Read Isu Aghě Kolòsî 1 Bible Online

Aghě Kolòsî 1 - Isu bible

Aghě Kolòsî 1

¹À ŋwàʼà kə̀ twà bə̀ mìə̀ Pôl, Zə̀kìy kə sày kə miə nə̀ mə doʼò wè ntwùm ə̀ Yesù Kə̀litò. Mə də dzəŋi nə̀ àzə̀ ŋgàŋ Timotì.

²Mə twâ bə̀ awò ghà àghě Kəzə̀ yə̀ ghà muə nəniy anə inaʼi Kolòsî. Ghu də awizə̂ ghələ yə ghu kwu nəniy ibɛmə yiy, də̀ sòʼo anə fyiə kəmòʼ nə̀ Kə̀litò. Ghè gwùŋə̀ nə̀ tè ŋgàŋ, Kə̀zə̀, dè ghà nə̀ fòŋ ə̀ we ìdzòŋə̀ yìy, ù nyə̀ sòʼò ghà nə̀ ìbvay yiy.

³Ghè taw nyiə̀ tsə̀ kə̀zòŋə̀ awò Zə̀kìy tè Mwe ə̀ Mbyi ə̀ ŋgàŋ, Yesù Kə̀litò anə nsòŋə indzə̀m abu ghè gwuŋə̀ nəniy anə utuw ghii.

⁴Aŋwòə ghè mə zuw ndzòʼò ìbɛmə yə ghà kwu nəniy azoŋə̀ Yesù Kə̀litò, zuw sòʼò ìliə yə ghà kwu nəniy azoŋə̀ àghě Kəzə̀ àdzə̀m.

⁵Yəə ghà kə zuw tsə nəniy ntwùm ə̀ Kə̀zə̀, toŋə ntwùm ə̀ ìdzòŋə̀ yìy anə sòŋə fə səsə fiy, ghà maa zuw fyiə kə ghà kwu ani gaʼ na yə̀ fòŋ təli ate kə də nəniy an-a-vələ. Yəə i də nəniy ghii, ibɛmə yə ghà kwu nə̀ ìliə yə ghà kwu nəniy, i tsoŋ dòʼò anə fyiə kə ghà gaʼ na fôŋ təli tiy ate kə də nəniy an-a-vələ Zə̀kìy byay na awò ghà.

⁶Ntùm ìdzòŋə̀ yə̀ namə zè kə nə̀ sə kiy anə bə̀lə̀ tə mbyi tə dzə̀m, fìì yə̀ ndə̀mə̀ tə ghù anə yiə yə ì kə faʼà anə uzə ghii, ani kaʼ ŋwò bə̀ anə ntsuk fə səsə fə ghà kə zuw kəli dzwâb tsə ayiə àsòŋə̀ yə̀ kwùmə̀ yə̀ nə̀ fòŋə̀ Kə̀zə̀ ì dzòŋə̀ yìy.

⁷Ghà kə zuw ntùm ìdzòŋə̀ yə̀ kwùmə̀ yə̀ nə̀ fòŋ ə̀ Kə̀zə̀ ìdzòŋə̀ yìy awò Èpafàs àzə̀ ə̀ ŋgàŋ ùdzòŋə̀ wìy. Ù fàʼà dzəŋə nə̀ ghə̀d. Ù fàʼà nə̀ fòŋə̀ we idzə̀m awò Yesù. Fàʼ kə we kiy də ifây awò ghə̀d.

⁸Ù mə dzày â ghə̀d yəə Zwàykə̀zwekiy zəŋə nə̀ ghà ki liə soʼo aghê liy yiy.

⁹Yəə i də nəniy ghii, ghè tsəŋə̀ gwùŋə̀ kə anə utuw ghii ani nìy ŋwò bə̀ ntsuk fə ghè kə zuw nəniy ndzòʼò ìbɛmə yə ghà kwu nəniy. Ghè gwuŋə̀ nə̀ Zə̀kìy ki dê bə̂ ghà nə̀ yiə yə ù liə nəniy nə̀ ghà zəŋi, ghà kəli tsə soʼò ùtwab nə̀ izuw kəli yə Zwàykə̀zwekiy nyiə̀ nəniy awò àghù yìy.

