂ yamə, ghà də yəə à də̀ Ayzìk, awa tɛb k-a-zə̀ ighəd soʼo anə yiə yə Ayzìk kə də nəniy wà tɛb k-a-zə̀ kìy.

²⁹I bvami də̀ sòʼò nyiə anə yiə yə i kə də nəniy a sòŋə fə ghà fə̀. Wa nə ghu kə byi nəniy we anə yiə yə aghê boŋə byikə awa yiy ate, u kaʼ yə̀ ani dzwu nə̀ wa nə ghu kə byi nəniy bòʼ Zwàykə̀zwe kiy.

³⁰I twâ dòʼò anə ŋwàʼà k-a-zə̀ nə̀, “Dzùmə ŋwǒ yə yəŋì kə̀kwə̀d wə̀ nə̀ wà we! Aŋwòə wà yəŋì kə̀kwə̀d wə̀ kì kəli dzə̀ wày fyiə kə̀liy kiy anə ufyiə wə wà wìyəŋi wə ù də wày kwə̂d kìy kwu nəniy ani kəli.”

³¹Awizə̂ yamə, yəə i də nəniy ghii, ŋgà way dzə awa yəŋì kə̀kwə̀d, ŋgà kwuni də̀ awa wìyəŋi wə ù də wày kwə̂d kìy.