Read Isu Aghě Efesùs 5 Bible Online

Aghě Efesùs 5 - Isu bible

Aghě Efesùs 5

¹Yəə ghà doʼò dzə̂ àwa yə Zə̀kìy gaʼ na nəniy fòŋ ate, ghà kwu ani dòʼò tsə yəə à də̌ we.

²Ghà kwu ani kəli tsə iliə anə imuə̀ ghii, ighəd anə yiə yə Kə̀litò kə liə nəniy ŋgaŋ ate u nyə̀ yə̀ ùwee u we awò Zə̀kìy bòʼ ŋgàŋ yəə à də̀ fyiə kə̀ lyimə kə ghu sâ nyə̀ nəniy â Zə̀kìy kə zəŋə nəniy nə̀ ù ki dyoʼo.

³Kəə ghà nì zəŋə ayiə kəlyaŋi yiy, moo awò ghà ani zəŋə yəə à də̀ təbvu, moo kəə ghà nì dǔw nə̀ isə yiy. Kəə ndzòʼò àyiə àdzəə yə̀ nə̀ bòʼò fyiə koʼò anə fwumi kəli aŋwòə ghà də aghee Kəzə̀.

⁴I boʼò dzwàbə̀ dyaŋə dzə̀ wày awò ghà ani dziy ayiə àdzəə yiy, moo ani dzày ayiə àliʼa yiy, moo nyàʼ tə yiə. À kwu ani fyiə bə kə ayiə yə a nyiə̀ nəniy zòŋə̀ kìy awò Zə̀kìy anə adzwə ghii.

⁵Ghà kəli tsə nə̀ ndzòʼò àghù yə̀ ghu zəŋə nəniy ayiə àlyaŋə yiy, nə̀ à yuu ghu zəŋə yəə à də̀ təbvu, nə̀ àghù yə̀ ghu kwu nəniy mwìy, (aŋwòə wù ù kwu nəniy umwîy ù də̌ wù wə̀ ù fwùlə̀ nəniy mwòʼo miy) ghu nî kəli way fyiə kə̀ liy kiy a loʼo kə Zə̀kìy saʼa nəniy ate.

⁶Kəə wè lìy nə̀ nɛbə myaʼà gha anə ayiə àguw yiy, aŋwòə à yù də̀ ndzòʼò àyiə yə fòŋə̀ Kə̀zə̀ ì ŋəmə̀ yìy kì bê ate azoŋə̀ àghù yə̀ ghu də zuw way awò we.

⁷Kəə ghǎ nì təmə dzəŋə nə̀ ndzòʼò àghě ghà yə̀.

⁸Ghà kwu ŋwô nə̀ ghà maa zəŋi tsìy ndzòʼò àyiə ghà yə̀ anə sòŋə fə ghà kə də tsə an-a-ləm. Ghà mə kwuni, ghà nyiə̀ də anə asə àzwe yiy. Ghà kwu ani mùə̀ tsə yəə à də̀ aghû yə̀ ghu də nəniy anə asə àzwe yiy.

⁹I də nə̀ abu wù fàʼà nəniy anə asə àzwe yiy ù ki də ani zəŋi le tə ayiə tə̀ dzoŋə̀ tìy, nə̀ àyiə tsitsi yiy, nə̀ àyiə àsoŋə̀ yìy.

¹⁰Ghà də̂m tsə anə kaw kəli fyi kə fyiə kə ayiə yə Mwe ə̀ mbyi liə nəniy.

¹¹Kəə ghǎ nì kwe awo ghii yiy anə ayiə kələm yə a də kwu wày fàʼ kìy, aghee mbyi yiy zəŋə. Ghà ki fələ niy bə ayiə ghè yə̀ anə asə àzwe yiy.

¹²I boʼò ŋge də̀lə̀ dyaŋə kə̀tuw ani dzày fyi bə̀ ayiə yə aghê zəŋə nəniy a təŋə kələm.

¹³Abu ghu nîy fyi bə̂ ayiə ghè yə̀ anə asə àzwe yiy, ayiə ghè yə̀ ki ba dê kə uwee anə ayiə yə a də nəniy ate.

¹⁴I də ghii aŋwòə ayiə yə àdzə̀m ghu dê dzwàb yə̂ nəniy awò àghù yìy, a də yəə à də̀ təkaʼì. À yù də ighe ghu kə dzây tsə nə̀, “Ŋwòə kə nənìy, gha yə ghà bvunə nəniy, ghà zɛmə̀ ŋwò kə anə ipfə Kə̀litò kî mwà bə̀ azoŋə̀ ghà.”

¹⁵Ghà nìy tsə iyɛmì anə dzəd yə ghà muə nəniy ate. Kəə ghà nì də dzə yəə à də̀ àghê àliʼa, ghà kwuni muə̀ tsə yəə à də̀ aghê àtwabə yiy.

¹⁶Ghà nîy kə bwôʼ kə̀ Zə̀kìy nyiə̀ na nəniy awò ghà ani zəŋə ayiə dzoŋə̀ yìy, aŋwòə ŋgà muə anə tsukə mə̀ bɛbə̀ mìy.