¹⁰Ghà ki dyaŋi də ani mùə̀ anə yiə yə Zə̀kìy liə nəniy, fàʼà àyiə yə a dzwabə̀ a kə̀lə̀ Kə̀zə̀, fàʼà yə̀ sòʼò ndə̀mə̀ tə yiə tə̀ dzòŋə̀ tìy. Ghà ki toʼò kəli dzwâb tsə soʼò wù wə̀ Zə̀kìy də nəniy we.

¹¹Ghè gwùŋə̀ nə̀ Zə̀kìy zəŋi tsə gha, anə daʼa kə we kə̀soŋə̀ kìy, nə̀ ghà ki taw, tə̀ ghà ki də ani kwù tə̀ fòŋ ani fii, ghà ki də soʼo ani dyoʼo, nyìə̀ yə̀ kəzòŋə̀ â Tè mbyi, ù zəŋi nəniy nə̀ ghà kəli itwoʼi ufyiə wə Zə̀kìy na nəniy awò àghè ə we yiy.

¹³Zə̀kìy mə bii ŋwò fyi ŋgaŋ anə daʼa kə ayiə àbɛbə kə kwu nəniy azoŋə̀ ŋgàŋ, nìy na bə̀ ŋgàŋ anə fyiə kəmòʼ nə̀ Wà we wə̀ ù ŋge liə nəniy, nə̀ ù saʼ ŋgaŋ.

¹⁴Wà Kə̀zə̀ mə ŋgàŋ zwe dzwoŋi anə kàŋ tə we, yəə ù zəŋi tsə nəniy nə̀ Zə̀kìy nîyzə̂ àyiə ŋgàŋ àbɛbə yiy.

¹⁵Yesù də̀ mà fyiə kə Zə̀kìy də nəniy ghe kiy. Ù də̌ wù wə̀ ù kwu nəniy daʼa kiy anə ufyiə wə ùdzə̀m Zə̀kìy kə zəŋi nəniy.

¹⁶À kə zəŋi we ufyiə wə ùdzə̀m, ufyiə udzə̀m an-a-vələ nə̀ ambvə̀dintsə, ufyiə wə a koʼò nə̀ ùfyiə wə a də kòʼò wày, yəə à də̀ ufyiə wə ù kwu nəniy udaʼa wiy nə̀ ù wə u saʼa nəniy. Zə̀kìy kə zəŋi kəbyiwuŋ nə̀ mbvə̀dintsə kiy abidzɛ̀mə̀ we, nə̀ awò we.

¹⁷Yesù kə də̀ ŋwô â ùfyiə udzə̀m ani bù dòʼò, à də̀ sòʼo we ù zəŋi nəniy nə̀ ufyiə udzə̀m u doʼò a lòʼo tə u də nəniy ate.

¹⁸Ù də̀ kətuw a ndàw Kə̀zə̀ à də nəniy uwe u we wiy. À nyìə̀ we imuə̀ yìy awò ùwee ughà wə̀. À də̀ sòʼo we wù ùsəsə wiy ani zɛ̀mə̀ dzwoŋi bə̀ ani pfə ani zəŋi tsə nə̀ à ki may kə we ù tsìy fyi nəniy ufyiə udzə̀m.

¹⁹À kə tsə̀m tsə Kəzə̀ nə̀ Kə̀litò dòʼò tsə yəə à də̌ we anə yiə dzə̀m.

²⁰Zə̀kìy kə tsə̀m tsə ani bù nə̀ ibvay yiy. U sà kàŋ tə Wà we anə kâʼ fə təzəd ani nìy dzwoŋi bə̀ ùfyiə udzə̀m, ufyiə wə u də nəniy an-a-mbvə̀dintsə, nə̀ ùfyiə wə u də nəniy an-a-vələ, tə̀ u doʼò a dəŋə̀ nə̀ we.

