Read Isu Aghě Filìpî 1 Bible Online

Aghě Filìpî 1 - Isu bible

Aghě Filìpî 1

¹À ŋwàʼà kə̀ twà bə̀ mìə̀ Pôl, mə də fwumi nə̀ Timotì. Ghè də aghee kəfàʼ ə Yesù Kə̀litò. Mə twâ bə̀ awò àghě Kəzə̀ yə̀ àdzə̀m ghu də nəniy a Filìpî ghu təm doʼò fwumi nəniy nə̀ Yesù Kə̀litò. Mə twâ yə̀ sòʼò awò àghù yə̀ ghu də nəniy tuw kìy anə dzəŋə kə aghě Kəzə̀ nə̀ àghù yə ghu də nəniy ŋgəd tiy anə dzəŋə kə aghě Kəzə̀.

²Mə gwuŋə̀ nə̀ Tè ŋgàŋ, Kə̀zə̀ we nə̀ Mwe ə̀ mbyi Yesù Kə̀litò, ghu dê ghà nə̀ fòŋə̀ ìdzòŋə̀ yìy, ghu nyiə̀ soʼò ghà nə̀ ibvay yiy.

³Mə taw nyiə̀ tsə̀ kə̀zòŋə̀ â Zə̀ kam kiy anə utuw ghii abu mə myìŋì tsə nəniy gha.

⁴Abu mə gwuŋə̀ soʼò nəniy â Zə̀kìy nsòŋə indzə̀m anə utuw ghii, mə gwùŋə̀ nə̀ dwiʼi kiy anə fôŋ awò àghè dzə̀m,

⁵aŋwòə ghà mə fày miə anə fàʼ kam kə̀ niʼa kə ntwùm ìdzòŋə̀ yìy, ani kaʼ tsə a ntsuk fə səsə fə ghà kə zuw tsə nəniy ntwùm ìghè yə̀ bù kwùm nyìə̀.

⁶Mə kwu təŋ ŋwô nə̀ Zə̀kə̀ kə kə kaʼ tsə nəniy fàʼ kə̀ dzoŋə̀ kə̀ azoŋə̀ ghà, ù kì tsìy yə̀ kə nə̀ səkiy ani fàʼ mà kə fàʼ kə ghè kə̀ ani zù kwùm anə sòŋə fə Yesù Kə̀litò nì bè dzwəŋə nəniy ate.

⁷Mə kwu təŋ tsə̀ gha anə fôŋ yam. Yəə i də nəniy ghii, mə kwu ŋwô ani moʼo gha anə fôŋ yam aŋwòə ghà mə fàʼ dzəŋi nə̀ mìə̀ anə fàʼ kə̀ Zə̀kìy kə nyiə̀ nəniy awò mìə̀ nə̀ fôŋə̀ we ìdzòŋə̀ yìy. Ghà faʼà nə̀ mìə̀ nyiə yəə mə də nəniy a ndàw ntsaʼ, ghǎ fàʼ sòʼò nə̀ mìə̀ nə̀ mə way a ndàw ntsaʼ anə sòŋə fə mə kə tyi dzîy àyiə yiy ani dè tsə nə̀ ntwum yə mə niʼà nəniy ì də̌ ìsòŋə̀ yìy, zəŋə sòʼò nə̀ aghê kəli tsə ibɛmə ìsoŋə̀ yìy ate.

⁸Zə̀kìy kwu ŋwô nə̀ ayiə yə mə dzîy à də̌ àsoŋə̀ yìy nə̀ mə mbvuŋə̀ ani kòʼ ghà, kwu sòʼo ndzòʼò ìliə yə Yesù Kə̀litò liə nəniy aghê àdzə̀m ate.

⁹Mə gwùŋə̀ nə̀ iliə yə ghà kwu nəniy i ki tsəŋə niyɛmə kwoʼo yəə, gwùŋə̀ sòʼò nə̀ ghà nɛmə yə̂ anə utwab, nə̀ ani zuw kəli ayiə,

¹⁰ani zəŋi tsə nə̀ ghà kəli tsə iyiə yə i dzwâb tsìy fyi nəniy, i də soʼo nəniy ani zəŋi tsə nə̀ ghà mùə̀ tsə muə̀ tə̀ zwe tiy nə̀ tə kwu dzə̀ way ibɛb ìliy yiy ani zù kwùm ntsuk fə Kə̀litò nì bê dzwəŋə nəniy ate.

