Read Isu Aghě Filìpî 2 Bible Online

Aghě Filìpî 2 - Isu bible

Aghě Filìpî 2

¹Yəə i də nəniy ghii, bəə à də nə̀ ghà kyilə ŋwòə fòŋ ì kwê yìy ani muə̀ ghii nə̀ Kə̀litò, bəə à də nə̀ ghà kwu ŋwô ifây yìy anə iliə yə Kə̀litò kwu nəniy azoŋə̀ ghà, bəə à də nə̀ ghà təm dòʼò fwumi ŋwô nə̀ Zwàykə̀zwekiy, bəə à də nə̀ ghà dê ŋwòə fòŋ ìdzòŋə̀ yìy awò àghè dzə̀m kwoʼo sòʼo nə̀ mwuli kiy azoŋə̀ ghu,

²ghǎ kəli tsə imôʼ ìmòʼ. Ghà liə yə̂ sòʼò àghè dzə̀m ighəd. Ghà kəli tsə fòŋ ìmòʼ anə yiə yə ghà zəŋə nəniy ayiə ate, nə̀ anə ayiə yə ghà moʼò nəniy ayiə yiy ate, ani zəŋi tsə nə̀ mə ki nge dyoʼo.

³Ghà kə môʼ təŋ dzə̀ iwe nəli yiy, moo ghà kə kwiʼi iwee yiy anə iyiə ìliy yiy ghà zəŋə nəniy. Ghà kwuni kwu ani bvamə tsə iwe nəli. Taw kòʼò yə̀ àghè liy yiy nə̀ ghu tsîy fyi ŋwô gha.

⁴Ghà kə kaʼi mòʼ dzə̀ ìwe nəli yiy, wù ùmoʼ umòʼ kwu ani moʼo tsə aghê liy yiy.

⁵Ghà kwu ani kəli tsə ndzòʼò ùmwamə wə Yesù Kə̀litò kə kwu nəniy.

⁶Kə̀litò kə bvami də̀ yəə à də̀ Kəzə̀, yəə i kə də kə aghii, u kə̀ kwuni twe dzə̂ ani nyəli màʼà tsə daʼa kə ù kə kwu nəniy ighəd nə̀ Zə̀kìy.

⁷Yəə ù kə də kə yəə à də̀ Kəzə̀, u kwuni tsə̀m tsə ani nyə̀ ŋwò kwoʼ yə̀ daʼa kə ù kə kwu nəniy dòʼò tsə yəə à də̌ wè kə̀fàʼ. Ghu byi bə̀ we anə uwè u wù mbyi, abù ù bù nəniy anə uwè u wù mbyi,

⁸u bvami tsə uwee we ani zuw yə̀ awò Zə̀kìy. U zuw kə awò Zə̀kìy ghii, zù pfə dyaŋi yə̀. Toŋə ipfə yə ù kə pfə nəniy anə kàʼ fə təzəd.

⁹À yù də̀ ighe Zə̀kìy kə nîy na kwoʼ kə nəniy we idoŋ anə lòʼo kə̀ nê kə̀ kə tsîy fyi nəniy, u nyiə̀ tsə sòʼò we nə̀ ìzəd yə i tsîy fyi nəniy azəd ə dzə̀m.

¹⁰Ani zəŋi tsə nə̀ abu ghu zuw nəniy izəd i Yesù yiy, aghê dzə̀m an-a-vələ nə̀ àghè dzə̀m fə a mbvə̀dintsə, nə̀ àghù yə̀ a təŋə kə mbvə̀dintsə, ghu nyaʼa nə̀ àŋwu yiy atəŋə̀ we.

¹¹Aghê dzə̀m kwu ani dzày fyi bə̀ nə̀ àdzwə ghu yiy nə̀ Yesù Kə̀litò də̀ Mwe ə̀ mbyi ani nyiə̀ tsə məŋkwiʼi â Zə̀kìy, Tè ŋgàŋ.

¹²Awizə̂ yam àsoŋə̀ yìy, ghà kə zuw tsə̀ ŋwò itswû yam yiy anə sòŋə fə mə kə də nəniy nə̀ ghà, yəə i də nəniy ghii, i boʼò ba dzwàb tsìy fyi nə̀ ghà zuw itswû yam nyiə yəə mə də wày dzə nə̀ ghà. Ghà ndəmi tsə nsə̀ŋ anə dzəd yə ghà də ani nyìə̀ yə̀ ŋkwiʼi mə̀sòŋə̀ mìy ate â Zə̀kìy â we ani bii fyi mà tsə gha,

¹³aŋwòə à də̀ Kəzə̀ kə fàʼà nəniy anə fwumi kəli ani zəŋi tsə nə̀ ghà ki liə, də̀ sòʼò ani fàʼ àyiə yə ù liə nəniy nə̀ ghà fâʼ.

