Read Isu Aghě Efesùs 4 Bible Online

Aghě Efesùs 4 - Isu bible

Aghě Efesùs 4

¹Mə də wè ndaw ntsaʼ aŋwòə mə faʼà awò Mwe ə̀ mbyi. Mə bwoʼo gha nə̀ wokiy nə̀ ghà muə̀ tsə imuə̀ yə̀ i kwoʼ kpe anə yiə yə Zə̀kìy kə fôʼ na nəniy a soŋə fə u kə twoŋə tsə gha.

²Ghà ki niy tswi tsə iwee nəli yiy ambvə̀d, bvamə tsə ìwee, kwè tsə sòʼò tə̀fòŋ. Ghà ki dee yə iliə yiy anə ayiə yə ghà yemə̀ nəniy azoŋə̀ àwizə̂ ghii yiy.

³Ghà də̂m tsə anə ayiə dzə̀m ani də anə fyiə kəmòʼ nə̀ Zwày kə̀ Zə̀kìy nyiə̀ nəniy, tə̀ ibvay yiy ki də anə fwumi kəli.

⁴Ŋgaŋ aghee Kəzə̀, ŋgà də yəə à də̀ uwee umòʼ, anə yiə yə Zwàykə̀zwekiy də kə̀ mòʼ. Ighəd anə yiə yə ghà kwu kə nəniy imôʼ yìy ìmòʼ anə tɛb kə Zə̀kìy kə nyiə̀ anə sòŋə fə ù kə sây fyi bə̂ nəniy gha.

⁵Ŋgà kwu kə Mwe ə̀ mbiy umòʼ, kwu sòʼò ibɛmə imòʼ ŋgaŋ ə dzə̀m, nìy sòʼò mwi m-à-zə̀ mə̀ moʼò mìy.

⁶Zə̀kìy də kə kə̀mòʼ ù də nəniy Təli awò àghè we dzə̀m. Ù tsìy fyi nəniy aghê dzə̀m, ù nyìə̀ nəniy daʼa kiy awò aghè we àdzə̀m, də̀ sòʼo azoŋə̀ àghè we àdzə̀m.

⁷Kə̀litò nyə̀ kə wù ùmoʼ umòʼ nə̀ ùnamə wiy anə foŋə Kə̀zə̀ ìdzòŋə̀ yìy, anə yiə yə ù kòʼo nə̀ i kpe dòʼò ŋwò.

⁸À yù də̀ ighe ŋwàʼa k-a-zə̀ kìy dzîy nə̀. “A yiə yə ù kə ŋwô kwoʼ nây kə idoŋ, u ŋwò dzwoŋi yə̀ nə̀ ù mə təm nyi aghû yə̀ ghu kə bâ nəniy we, u nyə̀ tsə aghee we nə̀ ùnamə wiy.”

⁹Ani dzày tsə nə̀ “Ù kə ŋwò kwoʼ này kə ŋwô,” i ghii myìŋə̀ nə̀ ù maa səsə kiy fyi tswi bù kwùm tsə fə a mbvə̀dintsə.

¹⁰We wə ù kə fyi tswi bə̂ nəniy à nam də̀ kə we wə ù kə fyi kwoʼ nây kə, tsìy fyi kwoʼ kə Kəbyiwuŋ ani zəŋi nə̀ mbyi dzə̀m dòʼò tsə anə daʼa kə we.

¹¹À kə də̌ we ù kə nyiə̀ aghê nə̀ ùnamə wiy, u sày kə aghê liy yiy nə̀ ghu doʼò àghě ntwùm ə̀ Yesù. Àliy nə̀ ghu doʼò àghù yə̀ ghu dzîy bə̂ nəniy ayiə yə Zə̀kìy dzîy, àliy yiy nə̀ ghu ki bwiiy niʼa yəə ntwùm ə̀ Kə̀zə̀, nə̀ àliy doʼò àghù yə̀ ghu biə kwoʼo bə̂ muə tə ghù tìy, àliy yiy ki tyi dè yəə ayiə Kəzə̀.

¹²Ù kə ùnamə wə̀ nyə̀ bə̀ ani byay na tsə aghee Kəzə̀ tə̀ ghu ki faʼa yə, byiə kwoʼ bə̀ ùwe u Kə̀litò wə̀ à də nəniy ndàw Kə̀zə̀.

¹³Tə̀ ŋgà ni bû doʼò mâ bə̂ anə fyiə kəmòʼ anə ibɛmə i ŋgàŋ, nə̀ ayiə yə ŋgà kəli tsə wù wə̀ Wà ə̀ Kə̀zə̀ də nəniy we, tə̀ ŋgà ni bû biy tsə anə aghù, ŋgà kpe dòʼò tsə sòʼò anə yiə yə Kə̀litò də.

¹⁴Ŋgà ki də kàm wày dzə yəə à də̀ anîsə̂, ghu sê ndzəŋə kyabə tsə̂ ghu anə zwiʼi tə̀ guw tiy, ghu nyəŋ yə̀ fə̀, nyəŋ yə̀ fìy, sè yə̀ isə, sè yə̀ ibàm, nə̀ à zəŋə kə àghè à guw yiy, ani nɛb màʼà àghù.

¹⁵Ŋgà kwuni kwu ani dziy ayiə àsoŋə̀ yìy awò àghè dzə̀m anə ìliə, ŋgà kwu ani nɛmə dòʼò mà bə̀ anə yə dzə̀m yəə à də̌ Kə̀litò, ù də nəniy tuw kiy.