²¹Ghà kə bòʼ dzàw dòʼò ŋwò nə̀ Zə̀kìy səsə. Ghà də sòʼò aghû yə̀ ghu dzwəə nə̀ Zə̀kìy bòʼ àyiə àbɛbə yə ghà kə zəŋə nəniy nə̀ mòʼ tə̀ bɛbə tə ghà kə kwu nəniy.

²²Wà we bù dòʼò bə̀ wù, bù pfə. Zə̀kìy tsə̀m tsə ani nìy dzwoŋi bə̀ ghà nə̀ ghà doʼò àghè ə we tə̀ ghe ki zəŋi tsə gha, ghà ki də nə̀ ghà kwu way gə̂ŋ kə udzə kiy, zwe sòʼò anə sə kə we anə yiə yə wù lìy də wày ani dzày nə̀ ghà mə zəŋi iyiə ibɛbə ìliy yiy.

²³Ghà kwu ani nam təmi taw tsə anə ibɛmə ghəli awò Kə̀litò, kəə fyiə kə̀ liy kiy nə̀ zəŋə nə̀ ghà bwi doʼò. Ghà kwu ani ləmə utɛb wə ghà kə zuw nəniy a sòŋə fə ghu kə naʼà nəniy ntùm ìdzòŋə̀ yə̀ â ghà. Ghu kə nàʼà awò àghè àdzə̀m fə anə mbyi. À də̌ ntwùm ìdzòŋə̀ yə̀ miə, Pôl, mə də nəniy wè kə̀fàʼ ə̀ Kə̀zə̀ ate.

²⁴Mə də nə̀ dwiʼi kiy nyiə anə ifii yə mə fyaʼa bòʼ ghà, aŋwòə abu mə fyaʼa nəniy anə ùwe nam, mə fììy ani mày kə ifii yə Kə̀litò kə nam kwu ani fii anə uwè u we ani zəŋi tsə nə̀ ndàw Kə̀zə̀ təmi taw tsə.

²⁵Zə̀kìy mə zəŋi miə nə̀ mə doʼò wè kə̀fàʼ awò ndàw Kə̀zə̀. Ù twum fyi soʼò miə nə̀ mə naʼà ntwum ə̀ Kə̀zə̀ yə̀ ìdzə̀m â ghà.

²⁶Ntwùm ə̀ Kə̀zə̀ yə̀ də̌ nùw tə yiə tə Zə̀kìy kə kwuu nûw na nəniy awò àghè dzə̀m, ù kwuni dê nəniy nyiə awò àghè ə we yiy.

²⁷Zə̀kìy kə liə nə̀ ghu kəli tsə nùw kə iyiə kə nə̀ kwab kə iyiə kə̀soŋə̀ kə̀ də̀ awò aghè dzə̀m. Nùw kə iyiə kə ghè kə̀ də̌ nə̀ Kə̀litò mùə̀ azoŋə̀ ghà gha yə ghà də wày aghee Dzû. Ì yû dè tsə nə̀ ghà kî mùə̀ nə̀ Zə̀kìy anə lòʼo kə̀ dzoŋə̀ kə̀ ù də nəniy ate.

²⁸À yù də̀ ighe ghè niʼà nəniy ntwum yə awò àghè dzə̀m kwùmə̀ yə̀ nə̀ Kə̀litò anə utwab wə Zə̀kìy nyiə̀ nəniy awò ghə̀d. Ghè tyi dè yə̀ àyiə yə aghê dzə̀mə̀ kwu ani zəŋi, ani nɛmə yə̀ anə ibɛmə i ghu azoŋə̀ Kə̀litò ani zəŋi tsə nə̀ ghu doʼò tsə tsitsi anə sə k-a-zə̀ yəə à də̀ aghee we.

²⁹À yù də̀ ighe mə faʼà nəniy nə̀ daʼa kiy nə̀ mə mə tsoŋ na idə̂ŋ yiy anə daʼa kə Kə̀litò kə̀ kə faʼà nəniy azoŋə̀ mìə̀.