Read Isu Aghě Filìpî 4 Bible Online

Aghě Filìpî 4 - Isu bible

Aghě Filìpî 4

¹Ani dzày kəd tsə, awizə̂ yamə, mə ŋge liə ŋwô gha, mbvùŋə̀ sòʼò ani kòʼ ghà. Ghà zəŋə miə nə̀ mə ki dyoʼo. Zəŋə sòʼò nə̀ mə ki gha uwe wiy. Mə bwoʼə kə̀wo nə̀ ghà kəli tsə kə ìbɛmə awò Mwe ə̀ mbyi.

²Mə bwoʼ kəwo awò Èyòdiyàs nə̀ awò Sìntikè nə̀ ghu doʼò tsə anə fyiə kəmòʼ aŋwòə ghu mə bɛmə awò Mwe ə̀ mbyi.

³Mə dzîy bə̀ â Sìzugùs, wô wə̀ wò kə fâʼ dzəŋi nəniy nə̀ mìə̀ anə yiə àdzoŋə̀, nə̀ wò fây kə iyəŋi yə àbè aŋwòə ghu maa fàʼ nə̀ daʼa kiy nə̀ mìə̀ ani nàʼà ntwùm ìdzòŋə̀ yə̀ awò àghè liy yiy. Ghu kə fàʼ dzəŋi nə̀ Klemèn nə̀ àghè liy yə soʼo ghu kə fâʼ dzəŋi nəniy nə̀ mìə̀. Zə̀kìy mə twà na azəd ə ghù yə̀ ghu kə fây nəniy miə anə ŋwàʼà kə̀ kə kwu nəniy azəd ə ghù yə̀ ghu kwu nəniy imuə itsà yìy abidzəmə̀ Yesù Kə̀litò.

⁴Ghà ki səaŋə nsòŋə indzə̀m anə yiə yə ghà təm doʼò fwumi nəniy nə̀ Mwe ə̀ mbyi. Mə kâm dzây fəli tsə nə̀ ghà ki səaŋə!

⁵Ghà ki zoŋə zəŋə yəə ayiə yiy nə̀ aghè dzə̀m. Ghà kəli tsə nə̀ fəkəmə̀ Mwe ə̀ mbyi bû.

⁶Ghà kə fyimi dzə̀ ìwe nəli yiy anə iyiə ìliy yiy. Bəə à kwuni də kə ndzòʼò ìyiə ighaa yiy, ghà kwu ani gwùŋì dzày yə̀ â Zə̀kìy, ŋwa yə̀ fyiə kə ghà liə nəniy, nyìə̀ yə̀ soʼò we nə̀ zoŋə̀ kìy anə ayiə yə àdzə̀m ù zəŋə nəniy.

⁷Bəə ghà zəŋi nəniy ghii, Zə̀kìy ki nyiə̀ ghà nə̀ ìbvay yə i tsîy fyi nəniy ayiə yə àdzə̀m ŋgà də ani kòʼ kəli. Ibvay i ghè yə̀ ki bwa tyilə bəə môʼ təli tiy nə̀ fôŋ təli tiy anə ayiə yə ghà təəm doʼò fwumi nəniy nə̀ Kə̀litò.

⁸Ani dzày kəd tsə awizə̂ yamə, ghà ki tsəŋ kwu kə ani mòʼ àyiə yə a də àsoŋə̀ yìy nə̀ à yuu a kwu nəniy ŋkwiʼi miy. À yuu a də nəniy tsitsi, nə̀ à yuu a də nəniy nə̀ a kwu way udzə wiy, nə̀ à yuu a dzwabə̀, nə̀ à yuu aghê liə nəniy. Bəə iyiə ìdzoŋə̀ ìliy yiy də aghê kyalə nəniy, ghà ki moʼo yəə ndzòʼò àyiə ghè yə̀.

⁹Ghà kwu ŋwô àyiə yə mə tyi dê nəniy awò ghà, Ghà mə zuw ayiə yə mə dzây nəniy, kòʼ sòʼò àyiə yə mə zəŋi. Ghà dzwumì yə̂ àyiə ghè yə̀. Zə̀kə̀ kə nyiə̀ nəniy ibvay yiy, kə kî də̀ ŋwô nə̀ ghà.

¹⁰Mə ŋge nyìə̀ ukali â Mwe ə̀ mbyi anə yiə yə ghà kâm mòʼ tsə nəniy miə nə̀ ghab kiy mə fyi, twum bə̀ mìə̀ nə̀ ìfày yìy. Mə dzîy dzə̀ wày nə̀ ghà kə bwi dòʼò yə̀ ŋwò ani fày mìə̀. À kwuni də̀ kə nə̀ ghà kə kwu way bwôʼ kìy ani fày mìə̀.

