Read Isu Aghě Efesùs 6 Bible Online

Aghě Efesùs 6 - Isu bible

Aghě Efesùs 6

¹Anîsə̂, ghà ki zuw yəə awò nə̀ təli ghii anə yiə yə Mwe ə̀ mbiy dziy nəniy, aŋwòə à yù də iyiə i tsitsi yiy awò ghà ani zəŋi.

²Ŋwàʼà k-a-zə̀ kìy dzîy nə̀, ghà ki nyiə yəə ŋkwiʼi miy awò nə̀ təli ghii nə̀ awò nə̀ zə̂ ghii. À yù də̀ lâŋ k-a-zə̀ kə səsə kiy kə kwu nəniy tɛb kìy,

³tə̀ ayiə nì də ani bwìy dzwàb awò ghà, ghà ki muə̀ ndaŋ k-a-ghab fə a mbvə̀dintsə, ghà muə̀ dzwâb soʼò.

⁴A nə̀ tə̌ wa nə̀ zəə wa, kəə ghǎ nì zəŋə awa ghii yiy nə̀ fôŋ tìy ki ŋəmə ghu, ghà kwu ani nìy kwoʼ bə̀ ghu anə ibvay nə̀ ìtswù i Mwe ə̀ mbi yiy.

⁵Aghee kəfàʼ yìy, i zuw yə nənìy awò àghù yə̀ ghà faʼà nəniy a təŋə̀ ghu, nyə̀ yə̀ ghu nə̀ ŋkwiʼi miy, kwu sòʼò ìtsəŋ anə fôŋ təli, yəə ghà faʼà â Kə̀litò.

⁶Kə̀ nə̀ sûw təŋ dzə̀ awo ghu anə sòŋə fə ghu fwələ̀ bə̂ gha kyalə tsə gha. Ghà ki kwuni faʼa yə ayiə yə Zə̀kìy liə nəniy yəə ghà də aghee kəfàʼ ghu faʼà nəniy awò Kə̀litò.

⁷I faʼa yəə fàʼ kəli kə̀ dzoŋə̀ kìy nə̀ fòŋ tə̀dzoŋə̀ tìy yəə ghà faʼà awò Mwe ə̀ mbiy nə̀ a wày dzə awò wù.

⁸Ghà kəli na tsə nə̀ Mwe ə̀ mbyi nî niamə àghè dzə̀m anə ayiə àdzoŋə̀ yə̀ ghu zəŋə nəniy, abu wò faʼa a təŋə̀ wù, moo wò də fàʼà wày.

⁹A nə̀ mwe, ghà nîy dzwâb tsə soʼò ìyèmì azoŋə̀ àghù yə̀ ghu faʼà nəniy a təŋə̀ ghà. Ghà bwi na tsə ani bvumi ghu. Ghà kəli tsə nə̀ gha nə̀ ghu, ghà kwu kə Mwe umòʼ ù də nəniy an-a-vələ, ù kòʼò ŋgwoʼo dzə̀ wày wè lìy kwuni kòʼò kè wè lìy.

¹⁰Ani dzày kəd tsə, ghà təmi taw tsə anə ibɛmə yə ghà kwu nəniy azoŋə̀ Mwe ə̀ mbiy. Ghà zoʼo doʼò yə̂ kə anə daʼa kə we.

¹¹Ghà dzəŋì kə ufyiə utsaam wə ùdzə̀m Zə̀kìy nyiə̀ nəniy, tə̀ ghà ki də ani təmi taw dòʼò tsə abu àmbvə̂ntsə bê nəniy nə̀ àyiə mə̀ tsèntwab a we yə.

¹²Aŋwòə ŋgà ŋwâ dzə wày nə̀ àghě mbyi yə. Ŋgə̀d kə ŋgàŋ kìy kwuni də̌ nə̀ nsìy mə̀bɛbə̀ mìy, nə̀ ùdòŋ u ghu wə u doʼò fyi kwoʼ nây kə nəniy idoŋ. À də̌ ghu ghu saʼa nəniy mbvə̀dintsə kə nə̀ ù daʼa u kələm wiy.

¹³Yəə i də nəniy ghii, ghà dzəŋì kə ufyiə u tsam wə Zə̀kìy nyiə̀ nəniy, tə̀ ghà ki də ani təmi taw tsə ani buu àmbvə̂ntsə bû nəniy ani bù ŋwày ghà tə̀ ani buu ghà ŋwây mày tsə nəniy, ghà ni nam tiy.

