Read Isu Aghě Efesùs 2 Bible Online

Aghě Efesùs 2 - Isu bible

Aghě Efesùs 2

¹Səsə, ghà kə də̀ yəə à də̀ aghê pfə yiy anə ayiə yə ghà kə də zəŋə way ayiə yə Zə̀kiy kə liə nəniy. Ghà kə zəŋə kə ayiə àbɛbə yə ghà kə zəŋə nəniy.

²Anə sòŋə fə ghè fə̀, ghà kə dzwùmə̀ yə̀ dzələ tə̀bɛbə tə mbyi tə, zwulə yə̀ àyiə yə ùdòŋ u nsìy mə̀bɛbə̀ mə̀ ìn də nəniy idoŋ dzîy nəniy, wù wə̀ ù tsày nəniy ulâŋ wìy, kwu sòʼò kədaʼa anə mbiy yə a də kòʼò wày, à də̌ we ù fàʼà nəniy anə fòŋ tə ghù yə̀ ghu twe nəniy ani zuw yə̀ awò Zə̀kìy.

³Ŋgaŋ adzə̀m ŋgà kə bòʼ də̀ tsə̀ yəə à də̌ ghu, ŋgǎ mùə̀ sòʼò anə yiə yə mbyi liə nəniy, zəŋə yə̀ ayiə yə iwee i ŋgaŋ yìy liə nəniy nə̀ fòŋ tə ŋgàŋ tìy. Zə̀kìy kə tsəbə ŋə̀mə̀ tsə̀ sòʼò fòŋ nə̀ ŋgàŋ, ù kə kwu sòʼò ani nyə̀ ŋgàŋ nə̀ mfəm yəə à də̌ aghee mbyi àliy yə.

⁴Zə̀kə̀ kə ŋge kwu nəniy mwuli kə̀ kwoʼo kiy, u fəd ŋge dè bə̀ ìliə i we awò ŋgàŋ.

⁵A sòŋə fə ŋgà kə nam də yəə à də̀ aghê pfə yiy, ŋgà kə də zəŋə way ayiə yə Zə̀kìy liə nəniy. Zə̀kǐy zəŋi tsə nə̀ ŋgà təm doʼò dzəŋi bə̂ nə̀ Kə̀litò. À də̌ bòʼ fòŋ ìdzòŋə̀ ì Kə̀zə̀ yìy ù fày fyi nəniy ŋgaŋ ate.

⁶Anə yiə yə ŋgà təm doʼò dzəŋi nə̀ Yesù Kə̀litò, Zə̀kìy maa zɛm ŋwò dzwoŋi bə̀ ŋgaŋ nə̀ we, nə̀ a doʼò fwumi nə̀ Kə̀litò an-a-byiwuŋ.

⁷Ù kə zəŋi ghii ani dè tsə awò àghè dzə̀m anə nsòŋə indzə̀m nə̀ ghe mə dě fòŋə̀ ìdzòŋə̀ yìy anə ìliə yə ù kə dê nəniy awò ŋgàŋ abidzəmə̀ àyiə yə Yesù Kə̀litò kə zəŋi awò ŋgàŋ.

⁸À də̌ bòʼ fòŋə̀ Kə̀zə̀ ìdzòŋə̀ yìy ù bii fyi nəniy gha abidzəmə̀ ìbɛmə yə ghà kwu nəniy azòŋə̀ Yesù Kə̀litò. À wày dzə nə̀ à zəŋi gha, à kwuni də̀ namə k-a-zə̀.

⁹À wày dzə bòʼ kə̀fàʼ. Kəə wè lìy nə̀ kwuni kwoʼo dzə̂ ùwee wiy ate.

¹⁰Zə̀kìy mə zəŋi ŋgaŋ nə̀ ŋgà doʼò fyiə kə ŋgà də nəniy ghe kiy anə yiə yə ŋgà təm doʼò fwumi nəniy nə̀ Kə̀litò ù mə zwùbì tsə ŋgaŋ ani mùə̀ yə̀ ŋgà də ani mùə̀ fàʼà yə̀ faʼ kə̀ dzoŋə̀ kìy anə yiə yə ù kə byay na nəniy ntìy mə̀ntìy â ŋgàŋ ani mùə̀ ndzòʼò ìmùə̀ i ghà yə̀.

¹¹Ghà myiŋì tsə fyiə kə ghà kə də tsə səsə. Gha yə ghà də wày aghee Dzû, Aghee Dzû yǐy tyoŋə gha nə̀ à də aghû yə̀ ghu də kamə kə̀ gwumì dzə̂ utu u ghu wiy, ghu kwuni tyoŋə ìwee i ghu yiy nə̀ à də aghû yə̀ ghu gwumì dzə̂ nəniy utu u ghu wiy, də̀ ghii nə̀ ghu utu wiy boʼò gwùmə̀ tsə anə awo.

