Read Isu Aghě Gàlatìyà 6 Bible Online

Aghě Gàlatìyà 6 - Isu bible

Aghě Gàlatìyà 6

¹Awizə̂ yamə, abu ghà kôʼ tsə àzə̀ ghi ù lìy ù zəŋi tsə ayiə àbɛbə yiy, gha yə ghà zəŋə nəniy ayiə yə Zwàykə̀zwekiy liə nəniy, ghǎ bwa tyili na dzwoŋi bə̀ we anə ayiə àdzoŋə̀ yìy, nìy tsə sòʼò ìyèmì nə̀ ghà kə zəŋi dzə̀ ìbɛb yiy anə dzəd yə ghà bwaa tyilə nəniy we ate.

²Ghà ki fii yəə aghê dzə̀m abu ghu də nəniy anə utswə̀d. Abu gha zəŋə nəniy ghii, à ki də nə̀ ghà zuw ŋwò lâŋ kə Kə̀litò kìy.

³Abu wò mòʼò nəniy nə̀ wò də̀ ŋwoə wù lìy, nə̀ wò tàʼà wày dzə ndzòʼò wù ghè wə̀, à ki də nə̀ wò nɛbə kwùnə̀ sòʼò ùwee niə̀.

⁴Wù ùmoʼ umòʼ kwuni kwu ani nìy tsə iyɛmì ani kòʼ tsə nə̀ ayiə yə ù zəŋə nəniy a də àdzoŋə̀ yìy. U ki də ani kwiʼi uwee anə ayiə yə ù zəŋi nəniy nə̀ à wày dzə nə̀ wò fòʼò yə̀ àyiə yə ù zəŋi nə̀ a mə tsìy fyi ayiə yə aghê liy yiy zəŋi nəniy.

⁵Kəli tsə nə̀, wù ùmoʼ umòʼ kwu ani fàʼ fàʼ kə we.

⁶Bəə wù tyi dê nəniy gha nə̀ ntwùm ə̀ Kə̀zə̀, ghà kwu ani nyə̀ we nə̀ ùfyiə ùdzoŋə̀ wə̀ ghà kwu nəniy.

⁷Kəə wù nə̀ nɛbə gha, wè lìy wày dzə ani tsè Kə̀zə̀. Fyiə kə wù zuu nəniy anə uswum, à də̀ fyiə kə ghè kə̀ ù kì kwu nəniy ani kpìy.

⁸Abu wò zəŋə ayiə yə gùw ùwè liə nəniy, ayiə ghè yə̀ də̀ ani zəŋi nə̀ wò doʼò yəə à də̌ wù ù pfə wìy anə sə k-a-zə̀. Abu wò kwuni zəŋi ayiə yə Zwàykə̀zwekiy liə, Zwàykə̀zwekiy ki nyiə̀ wò nə̀ ìmùə̀ itsà yìy.

⁹Yəə i də nəniy ghii, ŋgà kə bɛmə dzə̀ nə̀ ifəd yiy pfə ŋgaŋ ani zəŋi ayiə yə a də nəniy tsitsi aŋwòə abu soŋə fiy kpe tsə nəniy, ŋgà nî kyilə ŋwò namə kə̀soŋə̀ kìy.

¹⁰I dê tsə nyiə nə̀, abu ŋgà kəli kə bwôʼ kìy ani zəŋi iyiə ìdzoŋə̀ yìy, ŋgǎ zəŋi yə̀ ayiə àdzoŋə̀ yìy â àghè dzə̀m. À ba tsəb də̌ à yuu ghu bɛmə nəniy awò Kə̀litò.

¹¹Kòʼo tsə yə asə ə kəŋwàʼà yə̀ ghaʼa nəniy ate anə ŋwàʼà kə̀ mə twâ tsə nəniy nə̀ wo kam kiy!

¹²Aghû yə̀ ghu tyiŋə gha nə̀ ghu gwùmì ghà, ghu maŋə̀ khu dzəd ani dè tsə nə̀ ghu də aghee soŋə̀ yìy anə sə kə aghě Dzû. Ghu ghii zəŋə nə̀ wè lìy kə kaw dzə̌ ghu nə̀ ùtswə̀d wìy dzìy nə̀ ghu niʼà ìyiə ìsòŋə̀ yə̀ i də nəniy kwùmə̀ yə̀ nə̀ ìpfə i Yesu Kə̀litò yìy anə zəd tə fəkàʼ.

¹³Aghû yə̀ kə ghu gwumì na nəniy ghu, ghu nia dyaŋə way lâŋ kìy. Ghu liə ani gwùmì tsə gha anə yiə yə ghu də ani kwoʼo iwe yiy nə̀ ghu mə zəŋi ghu gwùmì nəniy gha.

¹⁴Awò mìə̀, mə way ani kwiʼi dzə̀ ùwe anə iyiə ìliy yiy tsìy fyi anə ipfə i Kə̀litò, Mwe ə̀ mbyi ə ŋgàŋ anə zəd tə fəkàʼ. Bòʼ yəə ghu kə ba wiy nəniy Yesù, ayiə mbyi yə̀ də̀ awò mìə̀ yəə a mə pfə dòʼò. Mə də sòʼò yəə mə mə pfə dòʼò awò àyiə mbyi yə.

¹⁵I dê dzə̀ wày iyiə liy abu wù də nə̀ ghu mə gwùmì we moo ghu kamə gwumi we yə. Iyiə yə i ba də ighe yiy à də̌ nə̀ Zə̀kìy mə zəŋi nə̀ wò doʼò wù ù fyiə wìy.

¹⁶Mə gwùŋə̀ nə̀ Zə̀kìy nyiə̀ ìbvay nə̀ mwuli kə̀ kwoʼo kiy awò àghù yə̀ ghu muə nəniy anə ndzòʼò dzəd yə, a ndzə̀m də̌ ghu Zə̀kìy koʼò nəniy nə̀ ghu də aghee Islàel.

¹⁷Ani dzày kəd tsə, wè lìy kə kâm nyə̀ dzə̀ miə nə̀ ùtswə̀d wìy aŋwòə afoŋ yə mə kə kəli nəniy anə uwè nam, ubənə u ghè wə̀ dè bə̀ kə̀tsəe nə̀ mə də wè Yesù.

¹⁸Awizə̂ yamə, mə gwùŋə̀ nə̀ Mwe ə̀ mbyi ə̀ ŋgàŋ, Yesù Kə̀litò, ù dè fòŋə̀ we ìdzòŋə̀ yìy awò ghà. I doʼò kə ghii!