Read Isu Aghě Gàlatìyà 5 Bible Online

Aghě Gàlatìyà 5 - Isu bible

Aghě Gàlatìyà 5

¹Kə̀litò mə fày ŋwò fyi ŋgaŋ ani zəŋi tsə nə̀ ŋgà kə kâm dòʼò sòʼò ukwə̂d wìy awò làŋ kìy. Ghà təmi doʼò tsə yəə à də̀ aghû yə̀ ghu ndzə̂m fày fyi dzə̂ nəniy ghu. Ghà kə kâm dòʼò dzə̀ ukwə̂d wìy.

²Ghà fwiy kə utswuŋi, miə Pôl, mə dzîy bə̀ â ghà nə̀ bəə ghè bɛmə yə̂ nə̀ ghu gwumì ghà i ki dè tsə nə̀ Kə̀litò kwu dzə̀ way ifây ìliy yiy awò ghà.

³Mə namə dzìy fwulə bə̀ nə̀ wù wə̀ ù bɛmə dzə̂ nə̀ ghu gwùmì we, i dê nə̀ ù kwu ani na ulâŋ ùdzə̀m udzə̀m.

⁴Gha yə ghà khu nəniy dzəd ani zəŋi tsə nə Zə̀kìy bɛmə kə nə̀ ghà də tsitsi anə sə kə we nə̀ ghà nia kə̀làŋ, ghà kə̀ kâm təm doʼò dzə̂ nə̀ Yesù. Zə̀kìy kâm wày soʼo ani dè ghà nə̀ fòŋə̀ we ìdzòŋə̀ yìy.

⁵Zwàykə̀zwekiy kwuni zəŋə tsə nə̀ ŋgaŋ yə ŋgà kwu nəniy ibɛmə yiy azoŋə̀ Kə̀litò, nə̀ ŋgà kəli tsə fôŋ tə̀ swəə tiy anə ayiə yə ŋgà lyimə nəniy nə̀ Zə̀kìy zəŋi tsə ŋgaŋ nə̀ ŋgà doʼò tsə tsitsi anə sə kə we anə yiə yə ù tɛb na.

⁶Aŋwòə abu ŋgà də anə fyiə kəmòʼ nə̀ Kə̀litò, ghu gwumì naa ŋgaŋ moo ghu də kə̀ gwùmì na nəway ŋgaŋ ə, i kwu dzə̀ way fàʼ kìy. Iyiə yə i kwuni kwu nəniy fàʼ kìy à də̌ nə̀ ŋgà kwu ani kəli tsə ibɛmə azoŋə̀ Kə̀litò, dè yə̀ sòʼò ìliə awò àghè dzə̀m.

⁷Gha kə mbaŋə fàʼà dzwàbə̀ tsə̀ ŋwò, à ghà kâm zəŋi ndiə nə̀ ghà bwi doʼò yə̂ ani zəŋə yəə ayiə àsoŋə̀ yìy ə?

⁸À kə wày dzə Zə̀kə̀ kə kə sây nəniy gha nə̀ ghà ki zəŋə dzòʼò àyiə yə.

⁹Ghu dzîy tsə̀ nə̀ nyoŋə fə mbwùŋ fìy də ani zəŋi tsə nə̀ ba kiy kwoʼ kə.

¹⁰Mə kwuni kwu ŋwô fyiə kə ghà də nəniy ghe kiy aŋwòə ŋgà təm dòʼò dzəŋi anə fyiə kəmòʼ nə̀ Mwe ə̀ Mbyi. Ghà kî dzwùmì dzə̀ wày aghû yə̀ ghu fwələ myaʼà gha. Ghà kî kwuni dzwumə̀ yə̀ àyiə yə mə dzîy â ghà. Zə̀kìy kî nyìə̀ àghù yə̀ ghu fwələ myaʼà gha nə̀ mfəm, bəə à tsəm də kə ndiə.

¹¹Awizə̂ yamə, bəə mə mə̀ fə̀ namə nìʼà nə̀ ghu kwu ani gwùmì tsə dzə̀ àghù, wù lìy mə̀ dzǐy khu dzə̀ wày miə nə̀ ùtswə̀d wìy. I mə də nə̀ ayiə yə mə kə tyi dê kwùmə̀ yə̀ nə̀ Kə̀litò kə pfə anə kàʼ fə təzəd ani sùw màʼà bɛb tə ŋgàŋ, a mə̀ dzǐy zəŋi dzə̀ wǎy nə̀ wù lìy ŋə̀m nə̀ fòŋ.

¹²Mə dzî nə̀ aghû yə̀ ghu fwələ tsə̂ gha nə̀ ghu ki zee kə nə̀ səkiy ani gwùmì iwe i ghu. Ghu boʼò kâ dyaŋi yə̂ soʼò ìwe i ghu.

¹³Awizə̂ yamə, Zə̀kìy kə sày fyi bə̀ ghà nə̀ ghà kə kâm dòʼò dzə̀ ukwə̂d wìy awò làŋ kìy. Anə ayiə yə ghà də kàm wày ukwə̂d wìy. Ghà kə kâm fàʼ dzə̀ ayiə yə gûw tə iwè təli tiy liə. Ghà kwuni nîy yəə nə̀ à də̀ kəbwôʼ ani fàʼ awò àghè dzə̀m nə̀ iliə yiy.

