Read Isu Aghě Efesùs 1 Bible Online

Aghě Efesùs 1 - Isu bible

Aghě Efesùs 1

¹À ŋwàʼà kə̀ twà bə̀ mìə̀ Pôl. Wù wə̀ Zə̀kìy sây kə nəniy nə̀ ù dòʼò wè ntwùm ə̀ Yesù Kə̀litò. Mə twâ yə̀ awò àghě Kəzə̀ yə̀ ghu muə nəniy a Efesùs ghu bɛmə soʼò nəniy awò Yesù Kə̀litò.

²Mə gwùŋə̀ nə̀ Zə̀ kə̀ kə də nəniy Tè ŋgàŋ, we nə̀ Mwe ə̀ Mbyi ə̀ ŋgàŋ Yesù Kə̀litò, ghu dè ghà nə̀ fòŋə̀ ìdzòŋə̀ yìy, ghu nyiə̀ soʼò ghà nə̀ ibvay yiy.

³Ŋgà ki nyiə yəə ukali wiy awò Zə̀ kə̀ kə də nəniy Tè ŋgàŋ, də̀ sòʼo Tè Mwe ə̀ mbyi ŋgàŋ Yesù Kə̀litò, anə yiə yə ŋgà təm doʼò dzəŋə dzə̂ nə̀ Kə̀litò. Ù mə nyiə̀ bə̀ ŋgaŋ nə̀ ùlwì wə̀ ùdzə̀m u ŋwô bə̂ nəniy an-a-vələ.

⁴Ù kə kwu sày fyi təŋ bə̀ ŋgàŋ isə awò we ani zəŋə bə̀ mbyi, nə̀ ŋgà nî bè təmə dyòʼò bə̀ nə̀ Kə̀litò tə̀ ŋgà zwu doʼò tsə nə̀ ŋgà kwu way gə̂ŋ kə udzə kiy anə səkə we. Bòʼ ìliə yə ù kwu nəniy azoŋə̀ ŋgàŋ.

⁵U zəŋi na təŋ tsə nə̀ ghe nî nìy nia bə̀ ŋgàŋ tə̀ a ba bû doʼò tsə awa i ghe abidzəmə̀ àyiə yə Yesù Kə̀litò kə zəŋi nəniy. À də̀ iyiə yə ù kə tsə̂m tsə ani zəŋi anə yiə yə fòŋ we kə liə.

⁶Ŋgà kwu ani nyə̀ ùkali awò Zə̀kìy anə kwab tə ayiə tə ù zəŋi nəniy anə fòŋə̀ we ìdzòŋə̀ yìy ù nyə̀ bə̂ nəniy awò ŋgàŋ aŋwòə ŋgà təm doʼò fwumi nə̀ Wà we ù tsukə̀ wìy.

⁷À də̌ bòʼ kàŋ tə Kə̀litò tə̀ ù kə kûm fyi bə̂ ŋgaŋ ate tə dê tsə nə̀ ù mə nìyzə̀ ibɛb i ŋgàŋ yìy. Kòʼo nə ayiə yə fòŋə Kə̀zə̀ ìdzòŋə̀ yə̀ loʼo faʼà nəniy ate.

⁸Zə̀kìy mə dè ŋgaŋ nə̀ fòŋə̀ we ìdzòŋə̀ yìy naʼ ì dzə̀m, ù mə nyə̀ sòʼò ŋgaŋ nə̀ ndə̀mə̀ utwab, zəŋi sòʼò ŋgà zuw kəli tsə ndə̀mə̀ ayiə.

⁹Ù maa zəŋi ayiə dzə̀m anə yiə yə, ù kə zəŋi nə̀ ŋgà kəli tsə nù tə ayiə tə ù kə byay na nəniy. Ŋgà kwu ani kəli tsə nə̀ à tsə̀m tsə we ani mày kə ayiə yə abidzəmə̀ Kə̀litò.

¹⁰Ayiə ghè yə̀ də̌ nə̀ ani bu soŋə fə ghè fə̀ kpe tsə nəniy Zə̀kìy ni təm na dzəŋi bə̂ ùfyiə udzə̀m wə u də nəniy an-a-vələ nə̀ ù wə u də a mbvə̀dintsə nə̀ Kə̀litò dòʼò tsə kətuw ate.

¹¹I də anə yiə yə Zə̀kìy kə kwu byay na bə̂ dzə̂ nəniy anə itsə̀m i we. Zə̀kìy kə sày fyi bə̀ ŋgàŋ nə̀ a bû zôŋ doʼò dzəŋə nə̀ Kə̀litò, ŋgà doʼò tsə aghee ighe, anə dzəd yə ghe liə nəniy nə̀ ayiə yə ghe kə tsə̂m tsə nəniy â mbyi ani kaʼ,

¹²ani zəŋi tsə nə̀ ŋgaŋ yə ŋgà kə kwu nəniy imôʼ yìy nə̀ Kə̀litò kì zəŋə ŋwò kwab kə iyiə kiy â ŋgàŋ, ŋgà ki nyiə̀ we nə̀ ùkali wiy aŋwòə ù də̌ wù ùsòŋə̀ wìy.