¹⁶À də̂ we ù təm na dzəŋə bə̂ nəniy ubə̂d u wè wə̀ ùdzə̀m nə̀ u zôŋ doʼò dzəŋi bə̂ tə̀ u ki niyɛmə yə, tiy sòʼo. Ù kwi kəli dzəŋi nyi yə̂ uwee wə ùdzə̀m. Abu bə̂d kə̀moʼ kəmòʼ kìy faʼà yə̂ anə yiə yə kə kwu nəniy ani faʼa ate, uwee udzə̀m u niyɛmə yə̀, ŋgaŋ yə ŋgà də nəniy ubə̂d u uwè wə̀, ŋgà ki biə kwoʼ kə uwee ughè wə̀ anə iliə.

¹⁷Mə kwâ bə̀ ghà anə izəd i Mwe ə̀ mbyi nə̀, kəə ghǎ nə̀ kamə̀ muə̀ nəniy yəə à də̀ aghê liy yə ghu də wày aghee Dzû, aŋwòə ayiə yə ghu moʼò nəniy a kwu dzə̀ way fàʼ kìy.

¹⁸Ləmkiy də anə fòŋ tə ghu. Ghu kwu way imuə̀ yə̀ Zə̀kìy nyiə̀ nəniy aŋwòə ghu tsəm bòʼ kwu dzə̀ way iyiə ìliy kùmə̀ yə̀ nə̀ Zə̀kìy, aŋwòə ghu taw nə̀ ùtuw wiy.

¹⁹Ghu kwu dyaŋi way utuw ùdələ wiy, ghu mə nyə̀ yə̀ ìwee yiy awò àyiə àlyaŋə yiy. Ghu ŋge liə ani zəŋə ayiə à dzəə yiy.

²⁰À yù wày dzə ayiə yə ghà kə zuw nəniy kwùmə yə̀ nə̀ Kə̀litò.

²¹Ghà maa mbaŋ zuw ayiə yə ghu kə tyi dê â ghà kwùmə̀ yə̀ nə̀ we, ghu maa tyi dè sòʼo dzə̀d ìdzòŋə̀ yə̀ ghà də ani mùə̀ ate anə ayiə yə Yesù kə dê awò ŋgàŋ.

²²Yəə i də nəniy ghii ghà nyəli maʼà àyiə àbɛbə yə ghà kə zəŋə tsə̂ nəniy, nə̀ ndzòʼò dzəd yə ghà kə muə tsə nəniy ate. Fôŋ təli tiy nɛbə gha, ghǎ mòʼò nə̀ idzwabə̀ ŋwò ani zəŋi ayiə àbɛbə yiy. Ndzòʼò ìmòʼ ighè yə̀ byɛbə myàʼà ghà.

²³Ghà kwu ani kwuni fôŋ təli ghà kəli tsə soʼò mòʼ tə̀ fyiə tiy.

²⁴Ghà kwu ani kwuni kə muə̀ təli anə yiə yə Zə̀kìy liə nəniy, ghà ki zəŋə yə ayiə yə a də tsitsi, fàʼà yə̀ sòʼò àyiə yə Zə̀kìy liə.

²⁵Kəə ghǎ nì kàmə̀ guw dzə̂, ŋgaŋ adzə̀m kwu ani dziy ayə àsoŋə̀ yìy awò aghe dzə̀m, aŋwòə ŋgà dzəŋi zòŋ dòʼò kə anə uwè ùmòʼ.

²⁶Abu fòŋ bɛb kə nəniy wô anə iyiə, kəə wò nì zəŋə iyiə ìbɛbə yiy, kəə wò nì byemə nə̀ inyi i zû gaŋi nə̀ fòŋ namə bɛbə kə wò,

²⁷Ani zəŋi tsə nə̀ wò kə nyiə̀ dzə̌ àmbvə̂ntsə nə̀ bwòʼ kìy.

²⁸Aghê tsoŋə kwu ni mbvami nyili màʼà ùtsoŋ tə̀ ghu kaʼ yə̂ ani fàʼ nə̀ àwo ghu yiy, kyilə ùfyiə anə dzə̀d ìdzòŋə̀ yìy, anə yiə yə ghu də ani fày yə̀ àghù yə̀ ghu laʼà nəniy.

²⁹Kə̀ bɛmə dzə̀ nə̀ iyiə ìbɛbə yiy ki fyiə bəə ani idzwə yə̂, à ki fyiə bəə kə àdzoŋə̀ yə̀ a kwu ani byiə kwoʼ kə agheè liy yiy anə fyiə kə ghu laʼà, tə̀ i ki də ani fày àghù yə̀ ghu zwulə bə̂.

³⁰Kəə wò nə̀ zəŋə soʼo Zwàykə̀zwekiy nə̀ ù ki mwe, aŋwòə ù də̀ tsəe kə Zə̀kìy kwe na azoŋə̀ wò, zoʼo na bə̀ we ani dè tsə nə̀ tsuk fiy nî bè ŋwò Zə̀kìy ni bii fyi mâ bə̂ ghà.

³¹Nyəli màʼa tsə iŋwîy yìy, nə̀ ìŋgali, nə̀ fòŋ i fwə̂ yìy, nə̀ ayiə àzwaʼa yiy moo ayiə ànyaʼa iwè yìy, nə̀ àyiə àtwabə dziy yiy, nə̀ ayiə yə àdzə̀m a tyiŋə fôŋ tìy.

³²Ghà ki zəŋə yəə ayiə àdzoŋə̀ yìy awò àghè dzə̀m, ghà kəli tsə fôŋ tə kəmwùli, nìyzə̀ yə̀ àyiə àbɛbə yə aghê zəŋə nəniy nə̀ ghà, ighəd yəə Zə̀kìy nîyzə̂ soʼò ayiə ghii àbɛbə yiy abidzəmə̀ Kə̀litò.