¹¹Yesù kî zəŋi tsə nə̀ ghà ki muə təŋ kə ani fàʼ ayiə yə a də nəniy tsitsi anə sə k-a-zə̀, ani nìy bə̀ mə̀ŋkwiʼi nə̀ ùkali wiy â Zə̀kìy.

¹²Awizə̂ yamə, mə liə nə̀ ghà kəli tsə nə̀ ayiə yə a fyi nəniy nə̀ mìə̀, a mə zəŋi nə̀ ndə̀mə̀ àghè zuw ntwùm ìdzòŋə̀ yə̀.

¹³Ayiə yə̀ mə zəŋi nə̀ àghû yə̀ ghu kyiŋə̀ nəniy ntòʼ ə Lûm nə̀ àghè liy yə àdzə̀m ghu də nəniy fə, ghu mə kəli nə̀ ghu fê na miə nə̀ mə də wè kə̀fàʼ ə̀ Kə̀litò.

¹⁴Anə yiə yə mə də nəniy a ndàw ntsaʼ, i mə zəŋi nə̀ ndə̀mə̀ àghě Kəzə̀ yìy gaʼ fôŋ tə ghu azoŋə̀ Mwe ə̀ mbyi, tsə̀ŋə̀ niʼà yə̀ sòʼò ntwùm ə̀ Kə̀zə̀ nə̀ ghu kwu way itsəŋ yiy.

¹⁵Aghê liy yiy ndzəmə̀ nìʼà ntwùm ə̀ Kə̀litò nə̀ ghu kwu kəghòʼ anə tə fòŋ, byàlə̀ sòʼò. Aghê liy yiy ndzəmə̀ nìʼà nə̀ ghu kwu môʼ tə̀ dzoŋə̀ tìy.

¹⁶Ndzòʼò àghù yə̀ ghu nìʼà nəniy anə mòʼ tə̀ dzoŋə̀ tìy, ghu ghii zəŋə bòʼ ìliə yə ghu kwu nəniy. Ghu kwu ŋwô nə̀ Zə̀kìy mə nyə̀ miə nə̀ fàʼ kìy nə̀ mə tyi dê yə̂ nə̀ ntwùm ə̀ ìdzòŋə̀ yə̀ də̌ ìsòŋə̀ yìy.

¹⁷A kwuni bû nəniy aghû yə̀ ghu nìʼà nəniy ntwùm ə̀ Kə̀litò anə mòʼ tə̀ bɛbə tiy, ghu ghii zəŋə ani kaw bə̀ ùtswə̀d anə tuw kam yiə mə nam də nəniy a ndàw ntsaʼ.

¹⁸Bəə ghu zəŋi kə mə̀yə, i kwu dzə̀ way fàʼ kìy, Iyiə ìsoŋə yìy də nə̀ aghee namə zuw ŋwòə ntwùm ə̀ ìdzòŋə̀ yə̀ kwùmə̀ yə̀ nə̀ Kə̀litò. Abu ghu naʼà kə ntwùm ə̀ ìghè yə̀ anə mòʼ tə̀ bɛbə tiy moo anə mòʼ tə̀ dzoŋə̀ tìy, mə ki namə dyoʼo kə ŋwô nə̀ ghu mə nàʼa ntwùm ə̀ Kə̀litò.

¹⁹Aŋwòə mə kwu ŋwô nə̀ igwuŋì ghii nə̀ ìfày yə̀ i ŋwô bə̂ â Zwày kə Yesù Kə̀litò kìy. I kî fìy ŋwò nə̀ mə ŋwô fyi fə anə utswə̀d wə̀.

²⁰Mə ndzə̂m kwu ighaa, kwu sòʼò imôʼ nə̀ mə kî kəli dzə̀ wày tuw kə̀dələ kiy ate. Mə kî kwuni zè kə nə̀ sə kiy ani kəli tsə fòŋ ìtaw yìy anə ayiə yam à dziy yiy moo anə ayiə yam àzəŋə yiy anə yiə yə mə də ani zəŋi nə̀ aghê nyiə̀ Kə̀litò nə̀ ŋkwiʼi miy anə nsòŋə indzə̀m, bəə mə də kə utaw moo abu mə pfə kə ŋwò.