¹⁴I də ghii aŋwòə ulâŋ wò ùdzə̀m ba dòʼò nyi bə̀ anə ibwoʼ imòʼ dzìy tsə nə̀, “liə yə aghê yìy anə yiə yə wò liə nəniy uwee niə̀ wìy ate.”

¹⁵Abu ghà kwuni ŋwuà kwùnə̀ nəniy anə iwè, ŋwumə sòʼò ìwee nə̀ azoŋə yəə à də̀ təbvu, nǐy tsə nə iyemì yìy. Nə̀ à wày ghii ghà ki byɛbi maʼà tsə iwee nəli.

¹⁶Mə dzìy bə̀ nə̀ ghà muə̀ tsə anə ayiə yə Zwàykə̀zwekiy liə. Ghà kə mùə̀ dzə̀ anə ayiə yə iwe nəli liə.

¹⁷Aŋwòə ayiə yə gùw ùwè liə nəniy nə̀ wò ki zəŋə a fələ̀ ŋwà yə̀ nə̀ àyiə yə Zwàykə̀zwekiy liə nə̀ wò ki zəŋə. Ayiə yə Zwàykə̀zwekiy liə nəniy nə̀ wò ki zəŋə a ŋwâ bə̀ sòʼò nə̀ àyiə yə gûw tə iwè tìy liə nə̀ wò ki zəŋə. Ayiə yə àbè a ŋwâ kə anə iwè, ani zəŋə tsə nə̀ wò kə fâʼ dzə̀ ìyiə yə wò liə nəniy ani fàʼ.

¹⁸Abu à kwuni də Zwàykə̀zwekiy kə bwaa tyilə yə̂ wô, Lâŋ kìy kâm kwu dzə̀ way daʼa kiy azoŋə̀ wò.

¹⁹Aghee dzə̀mə̀ kwu ŋwoə dzòʼò àyiə àbɛbə yə a fyiə abu wù dzwùmə̀ yə̂ nəniy ayiə yə gùw ùwè liə. Ndzòʼò àyiə àbɛbə ghè yə̀ aghê liə ani zəŋə à də̀ ayiə àlyaŋə yiy, nə̀ àyiə àdzəə yiy, nə̀ àyiə à dələ kətuw yiy, nə̀

²⁰àyiə à fwulə mə mwòʼo yiy, nə̀ ayiə kəvòŋ yìy, nə̀ dzwu kiy, ghu liə ani bələ ayiə yiy, kwu sòʼò kə ghòʼ, nə̀ ayiə fòŋ tə̀ ŋəmə tiy, ghu nia təŋə kə ìsə anə iwè i ghu, ghu liə sòʼò ani dzàw dòʼò anə ukaʼ aŋwòə ghu liə way ani bɛmə dzəŋi.

²¹Ghu liə ani kəli ufyiə wə à də nəniy u ghè liy wiy nə̀ à wày dzə u ghu wiy, nə̀ àyiə à muə kee mənlwù yìy. Ghu də anə udzəŋə wə aghee zəŋə nəniy le tə yiə tə bɛbə tiy ate, nə̀ ndə̀mə̀ ndə̀mə̀ tə yiə tə̀ bɛbə tə̀liy tiy. Mə dzîy bə̀ awò ghà nyiə anə ayiə yə mə mə̀ bòʼ dzày dzə̂ nə̀ ghà kəli tsə nə̀ ndzòʼò àghù yə̀ ghu zəŋə nəniy ndzòʼò àyiə yə, ghu kî dyòʼò dzəŋə dzə̀ wày nə̀ àghě Kəzə̀ yə̀ Zə̀kìy saʼa nəniy muə̀ tə ghu tiy.

²²Zwày k-a-zə̀ kìy kwuni zəŋə tsə nə̀ ŋgà ə kəli tsə iliə, nə̀ dwiʼi kiy, nə̀ ìbvay yiy, nə̀ Fòŋ i kwê yìy, nə̀ Fòŋ ìdzòŋə̀ yìy, nə̀ ìdzwàb yìy, fàʼà yə̀ ayiə yə a dê nəniy nə̀ ŋgà kwu ibɛmə â Zə̀kìy.

²³Zə̀kìy zəŋə tsə nə̀ ŋgà kə môʼ dzə̀ nə̀ ŋgà tsîy fyi ŋwò àghê liy yiy, nə̀ ùwe ù bvamə wiy, nə̀ ayiə kwi tsə uwè wìy. Lâŋ kə̀ liy kiy kə̀ twe dzə̂ nə̀ wù kə kəli dzə̌ ndzòʼò mwàmə mə.

²⁴Aghû yə̀ ghu də nəniy aghee Yesù Kə̀litò, i də yəə ghu maa ba wiy màʼà ayiə yə gûw tə iwè tìy kə liə anə kàʼ fə təzəd

²⁵Yəə Zwàykə̀zwekiy nyiə̀ dzə̀ ŋgaŋ nə̀ imùə̀ ìfyiə yiy, ŋgà kwu ani dzwùmì yə̀ àyiə yə kə dzîy nəniy.

²⁶Yəə i də nəniy ghii, ŋgà kwu dzə̀ way ani kwoʼo iwe yiy moo zəŋə àyiə yə fôŋ tə ghù tìy də anə ŋə̀m ate, moo kəli kəghòʼ azoŋə̀ àghù yìy.