¹⁴Ghà ki faʼa yə ayiə dzə̀m nə̀ ghà ŋwuŋə dzə̀ŋə̀ dzə̀ wày, nə̀ ghà zwaʼà sòʼò wày,

¹⁵ani zəŋi tsə nə̀ ghà doʼò tsə nə̀ ghà kwu way gə̂ŋ kə udzə kiy, ghà doʼò tsə awa Kəzə̀ yə̀ ghu ndzəmə̀ zwe nəniy nə̀ ghu muə anə fwumi kə aghè àbɛbə yiy fə anə mbyi nə̀ àghù yə̀ ghu zəŋə ayiə àbɛbə yiy. Ghà muə anə uzə u ghù yə̀ ghu ŋwunə nəniy zəŋə sòʼò àyiə àbɛbə yiy. Mwàmə məli miy kwu ani mwaa anə fwumi kə ghu yəə à də̀ mənsǐbə̂d ìn tuu nəniy idoŋ,

¹⁶abu ghà niʼà yə̂ nəniy ntwum yə ì nyìə̀ nəniy imuə itsà yìy. Abu ghà zəŋi nəniy ghii, i nî nyìə̀ mìə̀ nə̀ dwiʼi kiy anə tsuk fə Kə̀litò nì bè dzwəŋə nəniy ate, aŋwòə i ki dee nə̀ mə kə kə̀ wiy dzə̂ ùwe wiy kə̀ŋwôŋwò anə fàʼ kam.

¹⁷Mə də ani bòʼò pfə, kâŋ tam tiy fyi bə̂ yəə à də̀ kâŋ tə tə nyàm ghà sâ nyiə̀ yə̂ awò Zə̀kìy anə ibɛmə yə ghà kwu nəniy. A ki bu i fyi nəniy ghii, mə ki dyoʼo dzəŋə nə̀ àghè dzə̀m.

¹⁸Ighəd ghà ki kwu ani dwiʼi dzəŋi sòʼò nə̀ mìə̀.

¹⁹Bəə fòŋə̀ Mwe ə̀ mbyi Yesù dzwàb nəniy, mə kî kwùlə̀ twumə bə̀ ŋwò Timotì akə̀lə̀ ghà, ani zəŋi tsə nə̀ ù nì bè dzìy nəniy miə nə̀ àyiə àdzoŋə̀ yìy kwùmə̀ yə̀ nə̀ ghà tə uwee nam wiy ki ŋəmə ate soʼo.

²⁰Mə kwu dzə̀ way wè lìy ù ndzə̀m də ani yèmì azoŋə̀ ghà yəə à də̌ we.

²¹Aghê liy yə àdzə̀m bvami nia tsə kə ìsə anə ayiə ghu, ghu kwuni nia wày isə yiy anə ayiə yə a kwumə̀ yə̂ nəniy nə̀ Yesù Kə̀litò.

²²Ghà kwu ŋwô ndzòʼò wù wə̀ Timotì də nəniy we. Ù mə fàʼ nə̀ mìə̀ yəə à də̌ wa ani nàʼà ntwùm ìdzòŋə̀ yə̀.

²³Yəə i də nəniy ghii, abu mə kî kəli kə nəniy iyiə yə i kî kwùlə̀ fyiə nəniy nə̀ mìə̀, mə moʼò nə̀ mə kî twumə bə̀ ŋwǒ we akə̀lə̀ ghà.

²⁴Mə kwu ŋwô nə̀ Mwe ə̀ mbyi kî zəŋə tsə ŋwò nə̀ mə kwulì bû akə̀lə̀ ghà, nə̀ ùwee nam wiy.

²⁵Mə moʼò nə̀ i dzwabə̀ ŋwò awò mìə̀ ani twum dzwoŋi bə̀ Èpàfoditùs wə̀ ghà kə twum bə̂ nə̀ ù bù fày mìə̀. Ù bɛmə nəniy Zə̀kìy, fàʼ dzəŋi soʼò nə̀ mìə̀. Ù də̀ sòʼo wè kə̀fàʼ ə̀ Mwe ə̀ mbyi ù tsìy soʼo nəniy anə məntswə̀d nə̀ mìə̀.

²⁶Fòŋ swəə we ani kòʼ mà bə̀ ghà. Fòŋ fyimə sòʼò we aŋwòə ghà kə zuw nə̀ ù dzàŋə̀ ŋwò.

²⁷Ù kə ndzə̀mə̀ dzàŋə̀ ŋwò, u dòʼò mà bə̀ anə ayiə pfə yiy. Zə̀kìy kwuni kwoʼ nə̀ mwuli kiy azoŋə̀ we. Zə̀kìy kə kə̀ kaʼi kwoʼ dzə̂ nə̀ mwuli kiy azoŋə̀ we, ù kə kwoʼ sòʼò nə̀ mwuli kiy azoŋə̀ mìə̀, u zəŋi tsə nə̀ mə kə ŋge mwe dzə̀.

²⁸Mə ŋge liə ŋwô ani twum bə̀ Èpàfoditùs nyiə awò ghà ani zəŋi tsə nə̀ ghà ki dwiʼi abu ghà kâm kòʼ fwuli tsə nəniy we. Fòŋ yam ki də kàmə̀ fyimi sòʼò wày miə.

²⁹Ghà gwam na dzwâb tsə we anə ayiə yə ù də nəniy wè Mwe ə̀ mbyi. Ghà ki nyiə tsə soʼo ŋkwiʼi miy awò ndzòʼò àghù yə̀ ghu də nəniy yəə à də̌ we,

³⁰aŋwòə ù kə fii, bən pfə kè bòʼ fàʼ kə Kə̀litò, nə̀ ù ghii fyaʼa kə ani fày mìə̀ ani nyiə̀ mìə̀ nə̀ ndzòʼò ìfày yə̀ ghà kə də wày ani nyìə̀.