Read Isu Aghě Filìpî 3 Bible Online

Aghě Filìpî 3 - Isu bible

Aghě Filìpî 3

¹Awizə̂, ani dzày kəd tsə, ghà ki dyoʼo anə yiə yə ghà təm doʼò fwumi nəniy nə̀ Mwe ə̀ mbyi Yesù Kə̀litò. Mə nia dzə̀ wày ìsə yiy ani nam twà kwùnì bə̀ kə àyiə yə mə kə boʼò twà dzày bə̂ dzə̂ â ghà. I kî bòʼò fìy tsìy fyiə ŋwò ghà abu mə bôʼ twà kwùnì bə̂.

²Ghà nîy tsə iyɛmì nə̀ àghù yə̀ ghu zəŋə yəə à də̀ bvu tə̀ bɛbə tiy. Ghu də aghê bɛbə yiy, ghu dzîy nə̀ àghê kwu ani khìy ŋwò fyi ubə̂d anə gùw tə iwè tə ghu.

³À ba də̀ ghəd ghu gwumì na nəniy, aŋwòə ghè fwùlə̀ Kə̀zə̀ anə Zwàykə̀zwekiy, dyoʼo sòʼò anə yiə yə ghè təm doʼò fwumi nəniy nə̀ Yesù Kə̀litò. Ghě kə̀ na dzə̂ fôŋ tələ tiy anə ayiə yə aghê zəŋə nəniy anə gùw tə iwè.

⁴Mə kə dzǐy gaʼa nia ŋwòə fòŋ yam anə ayiə yə aghê zəŋə anə gùw tə iwè. Bəə wè lìy mòʼò nəniy nə̀ ghe də ani gaʼ na fòŋ anə ayiə yə aghê zəŋə nəniy anə gùw tə iwè tə ghu, mə mə də ani moʼo ghii bòʼ tsìy fyi.

⁵Ghu kə gwùmì mìə̀ nə̀ mə kpe tsə kə ìvən imòʼ. Mə də wè Islàel anə tuu kə Bendzamèn. Mə ba də̌ wè Hiblù. Akwuni bû nəniy ani na ulâŋ u ghě Dzû, mə kə də̌ wè Falàsî.

⁶Mə kə ŋge liə ŋwô ani zəŋə nə̀ àghě Kəzə̀ yìy fii aŋwòə mə kə mòʼò kə nə̀ ghu kə liə ani twe màʼà àyiə yə lâŋ kìy dzîy nəniy. Wù lìy kə wày dzə ani dzày nə̀ mə zəŋə way ayiə yə a də nəniy tsitsi kwùmə̀ yə̀ nə̀ ayiə yə lâŋ kìy dzîy.

⁷Ufyiə wə ù dzə̀m mə kə kwuni kwu nə̀ u də kə namə awò mìə̀, ufyiə u ghè wə̀ nyə̀ də̀ ufyiə ukə̀kpə̂mkpə̀m â mìə̀ aŋwòə mə liə ani kəli Yesù Kə̀litò.

⁸À kaʼi wày dzə ayiə yə àdzə̀m mə koʼò nə̀ à də̀ ayiə yə a də kwu way fàʼ kìy. Mə nîy àyiə dzə̀m nə̀ a kwu dzə̀ way fàʼ kìy, aŋwòə i dzwâb tsìy fyi ŋwô â mìə̀ ani kəli Yesù Kə̀litò Mwe ə̀ mbyi. Mə mə nyəli màʼà ùfyiə wiy ùdzə̀m, dzày tsə nə̀ u də kə̀ŋwôŋwò ani zəŋi tsə nə̀ mə nì də ani dòʼò wè Kə̀litò,

⁹mə təm doʼò fwumi yə̂ nə̀ we anə fyiə kəmòʼ, mə way dzə tsitsi anə sə k-a-zə̀ bòʼ àyiə yə mə nia nəniy lâŋ kìy. Mə kwuni dòʼò tsitsi abidzəmə̀ ìbɛmə yə mə kwu nəniy azoŋə̀ Kə̀litò. À də̀ Kəzə̀ kə zəŋə nəniy nə̀ wù dòʼò tsitsi anə sə kə we.

¹⁰Iyiə yə mə liə, à də̀ ani kəli tsə Kə̀litò nə̀ daʼa kə ù kə kwu nəniy yəə u kə zɛmə̀ ŋwò dzwoŋi bə̂ anə ipfə. Mə liə sòʼo ani fii anə yiə yə Kə̀litò kə fii nəniy ate, mə pfə soʼò anə yiə yə ù kə pfə nəniy ate,

¹¹nə̀ ìmòʼ yə̀ nə̀ Zə̀kìy kî zɛ̀mə̀ dzwəŋə bə̀ sòʼò ŋwò mìə̀ anə ipfə, mə doʼò bə̂ utaw.