¹⁷Kəə ghà nə̀ dyoʼò aghê àliʼa yiy, ghà kwuni kaw kəli fyi kə fyiə kə Mwe ə̀ mbyi liə nəniy nə̀ ghà zəŋi.

¹⁸Kəə ghà nì muə kee nəniy nlwùmìy, ìn də̀ ani byɛbi màʼà ghà. Ghà ki kwuni zəŋə yə ayiə yə Zwày k-a-zə̀ kìy liə, tə̀ kə ki lwe dòʼò tsə azòŋə̀ ghà.

¹⁹Abu ghà dzîy nəniy ayiə yiy anə iwè nəli, ghà ki dziy yə ayiə yə a də nəniy anə ŋwàʼà kə tə ndzàŋə. Ghà ki zɛmə yə soʼo ndzàŋə tə aghê fwulə̀ nəniy Zə̀kìy ate, nə̀ ndzàŋə tə aghê kyalə Zə̀kìy ate.

²⁰Ghà ki tsəŋə nyiə̀ kə̀ zòŋə̀ kìy awò Zə̀kə̀ à də nəniy Təli anə izəd i Mwe ə̀ mbyi ə̀ ŋgàŋ, Yesu Kə̀litò.

²¹Ghà ki nyiə tsə ŋkwiʼi miy awò wù ùmoʼ umòʼ bòʼ Kə̀litò.

²²Gha, aghiy, ghà ki nyiə tsə ŋkwiʼi miy awò àŋəm ghii yiy, yəə à də̀ aghû yə̀ ghu nyiə̀ nəniy ŋkwiʼi miy awò Mwe ə̀ mbyi.

²³Aŋwòə ŋəmə də kətuw awò àghiy yiy, ighəd yəə Kə̀litò də nəniy tuw kiy awò ndàw Kə̀zə̀. À də̌ Kə̀litò ù bii fyi nəniy ndàw Kə̀zə̀, toŋə uwee u we.

²⁴Yəə ndàw Kə̀zə̀ də nəniy a təŋə̀ Kə̀litò, à də̀ sòʼò ighəd wiyəŋi kwu nəniy ani nyə̀ yə̀ iwee ighu atəŋə̀ àŋəmə ghu yiy anə ayiə dzə̀m.

²⁵Gha, aŋəmə, ghà kwu ani kəli tsə iliə azoŋə̀ àghiy ghii ighəd yəə Kə̀litò liə nəniy ndàw Kə̀zə̀ ate, u nyə̀ dyaŋi yə̀ uwee uwe awò ndàw Kə̀zə̀.

²⁶Ù kə ghii zəŋi ani nyiə̀ yə̀ ndàw Kə̀zə̀ awò Zə̀kìy nə̀ ù mə sùw zwu na tsə, ndàw Kə̀zə̀ nə̀ ayiə Kəzə̀, yəə wù nə̀ zùw tsə nəniy fyiə kə̀ dzəə kiy anə mwi nə̀ kə ki zwe,

²⁷tə̀ ghe nə̀ nîy na bə̂ ndàw Kə̀zə̀ awò ìghe nə̀ ì mwà ŋwò, nə̀ ì kwu way gə̂ŋ kə udzə kiy soʼo, nə̀ ì kə̀ ndzukə doʼò soʼò a lòʼo kə̀ liy kiy, tə̀ ì ki zwe nə̀ ì kwu dzə̀ way utswə̂d ù liy wiy.

²⁸Yəə i də nəniy ghii, gha, aŋəmə, ghà kwu ani liə aghiy ghii yiy anə ayiə yə ghà liə nəniy iwee nəli yiy ate. Wù wə̀ ù liə nəniy wìy we, ù ghii liə sòʼò uwee u we.

²⁹Wù lìy wày dzə ù bà nəniy uwe u we wiy, ù fə̀lə̀ fyikə ùwee u we, yèmə̀ sòʼò ate, à də̀ ighəd Kə̀litò zəŋə nəniy nə̀ ndàw Kə̀zə̀,

³⁰aŋwòə ndàw Kəzə̀ də̀ uwe u Kə̀litò, ŋgà də nəniy ubə̂d uwè u we wiy.

³¹À yù də̀ ighe ghu kə twâ na nəniy anə ŋwàʼà k-a-zə̀ nə̀, “Wìŋəmə̀ kwu ani nyəli tsə təli nə̀ zə̂, ù təm dòʼò dzəŋi yə̀ nə̀ wìy tə̀ ghu ghè yə̀ àbè ki də wù ùmò”

³²À yù də̀ iyiə ìsoŋə̀ yə̀ i taw nəniy awò aghè ani zuw kəli, mə dzìy kwùmə̀ yə̀ Kə̀litò we nə̀ ndàw Kə̀zə̀.

³³A kwuni buu gha, wìŋəmə̀ kwu ani liə yə̀ wìy we anə ayiə yə ù liə nəniy uwe ù we wiy ate. Wìyəŋi kwu sòʼò ani nyə̀ tsə mə̀ŋkwiʼi awò ŋə̀mə̀ we.