¹²Anə soŋə fə ghà fə̀, ghà kə kə̀ təm dòʼò fwumi dzə̂ nə̀ Kə̀litò. Ghà kə də̀ yəə à də̀ tətwumə̀, ghà kə wày fwumi soʼo anə fwumi kə aghù yə̀ Zə̀kìy kə sây na nə̀ à də̀ aghee we. Ghà kə kwu dzə̀ wày wo kiy anə ŋkà mə̀ ìn kə kwu tɛb kə Zə̀kìy kə tɛb na â àghě Islàel yìy. Ghà mùə̀ sòʼò fə anə mbyi nə̀ ghà kwu way imôʼ yìy anə tɛb k-a-zə̀, ghà kə kwu sòʼò way Zə̀kìy.

¹³Abû nyiə ghà mə təm dòʼò fwumi anə fyiə kə mòʼ nə̀ Yesù. Gha yə ghà kə doʼò nây fyi yə̂ nəniy, ghà mə kwùlì dòʼò koŋə bə̀ nyiə bòʼ ndzòʼò ìpfə yə Kə̀litò kə pfə nəniy anə utuw ŋgàŋ.

¹⁴Aŋwòə Yesù Kə̀litò nə̀ ùwee u we wiy mə bù ŋgaŋ nə̀ ibvay yiy, zəŋi tsə nə̀ aghee Dzû nə̀ àghù yə̀ ghu də wày aghee Dzû, nə̀ ghu doʼò tsə anə fyiə kə mòʼ. Bòʼ ìpfə i we yə anə kàʼ fə tənzəd, i kə saʼà màʼà tsə bâʼ kə mbà kə̀ kə kə dzâw na nəniy aghee Dzû nə̀ àghù yə̀ ghu də wày aghee Dzû.

¹⁵Ù kwuni kə lâŋ kə aghee Dzû nə̀ àyiə yə lâŋ kə̀ kə dzîy nəniy ani zəŋi tsə aghee Dzû nə̀ àghù yə̀ ghu də wày aghee Dzû, ghu doʼò fwumi bə̂ nə̀ ìghe anə fyiə kəmòʼ. Abù ù zəŋi tsə ghii, u nìy bə̀ ìbvay anə fwumi kə ghu.

¹⁶Bòʼ ìpfə i Kə̀litò anə kàʼ fə təzəd, u zəŋi tsə ŋgaŋ nə̀ ŋgǎ doʼò tsə anə fyiə kəmòʼ. U təm na fwumi bə̀ àghè dzə̀m nə̀ ghu bû dzwoŋi akə̀lə̀ Kə̀zə̀ ani zəŋi tsə nə̀ dzwu kə ŋgà kə də nəniy ate nə̀ Zə̀kìy kə mây.

¹⁷À yù də̀ ighe ù kə bû naʼà bə̂ nəniy ntùmə̀ ìdzòŋə̀ yə̀ ì bè nəniy nə̀ ìbvay yiy awò àghè dzə̀m. Ù kə bù nàʼà bə̀ sòʼò awò ghà, gha yə ghà kə də way aghee Dzû, ghà kə doʼò fyi nây yə̂ nə̀ ghà way akə̀lə̀ Kə̀zə̀, u nàʼà sòʼò awò àghě Dzû, ghu kə kwùlì də nəniy akə̀lə̀ Zə̀kìy.

¹⁸À də̀ abidzəmə̀ Kə̀litò ŋgaŋ ə dzəm a bê nəniy anə zwày kə̀moʼo kiy a kə̀lə̀ Kə̀zə̀.

¹⁹Gha yə ghà də way aghee Dzû, ghà kâm wày dzə aghû yə̀ ghu bwîy bû nəniy moo aghû yə̀ ghu tsîy dyaŋə nəniy. Ghà nyiə̀ də̀ aghee inaʼi imòʼ nə̀ àghě Kəzə̀ yìy, də̀ sòʼò aghee isəd i ndaw i Kəzə̀.

²⁰Gha soʼo, ghà də yəə à də̌ ndaw yə ghu byiə kwoʼ kə anə tsəkəndaw kə aghee ntwùm ə̀ Yesù yìy kə zəŋi na nəniy, nə̀ àghě ntwùm ə̀ Kə̀zə̀, Kə̀litò nə̀ ùwee u we wiy baa də̌ itay ibvu i ndaw.

²¹À də̌ we ù kwi kəli ndaw idzə̀m, zəŋə sòʼò nə̀ ì nɛmə dòʼò bə̀ ndàw i zwê yìy â Mwe ə̀ mbyi.

²²Anə yiə yə ghà təm doʼò fwumi dzə̂ nə̀ we, ù mə zəŋi gha, ghà nyiə niyɛmə dzəŋə nə̀ àghè àliy yə. Ghà nyiə̀ də̀ yəə à də̌ ndaw yə Zə̀kìy muə nəniy ate toŋə Zə̀kə̀ kə də nəniy Zwày kìy.