¹²Mə dzîy dzə̀ wày nə̀ mə kwu ufyiə wə ùdzə̀m, Mə kamə kə̀ doʼò dzə̂ anə ayiə yə Zə̀kìy liə nəniy nə̀ mə doʼò ate. Kə̀litò mə zəŋi nə̀ mə doʼò wè we. À yù də̀ ighe mə kwuni namə dəmə̀ nəniy yəə à də̌ wù wə̀ u nyəŋə nəniy ani zù kəli kənamə. Mə dəmə̀ ani kòʼ tsə nə̀ mə bû doʼò yəə à də̌ Kə̀litò aŋwòə à də̌ we ù kə sây nəniy miə nə̀ mə bû doʼò yəə à də̌ we.

¹³Awizə̂, mə moʼò dzə̀ wày nə̀ mə mə təm nyi. Iyiə yiy kwuni də̀ ŋwoə̀ imòʼ mə zəŋə nəniy. Iyiə i ghè yə̀ də̌ nə̀ mə kwu ani nìyzə̀ yə̀ àyiə ibàm yə̀, mə də̂m yə̂ kə ani zù kəli kə fyiə kə kə lyimə nəniy miə isə.

¹⁴Mə nyəŋə yə̀ kə tsitsi ani zù kwùm yə̀ anə lòʼo kə mə də ani təm nyi namə kə ate. Namə kə ghè kə̀ də̀ itoŋə yə Zə̀kìy toŋə nəniy miə abidzəmə̀ Yesù Kə̀litò nə̀ mə bû mùə̀ an-a-vələ.

¹⁵Ŋgaŋ yə àdzə̀m ŋgà nɛmə yə̂ dzə̂ anə ayiə Kəzə̀, ŋgà kwu ani kəli tsə imôʼ yə̀ anə fòŋ tə ŋgàŋ. Abu à kwuni də nə̀ gha àliy yiy kwu imôʼ ì ŋwô yìy anə fòŋ təli, Zə̀kìy ki zəŋi tsə nə̀ ghà zuw kəli tsə ayiə yə soʼo.

¹⁶Abu i də kə mə̀yə, ŋgà kwuni kwu kə ani zù kə nə̀ sə kiy ani zəŋə yəə ayiə yə ŋgà kə zəŋə tsə̂ nəniy bù kwùm bə̀ nyiə̀.

¹⁷Awizə̂ yamə, ghà ki dzwumə bəə miə anə ayiə yə mə dê nəniy awò ghà. Ghà ki dzwumə yə soʼo aghû yə̀ ghu bwîy nəniy anə dzəd yə ghè dê na nəniy awò ghà.

¹⁸Mə mə dzày ayiə yə awò ghà anə ndə̀mə̀ nsòŋə, mə nyiə̀ namə dzìy kwùnə̀ bə̀ ŋwò nə̀ nsə miy an-a-tuw. Ndə̀mə̀ àghù də ŋwô, muə̀ tə ghu tiy zəŋə nə̀ ghu doʼò àghù yə̀ ghu dzwəə nə̀ ipfə i Kə̀litò yìy anə kàʼ fə təzəd.

¹⁹Ndzòʼò àghě ghè yə̀, ghu kî nìì anə uvə̀lə̀ aŋwòə zə̀ kə ghu ki də anə nìə̀ mə̀ ghu. Ghu kwoʼo sòʼò ìwee anə ayiə yə utuw wiy mə̀ kwu nəniy ani dələ ghu ate, Fôŋ tə ghu tiy də təŋ kə sòʼò anə ufyiə u mbyi.

²⁰Akwuni bû ŋgàŋ, ŋgà də aghê kəvələ, ŋgà lyimə kə wù wə̀ ù bii fyi nəniy ŋgaŋ nə̀ fòŋ tə̀ swəə tiy toŋə Yesù Kə̀litò Mwe ə̀ mbyi ə ŋgàŋ. Ù kì ŋwò bə̂ nəniy an-a-vələ.

²¹Kə̀litò nì kwunə kə ìwee i ŋgàŋ yə̀ i də mùə̀ tsà wày, ù nî zəŋi tsə i doʼò bə̂ yəə à də̀ uwee u we u mwaa wə̀ ù kwu nəniy. Ù nì zəŋə àyiə yə anə daʼa kə ù kwu nəniy kə zəŋə nə̀ ufyiə udzə̀m u doʼò a təŋə̀ we.