²¹Awò mìə̀, imùə̀ yìy ndoʼò ba dè kìə̀? Sələ kə iyiə kə mə muə nəniy à də̀ awò mìə̀ ani fàʼ awò Kə̀litò. I bôʼ dzwàb tsìy fyi ŋwô awò mìə̀ ani pfə aŋwòə i kî zəŋə tsə nə̀ ntwùm ìdzòŋə̀ yə̀ zù nə̀ səkiy.

²²Mə ba də̌ ani sày kə iyiə ìghaa yiy, mə də kwu way yə? Bəə mə muə mə ki də ani fàʼ fàʼ kə̀ dzoŋə̀ kìy.

²³Mə fwəd dòʼò anə ayiə ghè yə̀ àbè. Mə ba ŋge liə tsìy fyi ani pfə ŋwò tsə fə anə mbyi mə zû doʼò fwumi yə̂ nə̀ Kə̀litò. À də̀ iyiə yə i dzwâb tsîy fyi nəniy.

²⁴À də̌ bòʼ ghà, mə koʼò soʼò nə̀ idzwâb tsìy fyi ŋwô awò mìə̀ ani də utaw fə anə mbyi.

²⁵Mə kwu təŋ ŋwô nə̀ mə kî mùə̀ ŋwò, mə kwu ŋwô nə̀ mə kwu ani də utaw ani fày àghè dzə̀m ani zəŋi tsə nə̀ ghà ki niyɛmə yəə kwu sòʼò kədwiʼi anə ibɛmə yə ghà kwu nəniy.

²⁶Ani zəŋi tsə nə̀ abu mə kâm bwìy bù nəniy akə̀lə̀ ghà, ghà ki də ani kəli tsə dwiʼi kə̀soŋə̀ kìy ani mùə̀ nə̀ Yesù Kə̀litò bòʼ àyiə yə̀ ù zəŋə nə̀ ghà abidzəmə̀ mìə̀.

²⁷Abu à tsəb də kə iyiə ìghà yiy i fyiə nəniy nə̀ ghà, ghà kwu kə ani mùə̀ tsə anə ayiə yə ntwùm ə̀ Kə̀litò yə̀ dzìy nəniy, ani zəŋi tsə nə̀ abu mə bû nəniy ani bù kòʼ ghà moo mə mâŋ zuw tsə kə nə̀ ghà təmi dòʼò taw ŋwô anə ibɛmə ghii, mə ki kəli tsə nə̀ ghà faʼà fwumə yə̀ ŋwò nə̀ aghê liy yiy anə fôŋ ìmòʼ nə̀ iliə yiy ìmòʼ ani zəŋi tsə nə̀ ghu mboŋ bɛmə kə soʼò ntwùm ə̀ ìdzòŋə̀ yə.

²⁸Ghà kə tsəŋ dzə̀ aghû yə̀ ghu dzwəə nəniy nə̀ ghà, ghà kwu ani kəli tsə fôŋ tə̀ taw tiy. Ì yû kî dè tsə â ghu nə̀ ŋgə̀d kə̀ ghu ŋwâ nəniy, ghu kî kyilə way ibii fyi yiy, ghà ki kwuni kəli ibii fyi. À də̀ Kəzə̀ kə kî bii fyiə nəniy gha.

²⁹Kəli tsə nə̀ Zə̀kìy kə kə̀ kaʼi zəŋi dzə̂ nə̀ ghà bɛmə awò Kə̀litò, ù mə̀ bɛmə na sòʼò nə̀ fòŋ ìdzòŋə̀ yìy nə̀ ghà fii bòʼ Kə̀litò.

³⁰Ghà maa kòʼ ìfii yə mə kə tsîy nəniy ate, ghà namə zuw bə̂ kə nə̀ mə fyaʼa ŋwò. Ghà kwu ani fii sòʼò anə yiə yə mə kə fii nəniy ate.