¹³Ghà mə dòʼò sòʼò aghee Kəzə̀ yìy anə yiə yə ghǎ kə zuw tsə ntwùm ìdzòŋə̀ yə̀ kwùmə̀ yə̀ nə̀ Yesù. À də̌ ntwùm ìdzòŋə̀ yə̀ ì bii fyi nəniy gha. Ghà maa bɛmə â Yesù, i zəŋi tsə nə̀ Zə̀kìy kwe tsə tsəe kə we azoŋə̀ ghà. Tsəe kə ghè kə̀ à də̌ Zwàykə̀zwe kə ù kə tɛb na nə̀ ghe kî nyìə̀ ŋwò â ghà ani dè tsə nə̀ ghà də aghee we.

¹⁴Zwàykə̀zwe kə̀ də̀ fyiə kə kə dê tsə nə̀ ŋgà nî kyilə ŋwò fyiə kə ù kə tɛb na nəniy. Ì yû zəŋə tsə nə̀ ŋgà kəli təŋ tsə anə fòŋ tə ŋgàŋ nə̀ Zə̀kìy nî kùmə̀ fyiə ŋwò ŋgaŋ yə ŋgà də nəniy aghee we ani zəŋi tsə nə̀ ŋgà ki nyiə ukali wiy anə kwab tə yiə tə ù zəŋə nəniy.

¹⁵Yəə mə kə zuw tsə nə̀ ghà mə gaʼ na fôŋ tìy awò Mwe mbyi Yesù, nə̀ yiə ghà liə nəniy aghee Kəzə̀ yìy ate à dzə̀m, à yù də̀ ighe,

¹⁶mə də kamə bwi kôʼ dzə̂ ani nyə̀ kə̀zòŋə̀ â Zə̀kìy bòʼ ghà. Mə tsəŋə gwùŋə̀ kə anə utuw ghii nsòŋə indzə̀m.

¹⁷Mə gwuŋə̀ sòʼò nə̀ Zə̀ kə Mwe ə̀ Mbyi ə̀ ŋgàŋ Yesù Kə̀litò, Tè ŋgàŋ wə̀ ù kwu nəniy daʼa kiy nə̀ ù nyə̀ ghà nə̀ Zwàykə̀zwe kə kə kî nyiə̀ gha nə̀ utwab wiy tə̀ ghà zuw kəli dzwâb tsə nù tə ayiə tə we tə. Ì yû kì zəŋə tsə ŋwò gha nə̀ ghà kəli dzwâb tsə we.

¹⁸Mə gwuŋə̀ sòʼò nə̀ ghà fwiy kə fôŋ təli ani zəŋi tsə nə̀ ghà zuw kəli tsə fyiə kə Zə̀kìy tɛb na nəniy nə̀ aghee we yiy kəli tsə imôʼ ate nə̀ ghu nî kyilə ŋwò fyiə kə ù tɛb na nəniy awò àghù yə̀ ù sày na nəniy. Ghà kəli tsə soʼò kwab kə ulwì u we wə ù byay na nəniy awò àghě we yiy.

¹⁹Ghà kəli tsə soʼò kwab tə ayiə tə daʼa kə we kiy faʼà nəniy azoŋə̀ ŋgàŋ, ŋgaŋ yə a bɛmə dzə̂ nəniy awò we. Daʼa kə we kiy faʼà mali tə ayiə awò ŋgàŋ.

²⁰À kə nam də̀ kə daʼa kə ghè kə̀ Zə̀kìy kə zɛ̀mə̀ dzwoŋi bə̂ Kə̀litò ate anə ipfə, zù na tswi tsə we anə ukwe u we ù nyiə wiy an-a-vələ.

²¹À də̀ awo an-a-vələ Kə̀litò də nəniy wù wə̀ ù saʼa nəniy lelê tə u daʼa tə tə saʼa nəniy. Daʼa kə we kiy tsîy fyi u daʼa ù liy wə fə anə mbyi. À kaʼi wày nyiə à də̀ anə nsòŋə indzə̀m.

²²Zə̀kìy mə nyə̀ ayiə dzə̀m anə wo kə Kə̀litò nə̀ à kwu we daʼa kiy ate, zəŋi tsə sòʼò we nə̀ ù dòʼò tsə kətuw anə ufyiə udzə̀m, nə̀ azoŋə̀ aghù yə̀ ghu bɛmə nəniy Zə̀kìy.

²³Aghee Kəzə̀ yìy də yəə à də̀ uwee u Kə̀litò, à də̀ sòʼò aghee Kəzə̀ aghè yə̀ ghu zəŋi nəniy nə̀ Kə̀litò kpe dòʼò tsə anə yiə yə ù zəŋi tsə nəniy nə̀ ufyiə udzə̀m wìy kpe doʼò tsə.