¹¹Mə dzîy dzə̀ wày àyiə yə nə̀ mə liə ani kəli fyiə kə̀li kiy. Hǎyi à wày dzə̀ ghii, mə zwiʼi kəli na nə̀ mə kwu ani dyoʼo nə̀ fyiə kə mə kwu abu à fyiə kə kyìə̀ nə̀ mìə̀.

¹²Mə kwu ŋwô ani mùə̀ abu mə də banə kwu way ufyiə wiy moo abu mə kwu nəniy ufyiə wiy anə ndə̀m. Mə mə zwiʼi kəli ani mùə̀ abu mə nyiə kwee kə ŋwô moo bəə mə də nyiə kwe way. Mə də sòʼò ŋwô ani mùə̀ abu mə kwu kə nyòŋə fə ufyiə fiy moo abu mə kwu kə ufyiə wiy anə ndə̀m.

¹³Kə̀litò mə nyə̀ miə nə̀ daʼa kiy ani mùə̀ anə dzə̀lə tə tə̀dzə̀m.

¹⁴Ghà mə kwuni zəŋi dzwàb ani fày mìə̀ anə utswə̀d wə̀ mə də nəniy nyiə ate.

¹⁵Gha aghee Filìpî, ghà ndzə̂m kwu ŋwô nə̀ dzəŋə kə aghě Kəzə̀ kə̀liy kiy kə kə̀ fây dzə miə, à kə mày kə gha ghà kə fày nəniy miə anə sòŋə fə səsə fə mə kə bû nàʼà nəniy ntwùm ə̀ ìdzoŋə̀ yìy awò ghà nə̀ mə ŋwò bə̀ a Mèsèdonìyà. À kə mày kə gha, ghà kə nyiə̀ nəniy miə̀ nə̀ ùkhiy wiy, kəli sòʼò kə̀lwì ate.

¹⁶Ghà maa bòʼò twum bə̀ sòʼò miə nə̀ ìfày yìy nsòŋə ibè yəə mə kə də nəniy a Tèsàlonikà anə nsòŋə fə mə kə də kwu way fyiə kiy.

¹⁷Mə dzîy dzə̀ wày nə̀ mə liə nə̀ gha ki tsəŋə nyiə kə miə nə̀ ùfyiə wiy. Mə kwuni liə nə̀ ghà kəli tsə lwì kə̀ kə bê nəniy â Zə̀kìy abidzəmə̀ ayiə à nyiə ufyiə wiy awò àghù yìy.

¹⁸Ayiə yə mə twâ bə̂ fə anə lòʼo kə, à də̀ kəzòŋə̀ mə nyiə̀ bə̂ awò ghà anə ufyiə wə ù dzə̀m ghà nyiə̀ bə̂ nəniy awò mìə̀. Mə kwu ŋwoə̀ ùfyiə wiy anə ndə̀m nyiə bòʼ tsìy fyi, yəə Èpàfoditùs bù nyə̀ bə̂ dzə̂ nəniy miə nə̀ ùfyiə wə ghà twum bə̂ nəniy. U də yəə à də̀ ufyiə ùlyimə ùdzoŋə̀ wə̀ ghu nyiə̀ yə̂ nəniy awò Zə̀kìy, ù liə nəniy, dyoʼo sòʼò ate.

¹⁹Mə gwùŋə̀ nə̀ Zə̀kə̀ kə nîy nəniy iyemì yìy azoŋə̀ mìə̀, nə̀ ù nyiə̀ ghà nə̀ ùfyiə wə ùdzə̀m ghà laʼà anə ikwum i we ìsoŋə̀ yə̀ ù nyiə̀ nəniy awò ŋgàŋ abidzɛ̀mə̀ Yesù Kə̀litò.

²⁰Mə gwùŋə nə̀ ghà ki nyiə yəə ukali wiy awò Zə̀kìy, Tè ŋgàŋ anə nsòŋə indzə̀m. I də kə ghii.

²¹Mə twoŋə zuw bə̀ àghè Kəzə̀ àdzə̀m, aghû yə̀ à dzə̀m ghu bɛmə nəniy awò Yesù Kə̀litò. Aghee Kəzə̀ yə̀ ghu də nəniy fə nə̀ mìə̀, ghu twoŋə zuw bə̀ sòʼò ghà.

²²Aghee Kəzə̀ yə̀ fə àdzə̀m, ghu twòŋə zuw bə̀ ghà. À tsəb ba də̌ aghû yə̀ ghu faʼà nəniy anə ntòʼò Kaʼisà.

²³Mə gwùŋə̀ nə̀ Mwe ə̀ mbyi ə ŋgàŋ, Yesù Kə̀litò dè fòŋə̀ ìdzòŋə̀ yìy awò àghè dzə̀m.