¹⁴Ghà təmi taw tsə anə ayiə àsoŋə̀ yə̀ a də yəə à də̀ fəkwə̂, wù kwù kəli nəniy anə isəd, ù bya nəniy uwee u kəŋgə̀d wìy, ghà muə̀ tsə imuə̀ yə̀ i də nəniy tsitsi i də yəə à də̀ fyiə kə̀ tsəə kə sǔgôʼ dzə̀ŋə̀ kyilə kə anə ikiykiy abu ghu fyi yə̂ nəniy tsam.

¹⁵Ghà ki niʼa yəə ntwùm ìdzòŋə̀ yə̀ ì nyìə̀ nəniy ibvay yiy, ì də̀ yəə à də̀ təgûw ani dzə̀ŋì.

¹⁶Ani kwe fwuli tsə, kəli tsə ibɛmə yiy awò Zə̀kìy i də yəə à də̀ baʼa fə tsaam, ani bàʼ màʼà sàb tə tə mwè tə̀ ŋəmə tə Satàn swìì bə̂ nəniy.

¹⁷Ghà zoʼo doʼo yə̂ anə imùə̀ itsà yə̀ Zə̀kìy nyiə̀ nəniy, i də yəə à də̀ kaŋ k-a-ntyàŋì, ghà kwi taw tsə soʼò dzə̀ ə̀ Kə̀zə̀, ì də̀ yəə à də̀ kwab yə Zwàykə̀zwekiy nyiə.

¹⁸Ghà ki gwuŋə nsòŋə indzə̀m, gwùŋə̀ nə̀ Zə̀kìy fây ghà. Ghà na tsə soʼò ìwe nəli nə̀ Zwàykə̀zwekiy ki dee gha nə̀ dzəd anə nsòŋi ndzə̀m. Ghà ki ŋwa yəə ufyiə wiy awò Zə̀kìy. Ghà ki tiy kə anə ukəd kəə ghǎ nə̀ bwi. Ghà ki gwuŋə yəə anə utuw ghě Kəzə̀ àdzə̀m.

¹⁹Ghà ki gwuŋə tsə soʼo azoŋə̀ mìə̀ tə̀ Zə̀kìy nyiə̀ mìə̀ nə̀ daʼa kiy ani nàʼà yə̀ nù tə ayiə tə Zə̀kìy kə byay na nəniy anə ntwùm ìdzòŋə̀ yìy nə̀ fòŋ ì tâw yìy.

²⁰Mə fə̂ də̀ a ndàw ntsaʼ bòʼ ntwùm ìdzòŋə̀ yə̀, mə də asə ə Kə̀litò. Ghà gwuŋì nə̀ mə ki niʼa fyiə yə ntwùm ìdzòŋə̀ yə̀ nə̀ fòŋ i tâw yìy anə yiə yə mə kwu nəniy ani naʼa fyi yə̀ ate.

²¹Mə liə nə̀ ghà kəli tsə soʼò àyiə yə mə də nəniy ate nə̀ àyiə yə mə faʼà nəniy. Tàykikùs, àzə̀ ə̀ ŋgàŋ ù dzòŋə̀ wìy ù bɛmə soʼò nəniy Zə̀kìy, ù kì tòʼò dzày bə̀ àyiə yə àdzə̀m awò ghà.

²²À yù də sələ kə iyiə kə mə twumə bə̂ nəniy we asə̀ ə̀ ghà, ani zəŋi tsə nə̀ ghà kəli tsə ayiə yə ghè də nəniy ate, nə̀ ani kwe bə̀ sòʼò fòŋ təliy.

²³Mə gwuŋə̀ nə̀ Zə̀kə̀ kə də nəniy təli awò Mwe ə mbyi ə̀ ŋgàŋ Yesu Kə̀litò, ù nyə̀ ghà nə̀ ìbvay yiy, ù zəŋi sòʼò nə̀ ghà kəli tsə iliə azoŋə̀ àghè dzə̀m, ù zəŋi sòʼò nə̀ ibɛmə ghii yiy nɛmə yə̂.

²⁴Mə gwuŋə̀ nə̀ Zə̀kìy dê fòŋə̀ we ìdzòŋə̀ yìy awò àghè dzə̀m ghu liə nəniy Mwe ə̀ mbyi Yesù Kə̀litò nə̀ ìliə yə i də way ani pfə kòʼ.